ခါန် 14
လွင် ဒူအီ အီဆာရေလ ပီရူ ဂေ ဒီ ဇဝ်ဖြာ
1 ပါယ် တီ ဒူအီ ဂေ တွိုန် ဘော ဘဲန် နဝ်း က့လိုဝ်၊ နဝ်း ဒီတဲတ်။ ဂေ ဘော ယာမ် ဒွင် ခိူန်။ 2 ဂေ ဘောကာဂ့လျီတ် ဘော ပိုန့် ဘော အေး ဘော ကာလာင် ဂြုဝ်း တူ မွှိုမ် ဒီ အာမုဝ်ဆဲ ဂါယ် အာရူန်။ ဂေ တဝ်း၊ “ယေ နီ၊ ဆေ ယေ ယမ် ခဲင် မိူင် အဲဂိုပ်၊ ယမ် ဘော ခဲင် ပြဲ ကာဟဝ်း နီ၊ န့ မွှိုမ် ကာဆဝ် ဒီ ယေ။ 3 မှဝ် န့ ပါယ် ပီ ယဲတ့် ဇဝ်ဖြာ ဒီ ယေ၊ တဲး ယေ တး ဇမ် ခဲင် မိူင် တီ။း အန် ဒီ ဘော တဲး ယေ ယမ် ဒီ ဒါ ဆိုက်၊ တဲး အီဘိုန့် ဂေ ဂွန် ယေ ဝီ ခမ် ဒုက် နာ ပန်။ ခုဝ်၊ တဲး ယေ ဝီ ဝိဝ် ခဲင် မိူင် အဲဂိုပ် တွိုန်။ န့ မွှိုမ် လွှိုမ် ဟာဝ် လိုပ် အေ ခဲင် မိူင် တီ။” 4 ပါယ် တီ ဂေ ဘော လာယ် ကာမွုန် ကာတဲ ဂေ တဝ်း၊ “တဲး အေ ဝီ ရဝ်း ဒူအီ ခေါ အူ ဝီ၊ တဲး အန် ဝီ ယဲတ့် ဝိဝ် အေ ဒီ မိူင် အဲဂိုပ် တွိုန်။”
5 ဒေါ အန် တီ အာမုဝ်ဆဲ ဂါယ် အာရူန် ဘော မုတ် ဂိုပ် နာ အာတ့် ဂေ ဒူအီ ကိူန်။ 6 အာယုဝ်ဆူအာ အီ မုး ဂွန် အာနုန် တွိုန် ဘော အာဂါလိပ် အီ မုး ဂွန် အာယေဖုဝ်နာ၊ ဂါယ် ဟဲ့ ဒွိုမ် ဟာဝ် ဒူပ် ဂေ အီ ချွင် ဒီ ယွတ် မိူင် တွိုန်။ ဂါယ် ဘော ကာယာတ့် ခြိုင် တာ ဂါယ် ကူပ် ဟဲ့ က့လိုဝ် ဂါယ်။ 7 ဂါယ် ဝီ ကာလာင် ဒီ ဂေ ဒူအီ ဘောကာဂ့လျီတ် တဝ်း၊ “မိူင် ပဲ့ ဟဲ့ ဟွတ့် ဟာဝ် ယွတ် ယေ တီ၊ န့ ဟဲ့ မုး မိူင် အီ မွှိုမ် ကာဆဝ်။ 8 ဆေ ဇဝ်ဖြာ ဘော အိုင် အေ၊ အန် ဇဝ် ဒီ ယဲတ့် အေ တဲး အေ ဇမ် ခဲင် မိူင် တီ အီ မုး မိူင် ဘွတ် အီ တဲး အေ မိုဝ်း ပီ လုဝ် အေ ဒွန် မျုဝ်။ 9 ကွဲ့ တဲး အေ ကာခဲန့် ဒီ ဇဝ်ဖြာ။ ကွဲ့ တဲး အေ ယုဝ် ဒူအီ ခဲင် မိူင် တီ။ အေ ဒီ ပဲ ဂေ ငှိုယ် ငှိုယ်၊ တဲး န့ ပီ အေ ဟူမ် ခါမုန်။ ဂေ အာဝ် ဟူ မိုဝ်း အီ ရဲ အီ ဂွင့် ဂေ။ ဇဝ်ဖြာ ယီ ကွယ် ရိုမ် ဒူပ် အေ။ ခုဝ်၊ ကွဲ့ တဲး ဘေ ယုဝ်။”
10 ဂါယ် ဟဲ့ ဟွတ့် တဝ်း ပါယ် တီ ခဲ့ ကွယ် ဒူအီ ဂေ ဘောကာဂ့လျီတ် ဘော ဝီ ကာဖြူမ် ဒီ ဒိုဝ်း မာဝ်၊ တဝ်း ဒီ ဝိုန့်၊ တဲး ဂါယ် ယမ်။ ဒေါ အန် တီ အူ ဇေန့်၊ ဇဝ်ဖြာ ဘော ဘျ အာဖုင် ဒင်ခုဝ် အန်၊ တဲး န့ ဘ့လာင် ဒဲင် ထိုပ် ဘိက် ဘွတ်၊ တဲး ဂေ ဘောကာဂ့လျီတ် ပွိုန် ဒီ ယိုဝ်။ 11 ဇဝ်ဖြာ ဝီ တဝ်း ဒီ အာမုဝ်ဆဲ၊ “ဒူအီ အာမျုဝ် နီ၊ ဂေ တူ ရုဝ်ဆေ အုဝ် ဒေါ မှဝ်။ အုဝ် ဟဲ့ ဘူင် အီ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။ ဂေ ယီ တူ ညှိုမ် အုဝ် ဒေါ မှဝ်။ အုဝ် အာဝ် ဟူ ပဲ ခမ် ပီ ဘူင် ဂေ တီ။ 12 အုဝ် ဒီ တဲး ဂေ ခမ် ဒုက် ဒီ ဆဝ် ရောဂါ၊ တူ တဲး ဂေ ပွိုန် ဒီ ဘိုင် ခါဂုန် ပီ တဝ်း အုဝ် ဒီ ဒွါ ဒီ ဂေ။ အုဝ် ဒီ ဝီ တဲး မဲ ဘဲန် ဒူအီ အာမျုဝ် ကိူန်။ တဲး မဲ မိုဝ်း ပွုန် လွှိုမ် ဂေ။”
13 အာမုဝ်ဆဲ ဝီ တဝ်း ဒီ ဇဝ်ဖြာ၊ “မဲ ဇဝ် ဟဲ့ တဲး ပွုန် မဲ ယဲတ့် လေး ဒူအီ ဂေ နီ ခဲင် မိူင် အဲဂိုပ်။ ဆေ မဲ ဝီ ဝဲန် ဂေ၊ ဒူအီ အီ ကွယ် ခဲင် မိူင် အဲဂိုပ်၊ ဂေ ဒီ ဘော ဝီ ယိုဝ် လွင် အန် တီ။ 14 ဂေ ဒီ ဘော ဝီ ကာလာင် ဒီ ဒူအီ အီ ကွယ် ခဲင် မိူင် နီ။ ဂေ ယီ ဟဲ့ ဟွတ့် ယိုဝ် လွင် မဲ ဇဝ် ဟဲ့ ကွယ် ရိုမ် ဒူပ် ယေ ဒဲစေန့် မဲ။ မဲ ဇဝ်ဖြာ မိူဝ် ဟဲ့ ဘျ ဆီချာ ပီ ပါယ် မဲ ဒီ ယေ။ မဲ ဟဲ့ တဲး ရွင့် န့အု ကွယ် ကာရူယ် ယေ။ ကာတဲ ဆီငဲ န့ ဘော ဘဲန် ရွင့် န့အု။ ခဲင် မှိုဝ် န့ ဘော ဘဲန် ရွင့် ငဝ် အီ ယဲတ့် ဟာဝ် ယေ။ 15 ဆေ မဲ ဇဝ် ဒီ ငဝ်း ယမ် ဒူအီ ဘောကာဂ့လျီတ်၊ ဂေ ဒူအီ အာမျုဝ် ဟဝ်၊ ဂေ အီ ဟဲ့ ဒွိုမ် ယိုဝ် လွင် ပဲ့ ဟဲ့ ဘူင် မဲ ဇဝ် တီ၊ ဂေ ဒီ ဝီ တဝ်း၊ 16 ‘ဇဝ်ဖြာ တီ၊ အန် တူ ပဲ ဒီ ယဲတ့် ဟာဝ် ဂေ၊ တဲး ဂေ ဇမ် ခဲင် မိူင် ပဲ့ ဟဲ့ ကာဆဲန့် အန် ဒီ ဒွါ ဒီ ဂေ။ ခုဝ်၊ အန် ဝီ ငဝ်း ယမ် ဂေ ခဲင် ပြဲ ကာဟဝ်း နီ။’
17 အိုယ် မဲ ဇဝ်ဖြာ၊ ဒေါ တီ နီ အုဝ် ဝီ မှာန့်၊ တဲး မဲ ဇဝ် ဝီ ဘျ ပွုန် မဲ၊ တဲး မဲ ဇဝ် ဝီ ဘူင် ဒူပ် ပဲ့ ဟဲ့ ဒွိုမ် ဒွါ မဲ ဇဝ် ကာဒိက် ဆတ်ဇာ။ 18 မဲ ဇဝ် မိူဝ် ဟဲ့ ဒွိုမ် တဝ်း၊ ‘အုဝ် ဇဝ်ဖြာ၊ အုဝ် တူ ပီရူ ပီစာဝ် အုဝ် ငှိုယ် ငှိုယ်။ အုဝ် မုး ဇဝ်ဖြာ အီ နပ် ဒီ ရွက့် ကာဝေ ဆေဆေ။ အုဝ် ဘော ဂဝ်း ဝဲန် မှာပ် ဘော ထာယ် ဒီ ဒူအီ အီ ပီရူ ပီစာဝ် ဂေ ဒီ အုဝ်။ ပီ ဘော ဟဲ့ ပါယ် တီ မိူဝ်၊ အုဝ် ယီ တူ တဲး ဒူအီ လွတ် ခမ် မှာပ် ဂေ။ အုဝ် ဒီ ဒမ် မှာပ် ဒီ လှုက်လှာန် ဂေ၊ တဲး ဂေ ဝီ ခမ် မှာပ် ဂုန့် ဂေ တီ၊ တဲး န့ ကော နုဝ့် အူယ် စုဝ်၊ ဖွုန် စုဝ်။’ 19 အိုယ် မဲ ဇဝ်ဖြာ၊ ကူပ် မိုဝ်း မဲ နဝ်း ရွက့် အီ တူ နပ် ဒီ ဘျွင်၊ တူ နပ် ဒီ ဘ့လိူင်၊ အုဝ် ဝီ မှာန့် မဲ ဇဝ်၊ တဲး မဲ ဂဝ်း ဝဲန် မှာပ် ဒူအီ ဂေ နီ၊ တဲး န့ ပီ ဒေါ ဟဲ့ ဂဝ်း ဝဲန် မဲ ဇဝ် မှာပ် ဂေ ဆိန့် ဒေါ လေး ဂေ ခဲင် မိူင် အဲဂိုပ် တွိုန် ကော ဇမ် အာတိုဝ် နီ။ အုဝ် မှာန့် ပါယ် တီ။”
20 ဟဲ့ ဟွတ့် ပါယ် တီ ဇဝ်ဖြာ ဝီ တဝ်း ဒီ အာမုဝ်ဆဲ၊ “အုဝ် ဟဲ့ ဂဝ်း ဝဲန် မှာပ် ဂေ ကူပ် ဟဲ့ မှာန့် မဲ ဒီ အုဝ်။ 21 အုဝ် တဝ်း အာခ်ု ဒီ မဲ၊ အာဖုင် ဒင်ခုဝ် အုဝ် ဒီ ဘော လိုဝ်း ဒဲင် ကာဒါယ် နီ ဒွန် ပ့လုဝ့်။ 22 န့ ယီ မုး ဒူအီ ဂေ နီ၊ အုဝ် မိူဝ် ဟဲ့ ဟွတ့် တဲး ဂေ ယိုဝ် အာဖုင် ဒင်ခုဝ် အုဝ်။ ဂေ မိူဝ် ဟဲ့ ယိုဝ် ဘော အီ မွှိုမ် အာမ် ကာဆဝ် ပီ ဘျ အုဝ် ခဲင် မိူင် အဲဂိုပ် ဘော ဒေါ ဟာဝ် ဂေ ဒူပ် န့တေန့် ခဲင် ပြဲ ကာဟဝ်း နီ။ မာလဲ၊ ဂေ ယီ တူ ထူမ် ဂြုဝ်း အုဝ်၊ ဂေ ဟဲ့ ထေဝ် ဒီ ယွတ် နဝ်း အုဝ် ဘဲန် ဂိုဝ် ဇေန့်။ 23 ခုဝ်၊ ဒူအီ ဂေ တီ၊ ဂေ တူ ပွိုန် ဒီ လိုပ် ခဲင် မိူင် ပဲ့ ဟဲ့ ကာဆဲန့် အုဝ် ဒီ ဒွါ ဒီ ဂုန့် ဒင် ဂေ။ ဂေ အီ ဟဲ့ ပျာတ့် တဲး အုဝ် ရူ၊ ဂေ တူ ပွိုန် ဒီ လိုပ် ခဲင် မိူင် တီ ခေါ အူ ဝီ။ 24 မာလဲ၊ အီ မုး ဒဲစေန့် အုဝ် အာဂါလိပ်၊ နဝ်း အန် တူ ပီ ဂေ။ အန် ဟဲ့ ဒူပ် ဆီချာ အုဝ်။ ခုဝ်၊ အုဝ် ဒီ ယဲတ့် အန်၊ တဲး အန် ကော ဇမ် ခဲင် မိူင် ပဲ့ ဟဲ့ ဟွတ့် ဟာဝ် ယွတ် အန် တီ။ ဘော လှုက်လှာန် အန် ဒီ ပွိုန် ဒီ လိုပ် ကွယ် ခဲင် မိူင် တီ။ 25 ခဲညှာ တဲး ဘေ ဟာဝ်။ ဒူအီ အာမာလေက် ဘော ဒူအီ ကာနန့် ဂေ ဟဲ့ ကွယ် ဒူပ် ဒီလယ့်။ တဲး ဘေ ဟာဝ် ခဲင် ပြဲ ကာဟဝ်း ဒူပ် န့တေန့် အီ ဟာဝ် ဒီနှူင် ရေန့်။”
26 ဟဲ့ ဟွတ့် ပါယ် တီ ဇဝ်ဖြာ ပီ ဝီ တဝ်း ဒီ အာမုဝ်ဆဲ ဂါယ် အာရူန်၊ 27 “အုဝ် အာဝ် ဟူ ခမ် ဂေ ဒူအီ ဟာယ် ဒူအီ မိူက် အီ တဝ်း ဂြုဝ်း တူ မွှိုမ် ဒီ အုဝ်။ ဂြုဝ်း ပီ ပိုန့် ပီ တဝ်း ဂေ ဒီ အုဝ်၊ အုဝ် ဟဲ့ ဟွတ့် ဖဲ။ 28 တဲး မဲ ကာလာင် ဒီ ဂေ၊ ‘ဇဝ်ဖြာ တဝ်း အာခ်ု ဒီ ဘေ၊ အန် ဒီ ဘူင် ဒီ ဘေ၊ တဲး န့ ဒူပ် ပဲ့ ဟဲ့ ကာလာင် ဘေ ဒီ အန်။ 29 ဘေ လုဝ် ယမ်။ ဒုဝ် ယမ် ဘေ ဒီ ဘော ကွယ် ဘဲန် ပ့လုဝ့် ဘဲန် ပ့လုဝ့် ခဲင် ပြဲ ကာဟဝ်း နီ။ ဒွန် အီ အီ ဟဲ့ ဟပ် စိူဝ် အန် ခဲင် ဇာရာင် တွိုန်၊ အာဆာက် အီ ဟဲ့ နုဝ့် အာ ဂိုဝ် ဆီနမ် ဟုဝ့် နာ ဒဲင်၊ ဂေ ဘောကာဂ့လျီတ် ဟဲ့ ပိုန့်၊ ဟဲ့ တဝ်း ဂြုဝ်း တူ မွှိုမ် ဒီ အုဝ်။ ခုဝ်၊ အူ ဝီ မိူဝ် အာဝ် မိုဝ်း အီ ပွိုန် ဒီ လိုပ် ခဲင် မိူင် တီ။ 30 အုဝ် ဟဲ့ ဒွိုမ် ကာဆဲန့် ဒီ တဲး ဘေ ဘိုင် မိူင် တီ။ မာလဲ၊ န့ မိုဝ်း မီ အာဂါလိပ် အီ မုး ဂွန် အာယေဖုဝ်နာ ဂါယ် အာယုဝ်ဆူအာ အီ မုး ဂွန် အာနုန် အီ ပွိုန် ဒီ လိုပ်။ ဒဲင် တီ၊ ဘေ တူ ပွိုန် ဒီ ဘိုင် ခေါ အူ ဝီ။ 31 ဘေ ပီ ဘော ဟဲ့ တဝ်း၊ ဂွန် ဘေ ဘော လှုက်လှာန် ဘေ ဒီ ခမ် ဒုက် မိူဝ်၊ အုဝ် ယီ ဒီ ယဲတ့် ဒီ တိုယ် ဂေ၊ တဲး ဂေ ကော ဇမ် ခဲင် မိူင် ပဲ့ ဟဲ့ ဝဲန် ဘေ တီ။ တဲး ဂေ ဝီ ဘိုင် မိူင် တီ။ 32 အီ မုး ဘေ၊ ဘေ ဒီ ယမ် ခဲင် ပြဲ ကာဟဝ်း နီ။ 33 လှုက်လှာန် ဘေ၊ ဂေ လုဝ် ဟာဝ် ဝိဝ် ဟာဝ် ဝေန့် ခဲင် ပြဲ ကာဟဝ်း နီ အာဒါ ဖွုန် ဂိုဝ် ဆီနမ်။ ဂေ ဒီ ဝီ လုဝ် ခမ် မှာပ် ပဲ့ ဟဲ့ လုတ့် ဘေ၊ တဲး န့ ကော ဇမ် ပန် ဒီ ယမ် တူတ့် ဘေ ခဲင် ပြဲ ကာဟဝ်း နီ။ 34 ဘေ ဟဲ့ ဟာဝ် ချွင် ဒီ ယွတ် မိူင် တီ အာဒါ ဖွုန် ဂိုဝ် ဆီငဲ။ အူ ဆီငဲ၊ အုဝ် တဲး န့ ဝီ ဘဲန် အူ ဆီနမ်။ ဘေ လုဝ် ဝီ ခမ် မှာပ် ဘေ တီ အာဒါ ဖွုန် ဂိုဝ် ဆီနမ်။ ပါယ် တီ ဘေ မိူဝ် ဒီ နပ် ခဲ့ ဒီ ညှာပ် ဆေ အုဝ် ဝဲန် ဘေ။’ 35 အုဝ် ဟဲ့ ဟွတ့် ကာလာင်၊ အုဝ် ဒီ ဘူင် ပါယ် တီ ဒီ ဘေ ဒူအီ ဟာယ် ဒူအီ မိူက်။ ဘေ အီ ဟဲ့ ကွယ် ကာဇု ကာဒိုမ်၊ ကာဖာ မီ ဒီ ကာခဲန့် ဒီ အုဝ်။ ခဲ့ ကွယ် ဘေ ဘောကာဂ့လျီတ်၊ ဘေ ဒီ ယမ် တူတ့် ခဲင် ပြဲ ကာဟဝ်း နီ ဒွန် အီ။ အုဝ် ဇဝ်ဖြာ ဟဲ့ ကာလာင် ပါယ် တီ။”
36 ပန် တီ ဂေ ဒူအီ ပီ စ်ု အာမုဝ်ဆဲ တဲး ဂေ ဟာဝ် ချွင် ဒီ ယွတ် မိူင် တွိုန်၊ ဂေ အီ တူ ဝီ တး ကာလာင် ဂြုဝ်း မှာန်၊ ဂေ အီ ဘူင် တဲး ဒူအီ အီဆာရေလ ပိုန့် ဒီ ဇဝ်ဖြာ၊ 37 ဇဝ်ဖြာ တဲး ဂေ ယမ် တူတ့် ဒီ ဆဝ် ရောဂါ။ 38 ခဲင် ဂေ ဒူအီ ဂိုဝ် ဒီ အာ ဝီ အီ ဟာဝ် ချွင် ဒီ ယွတ် မိူင် တွိုန်၊ န့ လွတ် မီ အာယုဝ်ဆူအာ အီ မုး ဂွန် အာနုန် ဘော အာဂါလိပ် အီ မုး ဂွန် အာယေဖုဝ်နာ။ န့ မိုဝ်း မီ ဂါယ် အီ ပွိုန် ဒီ ကွယ် ဒါခိုယ် ဂျာမ်ဆာ။
39 အာမုဝ်ဆဲ ဘော ဝီ ကာလာင် ပီ တဝ်း ဇဝ်ဖြာ တီ ဒီ ဂေ ဒူအီ အီဆာရေလ ဘောကာဂ့လျီတ်။ ဂေ ဘော ဝီ က့လိုဝ် ကာဆဝ်။ 40 ပါ ခဲညှာ ဂေ ဘော ယိတ့် ဆိန့် ဆိန့်ဝး စေဝ်၊ တဲး ဂေ ဟုဝ့် ဒဲင် နွန် စာ။ ဂေ မိူဝ် တဝ်း၊ “အိုဝ်၊ ခါ နီ အေ ဒီ ဟာဝ် ဒီ မိူင် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ အေ။ ခုဝ်၊ အေ မိူဝ် ဟဲ့ ဟွတ့် ကာလိုပ်။”
41 မာလဲ အာမုဝ်ဆဲ ဝီ တဝ်း ဒီ ဂေ၊ “မှဝ် န့ ပါယ် ပီ လှိုဝ် ဘေ ဂြုဝ်း ဇဝ်ဖြာ။း အာကျာမ် အာငျာန် ဘေ တီ၊ န့ တူ ဘဲန်။ 42 ကွဲ့ တဲး ဘေ ဟာဝ်။ ဇဝ်ဖြာ တူ ကွယ် ရိုမ် ဒူပ် ဘေ။ ရန်ဆူ ဘေ ဒီ ကာဂုဝ်း ပဲ ဘေ။ 43 ဘေ ဟီ ကာတုန့် ဒူအီ အာမာလေက် ဘော ဒူအီ ကာနန့်၊ ဘေ ဒီ ယမ် ဒူင် ကာဂုဝ်း ဘေ တီ။ ကူပ် ဟဲ့ ဝဲန် ဘေ ဇဝ်ဖြာ၊ ဇဝ်ဖြာ မိူဝ် အာဝ် ဟူ ကွယ် ရိုမ် ဒူပ် ဘေ။”