1 ဂေ ဒူအီ အီဆာရေလ ပီ ဝီ ကာထုဝ့် ဟာဝ် ကွယ် ဒီ ဂ့လင် ခဲင် မိူင် မုဝ်အာပ် အီ ကွယ် နာ ဒွယ် ဘ့လဲင် အိုမ် ယောဒါန် အီ ကွယ် ခူပ် မိူင် ယေရီခုဝ်။

2 ခုန်ဒီခမ် အာဘာလာက် အီ မုး ဂွန် အာစီဖော အီ အိုပ် မိူင် မုဝ်အာပ်၊ အန် ဘော ယိုဝ် လွင် ပဲ့ ဟဲ့ ဘူင် ဂေ ဒူအီ အီဆာရေလ ဒီ ဒူအီ အာမုဝ်ရိတ်။ 3 ဘော အန် ဘော ဒူအီ ခဲင် မိူင် အန် တီ၊ ဂေ ဘော ယုဝ် ကာဆဝ် ကူပ် ဒူအီ အီဆာရေလ ဟဲ့ ကိူန် ကာဆဝ်။

4 ဂေ ဒူအီ မုဝ်အာပ် ဘော ဝီ ကာလာင် ဒီ ဂေ ဒါ တာင် အီ အိုပ် မိူင် မီဒီအာန် တဝ်း၊ “ဒူအီ ဖိုင် ကိူန် ဖိုင် တာင် ဒီ ဘော တး ပျာတ့် တူတ့် ခူပ် ဒူင် ကွယ် အေ နီ ဒွန် ဘ့လာက်။ ဂေ ဒီ ဘော ပီ မာမက် တး ဟူမ် ပေတ့် ခဲင် ဒူင် နာ။” အာခြာဝ် ဒေါ အန် တီ န့ မုး ခုန်ဒီခမ် အာဘာလာက် အီ မုး ဂွန် အာစီဖော တီ အီ အိုပ် မိူင် မုဝ်အာပ်။

5 အန် ဘော ဝီ စ်ု ဒါလာမ် အန် ဟာဝ် ဒူင် ကွယ် အာဘာလာအမ် အီ မုး ဂွန် အာပေါဆော အီ ကွယ် ဒီ မိူင် ဘေဆော။ မိူင် ဘေဆော တီ ဘော ကွယ် ခူပ် ဘ့လဲင် အိုမ် အူဖာရာတ် ဒူင် ကွယ် ဂေ ဒူအီ အာမဝ်။ အန် တဲး ဂေ ဒဲ့ တး အာဘာလာအမ် ဘော ကာလာင် ဒီ အန် တဝ်း၊ “ဒေါ တီ နီ၊ န့ ဟဲ့ မိုဝ်း ဒူအီ အာဒါ အူ မျုဝ်၊ ဂေ ဟဲ့ လေး တး ခဲင် မိူင် အဲဂိုပ်၊ ဟဲ့ ပ့လိုက် ဘော ကာဒါယ် နီ။ ဂေ ဟဲ့ ဝီ တး ကွယ် ခူပ် အုဝ်။ 6 ဂေ ဟဲ့ မိုဝ်း ပ့လူမ်၊ မိုဝ်း ဟဲန့် လွှိုမ် အုဝ်။ အုဝ် မှာန့်၊ တဲး မဲ တး ဒိူင် ဂေ ကာဒါင် အုဝ်။ ဆေ မဲ ဘူင် ပါယ် တီ အုဝ် ဒီ ဘော ကာဂုဝ်း ပဲ ဂေ၊ အုဝ် ဒီ ဘော ပွိုန် ဒီ ဟုဝ် တဝ် ဂေ တ မိူင် အုဝ် နီ။ အုဝ် ဟဲ့ နပ်၊ ဆေ မဲ မွင့်ကာရာ ဒွါ ဒီ အာဆေ၊ အန် ဒီ ပွိုန် နာ မွှိုမ်။ ဆေ မဲ ဝီ ဒိူင် ဝီ မှဝ်၊ အန် လုဝ် ခမ် ဂြုဝ်း ဒိူင် တီ။”

7 ပါယ် တီ ဂေ ဒါ တာင် ခဲင် မိူင် မုဝ်အာပ် ဘော ဒါ တာင် ခဲင် မိူင် မီဒီအာန်၊ ဂေ ဘော ဟာဝ် ဒူင် ကွယ် အာဘာလာအမ်။ ဂေ ဘော ဒိုဝ်း ဟာဝ် ဘော ခေါဆွင်၊ အီ မုး ရုး ပီ ကာလာင် ဒါ ဘေဒါင်။ ဂေ ဘော ကာလာင် ဂြုဝ်း ပီ တဝ်း ခုန်ဒီခမ် အာဘာလာက် တွိုန် ဒီ အန်။

8 အာဘာလာအမ် ဝီ တဝ်း ဒီ ဂေ၊ “တဲး ဘေ တမ် ဒီ နီ အာဒါ ခေါ အူ မှိုဝ်။ ခဲညှာ အုဝ် ဒီ ဝီ ကာလာင် ဒီ ဘေ ပီ တဝ်း ဇဝ်ဖြာ ဒီ အုဝ်။” ပါယ် တီ ဂေ ဒါ တာင် ခဲင် မိူင် မုဝ်အာပ် တွိုန်၊ ဂေ ဘော တမ် ဒူင် ကွယ် အာဘာလာအမ် တီ။

9 ဇဝ်ဖြာ ဝီ ဒီမွှတ် အာဘာလာအမ် တဝ်း၊ “ဒူအီ အီ တး ဒူင် ကွယ် မဲ တီ၊ ဂေ တး ကူပ် မာဆေ။း”

10 အာဘာလာအမ် ဝီ တဝ်း၊ “ခုန်ဒီခမ် အာဘာလာက် အီ အိုပ် မိူင် မုဝ်အာပ်၊ အန် ဟဲ့ စ်ု ဒူအီ ဂေ နီ တး ကာလာင် ဒီ အုဝ် တဝ်း၊ 11 ‘န့ ဟဲ့ မိုဝ်း ဒူအီ အူ မျုဝ်၊ ဂေ ဟဲ့ လေး ခဲင် မိူင် အဲဂိုပ်၊ ဟဲ့ တး ပ့လိုက် တူတ့် ကာဒါယ် နီ။ အုဝ် မှာန့်၊ တဲး မဲ ဒိူင် ဒူအီ ဂေ တီ၊ တဲး အုဝ် ကာဂုဝ်း ပဲ ဂေ၊ တဲး အုဝ် ပွိုန် ဒီ ဟုဝ် တဝ် ဒူအီ ဂေ တီ တ မိူင် အုဝ် နီ။’”

12 ဇဝ်ဖြာ ဝီ တဝ်း ဒီ အာဘာလာအမ်၊ “မဲ တူ ပွိုန် ဟာဝ် ဒူပ် ဂေ။ မဲ တူ ပွိုန် ဒိူင်၊ တူ ပွိုန် တဝ်း မာဆေ ဒီ ဒူအီ ဂေ တီ။ ဂေ မုး ဒူအီ ပဲ့ ဟဲ့ မွင့်ကာရာ ဒွါ အုဝ်။”

13 ဘော ဇမ် ပါ ခဲညှာ ဆိန့်ဝး၊ အာဘာလာအမ် ဘော ယိတ့်၊ ကာလာင် ဒီ ဂေ ဒါ တာင် ခုန်ဒီခမ် အာဘာလာက် တွိုန် တဝ်း၊ “တဲး ဘေ ဝီ ဝိဝ် ဒီ မိူင် ဘေ။ ဇဝ်ဖြာ တူ တဲး အုဝ် ဟာဝ် ရိုမ် ဒူပ် ဘေ။”

14 ဒါ တာင် ဂေ တီ ဘော ဝီ ဝိဝ်၊ ကာလာင် ဒီ ခုန်ဒီခမ် လွင် အာဘာလာအမ် တူ ဘဲန် တး ဒူပ် ဂေ။

15 ဟဲ့ ဟွတ့်၊ ခုန်ဒီခမ် အာဘာလာက် ပီ ဝီ စ်ု ဒူအီ အန် ပေါ အူ ဖိုင် ဟာဝ်၊ တဲး ဂေ ကိူန် လွှိုမ် ဘြိမ်၊ ဝီ စ်ု ဂေ အီ မုး ဒါ တာင် အီ မိုဝ်း ပွုန် လွှိုမ် ဂေ ဖိုင် အာတ့် တွိုန်၊ တဲး ဂေ ဝီ ဟာဝ်။ 16 ဂေ ဘော ဝီ ဟာဝ်၊ တး ဇမ် ဒူင် ကွယ် အာဘာလာအမ်၊ ကာလာင် ဂြုဝ်း ပီ စ်ု ခုန်ဒီခမ် ဂေ ကာလာင်။ ဂေ တဝ်း၊ “ခုန်ဒီခမ် အာဘာလာက် မှာန့်၊ ကွဲ့ တဲး န့ မိုဝ်း မာဆေ အီ ရန် အီ ဖျာက် မဲ၊ အီ ဘူင် ကွဲ့ တဲး မဲ ပွိုန် ဒီ ဟာဝ် ဒူင် ကွယ် အုဝ်။ 17 အုဝ် ဒီ ဒွါ ကိူန် ရုး ဒီ မဲ။ မဲ မှာန့် ခဲ့ မှဝ်၊ အုဝ် ဒီ ဒွါ။ တဲး မဲ ဒိူင် လဲ ဒူအီ အာမျုဝ် တီ ကာဒါင် အုဝ်။”

18 အာဘာလာအမ် ဝီ တဝ်း ဒီ ဂေ၊ “ဆေ ခုန်ဒီခမ် ပီ ဘော ဒွါ ရွိုန် ဂေ ခြိဝ် ဒီ အုဝ်၊ တဲး န့ ကော နုဝ့် ခဲင် ဟုဝ် အန် မိူဝ်၊ အုဝ် တူ ပွိုန် လှိုဝ် ဂြုဝ်း ဇဝ်ဖြာ ပီ ကြိုပ် အုဝ်။ ပီ ဘော မုး အီ အာရေ တျီ့ အာရေ တာင်၊ အုဝ် တူ ပွိုန် ဘူင် ဒေါ မှဝ်။ 19 ဆေ န့ ပါယ် တီ မှိုဝ် အာတိုဝ် တဲး ဘော ဘေ တမ် ဒီ နီ၊ တဲး အုဝ် ဘ်ု ဒီ ထူမ် ပီ ဒီ ကာလာင် ဇဝ်ဖြာ ဒီ အုဝ် ပေါ န့ ပွါ၊ တဲး အုဝ် နပ်၊ ယုဝ် ဇဝ်ဖြာ ဒီ တဝ်း မာဆေ။”

20 ဘော ဇမ် ခဲင် မှိုဝ်၊ ဇဝ်ဖြာ ဝီ တဝ်း ဒီ အာဘာလာအမ်၊ “ဆေ ဒူအီ ဂေ တီ ဘော တူ စူ ဒီ ဒဲ့ မဲ၊ တဲး မဲ ဟာဝ် ဒူပ် ဂေ။ မာလဲ၊ တဲး မဲ ဘူင် မီ ခဲ့ ပီ ကာလာင် အုဝ် ဒီ မဲ။”

21 ဘော ဇမ် ပါ ခဲညှာ ဆိန့်ဝး၊ အာဘာလာအမ် ဘော ရဲန် ကွပ် မာလာ အန်၊ ဘော ဟာဝ် ဒူပ် ဂေ အာမူ အာမာတ် ခုန်ဒီခမ် အီ အိုပ် မိူင် မုဝ်အာပ် တွိုန်။ 22 ပါယ် တီ ဇဝ်ဖြာ ဘော ရူ ကာဆဝ် ဒီ အာဘာလာအမ် ကူပ် ဟဲ့ ဟာဝ် အန် ဒူပ် ဂေ တွိုန်။ အန် မိူဝ် ပဝ့် မာလာ အန်။ ဘော ဒဲစေန့် အန် အာ ဝီ ဟဲ့ ဟာဝ် ဒူပ် အန်။ ဒေါ အန် တီ အာမူ အာမာတ် ဇဝ်ဖြာ ဘော စွင့် ကာတဲ န့တေန့်၊ ဘ်ု ဒီ ရဲ န့တေန့် အန်။ 23 မာလာ အန် တွိုန် ဘော ယိုဝ်၊ အာမူ အာမာတ် ဇဝ်ဖြာ ဟဲ့ ထွတ် မာပွါ့ လာင်၊ ဘ်ု ကာတဲ န့တေန့်၊ အန် ဘော ဝီ ဝး ဟာဝ် ခဲင် ဒူင် နာ။ အာဘာလာအမ် ဘော မး မာလာ အန်၊ တဲး အန် ဝီ ဟာဝ် ဒူပ် န့တေန့်။

24 ဟဲ့ ဟွတ့်၊ အာမူ အာမာတ် ဇဝ်ဖြာ ပီ ဝီ တး စွင့် ကာတဲ န့တေန့် ဒူင် ကာချီ့၊ ကာဆိူဝ် မိုဝ်း လူင့် မာန် မာငုန် ဘော အာ ဘ့လာက် န့တေန့်။ 25 မာလာ အန် တီ၊ ဟဲ့ ဝီ ယိုဝ် အာမူ အာမာတ် ဇဝ်ဖြာ ပေါ အူ ဇေန့်၊ အန် ဘော တဲး ဒုဝ် အန် ဟာဝ် ထိ ဒီ လူင့် အာဒါ အူ ဘ့လာက်၊ တဲး ပ့လဝ် အာဘာလာအမ် ထိပ် ဒီ လူင့် တီ။ ပါယ် တီ အာဘာလာအမ် ပီ ဝီ မး မာလာ အန် တီ ပေါ အူ ဇေန့်။

26 ဟဲ့ ဟွတ့်၊ အာမူ အာမာတ် ဇဝ်ဖြာ တွိုန် ပီ ဝီ ကာလုဝ်း ယဲတ့် နာ အာတ့်၊ ပီ ဝီ ဟာဝ် စွင့် ဒူင် ကာချီ့ ကာဆဝ်၊ ကွဲ့ တဲး န့ ဆီ မိုဝ်း နာ ဒီ ဝး ဘ့လာက် မှဝ်။ 27 ဒေါ ဝီ ယိုဝ် မာလာ အာမူ အာမာတ် ဇဝ်ဖြာ ခါ နီ၊ အန် ဘော ကာဒုး ဒီ အိတ် ကာတပ် ဒီ ကာဒါယ်။ ပါယ် တီ အာဘာလာအမ် ဘော ရူ ကာဆဝ် ဘော ဒိုဝ်း န့ကြွုန် အန်၊ မး မာလာ အန် တွိုန်။ 28 ဟဲ့ ဟွတ့် ပါယ် တီ ဇဝ်ဖြာ ဘော ဘူင် တဲး မာလာ အန် နပ် ဒီ ကာလာင် ဂြုဝ်း၊ ဘော တဝ်း ဒီ အန်၊ “အုဝ် ဟဲ့ ဘူင် မာဆေ ဒီ မဲ၊ တဲး မဲ မး အုဝ် ကော နုဝ့် အူယ် ဇေန့်။း”

29 အာဘာလာအမ် ဝီ တဝ်း ဒီ မာလာ အန် တီ၊ “မဲ နပ် ဒီ ညဝ့် အုဝ်။ အုဝ် ကာပြာ တဲး အုဝ် မိုဝ်း ဒီ ဂူင့် မာပွါ့ လာင်၊ တဲး အုဝ် ငဝ်း တဲး မဲ ယမ် ဒေါ တီ နီ။”

30 မာလာ တွိုန် ဝီ တဝ်း ဒီ အာဘာလာအမ်၊ “အုဝ် ဟဲ့ မုး မာလာ ပီ ဒွိုမ် ပဝ့် မဲ ဆေဆေ ကော ဇမ် အာတိုဝ် နီ။ အုဝ် ဟဲ့ ဒွိုမ် မိုဝ်း ဒီ ဘူင် ဒီ မဲ ပါယ် နီ။း” အန် ဝီ တဝ်း၊ “အာဝ် ဒွိုမ် မိုဝ်း။”

31 ဟဲ့ ဟွတ့်၊ ဇဝ်ဖြာ ဝီ တဲး အာဘာလာအမ် ယိုဝ် အာမူ အာမာတ် ဇဝ်ဖြာ ဟဲ့ ဂူင့် မာပွါ့ လာင်၊ စွင့် ကာတဲ န့တေန့်။ ပါယ် တီ အာဘာလာအမ် ဘော မုတ် ဂိုပ် ဒီ ကာဒါယ် အူ ဇေန့်။

32 အာမူ အာမာတ် ဇဝ်ဖြာ ဝီ တဝ်း ဒီ အန်၊ “မှဝ် န့ ပါယ် ပီ မး မဲ မာလာ မဲ ကော နုဝ့် အူယ် ဇေန့်။း အုဝ် ဟဲ့ တး ခြဲ မဲ၊ တူ ဆီ တဲး မဲ လေး န့တေန့် ခါ နီ။ မာလဲ၊ မဲ ယီ နဲ့ အီ ဆီ ဘူင် ပီ တူ အိုင် အုဝ်။ 33 မာလာ မဲ တီ၊ အန် ဟဲ့ ယိုဝ် အုဝ်၊ အန် ဟဲ့ ဝး အုဝ် ဘော အူယ် ဇေန့်။ ဆေ အန် တူ ဝး အုဝ်၊ အုဝ် ဟဲ့ ဟွတ့် ငဝ်း ယမ် မဲ။ မီ မာလာ မဲ တီ ဒီ လွတ် ယမ်။”

34 အာဘာလာအမ် ဝီ တဝ်း၊ “အိုဝ်၊ အုဝ် ဟဲ့ ဟွတ့် ကာလိုပ်။ အုဝ် မိူဝ် တူ နပ်၊ န့ မုး မဲ ဇဝ် အီ ရဲ န့တေန့် အုဝ်။ ဒေါ တီ နီ၊ ဒူင် ဒီ ဟာဝ် အုဝ် တီ၊ ဆေ န့ တူ မွှိုမ် ဟာဝ်၊ အုဝ် ဒီ ဝီ ဝိဝ် နာ ပန်။” 35 မာလဲ၊ အာမူ အာမာတ် ဇဝ်ဖြာ ဝီ တဝ်း ဒီ အန်၊ “တဲး မဲ ဟာဝ် ဒူပ် ဒူအီ ဂေ တီ။ မာလဲ၊ မဲ လုဝ် ကာလာင် မီ ခဲ့ ပီ စ်ု အုဝ် မဲ ကာလာင်။” ဟဲ့ ဟွတ့်၊ အာဘာလာအမ် ဘော ဟာဝ် ဒူပ် ဂေ။

36 ခုန်ဒီခမ် အာဘာလာက် ဘော ယိုဝ် လွင် အာဘာလာအမ် ဟဲ့ တး၊ အန် ဘော ဟာဝ် ဘ်ု ဒီ ရွုး န့တေန့် အာဘာလာအမ် ဒီ မိူင် ဂေ ဒူအီ မုဝ်အာပ် အီ ကွယ် ခူပ် ဘ့လဲင် အိုမ် အာရာနုန် တွိုန်။ န့ ဘော မုး ကာအုန် ကာဒါယ် မိူင် မုဝ်အာပ်။ 37 ခုန်ဒီခမ် အာဘာလာက် ဘော ကာလာင် ဒီ အာဘာလာအမ် တဝ်း၊ “မဲ ယိုဝ်၊ အုဝ် ဟဲ့ စ်ု ဒူအီ အုဝ် ဟာဝ် ဒဲ့ မဲ။ မှဝ် မ့ပါယ် ပီ တူ တး မဲ ဒူင် ကွယ် အုဝ်။း မဲ ယုဝ် အုဝ် တူ နပ် ဒီ မျုက် မဲ။း”

38 အာဘာလာအမ် ဝီ တဝ်း၊ “နီ၊ အုဝ် ဟဲ့ ဟွတ့် တး ဒေါ တီ နီ။ မာလဲ၊ အုဝ် တူ နပ် ယုဝ် အုဝ် ဒီ ပွိုန် ကာလာင် ဂြုဝ်း ပီ အိုင် မဲ။ အုဝ် လုဝ် ကာလာင် မီ ဂြုဝ်း ပီ စ်ု ဇဝ်ဖြာ အုဝ် ကာလာင်။”

39 ပါယ် တီ အာဘာလာအမ် ဘော ဒူပ် ခုန်ဒီခမ် အာဘာလာက် တွိုန်၊ ဟာဝ် ဒီ မိူင် ကီရီယာတ်ဟူစုတ်။ 40 ဘော ဇမ် ဒီ တီ၊ ခုန်ဒီခမ် အာဘာလာက် ဘော ငဝ်း လှူ မာမက် ဂေ မာဘူ။ အန် ဘော တိုယ် ဟာဝ် ဒီ အာဘာလာအမ် ဘော ဒီ ဂေ ဒါ တာင် အန် အီ ကွယ် ဒီ တီ။ 41 ဘော ဇမ် ပါ ခဲညှာ ဆိန့်ဝး၊ ခုန်ဒီခမ် အာဘာလာက် ဘော ဒဲ့ ဟုဝ့် အာဘာလာအမ် ဒဲင် နွန် ဒူင် စိူဝ် ဘာမုတ်ဘာလ၊ တဲး အန် ပွိုန် ယိုဝ် ဘာင် ဒူင် ချ ဒူအီ အီဆာရေလ မင် အီ။