1 ခဲ့ ကွယ် ဂေ ဒူအီ အီဆာရေလ ဘောကာဂ့လျီတ် ဟဲ့ တး ဇမ် ခဲင် ပြဲ ကာဟဝ်း အီ စိူဝ် စီနာ ဒေါ မုး မာဂျီန် ဒေါ ဂုဝ်။ ဂေ ဘော ချ ကွယ် ဒူင် စိူဝ် ဆာဒေတ်။ ဒေါ အန် တီ နာင် မီရီယမ် ဘော ယမ် ဒီ တီ။ ဂေ ဘော ဒိပ် အန် ဒီ တီ။

2 ဒေါ ကွယ် ဂေ ဒီ တီ၊ ဂေ တူ မိုဝ်း ဒီ ဒျီင် အိုမ်။ ခဲ့ ကွယ် ဒူအီ ဂေ တွိုန် ဘောကာဂ့လျီတ်၊ ဂေ ဘော တး ကာဇု ဘော အေး အာမုဝ်ဆဲ ဂါယ် အာရူန်။ 3 ဂေ ဘော ပိုန့် ဘော အေး ကာလာင် ဂြုဝ်း တူ မွှိုမ် တဝ်း၊ “ဆေ ဘော ယေ ယမ် ဒူပ် ဘီနွင် ယေ အီ ဟဲ့ ယမ် ဒီ အာတ့် ဇဝ်ဖြာ တွိုန်၊ န့ ဟဲ့ မွှိုမ် ဒီ ယေ။ မှဝ် န့ ပါယ် ပီ လုဝ် မဲ ယဲတ့် တး ယေ ဒီ နီ။း 4 ဘော ယေ ဘော ဒုဝ် ဆတ်ဒါဝါ ယေ၊ မှဝ် န့ ပါယ် ပီ ဝီ လုဝ် ယဲတ့် မဲ၊ တဲး ယေ တး ယမ် ဒီ နီ။း 5 မှဝ် န့ ပါယ် ပီ လုဝ် ယဲတ့် မဲ ယေ လေး ခဲင် မိူင် အဲဂိုပ်၊ တဲး ယေ ဝီ တး ကွယ် ဒူင် တူ မွှိုမ် နီ။း ဒီ နီ၊ ဆမ် မာဆေ မိူဝ် အာဝ် ပွိုန်။ ဆမ် ဘ့လေ ဒီပူ၊ ဘ့လေ မာငုန် ဂေ ဘ့လေ မာစက် မိူဝ် အာဝ် ပွိုန်။ အိုမ် ပီ ဒီ ဒျီင် မိူဝ်၊ အာဝ် မိုဝ်း။”

6 ပါယ် တီ အာမုဝ်ဆဲ ဂါယ် အာရူန် ဘော လေး ဒူင် ကွယ် ဒူအီ ကိူန် ဂေ တီ၊ ဝီ ဟာဝ် ဒီ ဘာင် မာလုဝ်း ထိုပ် ဘိက် ဘွတ် တွိုန်၊ ဝီ မုတ် ဂိုပ် ဒီ အာတ့် ဇဝ်ဖြာ။ ဒေါ အန် တီ အာဖုင် ဒင်ခုဝ် ဇဝ်ဖြာ ဘော လိုဝ်း ဆီချာ ဒီ ဂါယ်။ 7 ဇဝ်ဖြာ ဝီ တဝ်း ဒီ အာမုဝ်ဆဲ၊ 8 “တဲး မဲ ဒိုဝ်း န့ကြွုန် မဲ၊ တဲး ဘာယ် အာရူန် ဟာဝ် ဒဲ့ ကာဇု ဂေ ဒူအီ ကိူန်။ တဲး မဲ ကာလာင် ဒီ ဒါအာင် မာဝ် အီ ကွယ် နာ တ တွိုန်၊ တဲး ဘော ဒူအီ ကိူန် ဂေ တီ ထူမ်၊ တဲး န့ လေး အိုမ်။ အိုမ် မိူဝ် ဒီ လေး ခဲင် ဒါအာင် မာဝ် တီ၊ တဲး ဘော ဒူအီ ဘော ဒုဝ် ဆတ်ဒါဝါ ပွိုန် ဒီ ဒျီင် ဖဲ။”

9 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဘော ဟာဝ် ဒိုဝ်း န့ကြွုန် တွိုန်။ အန် ဘော ဘူင် ဒူပ် ပီ ကာလာင် ဇဝ်ဖြာ တီ။ 10 ဂါယ် အာရူန် ဘော ဒဲ့ ကာဇု ဒူအီ ကိူန် ဂေ တွိုန် တး ဇမ် နာ အာတ့် ဒါအာင် မာဝ် တွိုန်။ အာမုဝ်ဆဲ ဝီ တဝ်း၊ “အိုယ် ဘေ ဒူအီ အီ အွန် ဒီ ဘူင် ကာဘး ဆေဆေ၊ တဲး ဘေ ထူမ်။ ဘေ ဆီ တဲး ယာယ် ဘူင် တဲး အိုမ် လေး ခဲင် ဒါအာင် မာဝ် တာင် နီ။း” 11 ဟဲ့ ဟွတ့်၊ အာမုဝ်ဆဲ ဘော ဒိုဝ်း န့ကြွုန် တွိုန်၊ မး ဒါအာင် မာဝ် တီ အာ ဇေန့်။ ပါယ် တီ အိုမ် တာင် ဘော မာတုး လေး အူ ဇေန့်။ ဘော ဒူအီ ဘော ဒုဝ် ဆတ်ဒါဝါ ဘော ပွိုန် ဒီ ဒျီင် ဖဲ အိုမ် တီ။

12 ဇဝ်ဖြာ ဝီ တဝ်း ဒီ အာမုဝ်ဆဲ ဂါယ် အာရူန်၊ “ဘာယ် တူ ညှိုမ် ဆီချာ အုဝ်။ ဘာယ် တူ ဘူင် တဲး ဂေ ဒူအီ အီဆာရေလ ရုဝ်ဆေ အုဝ်။ ခုဝ် အန် တီ၊ ဘာယ် တူ ပွိုန် ဒီ ယဲတ့် ဟာဝ် ဂေ၊ တဲး ဂေ ဇမ် ခဲင် မိူင် ပဲ့ ဟဲ့ တဝ်း အုဝ် ဒီ အာပ် ဒွါ ဒီ ဂေ။”

13 လွင် အန် တီ၊ န့ ဘုဝ် ဘဲန် ဒီ ဒူင် စိူဝ် မေရီဘာ။ န့ မုး ဒူင် ပိုန့်၊ ဒူင် ကာဘး ဂေ ဒူအီ အီဆာရေလ ဒီ ဇဝ်ဖြာ။ ဒီ တီ၊ ဇဝ်ဖြာ ဘော ဘျ ခဲ့ ဘွတ် ခဲ့ မျာတ် အန်။

14 ဒေါ ကွယ် ဂေ ဒူင် အီ စိူဝ် ဆာဒေတ် တီ၊ အာမုဝ်ဆဲ ဝီ စ်ု ဒါလာမ် အန်၊ တဲး ဂေ ဟာဝ် ဒူင် ကွယ် ခုန်ဒီခမ် ခဲင် မိူင် အေဒူမ်၊ တဲး ဂေ ဟာဝ် ကာလာင် ဒီ ခုန်ဒီခမ် တဝ်း၊ “ယေ တး ကာလာင် လွင် ဂေ ဘီနွင် မဲ အီ မုး ဒူအီ အီဆာရေလ။ မဲ ခုန်ဒီခမ် မိူဝ် ဟဲ့ နပ်၊ ခဲ့ တာင် ဒုက် ယေ။ 15 ဂေ ဂုန့် ဒင် ယေ ဟဲ့ ဟာဝ် ကွယ် ခဲင် မိူင် အဲဂိုပ် တွိုန်။ ယေ မိူဝ် ဟဲ့ ကွယ် ခဲင် မိူင် တီ၊ ဟဲ့ လှေန့် ကာဆဝ်။ ဂေ ဒူအီ အာမျုဝ် အဲဂိုပ် မိူဝ် ဟဲ့ ခါနှာပ် ကာဆဝ် ယေ ဘော ဂုန့် ဒင် ယေ ဂေ တီ။ 16 ယေ ဘော ဝီ ဆာခိုဝ် ဒီ ဇဝ်ဖြာ၊ အန် ဇဝ် ဘော ထူမ် ပီ ဆာခိုဝ် ယေ။ အန် ဇဝ် ဘော စ်ု အာမူ အာမာတ် အန် ယဲတ့် လေး ယေ ခဲင် မိူင် အဲဂိုပ် တီ။ ဒေါ တီ နီ၊ ယေ ဟဲ့ ဝီ တး ကွယ် ဒီ ကာအုန် ကာဒါယ် ခူပ် မိူင် မဲ ခုန်ဒီခမ် နီ။ မဲ ဇဝ် မိူဝ် ဟဲ့ နပ် လွင် အန် တီ။ 17 ခုဝ်၊ ယေ မှာန့်၊ တဲး မဲ ခ့ဝါင် တဲး ယေ ကာလုဝ်း ဟာဝ် ကာတဲ မိူင် မဲ နီ။ ဘော ယေ ဘော ဒုဝ် ဆတ်ဒါဝါ ယေ၊ ယေ ဒီ ဟာဝ် မီ ဒူပ် န့တေန့်။ ယေ တူ လိုပ် ညဲတ့် မာန် ငှုဝ် ဘော မာန် မာငုန် ဘေ။ အိုမ် ခိုမ် ဘေ မိူဝ်၊ ယေ တူ ဒျီင်။ ယေ ဒီ ဟာဝ် ဆိူဝ် ဒူပ် န့တေန့် တာင်၊ တဲး ယေ ကော ကာလုဝ်း ပွုန် ကာအုန် ကာဒါယ် ခဲင် မိူင် မဲ နီ။”

18 မာလဲ၊ ခုန်ဒီခမ် ခဲင် မိူင် အေဒူမ် တီ ဝီ တဝ်း၊ “ဘေ တူ ပွိုန် ကာလုဝ်း ဟာဝ် ကာတဲ မိူင် ယေ နီ။ ဆေ ဘေ ကာလုဝ်း ဟာဝ် ကာတဲ မိူင် ယေ နီ၊ ယေ ဒီ ကာဂုဝ်း ဒီ ဘေ။”

19 ဂေ ဒူအီ အီဆာရေလ ဝီ တဝ်း ဒီ ခုန်ဒီခမ် ခဲင် မိူင် အေဒူမ် တီ၊ “ယေ ဒီ ဟာဝ် ဒီ ပ့လဝ်၊ ဟာဝ် မီ ဒူပ် န့တေန့်။ ဆေ ယေ ဘော ဒုဝ် ဆတ်ဒါဝါ ယေ ဘော ကာလုတ့် ဒီ ဒျီင် အိုမ် ခဲင် မိူင် ဘေ နီ၊ ယေ ဒီ ခေ ငဝ်း အန်။ ယေ မှာန့်၊ တဲး မဲ ခ့ဝါင် တဲး ယေ ကာလုဝ်း။ ယေ တူ ဘူင် မာဆေ။”

20 ခုန်ဒီခမ် ဝီ တဝ်း ဒီ ဂေ၊ “အုဝ် တူ တဲး ဘေ ကာလုဝ်း။” ပါယ် တီ ခုန်ဒီခမ် မိူင် အေဒူမ် တီ ဘော ရဲန် ကိူန် ဒါ ဆိုက် အန် အီ ကျ၊ အီ မိုဝ်း ပ့လူမ် တာင်၊ တဲး ဂေ ကာဂုဝ်း ဒီ ဒူအီ အီဆာရေလ။

21 ကူပ် တူ ခ့ဝါင် ခုန်ဒီခမ် ခဲင် မိူင် အေဒူမ် ဂေ ဒူအီ အီဆာရေလ ကာလုဝ်း ဟာဝ် ကာတဲ မိူင် ဂေ၊ ဂေ ဒူအီ အီဆာရေလ ဘော ဝီ ကာဒုး ဒီ ဝီ ဝး ဟာဝ် ပေါ န့တေန့်။

22 ဂေ ဒူအီ အီဆာရေလ ဘော လေး ဒီ ဒူင် စိူဝ် ဆာဒေတ် တွိုန်၊ ဝီ ဟာဝ် ကွယ် ဒီ နွန် ဟုဝ်ရာ။ 23 ဒူင် တီ ကွယ် ခူပ် ကာအုန် ကာဒါယ် မိူင် အေဒူမ် တွိုန်။ ဒေါ ကွယ် ဂေ ဒီ တီ၊ ဇဝ်ဖြာ ဝီ ကာလာင် ဒီ အာမုဝ်ဆဲ ဂါယ် အာရူန် တဝ်း၊ 24 “အာရူန် တူ ပွိုန် ဇမ် ခဲင် မိူင် ပဲ့ ဟဲ့ ကာဆဲန့် အုဝ် ဒီ ဒွါ ဒီ ဂေ ဒူအီ အီဆာရေလ။ ကူပ် ဟဲ့ ကာဘး အန် ဒီ ဂြုဝ်း အုဝ် ဒေါ ကွယ် ဘေ ဒီ ဒူင် စိူဝ် မေရီဘာ တွိုန်၊ အန် လုဝ် ယမ်။ 25 တဲး မဲ ဒဲ့ အာရူန် ဘော ဂွန် အီမာယ် အန် အီ စိူဝ် အာလေအာဆာ၊ တဲး ဘေ ဟုဝ့် ဒီ နွန် ဟုဝ်ရာ။ 26 မဲ လုဝ် ဘုတ့် လေး ခြိုင် ဒါ အီ လှူ ဒီ ဇဝ်ဖြာ ပီ တာ အာရူန်၊ ဝီ စှိုပ် ဒီ ဂွန် အန် အီ စိူဝ် အာလေအာဆာ တီ။ အာရူန် ဒီ ယမ် ဒီ တီ။ အန် လုဝ် ဝီ ဟာဝ် ကွယ် ဒူင် ကွယ် ဒူအီ အာမျုဝ် အန်။”

27 အာမုဝ်ဆဲ ဘော ဘူင် ဒူပ် ပီ ကာလာင် ဇဝ်ဖြာ တီ။ ဂေ ဘော ကာဒူပ် ဟုဝ့် ဒီ နွန် ဟုဝ်ရာ၊ တဲး ဘော ဒူအီ အီဆာရေလ ဘောကာဂ့လျီတ် ယိုဝ်။ 28 အာမုဝ်ဆဲ ဘော ဘုတ့် လေး ခြိုင် ဒါ အီ လှူ ဒီ ဇဝ်ဖြာ ပီ တာ အာရူန် တွိုန်၊ ဝီ စှိုပ် ဒီ ဂွန် အန် အီ မုး အာလေအာဆာ။ အာရူန် ဘော ယမ် ကာဒဲ့ နွန် တီ။ ဝါယ် အန် တီ အာမုဝ်ဆဲ ဂါယ် အာလေအာဆာ ဝီ တး လူင် ဒီ နွန် တွိုန်။ 29 ဖိုင် ဂေ ဒူအီ ကိူန် ဘော နပ် လွင် ဟဲ့ ယမ် အာရူန် တီ၊ ဂေ ဘော ကာဖြူမ် ဒီ ယာမ်၊ ဒီ က့လိုဝ် အာဒါ အာရူန် တီ၊ တဲး န့ ကော နုဝ့် အူယ် ဂိုဝ် ဆီငဲ။