1 ဇဝ်ဖြာ ဝီ စ်ု အာမုဝ်ဆဲ ဂါယ် အာရူန်၊ 2 တဲး ဂါယ် ဝီ ကာလာင် ပီ မှာန့် ဒါရာ ဒီ ဂေ ဒူအီ အီဆာရေလ။ ဇဝ်ဖြာ တဝ်း၊ “တဲး ဂေ ဒူအီ အီဆာရေလ ဒိုဝ်း တး မာမက် ဒုဝ် မာ အီ ရေန့် အူ ဒုဝ်၊ ဒွါ ဒီ ဘာယ်။ ကွဲ့ တဲး န့ မိုဝ်း ဒူင် စှေ ဒူင် နဲ။ လုဝ် ဒိုဝ်း အီ ညှမ် ဒွိုမ် ဒါင် ခေါ အူ ဇေန့်။ 3 ဘာယ် လုဝ် ဒိုဝ်း မာမက် တီ၊ ဝီ ဒွါ ဒီ ဒါ အီ လှူ ဒီ ဇဝ်ဖြာ အီ စိူဝ် အာလေအာဆာ။ အန် လုဝ် ဒိုဝ်း မာမက် တီ၊ လေး နာ ရေတ့် ဒူင် ချ ဘေ၊ ဝီ စ်ု ဒူအီ အူ ဝီ ငဝ်း ဒုဝ် တီ ဒီ အာတ့် အန်။ 4 ဟဲ့ ဟွတ့်၊ အာလေအာဆာ လုဝ် ဒိုဝ်း ကာနူ အန်၊ ဝီ စိုပ် ခဲင် နှာမ် မာမက် တီ၊ ဝီ မာငး ယွတ် နာ ကွယ် ထိုပ် ဘိက် ဘွတ်၊ ဝီ ကာထေတ့် နှာမ် တီ အာဒါ ဘူ ဇေန့်။ 5 ဒူအီ ဝီ အီ ငဝ်း မာမက် တွိုန် လုဝ် ဝီ ဒိုဝ်း မာမက် တီ၊ ဘော ဒုဝ် ဘော ယင် အန် ဘော ဟုန် အန် ဘော နှာမ် အန် ဂေ ညွင့် ဝတ့် အန်၊ ဝီ ဒုဝ့် နာ အာတ့် ဒါ အီ လှူ ဒီ ဇဝ်ဖြာ တွိုန်။ 6 ဒါ အီ လှူ ဒီ ဇဝ်ဖြာ လုဝ် ဝီ ဒိုဝ်း ဟေ အာရိတ် မင် ကာလဝ့် ဘော ဒဝ် ဟူဆူပ်၊ ဘော ဆေန့် အီ ရေန့် ဂဲ၊ ဝီ ဒုဝ့် ခဲင် ငဝ် ဒူပ် မာမက် တီ။ 7 ဆေ ဟဲ့ ဟွတ့် ပါယ် တီ ဒါ အီ လှူ ဒီ ဇဝ်ဖြာ လုဝ် ဝီ တာ အိုမ်၊ ဝီ လး ဘော ခြိုင် ပီ တာ အန်။ ဝါယ် တီ၊ အန် ဟဲ့ ပွိုန် ဝီ လိုပ် တး ခဲင် ဒူင် ချ ဘေ။ အန် ယီ တူ ဆီငါ ဒူပ် ပီ ဒမ် ဒါရာ ကော ဇမ် ဘာ ဒီ အပ်။ 8 ဘော ဒူအီ အီ ဒုဝ့် မာမက် တွိုန်၊ ဘော အန် လုဝ် ဝီ တာ အိုမ် ဘော လး ခြိုင် ပီ တာ အန်။ အန် မိူဝ် တူ ဆီငါ ကော ဇမ် ဘာ ဒီ အပ်။

9 ဟဲ့ ဟွတ့် ပါယ် တီ ဒူအီ အီ ဟဲ့ ဆီငါ အူ ဝီ၊ လုဝ် ဝီ ဟာဝ် ဂဲပ် ကာဇု ဘြဝ် ကာဝှါင် ဒူင် ဒုဝ့် ဂေ မာမက် တီ၊ တဲး အန် ဝီ ဟာဝ် အုန် နာ ရေတ့် ဒူင် ချ ဘေ အီ မုး ဒူင် ဆီငါ ဘွတ် ဒူပ် ပီ ဒမ် ဒါရာ။ ဘြဝ် တီ၊ ဘေ လုဝ် ဂဲပ် အုန် အာဒါ ဂေ ဒူအီ အီဆာရေလ၊ လုဝ် ဟပ် ခဲင် အိုမ်၊ တဲး အိုမ် တီ ဘာယ် ဝဲန် အီ တူ မွှိုမ်။ န့ ဒီ ဘဲန် အိုမ် အီ ဘာယ် ဝဲန် မှာပ်။ 10 ဒူအီ အီ ဂဲပ် အုန် ဘြဝ် တီ၊ အန် မိူဝ် လုဝ် ဝီ လး ခြိုင် ပီ တာ အန်။ အန် မိူဝ် တူ ဆီငါ ကော ဇမ် ဘာ ဒီ အပ်။ အာနီ န့ မုး ဒါရာ ပီ လုဝ် ဒူပ် ဂေ ဒူအီ အီဆာရေလ ဘော ဂေ ဒူအီ အာမျုဝ် ဟဝ် အီ ကွယ် ရိုမ် ဒူပ် ဂေ ဆေဆေ။

11 ဆေ န့ မိုဝ်း ဒူအီ အီ ဟဲ့ တာ ဒိုဝ် တာ ပါ ဒူအီ ယမ်၊ အန် တူ ဆီငါ အာဒါ ဘူ ဆီငဲ။ 12 အန် လုဝ် ဝီ ဘူင် တဲး ဒုဝ် အန် ဆီငါ။ အန် လုဝ် ဝီ တာ အိုမ် တွိုန် ဒေါ ဟဲ့ နုဝ့် အူယ် ဆီငဲ ဘော ဒေါ ဟဲ့ နုဝ့် ဘူ ဆီငဲ။ ဆေ အန် ယီ တူ ဘူင် ပါယ် တီ အန် တူ ဆီငါ။ 13 ဆေ န့ မိုဝ်း အီ ဟဲ့ တာ ပါ ဒူအီ ယမ်၊ ဆေ အန် တူ ဘူင် တဲး ဒုဝ် အန် ဆီငါ၊ အန် ယီ ကွယ် ပါယ် တီ အန် မိူဝ် တူ ဒိုဝ်း အိုမ် အီ တဲး အီ ဆီငါ တွိုန်၊ တူ ခြဝ်း ဒီ အန်၊ န့ ပီ အန် တူ ရုဝ်ဆေ ထိုပ် ဘိက် ဘွတ်၊ ဘူင် တဲး န့ ချဝ့်။ ဒူအီ ဝီ တီ ဘေ တူ ပွိုန် မာတ် အန် မုး ဒူအီ အီဆာရေလ။

14 ဆေ န့ မိုဝ်း အီ ယမ် ခဲင် ထိုပ်၊ ဘော ဂေ အီ ကွယ် ခဲင် ထိုပ်၊ ဘော ဂေ အီ တး လိုပ် ခဲင် ထိုပ် တီ၊ ဂေ တူ ဆီငါ ကော နုဝ့် ဘူ ဆီငဲ။ 15 ဘော ကာလုဝ့် ဂေ မ့ပါန် အီ တူ ဆီဘ့လိုက် ဒွန် မျုဝ် အာဝ် ဟူ ဆီငါ။

16 ဆေ န့ မိုဝ်း ဒူအီ အီ ယမ် ဒီဂ့လ၊ ဘော မုး ယမ် ဒီ မာပွါ့ လာင်၊ ယမ် ဒီ ဆဝ် ရောဂါ အာဝ် တဝ်း၊ ဆေ န့ မိုဝ်း အီ တာ ဒိုဝ် တာ ပါ ဒူအီ ယမ် တီ၊ တာ ဒိုဝ် ကာအာင် ဒူအီ ယမ် ဘော အွုန် ဒူအီ ယမ်၊ ဘော အန် တူ ဆီငါ အာဒါ ဘူ ဆီငဲ။

17 ဒူအီ အီ တူ ဆီငါ ဂေ တီ၊ ဂေ လုဝ် ဒိုဝ်း ဘြဝ် မာမက် တွိုန် မင် ကာလဝ့်၊ ဝီ ဟပ် ခဲင် ကာလုဝ့်၊ ဝီ ဟပ် ဘော အိုမ် အီ တဝ့် တး ကာမာယ်။ 18 ဟဲ့ ဟွတ့်၊ ဒူအီ အူ ဝီ အီ ဟဲ့ ဆီငါ ဒူပ် ပီ ဒမ် ဒါရာ၊ လုဝ် ဝီ ဒိုဝ်း ဒဝ် ဟူဆူပ် ဝီ စိုပ် ခဲင် အိုမ် တီ၊ ဝီ ခြဝ်း ဒီ ထိုပ် ဘိက် ဒူအီ အီ ယမ် တီ၊ ခြဝ်း ဘော ဒီ ခြိုင် တာ ဒွန် မျုဝ် အီ ကွယ် ခဲင် ထိုပ် တီ။ အန် လုဝ် ခြဝ်း ဘော ဒီ ဂေ ဒွန် အီ ဒူအီ အီ ဟဲ့ တာ ပါ ကာအာင် ဒူအီ ယမ်၊ ပါ ဒုဝ် ဒူအီ ယမ် ဘော အွုန် ဒူအီ ယမ် ဂေ တွိုန်။ ဘော မုး ဒူအီ ယမ် စာဝ်၊ ဘော မုး ဒူအီ ယမ် ဒါခိုယ် အာဝ် တဝ်း၊ ဘေ လုဝ် ဘူင် ပါယ် တီ။ 19 ဒူအီ အီ ဟဲ့ ဆီငါ တီ၊ အန် လုဝ် ဒိုဝ်း အိုမ် တွိုန်၊ ခြဝ်း ဒီ ဒူအီ အီ တူ ဆီငါ ဒေါ ဟဲ့ နုဝ့် အူယ် ဆီငဲ ဘော ဒေါ ဟဲ့ နုဝ့် ဘူ ဆီငဲ။ ဆေ ဟဲ့ ဟွတ့် နုဝ့် ဘူ ဆီငဲ၊ အန် လုဝ် ဘူင် တဲး ဒူအီ ဝီ တွိုန် ဝီ ဆီငါ။ ဒူအီ အီ တူ ဆီငါ ဝီ တီ မိူဝ်၊ အန် လုဝ် ဝီ တာ အိုမ်၊ လး ဘော ခြိုင် ပီ တာ အန်။ ဟဲ့ ဟွတ့်၊ ဘာ ဒီ အပ် အန် ဟဲ့ ဝီ ဆီငါ ဒူပ် ပီ ဒမ် ဒါရာ။ 20 ဒူအီ အီ တူ ဆီငါ တွိုန်၊ ဆေ အန် တူ ဘူင် တဲး အန် ဝီ ဆီငါ ပါယ် တီ ဆေ အန် တူ ခမ် ဒီ ဒိုဝ်း အိုမ် အီ တဲး အီ ဆီငါ တွိုန်၊ တူ ခမ် အီ ခြဝ်း ဒီ အန်၊ ဒူအီ ဝီ တီ ပီ အန် တူ ရုဝ်ဆေ ထိုပ် ဘိက် ဘွတ်။ အန် ဘူင် တဲး န့ ချဝ့်။ အာဝ် ဟူ ပွိုန် မာတ် အန် မုး ဒူအီ အီဆာရေလ။ 21 ဒါရာ တီ ဘေ လုဝ် ဒူပ် တဲး န့ ကော ဇမ် စုဝ် လှုက် စုဝ် လှာန် ဘေ ဒွန် စုဝ် ဒွန် ဘာန်။ န့ ယီ မုး ဒူအီ ဝီ အီ ဆီငါ တွိုန်၊ အီ ဟဲ့ ဟွတ့် ဒိုဝ်း အိုမ်၊ ခြဝ်း ဒီ ဝီ အီ တူ ဆီငါ၊ ဘော အန် လုဝ် ဝီ တာ အိုမ်၊ လး ဘော ခြိုင် ပီ တာ အန်။ ဝီ အီ တာ အိုမ် အီ ဘာယ် ဝဲန် အီ တူ မွှိုမ် တီ၊ ဘော အန် အာဝ် ဟူ ဆီငါ ဇမ် ဘာ ဒီ အပ်။ 22 ဆေ န့ မိုဝ်း ဒူအီ အီ တူ ဆီငါ ပါယ် တီ ပီ တာ ဒိုဝ် အန် ဒွန် မျုဝ်၊ န့ ဘဲန် တူတ့် အီ တူ ဆီငါ။ ဘော ဒူအီ အီ ဝီ တာ ဒိုဝ် ဇိုဝ် တီ၊ အန် အာဝ် ဟူ ဆီငါ ကော ဇမ် ဘာ ဒီ အပ်။”