ခါန် 23
အာဘာလာအမ် ဝီ တဝ်း ဒီ ခုန်ဒီခမ်၊ “တဲး မဲ ဘူင် ကာစှူင့် လှူ ဒီ နီ အာဒါ ဘူ ဘူင့်။ ရဲန် တး ဘော မက် အာလူင့် ဘူ ဒုဝ် ဘော မာဘူ အာလူင့် ဘူ ဒုဝ်၊ ဒွါ ဒီ အုဝ်။” 2 ခုန်ဒီခမ် အာဘာလာက် မိူဝ် ဘူင် ဒူပ် ပီ ကာလာင် အာဘာလာအမ် တီ။ ဂေ ဘော ဒိုဝ်း မာမက် အူ ဒုဝ် ဘော မာဘူ အူ ဒုဝ်၊ လှူ ဒဲင် ကာစှူင့် ဒွန် ကာစှူင့်။
3 ဟဲ့ ဟွတ့်၊ အာဘာလာအမ် ဝီ တဝ်း ဒီ အန်၊ “တဲး မဲ တး စွင့် ခူပ် ကာစှူင့် လှူ မဲ နီ။ အုဝ် ဒီ ဝီ ဟာဝ် ပေါ ပ့လုဝ့်၊ တဲး အုဝ် နပ် ယုဝ် ဇဝ်ဖြာ ဒီ တး ကာတုန့် အုဝ်။ ခဲ့ ပီ ကာလာင် အန် ဒီ အုဝ်၊ အုဝ် ဒီ ဝီ ကာလာင် ဒီ မဲ ခုန်ဒီခမ်။” ဟဲ့ ဟွတ့် ပါယ် တီ အာဘာလာအမ် ဘော ဟုဝ့် ဒဲင် နွန် စာ အာဒါ အူ ပ့လုဝ့်။
4 ဇဝ်ဖြာ ဘော ကာတုန့် အန်။ အန် ဘော ကာလာင် ဒီ ဇဝ်ဖြာ တဝ်း၊ “အုဝ် ဟဲ့ ဘူင် ကာစှူင့် လှူ ဘူ ဘူင့်။ အုဝ် ဟဲ့ ဒိုဝ်း ဘော မာမက် ဘော မာဘူ အူ မျုဝ် အူ ဒုဝ်၊ လှူ ဒဲင် ကာစှူင့် တီ ဒွန် ဘူင့်။”
5 ဇဝ်ဖြာ ဘော တဲး အန် နပ် ဂြုဝ်း ပီ လုဝ် ကာလာင် အန် ဒီ အာဘာလာက်။ ဟဲ့ ဟွတ့်၊ ဇဝ်ဖြာ တဝ်း၊ “တဲး မဲ ဝီ လူင် ဒူင် ကွယ် ခုန်ဒီခမ် အာဘာလာက်၊ တဲး မဲ ကာလာင် ပီ စ်ု အုဝ် ဒီ မဲ နီ။”
6 အန် ဘော ဝီ လူင်၊ ဘော ယိုဝ် ခုန်ဒီခမ် အာဘာလာက် ဆီ စွင့် ခူပ် ကာစှူင့် လှူ အန်။ ဘော ဂေ ဒါ တာင် ခဲင် မိူင် မုဝ်အာပ် တွိုန် ဟဲ့ ကွယ် ဒီ တီ။
7 အာဘာလာအမ် ဘော ကာလာင် ဂြုဝ်း ပဲ့ ဟဲ့ ကာလာင် ဇဝ်ဖြာ ဒီ အန်။ အန် တဝ်း၊ “ခုန်ဒီခမ် အာဘာလာက် ဟဲ့ ဒဲ့ အုဝ် တး ဒီ မိူင် အာရာမ်။ ခုန်ဒီခမ် အီ အိုပ် မိူင် မုဝ်အာပ် ဟဲ့ ဒဲ့ အုဝ် တး ဒီ နွန် အီ ကွယ် နာ လေး ဆီငဲ။ အန် ဟဲ့ တဝ်း၊ ‘တး ဒိူင် ဒူအီ အာမျုဝ် အာယာကူပ် အာဒါ အုဝ်။ တး ကာလာင် ဂြုဝ်း အီ နဲန ဂေ ဒူအီ အီဆာရေလ။’
8 အုဝ် ယီ တူ ပွိုန် ဒီ ဒိူင် ဒီ အေး ဒူအီ ပီ တူ ဒိူင် တူ အေး ဇဝ်ဖြာ။ အုဝ် တူ ပွိုန် နဲန ဒူအီ ပီ တူ နဲန ဇဝ်ဖြာ။
9 အုဝ် ဟဲ့ ကွယ် ကာဒဲ့ နွန် ဒါအာင် နေန့်၊ အုဝ် ဟဲ့ ယိုဝ် ဂေ။ အုဝ် ဟဲ့ ကွယ် ဒဲင် နွန်၊ ဝီ ယွတ် ဂေ။ ဂေ မုး ဒူအီ အီ ကွယ် ရာင် ဂေ။ ဂေ မိူဝ် တူ ကွယ် ကာဆူ ကာဝ်ု ဒူပ် ဒူအီ အာမျုဝ် ဟဝ်။
10 ခြိုဝ် ဂေ ဒူအီ အီဆာရေလ တီ၊ ဂေ ဟဲ့ ကိူန် ကော နှဲန် ကာပုး။ ဆေ ဘေ ပီ ဘော ကာယဝ်း ဂေ ဘဲန် ဖွုန် ဘုန်၊ အူ ဘုန် မိူဝ်၊ ဘေ တူ ပဲ ဒီ တိး။ အုဝ် မှာန့်၊ တဲး အုဝ် ယမ် ပီ ဒူအီ ဂေ တီ။ တဲး အုဝ် ပွိုန် ဒီ ယမ် ဒါခိုယ်၊ ယမ် ဆီချာ ပီ ဒူအီ ဂေ အီ မိုဝ်း နဝ်း ဆိူဝ် နဝ်း မှာန် တီ။”
11 ခုန်ဒီခမ် အာဘာလာက် ဝီ တဝ်း ဒီ အာဘာလာအမ်၊ “မာဆေ န့ မုး ပီ ဘူင် မဲ ဒီ အုဝ်။း အုဝ် ဟဲ့ ဒဲ့ တး မဲ တဝ်း၊ တဲး မဲ ဒိူင် ရန်ဆူ အုဝ်။ မာလဲ၊ ခဲ့ ပီ တဝ်း မဲ ဒွန် မျုဝ်၊ ဟဲ့ ဝီ မုး တူတ့် ဂြုဝ်း မွင့်ကာရာ။”
12 အန် ဝီ တဝ်း၊ “အုဝ် ဟဲ့ ဟွတ့် ကာလာင် ဒီ မဲ၊ အုဝ် ပွိုန် ကာလာင် မီ ပီ စ်ု ဇဝ်ဖြာ အုဝ် ကာလာင်။”
13 ခုန်ဒီခမ် အာဘာလာက် ပီ ဝီ တဝ်း ဒီ အာဘာလာအမ်၊ “တး မဲ ဟာဝ် ဒူပ် အုဝ်၊ တဲး အာယ် ဟာဝ် ပေါ ပ့လုဝ့်၊ တဲး မဲ ပွိုန် ယိုဝ် ဒူင် ချ ဂေ ဒူအီ အီဆာရေလ ပေါ ဘ့လာက်၊ ယီ တူ ပွိုန် ယိုဝ် တူတ့်။ တဲး မဲ ဒိူင် ဂေ ဒီ တီ အာဒါ အုဝ်။” 14 ဂါယ် ဘော ကာဒူပ် ဟာဝ် ဒီ ဂ့လင် အီ စိူဝ် စောဖိမ် အီ ကွယ် ဒဲင် နွန် ပီဆာကာ။ ဒီ တီ အာဘာလာက် ပီ ဝီ ဘူင် ကာစှူင့် လှူ ပေါ ဘူ ဘူင့်။ အန် ဘော ဒိုဝ်း မာမက် အူ ဒုဝ် ဘော မာဘူ အူ ဒုဝ်၊ လှူ ဒဲင် ကာစှူင့် ဒွန် ဘူင့်။
15 အာဘာလာအမ် ဝီ ကာလာင် ဒီ ခုန်ဒီခမ် အာဘာလာက် တဝ်း၊ “တဲး မဲ စွင့် ခူပ် ကာစှူင့် လှူ နီ။ အုဝ် ဒီ ဟာဝ်၊ တဲး အုဝ် ကာတုန့် ဇဝ်ဖြာ နှေ ဒီ နေန့်။”
16 ဇဝ်ဖြာ ဘော ကာတုန့် အာဘာလာအမ် ဘော တဲး အန် နပ် ဂြုဝ်း ပီ လုဝ် အန် ကာလာင် ဒီ အာဘာလာက်။ ဟဲ့ ဟွတ့်၊ အန် တဝ်း၊ “တဲး မဲ ဝီ ဟာဝ် ဒူင် ကွယ် ခုန်ဒီခမ် အာဘာလာက်၊ တဲး မဲ ကာလာင် ခဲ့ ပီ ဘျ အုဝ် ဒီ မဲ။”
17 အန် ဘော ဝီ ဟာဝ် ဒူင် ကွယ် ခုန်ဒီခမ် အာဘာလာက် တွိုန်။ အန် ဘော ယိုဝ် ခုန်ဒီခမ် ယီ ဆီ စွင့် ခူပ် ကာစှူင့် လှူ အန်၊ ဘော ဂေ ဒါ တာင် ခဲင် မိူင် မုဝ်အာပ် တွိုန် ဆီ ကွယ် ဒီ တီ။ အာဘာလာက် ဝီ ဒီမွှတ် အန် တဝ်း၊ “မာဆေ ပီ တဝ်း ဇဝ်ဖြာ ဒီ မဲ။း”
18 အာဘာလာအမ် ဘော ကာလာင် ဂြုဝ်း ပဲ့ ဟဲ့ ကာလာင် ဇဝ်ဖြာ ဒီ အန်။ အန် တဝ်း၊ “အိုယ် အာဘာလာက် အီ မုး ဂွန် အာစီဖော၊ တဲး မဲ ထူမ် ဂြုဝ်း အုဝ်။
19 ဇဝ်ဖြာ တူ ပီ ဒူအီ အီ နပ် ဒီ ကာလာင် ဂြုဝ်း ကာလုဝ်။ အန် ဇဝ် တူ မုး အာမျုဝ် ဒူအီ အီ ကာပ့လု နဝ်း၊ အီ ဘျွင် နဝ်း။ ခဲ့ ပီ ကာဆဲန့် အန် ဇဝ် ဒီ ဘူင်၊ အန် ဒီ ဘူင်။ ခဲ့ ပီ ကာလာင် အန် ဇဝ်၊ အန် ဒီ ဘူင် တဲး န့ ကော ဟွတ့် တူတ့် ဒွန် မျုဝ်။
20 အုဝ် ဟဲ့ ခမ် ဂြုဝ်း မွင့်ကာရာ ကူပ် ဟဲ့ မွင့်ကာရာ ဒွါ အန် ဇဝ်။ အုဝ် မိူဝ် တူ ပွိုန် ပျာတ့် ပီ မွင့်ကာရာ ဒွါ အန် ဇဝ် တီ။
21 အုဝ် တူ ပွိုန် ယိုဝ် ဒုက် မာဆေ အီ တး ဇမ် ကာတဲ ဂေ ဒူအီ အာကူပ်။ အုဝ် တူ ယိုဝ် မာဆေ အီ ဒီ ညှာပ် ကာတဲ ဂေ ဒူအီ အီဆာရေလ။ ဇဝ်ဖြာ ပီ ကြိုပ် ဂေ၊ အန် ဟဲ့ ကွယ် ရိုမ် ဒူပ် ဂေ။ ဂေ ဘော ကာလာင် ဂြုဝ်း တာင် တဝ်း၊ ‘အန် ဇဝ် မုး ခုန်ဒီခမ် အီ အိုပ် ဂေ။’
22 ဇဝ်ဖြာ ဟဲ့ ယဲတ့် လေး ဂေ ခဲင် မိူင် အဲဂိုပ်။ အန် ဇဝ် ဘော စွယ် ဂေ ကာဂုဝ်း။ ဂေ ဟဲ့ မိုဝ်း ဟဲန့် ပီ မက် ပြဲ အီ ဟဲန့် ကာဆဝ်။
23 အာဝ် မိုဝ်း အာငျာန် ဂေ ကာထာ မာဆေ။ ဘော အာဝ် မိုဝ်း အာဒါတ် မာဆေ အီ ဆီ ဒီ ပဲ ဂေ ဒူအီ အီဆာရေလ။ ဒူအီ ဘော ကာဒါယ် ဒီ ဘော ကာလာင် လွင် ဂေ ဒူအီ အီဆာရေလ တဝ်း၊ ‘ယွတ် အီ မွှိုမ် ပဲ့ ဟဲ့ ဘူင် ဇဝ်ဖြာ ဒီ ဂေ။’
24 ဒူအီ အီဆာရေလ ဂေ နီ၊ ဂေ ဒီ ပီ မာခြင်ဆီ အီ ဟဲန့် ကာဆဝ်။ အန် ဒီ ယိတ့် စွင့် ဘော ဘျ ဒုဝ် အန် ဒီ အီ ဟဝ်။ ဆေ အန် ညှမ် ဟွတ့် ဟူမ် ယင် ဒုဝ် ပီ မှေတ့် အန်၊ ညှမ် ဟွတ့် ညွှတ် ဘော နှာမ် ဒုဝ် ပဲ့ ဟဲ့ ငဝ်း ယမ် အန်၊ အန် မိူဝ် တူ ဝီ အိတ် ဒေါ မှဝ်။”
25 အာဘာလာအမ် ဟဲ့ ဟွတ့် ကာလာင် ပါယ် တီ ခုန်ဒီခမ် အာဘာလာက် ဝီ တဝ်း ဒီ အန်၊ “စူ ခဲ့ တီ။ အာဝ် ဟူ လုဝ် ဒိူင် ဂေ ဒူအီ အီဆာရေလ၊ ဘော အာဝ် ဟူ လုဝ် မွင့်ကာရာ ဒွါ ဒီ ဂေ။”
26 အာဘာလာအမ် ဝီ တဝ်း၊ “အုဝ် ဟဲ့ ဟွတ့် ကာလာင် ဒီ မဲ၊ အုဝ် လုဝ် ဘူင် မီ ပီ စ်ု ဇဝ်ဖြာ အုဝ် ဘူင်။”
27 ခုန်ဒီခမ် အာဘာလာက် ဝီ တဝ်း ဒီ အာဘာလာအမ်၊ “တး ဒူပ် အုဝ်၊ အုဝ် ဒီ ယဲတ့် ဟာဝ် မဲ ပေါ ပ့လုဝ့်၊ ယုဝ် ဇဝ်ဖြာ ပီ ဆော တဲး မဲ ဒိူင် ဂေ အာဒါ အုဝ် ဒီ တီ။” 28 ဂါယ် ဘော ကာဒူပ် ဟုဝ့် ကာဒဲ့ နွန် ဘေအူရာ၊ တဲး ဂါယ် ဝီ ပွိုန် ယွတ် လူင် ခဲင် ပြဲ ကာဟဝ်း တွိုန်။