ခါန် 17
လွင် န့ကြွုန် အာရူန်
1 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ မ့ပွါ တဝ်း၊
2 “မဲ ကာလာင် ဒီ ဂေ ဒူအီ အီဆာရေလ၊ တဲး ဂေ ဘူင် န့ကြွုန် ဂိုဝ် ဒီ အာ ညွင့်၊ တဲး ဂေ အီ မုး ဒါ တာင် အီ ယဲတ့် ခြိုဝ် ဂေ ပွိုန် အူ ဝီ အူ ညွင့်။ တဲး မဲ ဒဲမ် ဒိုက် စိူဝ် ဂေ ဒီ န့ကြွုန် တီ၊ ဝီ မှဝ် ဝီ အန်။ 3 စိူဝ် အာရူန် တဲး မဲ ဒဲမ် ဒိုက် ဒီ န့ကြွုန် ဒါ တာင် အီ ယဲတ့် ခြိုဝ် ဒူအီ အာလေဝီ။ ခုဝ်၊ ဒါ တာင် အီ ယဲတ့် ဒွန် ခြိုဝ် လုဝ် မိုဝ်း န့ကြွုန် ဝီ မှဝ် ဝီ အန်။ 4 ဟဲ့ ဟွတ့်၊ မဲ လုဝ် ဝီ ဒိုဝ်း န့ကြွုန် ဂေ တီ၊ ဟာဝ် အုန် ခဲင် ထိုပ် ဘိက် ဘွတ် နာ အာတ့် ဇီဒိူက် ဒူင် ကာတုန့် အုဝ် ဒီ မဲ တွိုန်။ 5 အီ မုး န့ကြွုန် ဝီ ပီ ရဝ်း အုဝ်၊ န့ ဒီ ဝီ မိုဝ်း န့လုဝ်း။ ဆေ ဂေ ဒူအီ ကိူန် ယိုဝ် လွင် အန် တီ၊ န့ ဒီ တဲး ပီ ပိုန့် ပီ အေး ဂေ ဘော ပဲ့ ဟဲ့ ဘူင် ကာဘး ဂေ ဒီ မဲ ဝီ ယေန်။”
6 ပါယ် တီ အာမုဝ်ဆဲ ဘော ကာလာင် ဒီ ဂေ ဒါ တာင် အီ ယဲတ့် ခြိုဝ် မှဝ် ခြိုဝ် အန်။ ဂေ ဘော ဒိုဝ်း တး န့ကြွုန် ဂေ၊ အူ ဝီ အူ ညွင့် အူ ညွင့်။ န့ကြွုန် ဂေ ဒါ တာင် ဘောကာဂ့လျီတ် ဂေ ကွယ် ဂိုဝ် ဒီ အာ ညွင့်။ ဟဲ့ ဘာ ဘော န့ကြွုန် အာရူန် တွိုန်။ 7 အာမုဝ်ဆဲ ဘော ဒိုဝ်း န့ကြွုန် ဂေ တီ၊ ဝီ ဟာဝ် အုန် ခဲင် ထိုပ် ဘိက် ဘွတ် နာ အာတ့် ဇီဒိူက် ဇဝ်ဖြာ။
8 ပါ ခဲညှာ အာမုဝ်ဆဲ ဘော ဝီ ဟာဝ် လိုပ် ခဲင် ထိုပ် ဘိက် ဘွတ် တွိုန်။ အန် ဘော ယိုဝ် န့ကြွုန် အာရူန် အီ ဟဲ့ ကာဒါင် ခြိုဝ် ဂေ ဒူအီ အာလေဝီ တွိုန်၊ န့ ဟဲ့ ဝီ မိုဝ်း န့လုဝ်း၊ မိုဝ်း ဘော ဘုဝ်း ဒိုမ် ဘော ဘုဝ်း ဘြး။ ဟဲ့ ဝီ မိုဝ်း ဘော ဘ့လေ ဆာဒဲတ် မင် ကာလဝ့် အီ ဟဲ့ ဆိန်။ 9 အာမုဝ်ဆဲ ဘော ဝီ ဒိုဝ်း န့ကြွုန် ဂေ အီ ကွယ် ဒီ အာတ့် ဇဝ်ဖြာ တီ၊ ဝီ ဘျ ဒီ ဂေ ဒူအီ အီဆာရေလ၊ တဲး ဂေ ယိုဝ်။ ဟဲ့ ဟွတ့်၊ ဂေ ဘော ဝီ ဒိုဝ်း န့ကြွုန် ဂေ၊ ရာင် အာဆေ ရာင် အန်။
10 ဇဝ်ဖြာ ပီ ဝီ ဒမ် အာမုဝ်ဆဲ တဝ်း၊ “တဲး မဲ ဝီ ဒိုဝ်း အုန် န့ကြွုန် အာရူန် တီ နာ အာတ့် ဇီဒိူက် ဇဝ်ဖြာ၊ တဲး ဂေ ဒူအီ အီဆာရေလ၊ ဂေ အီ အွန် ဒီ ပီရူ ဂေ ဒီ အုဝ် ပွိုန် ဒီ ယိုဝ် ဆေဆေ။ န့ ဒီ တဲး ဂေ စူ ပိုန့်၊ စူ အေး၊ ကွဲ့ တဲး ဂေ လုဝ် ယမ်။” 11 အာမုဝ်ဆဲ ဘော ဘူင် ဒူပ် ပီ ကာလာင် ဇဝ်ဖြာ တီ ဒီ အန်။