1 န့ ဘော မိုဝ်း ခုန်ဒီခမ် အီ ကွယ် ခဲင် မိူင် အာရာတ်၊ အန် မုး ဒူအီ အာမျုဝ် ကာနန့်။ အန် ကွယ် ခဲင် မိူင် ကာနန့် ဘ့လာက် နာ တေတ့်။ အန် ဘော ယိုဝ် လွင် ဂေ ဒူအီ အီဆာရေလ ဟဲ့ တး ဒူပ် န့တေန့် အာထာရိန်၊ အန် ဘော ရဲန် ဒါ ဆိုက် အန်၊ ဟာဝ် ကာဂုဝ်း ဒီ ဂေ။ အန် ဘော ပွိုန် ဒီ မှေတ့် ဒူအီ ဂေ မင် အီ။ 2 ဂေ ဒူအီ အီဆာရေလ ဘော ဝီ ကာဆဲန့် ဒီ ဇဝ်ဖြာ တဝ်း၊ “ဆေ မဲ ဇဝ် အာပ် တဲး ယေ အွင် ဒူအီ၊ ယေ ဒီ ပျာတ့် မိူင် ဂေ တီ၊ တဲး န့ ကော လိုဝ် တူတ့်။” 3 ဇဝ်ဖြာ ဘော ထူမ် ဂြုဝ်း ဂေ ဒူအီ အီဆာရေလ တီ။ အန် ဘော ကွယ် ဘ့လာက် ဂေ၊ တဲး ဂေ ပဲ ဒူအီ ကာနန့် ဂေ တီ။ ပါယ် တီ ဂေ ဘော ပျာတ့် မိူင် တီ ဘော ဒူအီ အီ ကွယ် ခဲင် မိူင် တီ ဘောကာဂ့လျီတ်။ ဒူင် တီ၊ ဂေ ဘော တဲး န့ စိူဝ် ဟောမ။

4 ဂေ ဒူအီ အီဆာရေလ ဘော ယိတ့် ဒီ နွန် ဟုဝ်ရာ တွိုန်၊ ဝီ ဟာဝ် ဒူပ် န့တေန့် အီ ဝီ လူင် ဒီနှူင် ရေန့်၊ တဲး န့ လဲပ် မိူင် အေဒူမ် တွိုန်။ န့တေန့် ပီ ဝဝ့် ဂေ တီ၊ န့ ညှာပ် ကာဆဝ်။ ခုဝ်၊ န့ ဘော ဘဲန် ဒီလှး၊ ဘဲန် က့လိုဝ် ဒီ ဂေ ဒူအီ အီဆာရေလ။ 5 ဂေ ဘော ကာလာင် ကာဘး ဒီ ဇဝ်ဖြာ ဂါယ် အာမုဝ်ဆဲ တဝ်း၊ “မှဝ် န့ ပါယ် ပီ ယဲတ့် လေး မဲ ဒီ ယေ ခဲင် မိူင် အဲဂိုပ်၊ ဝီ တဲး ယေ တး ယမ် ခဲင် ပြဲ ကာဟဝ်း နီ။း ယေ မိူဝ် တူ မိုဝ်း အိုမ်၊ တူ မိုဝ်း ခါမုန်။ ပီ ဒီ ဟူမ် အီ ပ့လေ ဆာလေ့ နီ၊ ယေ ဟဲ့ ဟွတ့် ပိုဝ်။”

6 ပါယ် တီ ဇဝ်ဖြာ ဘော စ်ု မာဟန့် အီ မိုဝ်း အာယ် ပီ ငဝ်၊ တဲး ဂေ တး ဒူင် ကွယ် ဂေ။ မာဟန့် တီ ဘော ဇုဝ့် ယမ် ကိူန် ကာဆဝ် ဂေ ဒူအီ အီဆာရေလ။ 7 ဟဲ့ ဟွတ့်၊ ဂေ ဘော ဝီ ကာလာင် ဒီ အာမုဝ်ဆဲ တဝ်း၊ “ကူပ် ဟဲ့ ကာဘး ယေ ဒီ ဇဝ်ဖြာ ဘော ဒီ မဲ၊ ဟဲ့ ဘဲန် ဒုက်၊ ဘဲန် မှာပ် ဒီ ယေ။ ယေ မှာန့်၊ တဲး မဲ ဝီ ဆာခိုဝ် ဒီ ဇဝ်ဖြာ၊ တဲး အန် ဇဝ် ဒိုဝ်း ဝဲန် မာဟန့် ဂေ နီ။” ပါယ် တီ အာမုဝ်ဆဲ ဘော ဝီ ဆာခိုဝ် ဒီ ဇဝ်ဖြာ ဒါင် ဂေ ဒူအီ ကိူန်။

8 ဇဝ်ဖြာ ဝီ တဝ်း ဒီ အာမုဝ်ဆဲ၊ “တဲး မဲ ဘူင် ရာင် မာဟန့် အူ ဒုဝ်၊ ဝီ ဒိုက် ဒီ ကာဒဲ့ ရွင့်။ ဝီ မှဝ် ပဲ့ ဟဲ့ ဇုဝ့် မာဟန့် တွိုန်၊ ဆေ အန် ဝီ ဆာကိုဝ်း ယွတ်၊ အန် ဒီ ဝီ ကဲန် ဒါခိုယ်။” 9 ပါယ် တီ အာမုဝ်ဆဲ ဘော ဒိုဝ်း ဘွင့် ဒေန့်၊ ဝီ ဘူင် ရာင် မာဟန့်၊ ဘ့လေး ကာဒဲ့ ရွင့်။ ဂေ ပဲ့ ဟဲ့ ဇုဝ့် မာဟန့် တွိုန်၊ ဝီ မှဝ် အီ ဆာကိုဝ်း ယွတ် ရာင် မာဟန့် တီ၊ အန် ဝီ ကဲန် ကွယ် ဒါခိုယ် ဂျာမ်ဆာ။

10 ဝါယ် အန် တီ ဂေ ဒူအီ အီဆာရေလ ဘော လေး ဒီ တီ၊ ဝီ ကာထုဝ့် ဟာဝ် ဒီ ဒူင် အီ စိူဝ် အောဘူတ်။ 11 ဂေ ဝီ လေး ဒီ ဒူင် အီ စိူဝ် အောဘူတ် တီ၊ ပီ ဝီ ဟာဝ် ချ ဒီ ဒူင် အီ စိူဝ် အီယာအာဘာရိမ် အီ ကွယ် ခဲင် ပြဲ ကာဟဝ်း နာ လေး ဆီငဲ မိူင် မုဝ်အာပ်။ 12 ဝါယ် တီ ဂေ ပီ ဝီ ကာထုဝ့် ဟာဝ် ကွယ် ခူပ် ဒီလယ့် စာရိတ်။ 13 ဟဲ့ ဟွတ့်၊ ဂေ ပီ ဝီ ကာထုဝ့် ဟာဝ် ပေါ မ့ပွါ။ ဂေ ပီ ဝီ ဟာဝ် ကွယ် နာ တေတ့် ဘ့လဲင် အိုမ် အာရာနုန် အီ ကွယ် ခဲင် ပြဲ ကာဟဝ်း အီ လာယ် ကာဇာပ် ဒီ မိူင် ဒူအီ အာမုဝ်ရိတ် တွိုန်။ ဘ့လဲင် အိုမ် အာရာနုန် တီ ကာခန် မိူင် မုဝ်အာပ် ဂါယ် မိူင် အာမုဝ်ရိတ်။ 14 ခုဝ် အန် တီ ခဲင် ဘပ် အီ ခဲ လွင် ဇဝ်ဖြာ စွယ် အီ ကာဂုဝ်း၊ န့ ဟဲ့ ဒဲမ် တဝ်း၊ “မိူင် ဝါဟဲမ် ကွယ် ဒီ ဒီလယ့် ဆူဖာ။ ခဲ့ ကွယ် ဘ့လဲင် အိုမ် ဒီတဲတ် ဂေ ဒီ ဒူပ် ဘ့လဲင် အာရာနုန်။ 15 ဒီလယ့် တီ န့ ဘော တူင့်၊ ဘော လူင် ကော ဇမ် မိူင် အာရာ။ န့ ဘော ဒူပ် ကာအုန် ကာဒါယ် မိူင် မုဝ်အာပ်။”

16 ဂေ ပီ ဝီ ယိတ့် ဒီ တီ၊ ပီ ဝီ ကာထုဝ့် ဟာဝ် ဒူင် မိုဝ်း အိုမ် ခိုမ် အီ စိူဝ် ဘီရာ။ လွင် ဒူင် တီ ဇဝ်ဖြာ ဟဲ့ ကာလာင် ဒီ အာမုဝ်ဆဲ တဝ်း၊ “ဒဲ့ ကာဇု ဂေ ဒီ တီ၊ အုဝ် ဒီ ဒွါ အိုမ် ဒီ ဂေ။” 17 ဒေါ အန် တီ ဂေ ဒူအီ အီဆာရေလ ဘော တဝ်း မှုဝ် လွင် အန် တီ။ ဂေ တဝ်း၊ “အိုယ် အိုမ် ခိုမ်၊ တဲး မဲ တုဝ်း လေး အိုမ်။ ယေ ဒီ တဝ်း မှုဝ် လွင် မဲ။ 18 မဲ မုး အိုမ် ခိုမ် ပီ ဂိုဝ်း အုန် ဂေ ဂွန် ခုန်ဒီခမ်။ ဘော ဂေ ဒါ တာင် ခဲင် မိူင် ဟဲ့ လာယ် စွယ် တဲး န့ ဘဲန်။ ဂေ ဟဲ့ ဂိုဝ်း တာ ဂ့လွင့် လျီး ဘော န့ကြွုန် ဂေ၊ တဲး န့ မိုဝ်း။”

ဝါယ် အန် တီ ဂေ ပီ ဝီ ကာထုဝ့် ဟာဝ် ဒူင် စိူဝ် မာတ်ထာနာ။ 19 ဂေ ပီ ဝီ ယိတ့် ဒီ မာတ်ထာနာ တီ၊ ပီ ဝီ ကာထုဝ့် ဟာဝ် ဒီ နီဟာလေလာ၊ ဝီ ဟာဝ် ဘော ဒီ ပါမူတ်။ ဂေ ပီ ဝီ ယိတ့် ဒီ ပါမူတ် တီ၊ 20 ပီ ဝီ ဟာဝ် ခဲင် ကာဒါယ် ဒူအီ မုဝ်အာပ် အီ ကွယ် ဒီ နွန် ပီဆာကာ။ ဒဲင် နွန် တီ ဟဲ့ ပွိုန် ဝီ မာငး လူင် ခဲင် ပြဲ ကာဟဝ်း။

21 ဒေါ အန် တီ ဂေ ဒူအီ အီဆာရေလ ဘော ဝီ စ်ု ဒါလာမ် ဂေ ဟာဝ် ဒူင် ကွယ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ်၊ တဲး ဂေ မှာန့် ဒီ အန် တဝ်း၊ 22 “ယေ မှာန့် ဒီ ကာလုဝ်း ဟာဝ် ကာတဲ မိူင် မဲ နီ။ ဘော ယေ ဘော ဒုဝ် ဆတ်ဒါဝါ ယေ၊ တူ ဝး န့တေန့်၊ တူ လိုပ် ညဲတ့် ဒူင် နာ ဂေ မာန် မာငုန် အီ ဟဝ်။ အိုမ် ခိုမ် ခဲင် မိူင် ဘေ နီ၊ ယေ မိူဝ် တူ ဒျီင်။ ယေ ဒီ ဟာဝ် ဆိူဝ် ဒူပ် န့တေန့် တာင် နီ။ တဲး မဲ တဲး ယေ ကာလုဝ်း ပွုန် ကာဒါယ် ခဲင် မိူင် မဲ နီ။”

23 မာလဲ၊ ခုန်ဒီခမ် အာဆီဟူန် တူ တဲး ဂေ ဒူအီ အီဆာရေလ ကာလုဝ်း ဟာဝ် ကာတဲ မိူင် အန် တီ။ အန် ဘော ဝီ ရဲန် ဒါ ဆိုက်၊ ဟာဝ် ခဲင် ပြဲ ကာဟဝ်း ဒူင် စိူဝ် ယာဟာတ်။ အန် ဘော ဟာဝ် ကာဂုဝ်း ဒီ ဂေ ဒူအီ အီဆာရေလ ဒီ တီ။ 24 ဂေ ဒူအီ အီဆာရေလ ဘော ဝီ ပွိုန် ဒီ ငဝ်း ယမ် ကိူန် ကာဆဝ် ရန်ဆူ ဂေ။ ဂေ ဘော ဝီ ပွိုန် ဘော ကာဒါယ် ဂေ။ န့ ဘော စုး ဒီ ဘ့လဲင် အိုမ် အာရာနုန် ကော ဝီ ဇမ် ဒီ ဘ့လဲင် အိုမ် ယာဘူက် အီ ကွယ် ဒီ ကာအုန် ကာဒါယ် ဒူအီ အမ်မူန် ဂေ တွိုန်။ ဂေ ဘော ဂိူတ် ဒီ တီ။ ခုဝ်၊ ဒူအီ အမ်မူန် အီ ကွယ် ဒီ ကာအုန် ကာဒါယ် တီ ဟဲ့ ဘ်ု ဆီချာ ကာအုန် မိူင် ဂေ။ 25 ပါယ် တီ ဂေ ဒူအီ အီဆာရေလ ဘော ပွိုန် မိူင် ဒူအီ အာမုဝ်ရိတ် ဘဲန် ပ့လုဝ့် ဘဲန် ပ့လုဝ့်။ ဂေ ဟဲ့ ပွိုန် ဘော မိူင် ဟေဆာဖူန် ဘော ဒွန် ပ့လုဝ့် အီ ကွယ် ရူပ် မိူင် တွိုန်။ ဂေ ဘော ဝီ ဟာဝ် ကွယ် ခဲင် မိူင် တီ။ 26 မိူင် တာင် ဟေဆာဖူန် တီ မုး ဒူင် ကွယ် ခုန်ဒီခမ် အာဆီဟူန် အီ မုး ဒူအီ အာမုဝ်ရိတ် တွိုန်။ ဒေါ မွိုန် အန် ဟဲ့ ဒွိုမ် ကာဂုဝ်း ဒီ ခုန်ဒီခမ် မုဝ်အာပ်၊ ဝီ ပွိုန် ဒီ အိုပ် မိူင် ဘော မိူင် ကော ဇမ် ဒီ ဘ့လဲင် အိုမ် အာရာနုန် တွိုန်။

27 ခုဝ် အန် တီ ဂေ အီ တဝ်း မှုဝ်၊ ဂေ ဟဲ့ တဝ်း၊

“တဲး အေ ဟာဝ် ဒီ မိူင် ဟေဆာဖူန်၊ တဲး အေ ဝီ မ့ပြာယ် မိူင် ခုန်ဒီခမ် အာဆီဟူန်၊ တဲး န့ ဝီ မွှိုမ်။ 28 ငဝ် ဟဲ့ လေး ခဲင် မိူင် ဟေဆာဖူန်၊ ဟဲ့ ကုး လေး တး ခဲင် ဒူင် ကွယ် ခုန်ဒီခမ် အာဆီဟူန်။ န့ ကာဆိုမ် ဘော မိူင် အာရာ အီ ကွယ် ခဲင် မိူင် မုဝ်အာပ် ဘော ဒူအီ အီ ကွယ် ဒဲင် နွန် နာ ကွာ ဘ့လဲင် အိုမ် အာရာနုန် တွိုန်။ 29 အိုယ် ဘေ ဒူအီ ခဲင် မိူင် မုဝ်အာပ်၊ ဘေ ဟဲ့ ဇမ် ဒုက်။ အိုယ် ဘေ ဒီဘဲ ဇဝ် ခေမူဆာ၊ ဘေ ဟဲ့ လိုဝ် စှိုမ်။ ဇဝ် ပီ ကြိုပ် ဘေ တီ ဟဲ့ တဲး ဂွန် အီမာယ် ဘေ လုဝ် တဝ် ဒါ ဆိုက်၊ ဟဲ့ တဲး ဂွန် အီဘိုန့် ဘေ ကာဒုး ဒီ ခမ် ခုန်ဒီခမ် အာမုဝ်ရိတ် မှေတ့် ဂေ။ 30 ဒူင် နာ ဘေ မိူဝ် ဟဲ့ ဟွတ့် လိုဝ် တူတ့် စုး ဒီ မိူင် ဟေဆာဖူန် ကော ဝီ ဇမ် ဒီ မိူင် ဒီဖူန်။ ယေ မိူဝ် ဟဲ့ ပျာတ့် ဘဲန် မိူင် ဘဲန် မိူင် ကော ဝီ ဇမ် မိူင် နောဖ အီ လာယ် ကာဇာပ် ဒီ မိူင် မေဒေဖာ။” ခဲ့ တီ ပဲ့ ဟဲ့ တဝ်း ဂေ။

31 ပန် အန် တီ ဂေ ဒူအီ အီဆာရေလ ဘော ပွိုန် ဒီ ကွယ် ခဲင် မိူင် ဒူအီ အာမုဝ်ရိတ်။

32 အာမုဝ်ဆဲ ပီ ဝီ စ်ု ဒူအီ ဂေ ဟာဝ် ချွင် ဒီ ယွတ် ပီ ဒီ ပါယ် ဒီ ကာဂုဝ်း ဒီ မိူင် ယာဇေရာ။ ဟဲ့ ဟွတ့်၊ ဂေ ဘော ပွိုန် တူတ့် ရဝ် ဂေ အီ ကွယ် နာ ရေတ့် မိူင် တီ။ ဂေ ဘော ဝီ ဟုဝ် လေး ဒူအီ အာမုဝ်ရိတ် အီ ကွယ် ဒီ တီ။ 33 ဂေ ပီ ဝီ ဝး ဟာဝ် ဒူပ် န့တေန့် အီ ဟာဝ် ဒီ မိူင် ဘာဆန်။ ခုန်ဒီခမ် အာအောခ အီ ကွယ် ဒီ မိူင် ဘာဆန် တီ၊ အန် ဘော ယဲတ့် ဒါ ဆိုက် အန်၊ ဟာဝ် ကာဂုဝ်း ဒီ ဒူအီ အီဆာရေလ ဒီ မိူင် အေတာရီ။

34 ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ ကွဲ့ ယုဝ် အန်။ အုဝ် ဒီ တဲး မဲ ပဲ အန် ဘော ဒူအီ အန် ဘော ကာဒါယ် အန်။ တဲး မဲ ဘူင် ဒီ အန်၊ တဲး န့ ပီ ပီ ဘူင် မဲ ဒီ ခုန်ဒီခမ် အာဆီဟူန် အီ ဟဲ့ အိုပ် ဒူအီ အာမုဝ်ရိတ်၊ အီ ကွယ် ခဲင် မိူင် ဟေဆာဖူန် တွိုန်။”

35 ပါယ် တီ ဂေ ဒူအီ အီဆာရေလ ဘော ပွိုန် ဒီ ငဝ်း ခုန်ဒီခမ် အာအောခ ဘော ဂွန် အီမာယ် အန် ဘော ဂေ ဒူအီ အန်၊ ကွဲ့ တဲး န့ ဆီ ဂိူတ် ခေါ အူ ဝီ။ ဂေ ဘော ပွိုန် တူတ့် မိူင် အန်။