1 ဝါယ် အန် တီ န့ မိုဝ်း အာခုဝ်ရာ အီ မုး ဂွန် အာအီဇာဟာ အီ မုး ဂွန် အာခုဝ်ဟာတ် ခဲင် ခြိုဝ် အာလေဝီ။ န့ ဘော မိုဝ်း ဘော ဒူအီ အာရူဘေန် အူယ် ဝီ အီ စိူဝ် အာဒါထာန် ဘော အာဖီရမ် အီ မုး ဂွန် အာအေလီအာပ် ဘော အာအူန် အီ မုး ဂွန် အာဘေလေတ်။ ဂေ ဝီ ခဲန့်၊ ဝီ ကာဘး ဒီ အာမုဝ်ဆဲ။ 2 ဂေ ဘော ဒဲ့ ဒူအီ အီဆာရေလ အီ မုး ဒါ တာင် ပဲ့ ဟဲ့ ဒါင် ဂေ တဲး ဒါ ဒါင် ဂေ တီ ဘဲန် ဒါ အီ အိုပ် အီ ယဲတ့် ဂေ။ ဂေ ကွယ် အာ မာယဝ်း ဒီ ဖန် ဂိုဝ် ဝီ။ 3 ဂေ ဘော ဟာဝ် ဒူင် ကွယ် အာမုဝ်ဆဲ ဂါယ် အာရူန်၊ ကာလာင် ဒီ ဂါယ် တဝ်း၊ “ပီ ဘူင် ဘာယ်၊ န့ ဟဲ့ ပွုန် ဟဲ့ လွှိုမ် ခဲ့ ကာအာပ် ဘူင်။ ဒူအီ ဂေ နီ၊ ဂေ ဒွန် အီ ဘော မုး ဒူအီ ပီ အိုပ် ဇဝ်ဖြာ။ ဇဝ်ဖြာ မိူဝ် ကွယ် ရိုမ် ဒူပ် ဂေ ဘောကာဂ့လျီတ်။ မဲ အာမုဝ်ဆဲ၊ မှဝ် န့ ပါယ် ပီ ဝီ ပီခိုက် ပီဖုင် မဲ ဒုဝ် ဘြိမ် မဲ ဒဲင် ဒူအီ ပီ အိုပ် ဇဝ်ဖြာ ဂေ နီ။း”

4 အာမုဝ်ဆဲ ဟဲ့ ယိုဝ် ဂြုဝ်း ဂေ တီ၊ အန် ဘော ဝီ မုတ် ဂိုပ် ဒီ ကာဒါယ် အူ ဇေန့်။ 5 အန် ဘော ဝီ ကာလာင် ဒီ အာခုဝ်ရာ ဘော ဒီ ဒူအီ ဂေ တွိုန် တဝ်း၊ “ခဲညှာ ဆိန့်ဝး၊ ဇဝ်ဖြာ ဒီ ဘျ တဲး အေ ယိုဝ်၊ အာဆေ ဟဲ့ မုး ဒူအီ ပီ စ်ု ဇဝ်ဖြာ၊ အာဆေ ဟဲ့ ဆီငါ ဘွတ်၊ အာဆေ ပွိုန် တး ကွယ် ဒီ အာတ့် ဇဝ်ဖြာ။ ဝီ ပီ ရဝ်း ဇဝ်ဖြာ၊ ဇဝ်ဖြာ ဒီ တဲး အန် တး ကွယ် ကာချြီ့ ဒီ အန်။ 6-7 ခဲညှာ ဘော မဲ ဘော ဂေ ဒူအီ အီ ဒူပ် မဲ၊ တဲး ဘေ ဒိုဝ်း အိုပ် ပဲ့ ဟဲ့ ဟပ် ဘေ န့ကိုဝ် ငဝ်၊ ဝီ ဒိုဝ်း ဘော ဆီနမ် အုး ငှုန်၊ ဝီ ဟပ် နာ ဒဲင်။ ဟဲ့ ဟွတ့်၊ ဇဝ်ဖြာ ဒီ ဘျ အာဆေ မုး ဒူအီ ပီ ရဝ်း အန်။ ဘေ အီ မုး ဒူအီ အာမျုဝ် အာလေဝီ နီ၊ ပီ ဘူင် ဘေ ခါ နီ ဟဲ့ ပွုန်၊ ဟဲ့ လွှိုမ် ခဲ့ ပီ ကာအာပ် ဘူင်။”

8 အာမုဝ်ဆဲ ပီ ဝီ ကာလာင် ဒီ အာခုဝ်ရာ ပေါ န့ ပွါ တဝ်း၊ “ဘေ အီ မုး ဒူအီ အာမျုဝ် အာလေဝီ၊ တဲး ဘေ ထူမ်။ 9 ဘေ တူ နပ် လွင် ပဲ့ ဟဲ့ ရဝ်း ဇဝ်ဖြာ ဒီ ဘေ ခဲင် ဖိုင် ဒူအီ အီဆာရေလ တွိုန် အီ အာရေ တာင် ကာဆဝ်။ အန် ဇဝ် ဟဲ့ တဲး ဘေ ပွိုန် ဒီ ကွယ် ကာတတ် အန်၊ ဟဲ့ အာပ် တဲး ဘေ ဘူင် ဂါန် အန် ခဲင် ထိုပ် ဘိက် ဘွတ် ကာဒါင် ဂေ ဒူအီ ကိူန်။ 10 ဇဝ်ဖြာ ဟဲ့ အာပ် ဘော မဲ ဘော ဘီနွင် မဲ အီ မုး ဒူအီ အာလေဝီ၊ တဲး ဘေ မိုဝ်း ဆာရေ။ မာလဲ၊ န့ ပီ ဘေ ဆီ ဝီ ဖာတ် ဘော ပွုန် ဒါ အီ လှူ ဒီ ဇဝ်ဖြာ။ 11 လွင် ပီ ပိုန့် ပီ ကာလာင် ဘေ နာ တူ မွှိုမ် ဒီ အာရူန် တီ၊ န့ ပီ ဘော မဲ ဘော ဖိုင် မဲ၊ ဘေ ကာဘး ဒီ ဇဝ်ဖြာ။”

12-13 အာမုဝ်ဆဲ ဝီ စ်ု အီ ဟဝ် ဟာဝ် ဒဲ့ အာဒါထာန် ဘော အာဖီရမ် အီ မုး ဂွန် အာအေလီအာပ် တွိုန်။ မာလဲ၊ ဂါယ် ဝီ တဝ်း၊ “ယာယ် တူ တး။ မဲ ဟဲ့ ယဲတ့် လေး ယေ ခဲင် မိူင် အဲဂိုပ် အီ မုး မိူင် ဘွတ် မိူင် မွှိုမ်၊ ဟဲ့ တဲး ယေ ဝီ တး ယမ် ခဲင် ပြဲ ကာဟဝ်း နီ။ ခဲ့ ပီ ဘူင် မဲ တီ၊ န့ ညှမ် ဘြေ့ ဒီ နဝ်း မဲ။ မဲ ဆီ ဝီ ဘဲန် ဘော ဒါ တာင် အီ အိုပ် ယေ ဆေဆေ။ 14 ဒဲင် တီ၊ မဲ ဟဲ့ တဝ်း ဒီ ယဲတ့် ဟာဝ် ယေ ဒီ မိူင် ဘွတ်၊ မိူင် မွှိုမ်။ မဲ ယီ တူ ယဲတ့် တဲး ယေ ဟာဝ်။ ဒူင် နာ ဂေ မာန် မာငုန် မိူဝ်၊ မဲ တူ ကာဆာင် ဒွါ ဒီ ယေ။ ဒေါ တီ နီ န့ ပီ မဲ ဆီ ဝီ ဂွယ့် လေး ဘော ငါယ် ဒူအီ ဂေ တီ၊ ကွဲ့ တဲး ဂေ ယိုဝ် ပီ ခါနှာပ် မဲ ဒီ ဂေ။ ခုဝ်၊ ယေ တူ တး ဒူင် ကွယ် မဲ။”

15 ပါယ် တီ အာမုဝ်ဆဲ ဘော ရူ ကာဆဝ်။ အန် ဝီ ကာလာင် ဒီ ဇဝ်ဖြာ တဝ်း၊ “ကွဲ့ တဲး မဲ ဇဝ် ရပ် ပီ လှူ ဂေ တီ။ အုဝ် ဒဲစေန့် မဲ ဇဝ် တူ ဒွိုမ် မိုဝ်း ဒီ ကာလုတ့် ဒီ ဂေ ခေါ အူ ဝီ။ ဘော မာလာ ဂေ ခဲ့ အူ ဒုဝ်၊ အုဝ် တူ ဒွိုမ် ဒိုဝ်း။”

16 ဟဲ့ ဟွတ့်၊ အာမုဝ်ဆဲ ဝီ တဝ်း ဒီ အာခုဝ်ရာ၊ “ခဲညှာ ဘော မဲ ဘော ဂေ ဒူအီ အီ ဒူပ် မဲ အာဒါ အာ မာယဝ်း ဒီ ဖန် ဂိုဝ် ဝီ တွိုန်၊ တဲး ဘေ ဘောကာဂ့လျီတ် ဟာဝ် ဒီ ထိုပ် ဘိက် ဘွတ်။ အာရူန် မိူဝ် ဒီ ကွယ် ဒီ တီ။ 17 တဲး ဘေ ဒွန် အီ ဂူင့် အိုပ် ငဝ်၊ တဲး ဘေ ဟပ် ဘော ဆီနမ် အုး ငှုန် ရာင် အာဆေ ရာင် အန်၊ ဝီ ဟာဝ် လှူ ဒီ ဇဝ်ဖြာ။ န့ ဒီ ဘော မိုဝ်း အိုပ် အာ မာယဝ်း ဒီ ဖန် ဂိုဝ် ဘူင့်၊ ဘော အိုပ် အာရူန် ဘော အိုပ် မဲ။” 18 ဟဲ့ ဟွတ့် ပါယ် တီ ဂေ ဒွန် အီ ဂူင့် အိုပ် ငဝ် ဂေ၊ ဟပ် ဘော ဆီနမ် အုး ငှုန်။ ဒွန် ဝီ ကွယ် ဘာင် မာလုဝ်း ထိုပ် ဘိက် ဘွတ်။ အာမုဝ်ဆဲ ဂါယ် အာရူန် မိူဝ် ဟဲ့ ကွယ် ဒီ တီ။ 19 အာခုဝ်ရာ တွိုန်၊ အန် ဟဲ့ ဒဲ့ ဒူအီ ဂေ တွိုန် ဘောကာဂ့လျီတ်၊ တဲး ဂေ တး ကာဇု နာ အာတ့် အာမုဝ်ဆဲ ဂါယ် အာရူန် ဒီ ဘာင် မာလုဝ်း ထိုပ် ဘိက် ဘွတ် တွိုန်။ ဒေါ အန် တီ အူ ဇေန့်၊ ဒူအီ ဂေ တွိုန် ဘောကာဂ့လျီတ် ဘော ယိုဝ် ဆီချာ ဘ့လာင် အာဖုင် ဒင်ခုဝ် ဇဝ်ဖြာ။ 20 ဇဝ်ဖြာ ဝီ တဝ်း ဒီ အာမုဝ်ဆဲ ဂါယ် အာရူန်၊ 21 “တဲး ဘာယ် ကာယဝ်း ဒီ ဒူအီ ဂေ တီ၊ တဲး အုဝ် ပွိုန် ဒီ ဘူင် တဲး ဂေ စှိုမ် တူတ့် အူ ဇေန့်။”

22 ဂါယ် မိူဝ် ဝီ မုတ် ဂိုပ် ဒီ ကာဒါယ် ဆာခိုဝ် တဝ်း၊ “အိုယ် မဲ ဇဝ်ဖြာ၊ မဲ မုး ဇဝ်ဖြာ အီ အိုပ် အာဆာက် ဒူအီ ဘော နဝ်း ဖွိုမ် ဒူအီ ဘောကာဂ့လျီတ်။ ကွဲ့ တဲး မဲ ဇဝ် ရူ ဒီ ဂေ ဒူအီ ဘောကာဂ့လျီတ် ကူပ် ပီ လုတ့် ဒူအီ အူ ဝီ တီ။”

23 ဇဝ်ဖြာ ဝီ တဝ်း ဒီ အာမုဝ်ဆဲ၊ 24 “တဲး မဲ ကာလာင် ဒီ ဒူအီ အီဆာရေလ ဘောကာဂ့လျီတ်၊ တဲး ဂေ ကာယဝ်း ဒီ ထိုပ် ဘိက် အီ မုး ဒူင် ကွယ် အာခုဝ်ရာ၊ အာဒါထာန်၊ ဘော အာဖီရမ်။”

25 အာမုဝ်ဆဲ ဘော ဂေ ဒါ တာင် ဒူအီ အီဆာရေလ၊ ဂေ ဘော ဟာဝ် ဒူင် ကွယ် အာဒါထာန် ဘော အာဖီရမ်။ 26 အာမုဝ်ဆဲ ဘော ကာလာင် ဒီ ဂေ ဒူအီ ကိူန် တီ တဝ်း၊ “တဲး ဘေ ကာယဝ်း ထိုပ် ဘေ ဒီ ထိုပ် ဒူအီ ဟာယ် ဒူအီ မိူက် ဂေ နီ။ ကွဲ့ တဲး ဘေ ပါ ကြုဝ်ကြာမ် ဂေ ခေါ အူ မျုဝ်။ ယုဝ် ဘော ဘေ ဒီ ဘော လိုဝ် စှိုမ် ကူပ် မှာပ် ပီ ဘူင် ဂေ။” 27 ပါယ် တီ ဂေ ဘော ကာယဝ်း ဘော ဝး ထိုပ် ဒူင် ကွယ် အာခုဝ်ရာ၊ အာဒါထာန် ဘော အာဖီရမ် ဂေ တွိုန်။ အာဒါထာန် ဂါယ် အာဖီရမ် ဘော အီဘိုန့် ဂေ ဂွန် ဂါယ် ဟဲ့ လေး ကွယ် နာ အာတ့် ထိုပ် ဂေ။

28 အာမုဝ်ဆဲ ဝီ ကာလာင် ဒီ ဒူအီ ကိူန် တဝ်း၊ “ဘေ လုဝ် နပ်၊ န့ မုး ဇဝ်ဖြာ အီ ဟဲ့ တဲး အုဝ် ဘူင် ဇိုဝ် နီ ဒွန် မျုဝ်။ ဘေ လုဝ် နပ်၊ အာဝ် မုး အုဝ် ဘူင် ဒူပ် ပီ အိုင် ဒုဝ် ဘြိမ် အုဝ်။ 29 ဆေ ဒူအီ ဂေ နီ ယီ တူ ယမ် ကူပ် ဒမ် ဇဝ်ဖြာ မှာပ် ဒီ ဂေ၊ ဆေ ဂေ ယမ် ဒါခိုယ် ပီ ဒူအီ ဟဝ်၊ အာဝ် မုး ဇဝ်ဖြာ ဟဲ့ စ်ု အုဝ် တး။ 30 မာလဲ၊ ဆေ ဇဝ်ဖြာ ယီ ဘူင် ပီ တူ ဒွိုမ် ယိုဝ် အီ ခေါ အူ ဇေန့်၊ ဆေ ကာဒါယ် ယီ ဒး ညွှတ် လူင် ဂေ ခဲင် မိူင် မာရာန ဘော အိမ်၊ ဘေ ဒီ နပ် ဆီချာ၊ ဒူအီ ဂေ နီ၊ ဂေ ဟဲ့ ဝဲန် ဇဝ်ဖြာ။”

31 အာမုဝ်ဆဲ ဟဲ့ ဟွတ့် ကာလာင် ဂြုဝ်း တီ၊ ကာဒါယ် ဒူင် ကွယ် ဂေ တွိုန် ဘော ဒး အူ ဇေန့်။ 32 န့ ဘော ညွှတ် ဂေ၊ ဘော ညွှတ် ဂေ အီ ဒူပ် ဒူအီ အာခုဝ်ရာ ဘောကာဂ့လျီတ်၊ ဘော န့ဟူမ် ဂေ ဘော ကြုဝ်ကြာမ် ဂေ ဘော တူတ့်။ 33 ပါယ် တီ ဂေ ဟဲ့ လူင် မိူင် မာရာန ဘော အိမ်။ ဘော ကြုဝ်ကြာမ် ဂေ ဟဲ့ လူင် ဒူပ်။ ဟဲ့ ဟွတ့်၊ ကာဒါယ် ဝီ ကာငီ နာ ဒဲင် ဂေ ပီ ဘြိမ်။ အီ မုး ဂေ၊ ဂေ ဟဲ့ ဟြာယ် အူ ဇေန့်၊ အာဝ် ဟူ ကွယ် ကာတဲ ဂေ ဒူအီ ကိူန်။ 34 ဂေ ဒူအီ အီဆာရေလ ဘော ယိုဝ် ဒတ် ဂေ၊ ဂေ ဘော ကာဘ့လဲပ် တဝ် အူ ဇေန့်။ ဂေ တဝ်း၊ “ကာဘ့လဲပ် တဝ် အေ၊ ယုဝ် ကာဒါယ် ညွှတ် ဘော အေ။”

35 ဝါယ် တီ ဇဝ်ဖြာ ပီ ဝီ တဲး ငဝ် ကာဆိုမ် ဒူအီ အာ မာယဝ်း ဒီ ဖန် ဂိုဝ် ဝီ ဒေါ လှူ ဂေ ဆီနမ် အုး ငှုန် တွိုန်။

36 ဟဲ့ ဟွတ့်၊ ဇဝ်ဖြာ ဝီ ကာလာင် ဒီ အာမုဝ်ဆဲ တဝ်း၊ 37 “တဲး မဲ ကာလာင် ဒီ အာလေအာဆာ အီ မုး ဂွန် ဒါ အီ လှူ ဒီ ဇဝ်ဖြာ အီ စိူဝ် အာရူန် တွိုန်။ တဲး အန် ဂဲပ် အုန် အိုပ် ငဝ် ဂေ ဒူအီ အီ ဟဲ့ ကာဆိုမ် တီ။ န့ကိုဝ် ငဝ် အီ ကွယ် ခဲင် အိုပ် တီ၊ တဲး အန် ဟာဝ် ဟုး ဝဲန် တူင့် တူင့်။ ခုဝ်၊ အိုပ် ပီ ဟပ် ဂေ န့ကိုဝ် ငဝ် တီ ဟဲ့ ဟွတ့် ဆီငါ။ 38 အိုပ် ငဝ် တီ ဟဲ့ ဘဲန် အီ ဆီငါ ကူပ် ဟဲ့ လှူ ဂေ ဒီ ဇဝ်ဖြာ။ ခုဝ်၊ တဲး အန် ဂဲပ် အုန် အိုပ် ငဝ် ဂေ ဒူအီ အီ ဟဲ့ ဘူင် မှာပ် အာမျုဝ် အီ ဝီ တဲး ဂေ ယမ်။ တဲး အန် ဝီ မး ဒီဖ့လ၊ တဲး န့ ဝီ ဘဲန် ဆီဘ့လိုက် ဒဲင် ကာစှူင့် လှူ။ ဆီဘ့လိုက် ကာစှူင့် လှူ တီ ဒီ ဘဲန် အီ တဲး ဂေ ဒူအီ အီဆာရေလ လှုဝ်း ဆေဆေ လွင် အန် တီ။”

39 ဒါ အီ လှူ ဒီ ဇဝ်ဖြာ အာလေအာဆာ တွိုန်၊ အန် ဘော ဂဲပ် အုန် အိုပ် ငဝ် ဂေ တီ။ အန် ဘော မး ဒီဖ့လ၊ တဲး န့ ဘဲန် ဆီဘ့လိုက် ကာစှူင့် လှူ။ 40 လွင် အန် တီ၊ န့ တဲး ဂေ ဒူအီ အီဆာရေလ လှုဝ်း ဆေဆေ။ ဆေ န့ တူ မုး လှုက်လှာန် အာရူန်၊ ဂေ တူ ပွိုန် လှူ ဆီနမ် အုး ငှုန် ဒီ အာတ့် ဇဝ်ဖြာ။ ဆေ န့ ယီ မိုဝ်း အီ ဆီ လှူ၊ ဘော အန် ဒီ ဘော လိုဝ် စှိုမ် ပီ အာခုဝ်ရာ ဘော ဖိုင် အန် ဂေ တွိုန်။ ပါယ် တီ အာလေအာဆာ ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ ဒွန် မျုဝ်။

41 ပါ ခဲညှာ ဖိုင် ဂေ ဒူအီ အီဆာရေလ ဘောကာဂ့လျီတ် ပီ ဝီ ပိုန့် အေး အာမုဝ်ဆဲ ဂါယ် အာရူန်။ ဂေ တဝ်း၊ “ဘာယ် ဟဲ့ ပီယမ် ဒူအီ ပီ အိုပ် ဇဝ်ဖြာ။”

42 ဒူအီ ဂေ တွိုန် မိူဝ် ဟဲ့ တး ကွယ် ကာဇု၊ တဲး ဂေ ပွိုန် ဒီ ကာထဲန့် ဒီ အာမုဝ်ဆဲ ဂါယ် အာရူန်။ ဒေါ အန် တီ ဂေ ဘော ဝီ ယိုဝ် န့အု အီ ဟဲ့ တး ပ့လိုက် ထိုပ် ဘိက် ဘွတ် တွိုန်၊ တဲး အာဖုင် ဒင်ခုဝ် ဇဝ်ဖြာ ဘော လိုဝ်း ဆီချာ ဒီ ဂေ။ 43 အာမုဝ်ဆဲ ဂါယ် အာရူန် ဘော ဟာဝ် စွင့် နာ အာတ့် ထိုပ် ဘိက် ဘွတ် တီ။ 44 ဟဲ့ ဟွတ့်၊ ဇဝ်ဖြာ ဝီ တဝ်း ဒီ အာမုဝ်ဆဲ၊ 45 “တဲး မဲ ကာယဝ်း လေး ဒီ ဖိုင် ဒူအီ ကိူန် ဂေ တီ။ အုဝ် ဒီ တဲး ဂေ လိုဝ် စှိုမ် တူတ့် အူ ဇေန့်။” ပါယ် တီ ဂါယ် မိူဝ် ဝီ မုတ် ဂိုပ် ဒီ ကာဒါယ်။

46 အာမုဝ်ဆဲ ဝီ ကာလာင် ဒီ အာရူန် တဝ်း၊ “တဲး မဲ ဒိုဝ်း အိုပ် ငဝ် မဲ၊ ဝီ ဒိုဝ်း ဟပ် န့ကိုဝ် ငဝ် အီ ကွယ် ဒဲင် ကာစှူင့် လှူ၊ ဝီ ဟပ် ဘော ဆီနမ် အုး ငှုန် နာ ဒဲင်၊ တဲး မဲ ဟာဝ် ခြန် ခြန် ဒူင် ကွယ် ဒူအီ ဂေ တွိုန်၊ တဲး မဲ ဝီ လှူ၊ တဲး ဂေ ဒူအီ အီဆာရေလ ဝီ ကာလဝ့် ဒီ ဇဝ်ဖြာ။ ခုဝ်၊ ဇဝ်ဖြာ ဟဲ့ ရူ ကာဆဝ် ဒီ ဂေ။ အာဖေ အာရေ အီ တဲး ဒူအီ ယမ် မိူဝ်၊ ဟဲ့ ဟွတ့် တး။” 47 အာရူန် ဘော ဘူင် ပါယ် တီ အူ ဇေန့်။ အန် ဘော ဒိုဝ်း အိုပ် ငဝ် အန် ကာဘ့လဲပ် ဟာဝ် ဒူင် ကွယ် ဒူအီ ဂေ တွိုန်။ အန် ဘော ယိုဝ် အာဖေ အာရေ ဟဲ့ ဟွတ့် တး။ ခုဝ်၊ အန် ဘော ဒိုဝ်း ဆီနမ် အုး ငှုန်၊ ဟပ် နာ ခဲင် အိုပ် အန်၊ ဘူင် ခဲ့ ပီ လုဝ် ဘူင် အန်၊ တဲး ဒူအီ အီဆာရေလ ဝီ ကာလဝ့် ဒီ ဇဝ်ဖြာ။ 48 ဟဲ့ ဟွတ့် ပါယ် တီ အာဖေ အာရေ တီ ဘော ဝီ ယေန် အူ ဇေန့်။ ဒေါ တး ကွယ် အန် ဒီ ကာတဲ ဂေ ဒူအီ အီ ဆီ အိမ် ဘော ဂေ အီ ဟဲ့ ဟွတ့် ယမ်၊ န့ ဟဲ့ စူ အူ ဇေန့်။ 49 ဂေ ဒူအီ အီ ဟဲ့ ယမ် ဒီ အာဖေ အာရေ တီ ဘောကာဂ့လျီတ် ဟဲ့ ဘဲန် အူ မှိုန့် ဒီ ဖွုန် ဟြဲန့် ဒီ ဘူ မာယဝ်း ဝီ။ ဒဲင် တီ၊ န့ ဘော မိုဝ်း ဘော ဂေ အီ ဟဲ့ ယမ် ကူပ် အာခုဝ်ရာ ဂေ တွိုန်။ 50 ဒုက် တာင် တီ ဟဲ့ ဟွတ့် ဝီ ယေန်၊ အာရူန် ဘော ဝီ တး ဒူင် ကွယ် အာမုဝ်ဆဲ ဒီ ဘာင် မာလုဝ်း ထိုပ် ဘိက် ဘွတ် တွိုန်။