ပါယ် တီ အာဘာလာအမ် ဘော နပ်၊ ဇဝ်ဖြာ အိုင် တဲး အန် မွင့်ကာရာ ဒွါ ဒီ ဂေ ဒူအီ အီဆာရေလ၊ အန် မိူဝ် အာဝ် ဟူ တဝ်း ဒီ ဟြေတ့် အာငျာန် အီ ဘူင် မျလှယ့် ပီ ခါ အာတ့်။ အန် ဘော ဝီ မာငး ယွတ် လူင် ခဲင် ပြဲ ကာဟဝ်း။ 2 အန် ဝီ ယိုဝ် ဂေ ဒူအီ အီဆာရေလ ဟဲ့ ချ ဒူင် ကွယ် ဂေ ဘဲန် မ့ပြဲင် ဘဲန် မ့ပြဲင်၊ ဒူပ် ခြိုဝ် မှဝ် ခြိုဝ် အန်။ ဒေါ အန် တီ နဝ်း ဖွိုမ် ဇဝ်ဖြာ ဘော တး ပ့လိုက် အန်။ 3 အန် ဘော ကာလာင် ဂြုဝ်း အာငျာန် တဝ်း၊

“ဂြုဝ်း ပီ ကာလာင် အာဘာလာအမ် အီ မုး ဂွန် အာပေါဆော တွိုန်၊ န့ မုး ဂြုဝ်း ဒူအီ အီ ဟဲ့ ပွိုန် ယိုဝ် ဆီချာ။

4 န့ မုး ဒူအီ အီ ဟဲ့ ယိုဝ် ဂြုဝ်း ဇဝ်ဖြာ၊ အီ ဟဲ့ မုတ် ဂိုပ်၊ ငါယ် အန် ယီ ဘ့လာင်။ အန် မိူဝ် ယိုဝ် ဆီချာ ပီ ဘျ ဇဝ်ဖြာ အီ အိုပ် တူတ့် ဒွန် မျုဝ်။

5 ထိုပ် ဘေ ဒူအီ အာမျုဝ် အာကူပ် ဟဲ့ ဒီ စှိတ် ကာဆဝ်။ ဒူင် ဟဲ့ ချ ဘေ ဒူအီ အီဆာရေလ ဟဲ့ မွှိုမ် ယွတ် ကာဆဝ်။

6 ဂေ ကွယ် ပီ ဒီလယ့် အီ ဟဲ့ မ့ဘ့လး ဒါခိုယ်။ ဂေ ဘော ပီ ဘော ကာပိုမ် ပဲ့ ဟဲ့ ဆမ် ဘဲန် မျုဝ် ဘဲန် မျုဝ် အီ ကွယ် ခူပ် ဘ့လဲင် အိုမ်။ ဂေ ပီ ဒဝ် အာလုဝ် ပဲ့ ဟဲ့ ဆမ် ဇဝ်ဖြာ။ ဟဲ့ ပီ ဘော ဟေ အာရိတ် အီ လတ့် ခူပ် ဘ့လဲင် ခူပ် နှူင်။

7 ဂေ ဒီ ဘော မိုဝ်း အိုမ် အီ ပွိုန် ဟုး ပွိုန် လှုဝ် ခဲင် ပုင် ဂေ။ ပီ ဆမ် ဂေ ဒွန် မျုဝ် ဒီ မိုဝ်း အိုမ် ကိူန်၊ အိုမ် လိုင်။ ခုန်ဒီခမ် ဂေ ဒီ ဘော မိုဝ်း ပွုန် လွှိုမ် ခုန်ဒီခမ် အာကာတ်။ အီ ဟဝ် ဒီ ဘော အိူပ် မျုက် မာန် မိူင် ဂေ။

8 ဇဝ်ဖြာ အီ ယဲတ့် လေး ဂေ ခဲင် မိူင် အဲဂိုပ် တွိုန်၊ အန် ဒီ စွယ် ဂေ ကာဂုဝ်း၊ တဲး ဂေ မိုဝ်း ဟဲန့် ကိူန် ပီ ဟဲန့် မက် ပြဲ။ ဂေ ဒီ ဘော ကာဘက် ကာအာင် ရန်ဆူ ဂေ ဘော ပျာတ့် အ ဂေ။

9 ဂေ ဒီ ပီ မာခြင်ဆီ အီ မိုဝ်း ပ့လူမ် တာင်။ ဒေါ ပီကေး အိတ် အန်၊ အာဝ် မိုဝ်း အာဆေ အီ ဝီ ယ ဘျိတ့် အန်။ အာဆေ မွင့်ကာရာ ဒွါ ဒီ ဘေ ဒူအီ အီဆာရေလ၊ တဲး အန် ဘျုဝ် ဒါခိုယ်။ အာဆေ ယီ ဒိူင် ယီ အေး ဘေ ဒူအီ အီဆာရေလ၊ တဲး အန် ဝီ ခမ် ဂြုဝ်း ဒိူင် ဂြုဝ်း အေး အန် တီ။”

10 အန် ဟဲ့ ဟွတ့် ကာလာင် ဂြုဝ်း တီ၊ ခုန်ဒီခမ် အာဘာလာက် ဘော ရူ ကာဆဝ် ဒီ အာဘာလာအမ်။ အန် ဘော ကာထ ဒဲ အန် ဘော ကာလာင် ဒီ အာဘာလာအမ် တဝ်း၊ “အုဝ် ဟဲ့ ဒဲ့ တး မဲ၊ တဝ်း တဲး မဲ ဒိူင် ရန်ဆူ အုဝ်။ မဲ ဘော ဝီ မွင့်ကာရာ ဒွါ ဒီ ဂေ ကော နုဝ့် အူယ် ဇေန့်။ 11 တဲး မဲ ဝီ ဝေန့် ဒီ ကာင် မဲ ဒေါ တီ နီ။ အုဝ် ဟဲ့ ကာဆဲန့် ဒီ ဒွါ ရုး အန် ကိူန် ဒီ မဲ။ မာလဲ၊ ဇဝ်ဖြာ ဟဲ့ ဝီ ဒိုဝ်း ဝဲန်၊ တူ တဲး မဲ ပွိုန်။”

12 အာဘာလာအမ် ဝီ တဝ်း ဒီ အန်၊ “အုဝ် ဟဲ့ ဟွတ့် ကာလာင် ဒီ ဂေ ဒါလာမ် ပီ စ်ု မဲ၊ တဲး ဂေ ဟာဝ် ဒဲ့ အုဝ်။ အုဝ် ဟဲ့ ဟွတ့် တဝ်း ဒီ မဲ။ 13 ‘ဆေ ခုန်ဒီခမ် ပီ ဘော ဒွါ ဒီ အုဝ် ရွိုန် ဂေ ခြိဝ် ကော နုဝ့် ခဲင် ဟုဝ် အန် မိူဝ်၊ အုဝ် တူ ပွိုန် လှိုဝ် ဂြုဝ်း ဇဝ်ဖြာ။’ အုဝ် တူ ပွိုန် ဘူင် ခေါ အူ မျုဝ် ဒူပ် နဝ်း အုဝ်။ န့ ပီ ဘော မုး နာ မွှိုမ် တူ မွှိုမ်၊ အုဝ် လုဝ် ကာလာင် မီ ပီ စ်ု ဇဝ်ဖြာ အုဝ် ကာလာင်။ 14 ဒေါ တီ နီ အုဝ် ဒီ ဝီ ဝေန့် ဒူင် ကွယ် ဒူအီ အာမျုဝ် အုဝ်။ အာတ့် ဟာဝ် အုဝ်၊ တဲး အုဝ် ဝီ ကာလာင် ဒီ မဲ လွင် ဂေ ဒူအီ အီဆာရေလ၊ ဂေ ဒီ ဘူင် မာဆေ ဒီ ဂေ ဒူအီ အာမျုဝ် မဲ နာ အာတ့် နီ ဟာဝ်။”

15 အာဘာလာအမ် ဘော ဝီ ကာလာင် ဂြုဝ်း ဇဝ်ဖြာ။ အန် တဝ်း၊ “ဂြုဝ်း ပီ ကာလာင် အာဘာလာအမ် အီ မုး ဂွန် အာပေါဆော နီ၊ န့ မုး ဂြုဝ်း အီ ဟဲ့ ပွိုန် ယိုဝ် ဆီချာ။

16 န့ မုး ဂြုဝ်း ဒူအီ အီ ဟဲ့ ယိုဝ် ဂြုဝ်း ဇဝ်ဖြာ။ အန် ဟဲ့ ပွိုန် အာငျာန် ပဲ့ ဟဲ့ ဒွါ ဇဝ်ဖြာ အီ အိုပ် တူတ့် ဒွန် မျုဝ်။ အန် ဟဲ့ မုတ် ဂိုပ်၊ ငါယ် အန် ယီ ဘ့လာင်။

17 အုဝ် ဟဲ့ ယိုဝ် အန်။ မာလဲ၊ န့ ညှမ် မုး ဒေါ တီ နီ။ အုဝ် ဟဲ့ ယွတ် အန်၊ န့ ယီ ညှမ် ငှိုယ် ဒီ ဇမ်။ န့ ဒီ မိုဝ်း ခုန်ဒီခမ် အီ ပီ ဆီမန့်။ အန် ဒီ ဂွိုတ် ခဲင် ဒူအီ အာကူပ်။ အန် ဒီ မိုဝ်း ဒူအီ အီ ဂူင့် ဘ့လာ လျီး။ အန် ဒီ ဂွိုတ် ခဲင် ခြိုဝ် ဒူအီ အီဆာရေလ။ အန် ဒီ ဘော မး ကာတဝ်း ဂေ အာမူ အာမာတ် အီ အိုပ် မိူင် မုဝ်အာပ်။ အန် ဒီ ဘော မး ကာလာတ့် ဂိန့် ဂေ ဒူအီ အီ မုး လှုက်လှာန် အာစေတ်။

18 အန် ဒီ ဘော ကာဂုဝ်း ပဲ ရန်ဆူ အန် အီ ကွယ် ခဲင် မိူင် အေဒူမ်။ မိူင် ဆေအီ ဒီ ဘော ဘဲန် မိူင် ပီ အိုပ် အန်။ ဂေ ဒူအီ အီဆာရေလ၊ ဂေ ဒီ ဘော မိုဝ်း နဝ်း ယ ကာဆဝ်။

19 ဂေ ဒူအီ အီဆာရေလ တီ၊ ဂေ ဒီ ဘော ညဲတ့် ဘော ပျာတ့် ဝဲန် ဂေ ဒူအီ အီ ဆီ ဂိူတ်၊ ဆီ ကွယ် ခဲင် မာန် မိူင် တီ။”

20 အာဘာလာအမ် ဟဲ့ ဟွတ့် ကာလာင် ဂြုဝ်း တီ၊ အန် ဝီ ယိုဝ် ဂြုဝ်း ဇဝ်ဖြာ ဘော လွင် ဒူအီ အာမာလေက်၊ အန် ဝီ ကာလာင် ဂြုဝ်း တီ တဝ်း၊ “ဒေါ တီ နီ ဂေ ဒူအီ အာမာလေက် ဟဲ့ ဘဲန် အီ တာင် လွှိုမ် အာမျုဝ် ဒူအီ ဘောကာဂ့လျီတ်။ မာလဲ၊ ဒီ ကာဒဲ့ အန်၊ ဂေ ဒီ လိုဝ် စှိုမ် တူတ့် ဒွန် အီ။”

21 အန် ဟဲ့ ဟွတ့် ကာလာင် ပါယ် တီ အန် ဝီ ယိုဝ် ဘော လွင် ဒူအီ အာမျုဝ် ခေနိတ်။ အန် ဝီ ကာလာင် ဂြုဝ်း တီ တဝ်း၊ “ဒူင် ကွယ် ဘေ ဟဲ့ မန် ဆီချာ။ ဒူင် ကွယ် ဘေ ဟဲ့ ပီ ကာဟုန် မာဆိမ် အီ ကွယ် ဒဲင် မာဝ် ဂေ ဒဲင် ဒါအာင်။

22 မာလဲ၊ ဘေ ဒူအီ အာမျုဝ် ခေနိတ်၊ ဘေ ဒီ လိုဝ် စှိုမ် ပန် ဒီ တး မှေတ့် ခုန်ဒီခမ် အာဆူရာ ဒီ ဘေ၊ တဲး ဘေ ဝီ ဘဲန် မှာယ် အန်။”

23 အာဘာလာအမ် ဟဲ့ ဟွတ့် ကာလာင် ဂြုဝ်း တီ၊ အန် ပီ ဝီ ကာလာင် ဂြုဝ်း ပေါ န့ ပွါ။ အန် တဝ်း၊ “အာလိုဝ်၊ ဆေ ဇဝ်ဖြာ ဟီ ဘူင် ပါယ် တီ အာဝ် မိုဝ်း အာဆေ အီ ပွိုန် ကွယ် ဂတ် ဂျီတ်။

24 ဒူအီ အီ ဆီ ကာဂုဝ်း ဒီ မိူင် အီ ဟဝ်၊ ဂေ ဒီ ပဝ့် ရိုဝ် ဆင်ဖုဝ်၊ တး ခဲင် မိူင် ခီထိမ်။ ဂေ ဒီ ဘော ကာဂုဝ်း ပဲ မိူင် အာဆူရာ ဘော မိူင် အေဘာ။ မာလဲ၊ ဘော ဂေ ဒီ ဝီ လိုဝ် စှိုမ် တူတ့် ဘောကာဂ့လျီတ်။”

25 အာဘာလာအမ် ဟဲ့ ဟွတ့် ကာလာင် ပါယ် တီ အန် ဘော ဝီ ဝေန့် ဒီ ကာင် အန်။ ဘော ခုန်ဒီခမ် အာဘာလာက် ဘော ဝေန့် ဒူင် ကွယ် ဘြိမ် အန်။