1 ဇဝ်ဖြာ ပီ ဝီ စ်ု အာမုဝ်ဆဲ၊ 2 တဲး အန် ကာလာင် ဒီ ဂေ ဒူအီ အီဆာရေလ တဝ်း၊ “ဆေ ဘေ ဟီ ဇမ် ခဲင် မိူင် ပီ ဒီ ဒွါ အုဝ် ဒီ ဘေ၊ 3 ဘေ လုဝ် ဒိုဝ်း မာမက်။ ဆေ အာဝ် မုး မာမက်၊ ဘေ လုဝ် ဒိုဝ်း မာဘူ၊ လှူ ဒီ ဇဝ်ဖြာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ ဆေ အာဝ် မုး ပါယ် တီ တဲး န့ ဘဲန် ပီ လှူ အီ ဒူပ် ပီ ကာဆဲန့် ဘေ။ ဆေ အာဝ် မုး ပါယ် တီ တဲး န့ ဘဲန် ပီ ဆီ လှူ ဘေ ဘဲန် မျုဝ် ဘဲန် မျုဝ်။ ဆေ အာဝ် မုး ပါယ် တီ တဲး န့ ဘဲန် ပီ လှူ ဒေါ ဘူင် ဘေ ဘ့လွယ်။ ဘေ လုဝ် လှူ ဇိုဝ် တီ၊ တဲး အုး ငှုန် ပီ လှူ ဘေ တီ ဘော လဝ့် နဝ်း ဇဝ်ဖြာ။ 4 ဝီ အီ လှူ ဒီဂါဝ် ဘဲန် မျုဝ် ဘဲန် မျုဝ် ဒီ ဇဝ်ဖြာ၊ အန် လုဝ် တဲး န့ ဘဲန် ပီ လှူ အီ ဒုဝ့် ဒီ ငဝ်။ အန် လုဝ် ဝီ ဒိုဝ်း ကာပဲ့ ခဝ်ချုင် အာဒါ အူ အုဝ်မာ အီ မုး အူ ဘ့လဲ ဒီ အူ ခ့ဝါက်။ အန် လုဝ် ကာဝ်ု ဘော နာမန် အူ ကာပဝ်။ 5 ဘေ လုဝ် ဒိုဝ်း ဘော အိုမ် မာငုန် အူ ကာပဝ်၊ တဲး န့ ဘဲန် ပီ ဒီ လှူ ပီ ဒီ ဒျီင်၊ တဲး ဘေ လှူ ဒူပ် ပီ ဒီ လှူ အီ ဒုဝ့် ဒီ ငဝ် ဘော ဒူပ် ပီ ဒီ လှူ အီ မုး မာဘူ ဒွန် ဒုဝ်။

6 ဆေ ဘေ လှူ မာဘူ အာလူင့်၊ ဘေ လုဝ် ဟပ် ဘော ပီ ဒီ လှူ ဒီဂါဝ် ဘဲန် မျုဝ် ဘဲန် မျုဝ်။ ဘေ လုဝ် ဒိုဝ်း ကာပဲ့ ခဝ်ချုင် အာ အုဝ်မာ အီ မုး အူယ် ဘ့လဲ ဘော နာမန် အူ ကာပဝ် ဒီ အူ ကာတဲ။ 7 ဘေ လုဝ် ကာဝ်ု ဘော အိုမ် မာငုန် အူ ကာပဝ် ဒီ အူ ကာတဲ၊ တဲး န့ ဘဲန် ပီ လှူ ပီ ဒီ ဒျီင်၊ တဲး အုး ငှုန် ပီ လှူ တီ လဝ့် နဝ်း ဇဝ်ဖြာ။

8 ဆေ ဘေ လှူ မက် အာလူင့် ဒီ ဇဝ်ဖြာ၊ တဲး န့ ဘဲန် ပီ လှူ အီ ဒုဝ့် ဒီ ငဝ်။ ဆေ အာဝ် ပါယ် တီ တဲး န့ ဘဲန် ပီ လှူ အီ ဒူပ် ပဲ့ ဟဲ့ ကာဆဲန့် ဘေ ဒီ ဇဝ်ဖြာ။ ဆေ အာဝ် မုး ပါယ် တီ တဲး န့ ဘဲန် ပီ လှူ အီ ကွယ် ကာဇု ဟူမ် ရိုမ်၊ 9 တဲး ဘေ ဒိုဝ်း ဘော ပီ လှူ ဒီဂါဝ် အီ မုး ကာပဲ့ ခဝ်ချုင် အာဒါ အူယ် အုဝ်မာ အီ မုး ဖွုန် ဘ့လဲ ဒီ အူ ခ့ဝါက်၊ ကာဝ်ု ကာဆူ နာမန် အာ ကာပဝ် ဘော လှူ ဒူပ် မာမက် တီ။ 10 တဲး ဘေ ဝီ ကာဝ်ု ဘော ပီ လှူ ပီ ဒီ ဒျီင် အီ မုး အိုမ် မာငုန် အာ ကာပဝ်၊ တဲး အုး ငှုန် ပီ လှူ ဘေ တီ လဝ့် နဝ်း ဇဝ်ဖြာ။ 11 ဘေ လုဝ် ဘူင် ပါယ် တီ ဆေ ဘေ လှူ မက် အာလူင့်၊ မာဘူ အာလူင့် ဘော မာပဲ ဒွန် ဒုဝ်။ 12 ဆေ ဘေ ဘော လှူ ဒုဝ် ဆတ်ဒါဝါ ဒွန် မျုဝ်၊ ဘေ လုဝ် ဟပ် ခဲ့ တီ အာဒါ ဒွန် ဒုဝ်။

13 ဘေ ဒူအီ အီဆာရေလ ဒွန် အီ လုဝ် ဘူင် ပါယ် တီ ဒေါ လှူ ဘေ ပီ လှူ အီ ဒုဝ့် ဒီ ငဝ်၊ တဲး အုး ငှုန် ပီ လှူ ဘေ တီ ဘော လဝ့် နဝ်း ဇဝ်ဖြာ။ 14 ဂေ ဒူအီ အာမျုဝ် ဟဝ် အီ တး ကွယ် ကာတဲ ဘေ၊ န့ ဘော မုး အီ ကွယ် ဆေဆေ၊ ဘော မုး အီ ကွယ် အူ ကာစန် အူ ကာဘြိုဝ်း၊ ဆေ အန် မိုဝ်း နဝ်း ဆီ လှူ ပီ ဒီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ၊ အန် လုဝ် ဘူင် ဒူပ် ပီ ပီ ဘူင် ဘေ တီ။ 15 ဆိန့် ဒေါ တီ နီ ဟာဝ် နာ အာတ့်၊ တဲး န့ ကော ဇမ် ဘော စုဝ် လှုက်လှာန် ဘေ ဒွန် စုဝ် ဒွန် ဘာန်၊ ဘေ လုဝ် ဒူပ် ဒါရာ အူ မျုဝ် တီ။ ဘော ဘေ ဘော ဒူအီ အာမျုဝ် ဟဝ် မုး အူ မျုဝ် ဒီ အာတ့် ဇဝ်ဖြာ။ 16 ဘော ဘေ ဘော ဒူအီ ဂေ တီ လုဝ် ဒူပ် ဒါရာ အူ မျုဝ် ဘော ဟိတ် အူ မျုဝ် တီ။”

17 ဟဲ့ ဟွတ့်၊ ဇဝ်ဖြာ ပီ ဝီ စ်ု အာမုဝ်ဆဲ တဲး အန် ကာလာင် ဒီ ဂေ ဒူအီ အီဆာရေလ တဝ်း၊ 18 “ဆေ ဘေ ဟီ ဟာဝ် ဇမ် ခဲင် မိူင် ပီ ဒီ ယဲတ့် ဟာဝ် အုဝ် ဒီ ဘေ၊ 19 ဆေ ဘေ ဒီ ဟူမ် ပီ ဒီ ဟူမ် ပဲ့ ဟဲ့ ပွိုန် ဘေ ခဲင် မိူင် တီ၊ တဲး ဘေ အာပ် လှူ မင် ကာလဝ့် ဒီ ဇဝ်ဖြာ။ 20 ဒေါ ဒီ ဒုဝ့် ဘေ ခါမုန် အီ မုး ကာပဲ့ ခဝ်ချုင် ပဲ့ ဟဲ့ ဆုဝ့် ဘေ ဒီ အာတ့်၊ တဲး ဘေ ဒိုဝ်း အာဒါ အူ ဒီခ့လဲပ်၊ လှူ ဒီ ဇဝ်ဖြာ၊ တဲး န့ ဘဲန် ပီ ဒါင် ဘေ ဒီ ဇဝ်ဖြာ အီ တး ဒီ အူင့် ကာင်နဝ်း ဘေ။ 21 ပါယ် တီ ဘေ လုဝ် လှူ ဒီ ဇဝ်ဖြာ ဆိန့် ဒေါ ဟူမ် ဘေ ခါမုန် ဒေါ ဂုဝ်၊ တဲး န့ ကော ဇမ် ဘော စုဝ် လှုက် စုဝ် လှာန် ဘေ ဒွန် စုဝ် ဒွန် ဘာန်။

22 ဆေ ဘေ ယီ ဘူင် ကာလိုပ်၊ တူ ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ ဒွန် မျုဝ်၊ 23 ဘော နာ အာတ့် နီ ဟာဝ်၊ ဆေ ဖိုင် ဘေ ဒူအီ ကိူန် တူ ဒူပ် ဒါရာ ပီ ကာလာင် ဇဝ်ဖြာ ဒီ အာမုဝ်ဆဲ တီ ဒွန် မျုဝ်၊ 24 ဆေ ဂေ ဒူအီ ကိူန် တူ နပ် လွင် အန် တီ၊ ယီ ဘူင် ကာလိုပ်၊ ဒွန် ဇေန့် ဂေ လုဝ် ဒိုဝ်း မက် အာလူင့် အူ ဒုဝ် ဝီ လှူ၊ တဲး န့ ဘဲန် ပီ လှူ အီ ဒုဝ့် ဒီ ငဝ်၊ တဲး အုး ငှုန် အန် လဝ့် နဝ်း ဇဝ်ဖြာ။ တဲး ဂေ လှူ ဘော ပီ ဒီ လှူ ဒီဂါဝ် ဘော အိုမ် မာငုန်။ တဲး ဘေ ဒိုဝ်း ဘော မာပဲ အာလူင့် အူ ဒုဝ် ဝီ ပွါ၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ 25 ဒါ အီ လှူ ဒီ ဇဝ်ဖြာ လုဝ် ဘူင် တဲး ဂေ ဒူအီ အီဆာရေလ ဘောကာဂ့လျီတ် ဝီ ကာလဝ့် ဒီ ဇဝ်ဖြာ။ ပါယ် တီ ဇဝ်ဖြာ မိူဝ် ဒီ ဂဝ်း ဝဲန် မှာပ် ဂေ။ ပဲ့ ဟဲ့ ဘူင် လုတ့် ဂေ တီ၊ ဂေ တူ နပ် လွင် ဒါင် အန်။ ဂေ ဟဲ့ ကာလိုပ် ဒီ ဘူင်။ ခုဝ်၊ ဂေ လုဝ် ဝီ လှူ ပီ လှူ အီ ဒုဝ့် ဒီ ငဝ် ဘော ပီ လှူ အီ ဂဝ်း ဝဲန် မှာပ် ဒီ ဇဝ်ဖြာ။ 26 ဆေ ဂေ ဘူင် ပါယ် တီ၊ ခဲ့ ကွယ် ဂေ ဒူအီ အီဆာရေလ ဘောကာဂ့လျီတ်၊ ဘော ဂေ ဒူအီ အာမျုဝ် ဟဝ် အီ ကွယ် ကာတဲ ဂေ၊ ဂေ မိူဝ် ဒီ လွတ် ခမ် မှာပ် ဂေ။ ခုဝ်၊ ပဲ့ ဟဲ့ ဘူင် ကာလိုပ် ဂေ တီ၊ အာဝ် မုး ဂေ အုန် နဝ်း ဒီ ဘူင်။

27 ဆေ န့ မိုဝ်း ဒူအီ အူ ဝီ အီ ဟဲ့ ကာလိုပ် ဒေါ တူ လှုဝ်း တူ နပ် အန် လွင် အန် တီ၊ အန် လုဝ် ဝီ လှူ မာပဲ အာဟျာင် အူ ဒုဝ် အီ နုဝ့် အူ ဆီနမ်၊ တဲး န့ ဘဲန် ပီ လှူ အီ ဂဝ်း ဝဲန် မှာပ်။ 28 ဒါ အီ လှူ ဒီ ဇဝ်ဖြာ လုဝ် ဘူင် တဲး ဒူအီ ဝီ တီ ဝီ ကာလဝ့် ဒီ ဇဝ်ဖြာ။ ဇဝ်ဖြာ မိူဝ် ဒီ ဂဝ်း ဝဲန် မှာပ် အန်။ 29 ဆေ ဘေ ဟဲ့ ကာလိုပ် ဒေါ တူ နပ် ဘေ လွင် အန် တီ၊ ဘော မုး ဒူအီ အီဆာရေလ ဘော မုး ဒူအီ အာမျုဝ် ဟဝ် အီ ကွယ် ကာတဲ ဘေ၊ ဘေ လုဝ် ဒူပ် ပီ စ်ု အုဝ် အူ မျုဝ် တီ။

30 န့ ဘော မုး ဒူအီ အာမျုဝ် ဘေ၊ ဘော မုး ဒူအီ အာမျုဝ် ဟဝ်၊ ဆေ ဒူအီ အူ ဝီ ဟဲ့ အုန် နဝ်း ဒီ ဘူင် တဲး အန် လုတ့်၊ တဲး အန် ကာလိုပ်၊ အန် တူ ရုဝ်ဆေ ဇဝ်ဖြာ။ ခုဝ်၊ ဘေ လုဝ် ဝဲန် ဒူအီ ဝီ တီ၊ တူ မာတ် အန် မုး ဒူအီ အီဆာရေလ။ 31 ကူပ် ဟဲ့ လုက်တာယ် အန် ဒီ ဂြုဝ်း ဇဝ်ဖြာ ဘော လှိုဝ် ဒါရာ ဇဝ်ဖြာ၊ ဘေ လုဝ် ဝဲန် အန်၊ ကွဲ့ ဟူ မာတ် အန် မုး ဒူအီ အာမျုဝ် ဘေ။ အန် မိူဝ် လုဝ် ဝီ ခမ် မှာပ် အန် တီ။”

32 ဒေါ ကွယ် ဒူအီ အီဆာရေလ ခဲင် ပြဲ ကာဟဝ်း တွိုန်၊ အာဒါ အူ ဆီငဲ ဂေ ဘော ယိုဝ် ဒူအီ အူ ဝီ၊ အီ ဟဲ့ ဟာဝ် ဂဲပ် အုန် ဟေ ဒေါ မုး ဆီငဲ ဒီလှဝ်။ 33 ဂေ ဘော ဒဲ့ တး အန် ဒူင် ကွယ် အာမုဝ်ဆဲ ဂါယ် အာရူန်၊ တဲး ဘော ဂါယ် ဒူအီ ကိူန် ယိုဝ်။ 34 ဂေ ဘော ခြွင့် အန် ခဲင် ကာပိုမ် ကူပ် ညှမ် နပ် ဂေ ပီ ဒီ ပါယ် ဒီ ဆုင်ဖျာတ် အာမူ အန်။ 35 ဇဝ်ဖြာ ဘော ဝီ ကာလာင် ဒီ အာမုဝ်ဆဲ တဝ်း၊ “ဒူအီ ဝီ တီ ဘေ လုဝ် ငဝ်း ယမ်။ ဘေ လုဝ် ဒိုဝ်း လေး အန် နာ ရေတ့် ဒူင် ချ ဘေ၊ တဲး ဒူအီ ဘောကာဂ့လျီတ် ဒိုဝ်း မာဝ်၊ ဝိုန့် ယမ် အန်။” 36 ပါယ် တီ ဖိုင် ဂေ ဒူအီ ကိူန် တွိုန် ဘော ဒိုဝ်း လေး အန် နာ ရေတ့် ဒူင် ချ ဂေ။ ဂေ ဘော ကာဖြူမ် ဒီ ဒိုဝ်း မာဝ်၊ ဝိုန့်၊ တဲး အန် ယမ်၊ တဲး န့ ဒူပ် ပီ ကာလာင် အုန် ဇဝ်ဖြာ။

37 ဇဝ်ဖြာ ပီ ဝီ စ်ု အာမုဝ်ဆဲ တဲး အန် ကာလာင် ဒီ ဂေ ဒူအီ အီဆာရေလ တဝ်း၊ 38 “ဘေ လုဝ် ဘူင် ဒုယ် အီ မိုဝ်း ဆေန့် ငျီန်၊ ဟွယ် ဒီ ဆီတုဝ် ဘေ ဖွုန် ကာတုဝ့်။ ဘေ လုဝ် ဘူင် ပါယ် တီ တဲး န့ ကော ဇမ် စုဝ် လှုက်လှာန် ဘေ ဒွန် စုဝ် ဒွန် ဘာန်။ 39 ဆေ ဘေ ယွတ် ဒုယ် တီ၊ န့ ဒီ တဲး ဘေ လှုဝ်း ဒါရာ ဇဝ်ဖြာ ဘောကာဂ့လျီတ်၊ တဲး ဘေ ပွိုန် ဒီ ဘူင် ဒူပ်၊ ကွဲ့ တဲး ဘေ ဘူင် ပီ အိုင် ဘေ ဘော ပီ ယိုဝ် ဘေ အီ တဲး ဘေ ကာလိုပ်။ 40 ဒုယ် တီ ဒီ ဒမ် ဆာဒိက် ဒီ ဘေ၊ တဲး ဘေ ဘူင် ဒူပ် ဒါရာ အုဝ်၊ တဲး ဘေ ဘဲန် ဒူအီ ပီ အိုပ် အုဝ်။ 41 အုဝ် မုး ဇဝ်ဖြာ ပီ ကြိုပ် ဘေ၊ ဇဝ်ဖြာ အီ ဟဲ့ ထုတ် လေး ဘေ ခဲင် မိူင် အဲဂိုပ်။ အုဝ် မိူဝ် မုး အန် ဇဝ်၊ အီ မုး ဇဝ်ဖြာ ပီ ကြိုပ် ဘေ။”