1 ဇဝ်ဖြာ ပီ ဝီ စ်ု အာမုဝ်ဆဲ တဝ်း၊ 2 “တဲး မဲ ရဝ်း ဂေ အီ မုး ဒါ တာင် ဒူအီ အီဆာရေလ ဂိုဝ် ဒီ အာ ဝီ၊ အူ ခြိုဝ် အူ ဝီ၊ တဲး ဂေ ဟာဝ် ချွင် ဒီ ယွတ် မိူင် ကာနန့် အီ မုး မိူင် ပီ ဒီ ဒွါ အုဝ် ဒီ ဘေ ဒူအီ အီဆာရေလ။”

3 ပါယ် တီ အာမုဝ်ဆဲ ဘော ဘူင် ဒူပ် ပီ ကာလာင် ဇဝ်ဖြာ ဒီ အန်။ အန် ဘော စ်ု ဂေ အီ မုး ဒါ တာင် အီ ယဲတ့် ဂေ ဒွန် ခြိုဝ်၊ တဲး ဂေ လေး ခဲင် ပြဲ ဒူင် စိူဝ် ဖာရာန် တွိုန်။

4 ခဲင် ခြိုဝ် အာရူဘေန် န့ ဘော မုး အာဆာမူအာ အီ မုး ဂွန် အာဇာကူရာ။

5 ခဲင် ခြိုဝ် အာဆီမေအူန် န့ ဘော မုး အာဆာဖတ် အီ မုး ဂွန် အာဟုဝ်ရီ။

6 ခဲင် ခြိုဝ် အာယူဒါ န့ ဘော မုး အာဂါလိပ် အီ မုး ဂွန် အာယေဖုဝ်နာ။

7 ခဲင် ခြိုဝ် အာအီဆာခါ န့ ဘော မုး အာအီဂါလ အီ မုး ဂွန် အာယုဝ်။

8 ခဲင် ခြိုဝ် အာအေဖာရိမ် န့ ဘော မုး အာဟုဝ်ဆေ အီ မုး ဂွန် အာနုန်။

9 ခဲင် ခြိုဝ် အာဘေန်ယာမ် န့ ဘော မုး အာပါလာဒီ အီ မုး ဂွန် အာရာဖူ။

10 ခဲင် ခြိုဝ် အာဇေဘူလူန် န့ ဘော မုး အာကာဒေလ အီ မုး ဂွန် အာဆောဒီ။

11 ခဲင် ခြိုဝ် အာမာနာဆေ အီ မုး ဂွန် အာယုဝ် တွိုန် န့ ဘော မုး အာကာတီ အီ မုး ဂွန် အာဆူဆီ။

12 ခဲင် ခြိုဝ် အာဒါန် န့ ဘော မုး အာမေလာ အီ မုး ဂွန် အာကေမာလီ။

13 ခဲင် ခြိုဝ် အာဆေန် န့ ဘော မုး အာဆေဆူရာ အီ မုး ဂွန် အာမီခီလာ။

14 ခဲင် ခြိုဝ် အာနာပ်ထာလီ န့ ဘော မုး အာနာဖီ အီ မုး ဂွန် အာဝါဖာဆီ။

15 ခဲင် ခြိုဝ် အာဂတ် န့ ဘော မုး အာဂူလ အီ မုး ဂွန် အာမာခီ။

16 အာမုဝ်ဆဲ ဘော စ်ု ဒူအီ ဂေ တီ တဲး ဂေ ဟာဝ် ချွင် ဒီ ယွတ် ခဲင် မိူင် ကာနန့် တွိုန်။ အာဟုဝ်ဆေ အီ မုး ဂွန် အာနုန် တွိုန်၊ အာမုဝ်ဆဲ ဘော ဝီ ကာပ့လု စိူဝ် အန်၊ တဲး အန် ဝီ စိူဝ် အာယုဝ်ဆူအာ။

17 ဒေါ စ်ု အာမုဝ်ဆဲ ဂေ ဟာဝ် တီ၊ အန် ဝီ ဒမ် ဂေ တဝ်း၊ “တဲး ဘေ ဟာဝ် ဒူပ် န့တေန့် နာ တေတ့်၊ တဲး ဘေ ဝီ ဟုဝ့် ဒဲင် နွန်။ 18 တဲး ဘေ ယွတ်၊ တဲး ဘေ နပ် ခဲင် မိူင် တီ န့ ပါယ် မှဝ်။ ဒူအီ အီ ကွယ် ခဲင် မိူင် တီ၊ န့ ကိူန် ခဲ့ မှဝ်။ ဂေ မိုဝ်း ဟဲန့် မွက် မှဝ်။

19 တဲး ဘေ ယွတ် ဘော ကာဒါယ် ခဲင် မိူင် တီ၊ ယုဝ် န့ မွှိုမ် အာဝ် မွှိုမ်။ တဲး ဘေ ယွတ် ဘော ဒူင် ကွယ် ဂေ ဒူအီ ခဲင် မိူင် တီ၊ ယုဝ် န့ မုး ထိုပ် ဘိက်၊ ယုဝ် န့ မုး မိူင် အီ ဟဲ့ မိုဝ်း ရဲင်၊ အီ ဟဲ့ မန် ဆီချာ။ 20 တဲး ဘေ ယွတ် ဘော ကာဒါယ် ဒူင် ရန့် ဂေ၊ ယုဝ် လေး အန် ဟဲ့ ကိူန် အာဝ် ကိူန်။ ယွတ် ဘော ပြဲ ဂေ နင် ဟေ၊ ယုဝ် န့ မိုဝ်း တူ မိုဝ်း။ တဲး ဘေ လာယ် ယဲတ့် ဒီ ယ။ တဲး ဘေ ဘော ဒိုဝ်း တး ဘ့လေ ပီ ဆမ် ဂေ ခဲင် မိူင် တီ မင် မျုဝ်။” အာခြာဝ် ဒေါ အန် တီ န့ ဆီငျာ ကာစုး ဘ့လေ မာငုန် ဒီ ဆိန်။

21 ဂေ ဘော ဟာဝ် ဒူပ် န့တေန့် နာ ကွာ တွိုန်။ ဂေ မိူဝ် ကာစုး ဒီ ယွတ် ခဲင် ပြဲ ကာဟဝ်း အီ စိူဝ် စီနာ ကော ဝီ ဇမ် ဒူင် အီ စိူဝ် ရေဟူပ် အီ မုး ခူပ် န့တေန့် အီ ဟာဝ် လေဘုဝ်ဟာမာတ်။ 22 ပါယ် တီ ဂေ ဟာဝ် ဒူပ် န့တေန့် ဘ့လာက် နာ တေတ့်၊ ဝီ ဟာဝ် ဇမ် ဒီ မိူင် ဟေဘြုဝ် အီ မုး ဒူင် ကွယ် ဂေ ဒူအီ အာဟီမာန် ဘော ဒူအီ အာဆေမ်ဆေ ဘော ဒူအီ အာတာလာမ်။ ဒူအီ ဂေ တီ၊ ဂေ မုး လှုက်လှာန် ဒူအီ အာနာက်။ မိူင် ဟေဘြုဝ် တီ၊ ဂေ ဟဲ့ ဒဲ အာတ့် ဒဲ ဂေ မိူင် စောနာ အီ ကွယ် ခဲင် မိူင် အဲဂိုပ် တွိုန်။ ဂေ ဟဲ့ ဒဲ မိူင် ဟေဘြုဝ် တီ အာဒါ ဘူ ဆီနမ်၊ ဂေ ကော ဝီ ဒဲ မိူင် စောနာ။ 23 ဒေါ ဟာဝ် ဇမ် ဂေ ဒီ ဒီလယ့် အီ စိူဝ် အေခူန်၊ ဂေ ဘော ဒဲပ် ဘ့လေ မာငုန် အူ ကာယူင့် အီ တာင် ကာဆဝ်။ ဒူအီ အာ ဝီ လုဝ် ကာဂွတ် ကာယူင့် ဘ့လေ မာငုန် တီ။ ဂေ ဘော ဒိုဝ်း တး ဘော ဘ့လေ မာစက် ဘော ဘ့လေ ဒီပူ။ 24 ကူပ် ဒဲပ် ဂေ ဒူအီ အီဆာရေလ ဒီ ကာယူင့် ဘ့လေ မာငုန် ဒူပ် ဒီလယ့် တီ၊ ဂေ တဲး ဒီလယ့် တီ စိူဝ် အေခူန်။ “အေခူန်” ခဲင် ဂြုဝ်း ဂေ၊ န့ လေး “ကာယူင့် ဘ့လေ။” 25 န့ ဘော နုဝ့် ဖွုန် ဂိုဝ် ဆီငဲ၊ ဂေ ဘော ဝီ လေး ဒူင် ပြာ ဂေ ဒီ ချွင် ဒီ ယွတ်၊ ဝီ ဝိဝ် ဒူင် ကွယ် ဂေ။

26 ဒေါ အန် တီ အာမုဝ်ဆဲ ဘော အာရူန် ဘော ဂေ ဒူအီ အီဆာရေလ ဘောကာဂ့လျီတ်၊ ဂေ ကွယ် ခူပ် မိူင် ဆာဒေတ် ခဲင် ပြဲ ကာဟဝ်း အီ စိူဝ် ဖာရာန် တွိုန်။ ဂေ ဘော ကာလာင် ဘော ခဲ ပီ ပါယ် ပဲ့ ဟဲ့ ယိုဝ် ဂေ။ ဂေ ဘော ဘျ ဘော ဘ့လေ ပီ ဒိုဝ်း တး ဂေ တွိုန်၊ တဲး ဒူအီ ကိူန် ယိုဝ်။ 27 ဂေ ဘော ကာလာင် ဒီ အာမုဝ်ဆဲ တဝ်း၊ “ယေ ဟဲ့ ဟွတ့် ဟာဝ် ယွတ် ဆီချာ ပီ ပါယ် ခဲင် မိူင် တီ။ ဟဲ့ မုး မိူင် ဘွတ် အီ တဲး အေ မိုဝ်း ပီ လုဝ် အေ ဒွန် မျုဝ်။ ဘော ကာဒါယ် ဟဲ့ ဘွတ်၊ ဟဲ့ မွှိုမ်။ ဘ့လေ ဂေ နီ မိူဝ်၊ ဘော မုး ဘ့လေ ခဲင် မိူင် တီ။ 28 မာလဲ၊ ဒူအီ အီ ကွယ် ခဲင် မိူင် တီ၊ ဂေ မိုဝ်း ပ့လူမ် မိုဝ်း ဟဲန့် ကိူန်။ မိူင် ဒွန် မိူင် ဘော မုး မိူင် တာင် အီ ဟဲ့ မိုဝ်း ရဲင် ရူပ် ဒွန် ဘ့လာက်။ ဒဲင် တီ၊ ယေ ဟဲ့ ယိုဝ် ဘော ဒူအီ အာနာက် တွိုန်။ 29 ဒူအီ အာမာလေက် ဘော ကွယ် ဘ့လာက် နာ တေတ့်။ ဒူအီ အာမျုဝ် ဟေထိတ်၊ ဒူအီ ယေဘူဆိတ် ဘော ဒူအီ အာမုဝ်ရိတ်၊ ဂေ ဝီ ကွယ် ဒဲင် နွန်။ ဒူအီ အာမျုဝ် ကာနန့်၊ ဂေ ဘော ကွယ် ခူပ် အိုမ် နမ်မုက်ဆာရာ ဘော ခူပ် ဘ့လဲင် ယောဒါန်။”

30 ပန် တီ အာဂါလိပ် ဘော ကာလာင် ဒီ ဂေ ဒူအီ ကိူန် အီ ဟဲ့ စုး ဒီ ပိုန့် ဒီ အာမုဝ်ဆဲ၊ တဲး ဂေ ဝီ ယေန်။ အန် တဝ်း၊ “တဲး အေ ဟာဝ် ဒိုဝ်း မိူင် တီ အူ ဇေန့်။ အေ ဒိူန် ဒီ ပဲ ဂေ အာခါခ်ု မှာန်။”

31 မာလဲ၊ ဂေ ဒူအီ အီ ဒူပ် အန်၊ ဂေ ဝီ တဝ်း၊ “အေ တူ နှဲန် ဒီ ပဲ ဒူအီ ခဲင် မိူင် တီ။ ဂေ မိုဝ်း ပ့လူမ် ဂေ ဟဲန့် လွှိုမ် အေ။” 32 ပါယ် တီ ဂေ ဝီ ကာလာင် အီ တူ မွှိုမ် ဒီ ဂေ ဒူအီ အီဆာရေလ လွင် ပီ ပါယ် ခဲင် မိူင် တွိုန်။ ဂေ ဝီ တဝ်း၊ “မိူင် ပဲ့ ဟဲ့ ဟွတ့် ဟာဝ် ယွတ် ယေ တီ၊ န့ ဘော မုး မိူင် အီ နပ် ဒီ တဲး ဒူအီ အီ ကွယ် နာ ခဲင် လိုဝ် စှိုမ်။ ဒူအီ ပီ ကာတုန့် ယေ ခဲင် မိူင် တီ မိူဝ်၊ န့ မုး တူတ့် ဒူအီ ဒုဝ် တူင့် ဒုဝ် တာင် ဒီလူယ်။ 33 ယေ ဟဲ့ ယိုဝ် ဒူအီ ဒုဝ် တာင်၊ ပ့လူမ် တာင် အီ မုး ဒူအီ အာနာက် တွိုန်။ ဂေ ကွယ် ခဲင် မိူင် တီ။ ယေ ယွတ် ဂေ၊ အေ ဟဲ့ ပီ မာ အာဇူင့်။ ဂေ မိူဝ် ဒီ မာတ် အေ ပါယ် တီ။”