1 ဒေါ အန် တီ ဂေ ဒူအီ အီဆာရေလ ဘောကာဂ့လျီတ် ဟဲ့ ကာစုး ဒီ ပိုန့် ဒီ ဇဝ်ဖြာ ကူပ် ဟဲ့ ခမ် ဂေ ဒုက်။ ဇဝ်ဖြာ ဘော ယိုဝ် ဂြုဝ်း ဂေ တီ၊ အန် ဘော ရူ ကာဆဝ် ဒီ ဂေ။ အန် ဘော တဲး ငဝ် တး ကာဆိုမ် မင် ပ့လုဝ့် ကာတဲ ဂေ ဘော ပျာတ့် ဒီ ခူပ် ဆိူတ် ဒူင် ချ ဂေ။ 2 ပါယ် တီ ဂေ ဘော ဝီ ကာဖြူမ် ဒီ ဒတ် ဒဲ့ အာမုဝ်ဆဲ။ အာမုဝ်ဆဲ ဘော ဝီ ဆာခိုဝ် ဒီ ဇဝ်ဖြာ။ ဟဲ့ ဟွတ့်၊ ငဝ် တီ ဘော ဝီ ယေန်။ 3 ကူပ် ဟဲ့ တဲး ဇဝ်ဖြာ ငဝ် ကာဆိုမ် ကာတဲ ဂေ တီ၊ ဂေ ဘော တဲး ဒူင် တီ စိူဝ် ဒါဘီရာ။^a

4 ဝါယ် အန် တီ န့ မုး ဂေ ဒူအီ အာမျုဝ် ဟဝ် အီ ဒူပ် တး ဂေ ဒူအီ အီဆာရေလ၊ ဂေ မိူဝ် မိုဝ်း နဝ်း ဆီ ဟူမ် ကာဆဝ် ယင်။ ဘော ဂေ ဒူအီ အီဆာရေလ ဝီ ပိုန့် တဝ်း၊ “မှဝ် န့ ပါယ် ပီ အေတ့် အေ ယင် ပါယ် နီ။း 5 ဒေါ ကွယ် အေ ခဲင် မိူင် အဲဂိုပ်၊ အေ ပွိုန် ဒီ ဟာပ် ဖဲ မာဂါ၊ တူ လုဝ် စိုဝ်း။ အေ ဟဲ့ နမ်လှုဝ်း ဘော ဒီဂျီ ဘဲန် မျုဝ် ဘဲန် မျုဝ်၊ မှီ ဘော မာပုဝ် လုယ်၊ မာပုဝ် ရေန့်။ 6 ဒေါ တီ နီ၊ ယေ ဟဲ့ ပိုဝ် ကာဆဝ်။ ဒွန် ဆီငဲ၊ ဒွန် ဆီငဲ ဘော မုး မီ ခါမုန် မာနာ။ အာမျုဝ် ဟဝ် ခေါ အူ မျုဝ် မိူဝ် အာဝ် မိုဝ်း။”

7 ခါမုန် မာနာ တီ၊ န့ ပီ ကာအာင် ဖူဂီ။ န့ ဒေန့် လုယ် ပီ ကာညန် ဟေ ဘေဒါလူင်။ 8 ဒူအီ ဂေ တွိုန် ဘော ဟာဝ် ဒိုဝ်း တး ကြိတ်၊ တး ဒုး ခဲင် မ့ဘဝ် ဒဲ။ ဟဲ့ ဟွတ့်၊ ဂေ ဘော ဝီ ဒင် ခဲင် ကာလုဝ့်၊ ဘူင် တဲး န့ ဘဲန် ခါမုန် အီ ဒီခ့လဲပ်။ ပီ ပါယ် ဒီ ဆီငဲး၊ န့ ပီ ခါမုန် ပဲ့ ဟဲ့ ဟပ် အီ ခဲင် နာမန်။ 9 ခါမုန် မာနာ တီ စုဝ်း လူင် ခူပ် ဒူင် ကွယ် ဂေ တွိုန် ခဲင် မှိုဝ်။ န့ ဘော စုဝ်း ဒူပ် အိုမ် ဒီငါန်။

10 အာမုဝ်ဆဲ ဟဲ့ ယိုဝ် ဂေ ဒွန် န့ဟူမ်၊ ဂေ ဟဲ့ ကွယ် ဘဲန် ဖိုင် ဘဲန် ဖိုင် နာ အာတ့် ထိုပ် ဂေ။ န့ဟူမ် မှဝ် မိူဝ် ဟဲ့ ပိုန့် ဒီ ဇဝ်ဖြာ။ န့ ဘော ဘဲန် နဝ်း ဒီတဲတ် ဒီ အာမုဝ်ဆဲ ကူပ် ဟဲ့ ရူ ဇဝ်ဖြာ ဒီ ဂေ။ 11 အန် ဝီ တဝ်း ဒီ ဇဝ်ဖြာ၊ “မှဝ် န့ ပါယ် ပီ ခါနှာပ် မဲ ဇဝ် ဒီ အုဝ် ပါယ် နီ။း မှဝ် န့ ပါယ် ပီ တဲး မဲ ဇဝ် အုဝ် ယဲတ့် ဒူအီ ဂေ နီ၊ တဲး န့ ညှာပ် ကာဆဝ် တိူက် ဒီ အုဝ်။း မှဝ် န့ ပါယ် ပီ တူ ကာဝေ မဲ ဇဝ် ဒီ အုဝ်။း 12 ယီ ဟူ မုး အုဝ် အီ ဘူင် တဲး ဂေ ဂွိုတ်။ အုဝ် မိူဝ် တူ ကာဒုး ဒီ တူ အး ဒီ ဂေ။ မှဝ် န့ ပါယ် ပီ ဝီ တဲး မဲ ဇဝ် အုဝ် ဝီ စုဝ့် ငျီ့ ဂေ ပီ ဂွန် င ရေန့်။း မှဝ် န့ ပါယ် ပီ ဝီ တဲး မဲ အုဝ် ယဲတ့် ဟာဝ် ဂေ ဒီ မိူင် ပဲ့ ဟဲ့ ကာဆဲန့် မဲ ဇဝ် ဒီ ဒွါ ဒီ ဂုန့် ဒင် ဂေ။း 13 အုဝ် ဒီ ဒိုဝ်း ယင် ဒီ မှဝ်၊ ဟျီင် ဒူအီ ဂေ နီ။း ဂေ ဟဲ့ ကာပြာန့် ကာဆဝ် ယင်။ ဂေ ဟဲ့ မှာန့်၊ တဲး အုဝ် ဒွါ ဂေ ဟူမ် ယင်။ 14 အုဝ် အူ ဝီ အာဝ် ဟူ ပဲ ဒီ ယွတ် တူတ့် ဂေ။ န့ ဟဲ့ ကာဆဝ် တိူက် ဒီ အုဝ်။ 15 ဆေ မဲ ဇဝ် ဆီ ဘူင် ပါယ် တီ အုဝ် မှာန့်၊ တဲး မဲ ကာဝေ အုဝ်၊ ငဝ်း ယမ် အုဝ် ခြန် ခြန်၊ ကွဲ့ တဲး အုဝ် ဆီ ယိုဝ် အီ ဒုက် ဒီ နဝ်း အုဝ် ပါယ် တီ။”

16 ဇဝ်ဖြာ ဝီ ကာလာင် ဒီ အာမုဝ်ဆဲ တဝ်း၊ “တဲး မဲ ဒဲ့ တး ဂေ ဒူအီ ပဲ့ ဟဲ့ နပ် မဲ၊ ဂေ အီ မုး ဒါ တာင် အီ ယဲတ့် အီ ဟဝ်။ တဲး မဲ ဒဲ့ ဒူအီ ဇိုဝ် တီ အာဒါ ဘူ ဂိုဝ် ဝီ၊ တဲး ဂေ တး ကွယ် ရိုမ် ဒူပ် မဲ ဒီ အာတ့် ထိုပ် ဘိက် ဘွတ် တွိုန်။ 17 အုဝ် ဒီ တး လူင် ကာလာင် ဂြုဝ်း ဒီ မဲ ဒီ တီ။ အုဝ် ဒီ ဒိုဝ်း နဝ်း ဖွိုမ် အုဝ် ပဲ့ ဟဲ့ ဒွါ အုဝ် ဒီ မဲ တွိုန်၊ ဝီ ကာဆာင် ဘော ဒီ ဂေ၊ တဲး ဂေ ပွိုန် ဒီ စွယ် မဲ ယွတ် မဲန် ဒူအီ ဘောကာဂ့လျီတ်၊ ကွဲ့ တဲး န့ မုး မဲ အူ ဝီ အီ လုဝ် ယွတ် မဲန် ဂေ ဒူအီ ကိူန်။

18 တဲး မဲ ဘော ကာလာင် ဒီ ဒူအီ ကိူန် ဂေ တီ တဝ်း၊ ‘ခဲညှာ တဲး ဘေ ပီဆီငါ ဒုဝ် ဘေ။ ခုဝ်၊ ဘေ ဒီ ပွိုန် ဒီ ဟူမ် ယင်။ ဇဝ်ဖြာ ဟဲ့ ဟွတ့် ယိုဝ် ပီ ပိုန့် ဘေ ဒေါ ဟဲ့ မှာန့် ဘေ ဒီ ဟူမ် ယင်။ ဘေ ဟဲ့ တဝ်း ဒေါ ကွယ် ဘေ ခဲင် မိူင် အဲဂိုပ်၊ န့ ဟဲ့ မွှိုမ် လွှိုမ် ကွယ် ဘေ ဒီ နီ။ ခုဝ် အန် တီ၊ ဇဝ်ဖြာ ဒီ ဒွါ ယင် ဒီ ဘေ၊ တဲး ဘေ ပွိုန် ဒီ ဟူမ် ဖဲ။ 19 အာဝ် မုး ဘေ ဒီ ပွိုန် ဒီ ဟူမ် မီ အူ ဆီငဲ၊ အာ ဆီငဲ။ အာဝ် မုး မီ ခဲ့ ဖန် ဆီငဲ၊ ဂိုဝ် ဆီငဲ ဘော အာ ဂိုဝ် ဆီငဲ။ 20 ဘေ ဒီ ပွိုန် ဒီ ဟူမ် အာဒါ အူ မာဂျီန် ဘြီ ဘြီ၊ တဲး ဘေ ကော ဖဲ၊ ကော ဝီ ပိုဝ်၊ တဲး ဘေ ကော ဝီ ကာအိး။ န့ ဒီ ဘဲန် ပါယ် တီ ဒီ ဘေ ကူပ် ဟဲ့ ဝဲန် ဘေ ဇဝ်ဖြာ အီ ဟဲ့ ကွယ် ရိုမ် ဒူပ် ဘေ။ ဘေ ဟဲ့ ယာမ် ဒီ အာတ့် အန် ဇဝ် ဘော ဒတ် တဝ်း၊ ဒေါ ကွယ် ယေ ခဲင် မိူင် အဲဂိုပ်၊ န့ မွှိုမ် လွှိုမ် ကွယ် ယေ ဒီ နီ။’”

21 ဝါယ် အန် တီ အာမုဝ်ဆဲ ဝီ တဝ်း ဒီ ဇဝ်ဖြာ၊ “ဒူအီ ပီ ယဲတ့် အုဝ် နီ၊ ဂေ ဟဲ့ ကွယ် ဒဝ် ဆဲန် ဝီ။ မဲ ဇဝ် ယီ တဝ်း၊ ‘အုဝ် ဒီ ဟျီင် တဲး ဂေ ဟူမ် ယင် အာဒါ အူ မာဂျီန်။’ 22 မဲ ဆီ တဲး ယေ ဒိုဝ်း ဖိုင် မာမက်၊ ဖိုင် မာဘူ ဂေ ဖိုင် မာပဲ၊ ဝီ ငဝ်း ဝီ ဟျီင် ဂေ။း ဆေ အာဝ် ပါယ် တီ မိူဝ်၊ မဲ ဆီ တဲး ယေ ဒိုဝ်း ကာဇု တူတ့် ခဲ့ ကွယ် မာဂါ ခဲင် အိုမ် နမ်မုက်ဆာရာ နီ၊ တဲး ယေ ဝီ ဟျီင် ဂေ၊ တဲး ဂေ ကော ဖဲ။း”

23 ဇဝ်ဖြာ ဝီ တဝ်း ဒီ အာမုဝ်ဆဲ၊ “မဲ ထာင် အုဝ် တူ ပွိုန် ဘူင် ခဲ့ ပီ ကာလာင် အုဝ် တီ။း န့ ဒီ ဘဲန် တူ ဘဲန်၊ မဲ ဒီ ယိုဝ် ခြန် ခြန်။”

24 အာမုဝ်ဆဲ ဘော ဝီ လေး ဒူင် ကွယ် အန်၊ ဝီ ကာလာင် ဂြုဝ်း ဇဝ်ဖြာ တီ ဒီ ဂေ ဒူအီ ကိူန်။ အန် မိူဝ် ဝီ စ်ု အီ တဲး ဂေ ဒဲ့ ဂေ အီ မုး ဒါ တာင် ဘူ ဂိုဝ် ဝီ၊ တဲး ဂေ တး ကွယ် ရူပ် ထိုပ် ဘိက် ဘွတ်။ 25 ပါယ် တီ ဇဝ်ဖြာ ဘော လူင် ဒူပ် န့အု ဘော ကာလာင် ဂြုဝ်း ဒီ အာမုဝ်ဆဲ။ ဇဝ်ဖြာ ဘော ဒိုဝ်း နဝ်း ဖွိုမ် အီ ကွယ် ခဲင် နဝ်း အန် မင် ကာလဝ့်၊ ဝီ ဒွါ ဒီ ဂေ ဒါ တာင် ဘူ ဂိုဝ် ဝီ တွိုန်။ ဒေါ ဟဲ့ လိုပ် နဝ်း ဖွိုမ် ဇဝ်ဖြာ ခဲင် နဝ်း ဂေ တီ၊ ဂေ ဘော နပ် ဒီ ကာလာင် ဂြုဝ်း ပီ ဒါ အီ ဘျာန် ဂြုဝ်း ဇဝ်ဖြာ။ မာလဲ၊ ဂေ ယီ တူ ဘူင် ပါယ် တီ ပေါ အူ ဇေန့်။

26 ကာတဲ ဂေ ဒူအီ ဘူ ဂိုဝ် ဝီ တွိုန်၊ န့ ယီ မုး အာအေလာဒါတ် ဂါယ် အာမေဒါတ်။ နဝ်း ဖွိုမ် ဇဝ်ဖြာ လိုပ် ခဲင် ဒုဝ် ဂါယ်။ ဂါယ် ယီ တူ ကွယ် ဒီ အာတ့် ထိုပ် ဘိက် ဘွတ်။ ဂါယ် ဆီ ကွယ် ခဲင် ဒူင် ချ ဂေ တွိုန်။ ဂါယ် ဘော ဘျာန် ဂြုဝ်း ဇဝ်ဖြာ ခဲင် ဒူင် ချ ဂေ တီ။ 27 န့ ဝီ မိုဝ်း ကာညူမ် အူ ဝီ၊ အန် ဝီ ကာဘ့လဲပ် ဟာဝ် ကာလာင် ဒီ အာမုဝ်ဆဲ လွင် အာအေလာဒါတ် ဂါယ် အာမေဒါတ် ဟဲ့ ဘျာန် ဂြုဝ်း ဇဝ်ဖြာ ခဲင် ဒူင် ချ ဂေ။

28 န့ ယီ မုး အာယုဝ်ဆူအာ အီ မုး ဂွန် အာနုန်၊ အန် ဟဲ့ ဘဲန် ဒဲစေန့် အာမုဝ်ဆဲ ဆိန့် ဒေါ နှိုမ် အန်။ အန် တဝ်း ဒီ အာမုဝ်ဆဲ၊ “အိုယ် မဲ ဒါ ကာညာ အုဝ်၊ အုဝ် မှာန့်၊ တဲး မဲ ခြဲ ဂါယ်။”

29 အာမုဝ်ဆဲ ဝီ တဝ်း ဒီ အန်၊ “မဲ ဆီ နဲ ဂါယ် ကူပ် တူ ကွယ် ရိုမ် ဂါယ် ဒူပ် အုဝ်။း အုဝ် ဟဲ့ ဆီ တဲး ဒူအီ ပီ အိုပ် ဇဝ်ဖြာ ဒွန် အီ ဘဲန် တူတ့် ဒူအီ ဘျာန် ဂြုဝ်း ဇဝ်ဖြာ။ အုဝ် ဆီ မှာန့် ဘော နဝ်း ဖွိုမ် အန် ဇဝ် တဲး န့ အိုပ် ဒွန် အီ။” 30 ဟဲ့ ဟွတ့် ပါယ် တီ အာမုဝ်ဆဲ ဘော ဂေ အီ မုး ဒါ တာင် ဘူ ဂိုဝ် ဝီ တွိုန်၊ ဂေ ဘော ဝီ ဝေန့် ဒူင် ချ ဂေ။

31 ပန် တီ ဇဝ်ဖြာ ဘော ဘူင် တဲး ခုန် တး နာ ကွယ် အိုမ် နမ်မုက်ဆာရာ၊ တဲး န့ ဘုတ် တး မာ အာဘြူင့် ကိူန် ကာဆဝ်၊ တဲး ဂေ တး စုဝ်း ခူပ် ဒူင် ချ ဂေ တွိုန် ဒွန် ဘ့လာက်။ ဂေ ဘော စုး ရူပ် ဒူင် ချ ဂေ တီ ဘော တူင့် ခဲ့ ပွိုန် ဟာဝ် အာဒါ ခြာဝ် န့တေန့် အူ ဆီငဲ။ ဒဲင် ကာဒါယ် တီ ဒွန် ပ့လုဝ့်၊ န့ ဘော ဟေတ့် အာ ကာနိး။ 32 ဒူအီ ဂေ တွိုန် ဘော ဂဲပ် အုန် မာ အာဘြူင့် တီ ဒွင် ခိူန် ဒွင် ဝန်၊ ဘော ပါ ခဲညှာ ဒွင် ဝန်။ ဂေ အီ ပွိုန် ပြေတ့် လွှိုမ် အီ ဟဝ်၊ ဂေ ဆီ ဘော ပွိုန် ဖန် ဂိုဝ် ခွန်။ ဂေ ဘော ရာယ် ခူပ် ထိုပ် ဒူင် ချ ဂေ တွိုန်၊ ကော ရူပ် ဒွန် နာ ဒွန် ပ့လုဝ့်။ 33 မာလဲ၊ ဒေါ ဆီငျာ ဟူမ် ဂေ ယင် တီ၊ ဇဝ်ဖြာ ဘော ရူ ကာဆဝ် ဒီ ဂေ ဘော ဘူင် တဲး ဂေ ခမ် ဒုက် ဆဝ် ရောဂါ အီ တာင် ကာဆဝ်။ 34 ခုဝ်၊ ဂေ ဘော တဲး ဒူင် တီ စိူဝ်၊ ဂီဘာရုတ်ဟာတာဝါ။ ခုဝ်၊ န့ မုး ဒူင် ဒိပ် ဂေ ဒူအီ အီ မိုဝ်း နဝ်း လာမာက် ဒီ ဟူမ်။

35 ဝါယ် အန် တီ ဂေ ဘော ဝီ ကာထုဝ့် ဟာဝ် ဒူင် အီ စိူဝ် ဟာစာရုတ်။ ဂေ ဘော ဝီ ဟာဝ် ချ ဒီ တီ။