1 န့ ယီ မုး နာင် မီရီယမ် ဂါယ် အာရူန်၊ ဂါယ် ဝီ ဆီ ဖျာက် အာမုဝ်ဆဲ ကူပ် ဟဲ့ ခတ် ဒိုဝ်း အန် အီဘိုန့် အီ မုး ဒူအီ အာမျုဝ် ကူဆာ တွိုန်။ 2 ဂါယ် တဝ်း၊ “အာဝ် မုး၊ ဇဝ်ဖြာ ကာလာင် ဂြုဝ်း မီ ဒီ အာမုဝ်ဆဲ အူ ဝီ။ အန် နပ် ဒီ ကာလာင် ဘော ဒီ ယာယ်။” ဇဝ်ဖြာ မိူဝ် ဟဲ့ ယိုဝ် ဂြုဝ်း ဂါယ် တီ။

3 အီ မုး အာမုဝ်ဆဲ တွိုန်၊ အန် ယီ မိုဝ်း နဝ်း ဂူမ် နဝ်း တျီမ် လွှိုမ် ဒူအီ ဘောကာဂ့လျီတ် ဒဲင် ကာဒါယ် နီ။

4 ဒေါ အန် တီ အူ ဇေန့်၊ ဇဝ်ဖြာ ဝီ ကာလာင် ဒီ အာမုဝ်ဆဲ ဘော အာရူန် ဘော နာင် မီရီယမ် တဝ်း၊ “တဲး ဘေ ဟာဝ် ဒူင် ကွယ် ထိုပ် ဘိက် ဘွတ်။” ဂေ မိူဝ် ဟာဝ်။ 5 ဇဝ်ဖြာ မိူဝ် လူင် ဒူပ် ရွင့် န့အု၊ ဝီ ကွယ် ဒီ ဘာင် မာလုဝ်း ထိုပ် ဘိက် ဘွတ် တွိုန် ဘော ဒဲ့ အာရူန် ဂါယ် နာင် မီရီယမ်။ ဂါယ် မိူဝ် ဘော တး ဒီ အာတ့် ဇဝ်ဖြာ။ 6 ဇဝ်ဖြာ ဝီ တဝ်း ဒီ ဂါယ်၊ “တဲး ဘာယ် ထူမ် ဂြုဝ်း အုဝ်။ ဆေ ဟဲ့ မိုဝ်း ဒူအီ အီ ဘျာန် ဂြုဝ်း ဇဝ်ဖြာ ကာတဲ ဘေ၊ အုဝ် ဒီ တဲး အန် နပ် လွင် အုဝ် ဒေါ ယိုဝ် အန် အာရူင် ပီ ဘျ အုဝ် ဒီ အန်။ အုဝ် ဒီ ဘော ကာလာင် ဂြုဝ်း ဒီ အန် ဒေါ အိတ် မ့ဘာဝ် အန်။ 7 န့ ယီ မုး အာမုဝ်ဆဲ အီ မုး ဒဲစေန့် အုဝ်၊ အုဝ် တူ ဘူင် ပါယ် တီ ဒီ အန်။ အန် ဘော မုး ဒူအီ အီ ဘူင် ဆီချာ ဂါန် ခဲင် ကာင် အုဝ် ဒွန် မျုဝ်။ 8 ခုဝ်၊ ဆေ အုဝ် ကာလာင် ဂြုဝ်း ဒီ အန်၊ အုဝ် ကာလာင် ဆိူဝ် ဒီ အန်။ အုဝ် တဲး အန် နပ် ဆီချာ။ အုဝ် တူ ကာလာင် ဂြုဝ်း အီ ညှာပ် ထူမ်။ အုဝ် တဲး အန် ယိုဝ် ပီ ပါယ် အုဝ် အီ မုး ဇဝ်ဖြာ။ ခုဝ် န့ ပါယ် တီ မှဝ် န့ ပါယ် ပီ ဝီ ယ ကာလာင် ကာဘး ဘာယ် ဒီ အာမုဝ်ဆဲ အီ မုး ဒဲစေန့် အုဝ် တီ။း”

9 ပါယ် တီ ဇဝ်ဖြာ ဘော ရူ ကာဆဝ် ဒီ ဂါယ် ဘော လေး ဒူင် ကွယ် ဂါယ် တီ။ 10 ရွင့် န့အု တွိုန် မိူဝ်၊ န့ ဘော ကာဂဝ်း ဒီ ထိုပ် ဘိက် ဘွတ် တွိုန်။ နာင် မီရီယမ် ဘော မိုဝ်း ဆဝ် ဒု အူ ဇေန့်၊ ကော လုယ် ပီ ဘျြီ။ ဒေါ ယိုဝ် အာရူန် နာင် မီရီယမ် ဟဲ့ ဘဲန် ဒု ပါယ် တီ 11 အန် ဝီ ကာလာင် ဒီ အာမုဝ်ဆဲ တဝ်း၊ “အိုယ် မဲ ဒါ ကာညာ အုဝ်၊ အုဝ် မှာန့်၊ ကွဲ့ တဲး ယာယ် လုဝ် ခမ် ဒုက် ကူပ် မှာပ် ပဲ့ ဟဲ့ ကာလိုပ် ယာယ် တီ။ 12 ကွဲ့ တဲး နာင် မီရီယမ် ယမ် ပီ ဒူအီ အီ ဟဲ့ ယမ် ဆိန့် အာတ့် ဂွိုတ် လေး အန် ခဲင် ဝတ့် မာ အန်၊ ယင် အီ ဟဲ့ အမ် လာတ့် မင် ကာလဝ့်။”

13 အာမုဝ်ဆဲ ဘော ဝီ တဝ်း ဒီ ဇဝ်ဖြာ၊ “အိုယ် မဲ ဇဝ်ဖြာ၊ အုဝ် မှာန့်၊ တဲး ဆဝ် ဒု အန် တီ ဝီ ဟြာယ်။”

14 ဇဝ်ဖြာ ဝီ တဝ်း ဒီ အာမုဝ်ဆဲ၊ “ဆေ ဂုန့် အန် ပတ့် နာ အန်၊ အန် လုဝ် ဆာယ် အီ ဟဝ် အာဒါ ဘူ ဆီငဲ၊ မုး။း ဆေ န့ ပါယ် တီ အုဝ် တဲး အန် လေး ကွယ် နာ ရေတ့် ဒူင် ချ ဘေ အာဒါ ဘူ ဆီငဲ။ ဟဲ့ ဟွတ့်၊ အန် ပွိုန် ဝီ တး လိုပ် ခဲင် ဘာင် ဒူင် ချ ဘေ။” 15 ပါယ် တီ နာင် မီရီယမ် ဘော ကာဒုး ဒီ လေး ဟာဝ် ကွယ် နာ ရေတ့် ဒူင် ချ ဂေ၊ တဲး န့ ကော နုဝ့် ဘူ ဆီငဲ တီ။ ဒူအီ ဂေ တွိုန် မိူဝ် တူ ကာထုဝ့် ဘာင် ဒူင် ချ ဂေ။ ဂေ ဘော ဘ်ု တဲး နာင် မီရီယမ် ကော ဝီ တး။

16 ဝါယ် အန် တီ ဂေ ဘော ကာထုဝ့် လေး ဒူင် ကွယ် ဂေ အီ စိူဝ် ဟာစာရုတ် တွိုန်၊ ဝီ ဟာဝ် ခဲင် ပြဲ ကာဟဝ်း၊ ဝီ ချ ဒူင် စိူဝ် ဖာရာန်။