1 ဇဝ်ဖြာ ဝီ ကာလာင် ဒီ အာရူန် တဝ်း၊ “ဆေ န့ မိုဝ်း ဝီ အီ ဘူင် ကာလိုပ် ခဲင် ထိုပ် ဘိက် ဘွတ်၊ ဘော မဲ ဘော ဂွန် အီမာယ် မဲ ဒွန် အီ ဘော ဂေ ဒူအီ အာမျုဝ် အာလေဝီ တွိုန် လုဝ် ခမ် မှာပ် တီ။ ဆေ န့ ယီ မုး ဒါ အီ လှူ ဒီ ဇဝ်ဖြာ အီ ဘူင် ကာလိုပ် ဂါန် ဂေ၊ န့ ဘော မုး မဲ ဂေ ဂွန် မဲ၊ ဘေ လုဝ် ခမ် မှာပ် တီ။ 2 တဲး မဲ ဒဲ့ ဘီနွင် မဲ အီ မုး အာမျုဝ် အာလေဝီ ဂေ တွိုန်၊ တဲး ဂေ ဘူင် ရိုမ် ဂါန် ဒူပ် မဲ၊ တဲး ဂေ စွယ် မဲ ဒေါ ဘူင် ဘေ ဂွန် မဲ ဂါန် ဒီ အာတ့် ထိုပ် ဘိက် ဘွတ် တွိုန်။ 3 ဒူအီ ဂေ တီ၊ ဂေ လုဝ် ဘူင် ပီ စ်ု ဘေ၊ ဘော ယွတ် လိုမ်လာ တူတ့် ဒွန် မျုဝ် ခဲင် ထိုပ် ဘိက် ဘွတ်။ မာလဲ၊ ကွဲ့ တဲး ဂေ တး ချြီ့ ခြိုင် တာ အီ ဆီငါ ဘွတ် ဘော ကာစှူင့် လှူ ဒေါ မှဝ်၊ ကွဲ့ တဲး ဘေ လုဝ် ယမ်။ 4 ဂေ လုဝ် ဘူင် ရိုမ် ဂါန် ဒူပ် ဘေ၊ လုဝ် ယွတ် လိုမ်လာ မီ ဂါန် အီ ကွယ် ခဲင် ထိုပ် ဘိက် ဘွတ်။ ဂေ အီ ဟဝ် အီ တူ ကာအာပ် ဘူင် ဂါန် မဲ၊ ကွဲ့ တဲး ဂေ တး ချြီ့ ဘေ။

5 န့ မိုဝ်း မီ မဲ ဘော ဂွန် မဲ အီ ပွိုန် ယွတ် လိုမ်လာ ဒူင် ဆီငါ ဘွတ်၊ ယွတ် လိုမ်လာ ကာစှူင့် လှူ။ ဆေ န့ ပါယ် တီ ဝါယ် နီ၊ အုဝ် အာဝ် ဟူ လုဝ် ရူ ဒီ ဂေ ဒူအီ အီဆာရေလ။ 6 အုဝ် မုး ဒါ ကာညာ အီ ဟဲ့ ရဝ်း ဂေ ဒူအီ အာမျုဝ် အာလေဝီ၊ တဲး ဂေ ကာယဝ်း ဒီ ဒူအီ အီဆာရေလ။ အုဝ် ဟဲ့ အာပ် ဂေ ဒီ မဲ။ တဲး ဘေ ပွိုန် ဒီ ဘူင် ဂါန် ခဲင် ထိုပ် ဘိက် ဘွတ်။ န့ ပီ ဂေ ဒူအီ အာမျုဝ် အာလေဝီ ဟဲ့ ဘဲန် ခါဂုန် ပီ ဒွါ အုဝ် ဒီ မဲ။ 7 မာလဲ၊ န့ မိုဝ်း မီ မဲ ဘော ဂွန် မဲ အီ ပွိုန် ဘဲန် ဒါ အီ လှူ ဒီ ဇဝ်ဖြာ၊ ပွိုန် ဘူင် ဂါန် ဒီ ကာစှူင့် လှူ ဘော ဒီ ဒူင် ဆီငါ ဘွတ် လွှိုမ် တူတ့် တွိုန်။ ဇိုဝ် တီ မုး ဘေ အီ လုဝ် ယွတ် လိုမ်လာ။ ခုဝ်၊ အုဝ် ဟဲ့ ဂေဇူ ဘေ၊ တဲး ဘေ ပွိုန် ဒီ ဘဲန် ဒါ အီ လှူ ဒီ ဇဝ်ဖြာ။ ဆေ န့ ယီ မိုဝ်း အီ ဟဝ်၊ အီ တူ ကာအာပ် တး၊ ဆေ အန် တး ချြီ့ ခြိုင် တာ အီ ဆီငါ ဘွတ် တီ၊ အန် လုဝ် ယမ် အာခ်ု မှာန်။”

8 ဇဝ်ဖြာ ပီ ဝီ ကာလာင် ဒီ အာရူန် တဝ်း၊ “အုဝ် ဟဲ့ ဒိုဝ်း ဒွါ ဒီ မဲ ကြုဝ် အီ ဆီငါ ဘွတ် အီ မုး ပီ လှူ ပီ ဒါင် ဂေ ဒူအီ အီဆာရေလ ဒီ ဇဝ်ဖြာ။ အုဝ် ဟဲ့ ဒွါ ဒီ မဲ ဘော အီ ဆီငါ ဘွတ် ဘဲန် မျုဝ် ဘဲန် မျုဝ် အီ မုး ပီ လှူ ဂေ၊ တဲး န့ ဝီ ဘဲန် ကြုဝ် မဲ ဘော ကြုဝ် ဂေ လှုက်လှာန် မဲ ဆေဆေ။ 9 ခဲ့ ကွယ် ကြုဝ် ပီ လှူ အီ ဒဲင် ကာစှူင့် လှူ ပီ တူ ဒုဝ့် ဒီ ငဝ်၊ န့ ဘဲန် ကြုဝ် မဲ။ န့ ဘော မုး ပီ လှူ ဒီဂါဝ် ဘဲန် မျုဝ် ဘဲန် မျုဝ်၊ ပီ လှူ အီ ဂဝ်း ဝဲန် မှာပ် ဘော ပီ လှူ အီ တဲး ဒူအီ ဝီ ကာလဝ့် ဒီ ဇဝ်ဖြာ၊ အီ ဟဲ့ ဆီငါ ဘွတ်၊ ပီ ဝါက် လေး ဂေ ဒီ ပီ လှူ ဂေ တီ၊ ဟဲ့ ဝီ ဘဲန် ကြုဝ် မဲ ဘော ကြုဝ် ဂေ ဂွန် အီမာယ် မဲ။ 10 ဘေ အီမာယ် ဒွန် အီ လုဝ် ဟူမ် ဒီ ဒူင် ဆီငါ ဘွတ်။ ဘေ လုဝ် မာတ် န့ မုး အီ ဆီငါ ဘွတ် ကာဆဝ်။

11 ဘော ပီ ဝါက် လေး ဘေ ဒီ ပီ လှူ ဂေ ဒူအီ အီဆာရေလ၊ အီ မုး ပီ လှူ အီ မာဝတ် ဝိဝ် မာဝတ် ဝေန့်၊ အုဝ် ဟဲ့ ဝီ ဒွါ ဒီ မဲ၊ တဲး ဘော မဲ ဘော ဂွန် အီဘိုန့် ဂေ ဂွန် အီမာယ် မဲ ဒွန် အီ ပွိုန် ဒီ ဟူမ်။ ဒူအီ ခဲင် န့ဟူမ် မဲ အီ ဆီငါ ဘွတ် ဒူပ် ပီ ဒမ် ဒါရာ ဟဲ့ ပွိုန် ဟူမ် ဒွန် အီ။

12 ဘော နာမန် ဂေ အိုမ် မာငုန် အီ ဟဲ့ မွှိုမ် လွှိုမ် တူတ့် ဘော ကာပဲ့ ခဝ်ချုင် ပီ ဆုဝ့် ဂေ ဒီ အာတ့်၊ အီ ဟဲ့ မွှိုမ် လွှိုမ် တူတ့်၊ အီ မုး ပီ လှူ ဂေ ဒီ အုဝ် အူ ဆီနမ် အူ ဇေန့်၊ အုဝ် ဟဲ့ အာပ် ဒွါ တူတ့် ဒီ မဲ။ 13 ခဲ့ ကွယ် ဘ့လေ ဒွန် မျုဝ် အီ မုး ဘ့လေ ဒင် ပီ တး လှူ ဂေ ဒီ ဇဝ်ဖြာ၊ အုဝ် ဟဲ့ အာပ် ဒွါ ဒီ မဲ။ ဒူအီ ခဲင် န့ဟူမ် မဲ အီ ဆီငါ ဘွတ် ဒူပ် ပီ ဒမ် ဒါရာ ဟဲ့ ပွိုန် ဟူမ် ဒွန် အီ။

14 ဘော ပီ ဒိူင် ပီ ကာဆဲန့် ဂေ ဒူအီ အီဆာရေလ ဒီ လှူ ဒီ အုဝ်၊ န့ ဟဲ့ ဘဲန် တူတ့် ကြုဝ် မဲ။ 15 ခဲ့ ကွယ် ဂွန် ဂိန့်၊ ဘော မုး ဂွန် ဒူအီ ဘော မုး ဂွန် ဒုဝ် ဆတ်ဒါဝါ၊ ခဲ့ ပီ လှူ ဂေ ဒီ အုဝ် ဟဲ့ ဘဲန် တူတ့် ကြုဝ် မဲ။ မာလဲ၊ ဆေ န့ မုး ဂွန် ဒူအီ ဘော ဂွန် ဒုဝ် ဆတ်ဒါဝါ ဒုဝ် အီ တူ ဆီငါ၊ မဲ လုဝ် ဝီ ထုတ် ဝိဝ် ဂေ ဒီ မဲ။ 16 အီ မုး ဂွန် ဂိန့် ဒူအီ၊ ဆေ ဟဲ့ နုဝ့် အူ မာဂျီန်၊ ဘေ ကော ပွိုန် ဝီ ထုတ် ဝိဝ်။ ဘေ လုဝ် ထုတ် တာ ရွိုန် ဖန် ဆေခေန် အီ မုး မွက် အူယ် ကျာပ်။ ဘေ လုဝ် ဆ တာ ဘ့လေ ဆ အီ ကွယ် ခဲင် ထိုပ် ဘိက် ဘွတ်။

17 မာလဲ၊ အီ မုး ဂွန် ဂိန့် မာမက်၊ မာဘူ ဂေ မာပဲ အီ မုး ဒုဝ် အာလူင့် ဒွန် ဒုဝ်၊ ဘေ တူ ပွိုန် ဝီ ထုတ် ဝိဝ်။ န့ ဟဲ့ ဘဲန် မီ ကြုဝ် အုဝ်။ မဲ လုဝ် ဘူင် တဲး န့ ဘဲန် ပီ ဒီ လှူ၊ လုဝ် ဒိုဝ်း နှာမ် အန်၊ ခြဝ်း ဒီ ကာစှူင့် လှူ။ အီ မုး ဘျြီင် အန်၊ လုဝ် ဒုဝ့် ခဲင် ငဝ်၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး န့ ဘော အုး ငှုန် ဒီ အာတ့် ဇဝ်ဖြာ။ 18 အီ မုး ယင် အန်၊ န့ ဘဲန် ကြုဝ် မဲ။ န့ ဘော ပီ ဒုဝ် ပီ ဒီ လှူ အီ မာဝတ် ဝိဝ် မာဝတ် ဝေန့် တွိုန်။ ယင် ဒီ ဘင်နဝ်း ဒုဝ် တီ ဘော ဂိုမ် ပန် အန် ဘ့လာက် အာအး ဟဲ့ ဘဲန် ကြုဝ် မဲ။ 19 ကြုဝ် ပဲ့ ဟဲ့ ဝါက် လေး အုဝ် ဒီ ပီ လှူ ဂေ ဒီ အုဝ် ဘောကာဂ့လျီတ်၊ အီ ဟဲ့ ဆီငါ ဘွတ် တွိုန်၊ အုဝ် ဟဲ့ ဝီ အာပ် ဒွါ ဒီ မဲ၊ တဲး န့ ဘဲန် ကြုဝ် မဲ ဘော ကြုဝ် ဂွန် အီဘိုန့် ဂေ ဂွန် အီမာယ် မဲ ဆေဆေ။ န့ မုး ကာဒိက် ဆတ်ဇာ ပီ ဒွါ အုဝ် ဒီ မဲ ဘော ဒီ ဂေ လှုက်လှာန် မဲ။ အုဝ် ဒီ ဘော လှုဝ်း ကာဒိက် ဆတ်ဇာ တီ ဆေဆေ၊ ကွဲ့ တဲး န့ လိုဝ် ဒေါ မှဝ်။”

20 ဇဝ်ဖြာ ပီ ဝီ တဝ်း ဒီ အာရူန်၊ “မဲ တူ ပွိုန် ကာဒါယ် အီ ဒီ ဘဲန် ခါဂုန် ဒီ မဲ။ မဲ မိူဝ် တူ ပွိုန် ဒီ ဘိုင် ခေါ အူ ပ့လုဝ့်။ န့ မုး မီ အုဝ် ဇဝ်ဖြာ အီ ဘဲန် ဒူင် ဒီ ဘိုင် မဲ။”

21 “ကြုဝ်ကြာမ် ပီ လှူ ဂေ ဒူအီ အီဆာရေလ ဒီ အုဝ် အီ မုး ဂိုဝ် ဘုန် အူ ဘုန် တွိုန်၊ အုဝ် ဟဲ့ ဝီ ဒွါ ဒီ ဂေ ဒူအီ ခြိုဝ် အာလေဝီ ကူပ် လိုမ်လာ တူတ့် ဂေ ဒွန် မျုဝ် ခဲင် ထိုပ် ဘိက် ဘွတ်။ 22 ပါယ် တီ ဆိန့် ဒေါ တီ နီ ဟာဝ်၊ ဂေ ဒူအီ အီဆာရေလ အာဝ် ဟူ ပွိုန် တး ကာတတ် ထိုပ် ဘိက် ဘွတ်။ န့ ဒီ ဘဲန် မှာပ် ဒီ ဂေ အီ တဲး ဂေ လုဝ် ယမ်။ 23 မီ ဂေ ဒူအီ အာမျုဝ် အာလေဝီ ပွိုန် ဒီ လိုမ်လာ ထိုပ် ဘိက် ဘွတ်၊ ပွိုန် ဒီ ဘူင် ဂါန် နာ ခဲင်။ ပါယ် တီ ဆေ အီ ကာလိုပ်၊ ဘော မုး မျုဝ် မှဝ် အာဝ် တဝ်း၊ န့ ဘဲန် မှာပ် ဒီ ဂေ။ တဲး ဘေ ဘူင် ပါယ် တီ တဲး န့ ကော ဇမ် စုဝ် လှုက်လှာန် ဘေ ဒွန် စုဝ် ဒွန် ဘာန်။ ဂေ ဒူအီ အာမျုဝ် အာလေဝီ တူ ပွိုန် ခါဂုန် ပီ ဒွါ ဇဝ်ဖြာ ဒီ ဂေ ဒူအီ အီဆာရေလ။ 24 အုဝ် ယီ ဒိုဝ်း ပီ လှူ ဂေ ဒူအီ အီဆာရေလ ဂိုဝ် ဘုန် အူ ဘုန် အီ မုး ပီ လှူ ပီ ဒါင် ဂေ ဒီ ဇဝ်ဖြာ၊ ဝီ ဒွါ ဒီ ဂေ။ ခုဝ် အန် တီ အုဝ် တဝ်း၊ ဂေ တူ ပွိုန် ခါဂုန် ခဲ့ ပီ ပွိုန် ဂေ ဒူအီ အီဆာရေလ။”

25 ဇဝ်ဖြာ ပီ ဝီ စ်ု အာမုဝ်ဆဲ၊ တဲး အန် ကာလာင် ဒီ ဂေ ဒူအီ အာမျုဝ် အာလေဝီ တဝ်း၊ 26 “ဆေ ဘေ ဟဲ့ ပွိုန် ဂိုဝ် ဘုန် အူ ဘုန် ပီ လှူ ဂေ ဒူအီ အီဆာရေလ၊ ဘေ ပီ ဝီ လုဝ် လှူ ဂိုဝ် ဘုန် အူ ဘုန် ခဲင် ပီ လှူ တီ၊ တဲး န့ ဘဲန် ပီ လှူ အီ မာဝတ် ဝိဝ် မာဝတ် ဝေန့် ဒီ ဇဝ်ဖြာ။ 27 ပီ လှူ ဘေ တီ၊ ဘေ လုဝ် မာတ် တဲး န့ ပီ ပီ လှူ ဂေ ဒူအီ အီ ရန့် မာန် ဂေ ဒူင် နာ၊ အီ လှူ ငှုဝ် ကာမာယ် ဂေ အိုမ် မာငုန်။ 28 ပါယ် တီ ဘော ဘေ လုဝ် ဝီ ဒိုဝ်း ဂိုဝ် ဘုန် အူ ဘုန် ခဲင် ပဲ့ ဟဲ့ ပွိုန် ဘေ ဒီ ဂေ ဒူအီ အီဆာရေလ တီ၊ ဝီ လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒါင် ဒီ အန်။ ပီ လှူ တီ၊ ဘေ လုဝ် ဝီ ဒွါ ဒီ အာရူန် အီ မုး ဒါ အီ လှူ ဒီ ဇဝ်ဖြာ။ 29 ပဲ့ ဟဲ့ ပွိုန် ဘေ တီ၊ ဘေ လုဝ် ဒိုဝ်း အီ မွှိုမ် လွှိုမ် တူတ့်၊ ဝီ ဒွါ ဒီ ဇဝ်ဖြာ။

30 ဆေ ဘေ ဟဲ့ ဟွတ့် လှူ အီ မွှိုမ် လွှိုမ် တူတ့် တီ၊ ဇဝ်ဖြာ ဒီ မာတ် န့ ပီ ဒီဂါဝ် ပဲ့ ဟဲ့ မး ဘေ ဒီ အူင့် ကာင်နဝ်း ဘော အိုမ် မာငုန် ပဲ့ ဟဲ့ နျီ့ ဘေ။ 31 အီ ဆီ ဂိူတ် တွိုန် ဘော ဘေ ဘော ဒူအီ ခဲင် န့ဟူမ် ဘေ ဟဲ့ ပွိုန် ဟူမ် ဒွန် အီ ဒီ ဒူင် ကွယ် ဘေ ဒွန် ပ့လုဝ့်။ န့ ဘော မုး ရုး ကူပ် ဘူင် ဘေ ဂါန် ခဲင် ထိုပ် ဘိက် ဘွတ်။ 32 ဆေ ဘေ ဟဲ့ ဟွတ့် လှူ ဒီ ဇဝ်ဖြာ အီ ဟဲ့ မွှိုမ် လွှိုမ် တူတ့် တီ၊ ခဲ့ ပီ ဟူမ် ဘေ တီ၊ အာဝ် ဟူ ဘဲန် မှာပ် ဒီ ဘေ။ မာလဲ၊ ဘေ လုဝ် ဆာဒိက်၊ ကွဲ့ တဲး ဘေ ဘူင် မာဆေ အီ တူ ရီမာတ် ပီ လှူ ဂေ ဒူအီ အီဆာရေလ တီ၊ ယုဝ် ဘေ ကာဒုး ဒီ ယမ်။”