1 ဇဝ်ဖြာ ပီ ဝီ ကာလာင် ဒီ အာမုဝ်ဆဲ တဝ်း၊ 2 “တဲး မဲ ဒိုဝ်း လာန် ရွိုန် အာ ဒီဖ့လ၊ စိုမ် ဝဝ် အာ လဝ်၊ တဲး ဂေ ဘုတ် ဒေါ ဒဲ့ ကာဇု မဲ ဂေ ဒူအီ ဘော ဒေါ လုဝ် ကာထုဝ့် ဘေ ဘာင် ဒူင် ချ ဘေ။ 3 ဆေ ဟီ ဘုတ် ဝဝ် ဘော အာ လဝ် တီ၊ ခဲ့ ကွယ် ဒူအီ ဘော ဖိုင် လုဝ် တး ကာဇု ဒူင် ကွယ် မဲ ဒီ အာတ့် မာလုဝ်း ထိုပ် ဘိက် ဘွတ် တွိုန်။ 4 ဆေ ဂေ ယီ ဘုတ် မီ အူ လဝ်၊ န့ မုး မီ ဂေ ဒါ တာင် အီ အိုပ် ခဲင် ခြိုဝ် ဂေ လုဝ် တး ကာဇု ဒူင် ကွယ် မဲ။ 5 ဆေ ဂေ ယီ ဘုတ် ဒီယေန့် ဒီယေန့်၊ န့ မုး ဂေ ဒူအီ အီ ကွယ် ဘ့လာက် နာ လေး ဆီငဲ၊ ဂေ လုဝ် ကာထုဝ့် ဟာဝ်။ 6 ဆေ ဟီ ဘုတ် ဒီယေန့် ဒီယေန့် ပေါ အူ ဇေန့်၊ န့ မုး ဂေ ဒူအီ အီ ကွယ် ဘ့လာက် နာ တေတ့် အီ လုဝ် ကာထုဝ့် ဟာဝ်။ ပါယ် တီ ဆေ ဟီ ဘုတ် ဒီယေန့် ဒီယေန့်၊ န့ တဲး ဒူအီ နပ်၊ ဂေ လုဝ် ကာထုဝ့် ဘာင် ဒူင် ချ ဂေ။ 7 ဆေ န့ လုဝ် ဒဲ့ ဒူအီ တး ကာဇု၊ လုဝ် ဘုတ် တဲး ဟမ် တူင့်၊ ယီ တူ လုဝ် ဘုတ် ဒီယေန့် ဒီယေန့်။

8 ဂေ ဒါ အီ လှူ ဒီ ဇဝ်ဖြာ အီ မုး ဂွန် အာရူန် တွိုန်၊ ဂေ လုဝ် ဘုတ် ဝဝ် တီ။ လွင် အန် တီ၊ တဲး ဘေ ဘူင် တဲး န့ ကော ဇမ် စုဝ် လှုက် စုဝ် လှာန် ဘေ ဒွန် စုဝ် ဒွန် ဘာန်။ 9 ဆေ န့ မိုဝ်း ဒါ ဆိုက် အီ တး ကာဂုဝ်း ခဲင် မိူင် ဘေ၊ ဆေ ဘေ လုဝ် ကာဂုဝ်း ဒီ ဂေ၊ ဘေ လုဝ် ဘုတ် ဝဝ် နီ၊ တဲး န့ ဒွါ ဆာဒိက် ဒီ အုဝ်။ အုဝ် မုး ဇဝ်ဖြာ ပီ ကြိုပ် ဘေ၊ အုဝ် ဒီ စွယ် ဘေ၊ တဲး ဘေ လွတ် ဒီ ရန်ဆူ ဘေ တီ။ 10 ဒေါ မုး ဆီငဲ ဘျုဝ် ဆီငဲ ကျဝ် ဘေ၊ ဆီငဲ ဘူင် ဘေ ဘ့လွယ်၊ ဘော ဆီငဲ လိူန်မူန်၊ တဲး ဘေ ဘုတ် ဝဝ် တီ။ ဘော ဆေ ဘေ လှူ ပီ ဒီ လှူ အီ ဒုဝ့် ဒီ ငဝ် ဘော ပီ လှူ အီ ကွယ် ကာဇု ဟူမ် ရိုမ်၊ ဘေ လုဝ် ဘုတ် ဝဝ် တီ။ ဒေါ အန် တီ အုဝ် ဒီ ဘော လှုဝ်း ဘေ ဘော ထူမ် ဟမ် ဝဝ် တီ ဘော စွယ် ဘေ။ အုဝ် မုး ဇဝ်ဖြာ ပီ ကြိုပ် ဘေ။”

11 ဂေ ဒူအီ အီဆာရေလ ဟဲ့ လေး ခဲင် မိူင် အဲဂိုပ် အာဒါ အူ ဆီနမ်၊ ဒေါ ဇမ် ဆီနမ် ဟာအာ၊ မာဂျီန် ဟာအာ၊ ဆီငဲ အာ ဂိုဝ်၊ န့အု တွိုန် ဘော ကာဂဝ်း ဒီ ထိုပ် ဘိက် ဘွတ် တွိုန်။ 12 ဂေ ဒူအီ အီဆာရေလ မိူဝ် ကာထုဝ့် ဒူင် ကွယ် ဂေ ဒီ နွန် ဆီနာယ် တွိုန်။ န့အု တီ ဘော ဝီ ဟာဝ် ဂိူတ် ခဲင် ပြဲ ကာဟဝ်း ဒူင် စိူဝ် ဖာရာန်။ 13 န့ မုး ဒေါ ဂုဝ် ဒေါ ကာထုဝ့် ဟာဝ် ဂေ ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တွိုန်။

14 ပါယ် တီ ဂေ ဘော ကာထုဝ့် ဟာဝ် ဒေါ မှဝ်၊ ဂေ မိူဝ် ဟာဝ် လာယ် ဒါမ် ဒွန် ဇေန့် ပီ ခါ နီ။ ဂေ ဒူအီ ခြိုဝ် အာယူဒါ၊ ဂေ ဘော ဂူင့် အာလာမ် ဂေ၊ ယဲတ့် ဒီ အာတ့် အီ ဟဝ်။ အာနာဆူန် အီ မုး ဂွန် အာမီနာဒါပ်၊ အန် ဘော ဘဲန် အီ အိုပ် အီ ယဲတ့် ခြိုဝ် အာယူဒါ တီ။ 15 အာနေထာနေလာ အီ မုး ဂွန် အာစူအာ၊ အန် ဘော ယဲတ့် ဒူအီ ခဲင် ခြိုဝ် အာအီဆာခါ။ 16 အာအေလီအာပ် အီ မုး ဂွန် အာဟေလူန် ဘော ယဲတ့် ဒူအီ ခဲင် ခြိုဝ် အာဇေဘူလူန်။ 17 ဂေ ဘော ယဝ်း လေး ဘော ဒိုဝ်း လူင် ထိုပ် ဘိက် ဘွတ် တွိုန်။ လှုက်လှာန် အာဂေန်ရာဆူန် ဂါယ် အာမေန်ရာရီ၊ ဂေ ဘော ကာဂွတ် ဟာဝ် ခြိုင် ထိုပ် ဘိက် ဘွတ်။

18 ဝါယ် တီ ဒူအီ ခဲင် ခြိုဝ် အာရူဘေန် န့ဟူမ် မှဝ် န့ဟူမ် အန် ဘော ဂူင့် ဟာဝ် အာလာမ် ဂေ။ အာအေလီစူ အီ မုး ဂွန် အာဆေတူရ၊ အန် ဘော ယဲတ့် ခြိုဝ် အာရူဘေန် တီ။ 19 အာဆေလူမေန် အီ မုး ဂွန် အာဇူရီဆာဒေ၊ အန် ဘော အိုပ် ဘော ယဲတ့် ဒူအီ ခြိုဝ် အာဆီမေအူန်။ 20 အာအေလာဆာပ် အီ မုး ဂွန် အာတူလာ၊ အန် ဘော ဘဲန် အီ အိုပ် အီ ယဲတ့် ဒူအီ ခြိုဝ် အာဂတ်။ 21 ဟဲ့ ဟွတ့် ပါယ် တီ ဒူအီ အာမျုဝ် အာခုဝ်ဟာတ် ဘော ကာဂွတ် ခြိုင် ဘဲန် မျုဝ် ဘဲန် မျုဝ် အီ ဆီငါ ဘွတ် တွိုန်။ နီ ဒီ ဟာဝ် ဇမ် ဂေ ဒူင် ချ ကာမာယ်၊ ဒူအီ ဂေ အီ ဟဲ့ ယဲတ့် တွိုန် လုဝ် ဝီ ဆမ် အုန် ထိုပ် ဘိက် ဘွတ်၊ တဲး န့ ဟွတ့်။

22 ဝါယ် တီ ဒူအီ ခဲင် ခြိုဝ် အာအေဖာရိမ် ဘော ဂူင့် အာလာမ် ဂေ ဟာဝ် ဘဲန် ဖိုင် ဘဲန် ဖိုင်။ အာအေလီဆာမာ အီ မုး ဂွန် အာမီဟုတ် ဘော ဘဲန် အီ အိုပ် အီ ယဲတ့် ဂေ။ 23 အာဂါမာလေန် အီ မုး ဂွန် အာပေတာစူရ ဘော ဘဲန် အီ အိုပ် အီ ယဲတ့် ဒူအီ ခဲင် ခြိုဝ် အာမာနာဆေ။ 24 အာဖီဒါန် အီ မုး ဂွန် အာကီတောနီ ဘော ဘဲန် အီ အိုပ် အီ ယဲတ့် ဒူအီ ခဲင် ခြိုဝ် အာဘေန်ယာမ်။

25 ဒူအီ ခဲင် ခြိုဝ် အာဒါန် ဘော လေး ဟာဝ် ဂူင့် အာလာမ် ဂေ ဘဲန် ဖိုင် ဘဲန် ဖိုင်။ ဂေ ဘော ဘဲန် အီ ဒူပ် ဒီ ပန် ဆိူတ် အီ ဒွန် ဖိုင်။ အာဟေစာ အီ မုး ဂွန် အာမီဆာဒေ ဘော ဘဲန် အီ အိုပ် အီ ယဲတ့် ဒူအီ ခြိုဝ် အာဒါန် တီ။ 26 အာဘာဂ့လဝ် အီ မုး ဂွန် အာအောခါရာ၊ အန် ဘော ဘဲန် အီ အိုပ် အီ ယဲတ့် ဒူအီ ခြိုဝ် အာဆေန်။ 27 အာဟီရ အီ မုး ဂွန် အာအေနန် ဘော ဘဲန် အီ အိုပ် အီ ယဲတ့် ဒူအီ ခြိုဝ် အာနာပ်ထာလီ။ 28 အာတီ ဘော မုး လွင် ဂေ ဒူအီ အီဆာရေလ ကာထုဝ့် ဘာင် ဒူင် ချ ဂေ။ ဂေ ဘော ချ လာယ် ဒါမ် ဖိုင် မှဝ် ဖိုင် အန်၊ ခြိုဝ် မှဝ် ခြိုဝ် အန်။

29 အာမုဝ်ဆဲ ဝီ ကာလာင် ဒီ အာဟုဝ်ဘာ အီ မုး ဂွန် အာရေအူအေန်။ အာရူဘေန် မုး ဘိုဝ် အာမုဝ်ဆဲ တွိုန် အီ ကွယ် ခဲင် မိူင် မီဒီအာန်။ အာရေအူအေန် ဘော စိူဝ် အာယေထာရုဝ်။ အာမုဝ်ဆဲ တဝ်း ဒီ အန်၊ “ယေ ဒီ ဟာဝ် ဒူင် ပဲ့ ဟဲ့ ကာဆဲန့် ဇဝ်ဖြာ ဒီ ဒွါ ဒီ ယေ။ ဟာဝ် မဲ ဟာဝ် ဒူပ် ယေ၊ ယေ ဒီ ဘူင် နာ မွှိုမ် ဒီ မဲ။ ခုဝ်၊ ဇဝ်ဖြာ ဟဲ့ တဝ်း ဒီ ဘူင် နာ မွှိုမ် ဒီ ယေ။”

30 အာဟုဝ်ဘာ ဝီ တဝ်း၊ “အုဝ် တူ ဟာဝ်၊ အုဝ် ဒီ ဝီ ဝေန့် ခဲင် မိူင် ဘြိမ် အုဝ်၊ ဒူင် ကွယ် ဘီနွင် ဝေါဝဲ အုဝ်။”

31 အာမုဝ်ဆဲ ပီ ဝီ တဝ်း ဒီ အန်၊ “မဲ ကွဲ့ ဝဲန် ယေ၊ မဲ မုး အီ ဟဲ့ နပ် ပီ ဒီ ပါယ် လုဝ် ကွယ် ခဲင် ပြဲ ကာဟဝ်း နီ။ မဲ ဟဲ့ ပီ ငါယ် ယေ၊ ဟဲ့ နပ် ဒီ မာနုဝ် ယေ လွင် အန် တီ။ 32 ဆေ မဲ ဟာဝ် ဒူပ် ယေ၊ ခဲ့ ဘော မိုဝ်း နာ ဘွတ် ပီ ဒွါ ဇဝ်ဖြာ ဒီ ယေ၊ ယေ ဒီ ဝီ ကာဆာင် ဒွါ ဘော ဒီ မဲ။”

33 ဂေ ဒူအီ အီဆာရေလ ဘောကာဂ့လျီတ် ဟဲ့ ဟွတ့် လေး ဒီ နွန် ဆီနာယ် အီ မုး နွန် ဒူင် ကွယ် ဇဝ်ဖြာ တီ၊ ဂေ ဘော ဟာဝ် ဒူပ် န့တေန့် အာဒါ အူယ် ဆီငဲ။ ဇီဒိူက် ဇဝ်ဖြာ တွိုန် ဘော ယဲတ့် ဒီ အာတ့် ဂေ ဆေဆေ၊ တဲး ဂေ ဟြေတ့် ဒူင် ဒီ ချ ဂေ။ 34 ဒေါ ဟာဝ် ဂေ ဒူပ် န့တေန့် တီ၊ န့အု ဇဝ်ဖြာ တွိုန် ဘော ကွယ် ကာရူယ် ဂေ ဒေါ ကာတဲ ဆီငဲ။

35 ဒေါ ကာစုး ဂေ ဒီ ဒိုဝ်း ဟာဝ် ဇီဒိူက် ဇဝ်ဖြာ တီ၊ အာမုဝ်ဆဲ ဝီ တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ယဲတ့် ယေ။ တဲး ဂေ ရန်ဆူ မဲ ဇဝ် တဝ် ကာယဝ်း ကာရေး ဟာဝ် ဒွန် ဘ့လာက်။ တဲး ဂေ အီ ဇွင့် မဲ ဇဝ် တဝ် မဲ။”

36 ဒေါ ဟဲ့ ဝီ ဂိူတ် ကွယ် ဇီဒိူက် ဇဝ်ဖြာ တီ၊ အာမုဝ်ဆဲ ပီ ဝီ တဝ်း၊ “အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဝီ တး ကွယ် ဒူင် ကွယ် ဂေ ဒူအီ အီဆာရေလ အီ ဟဲ့ ကိူန် ဘဲန် မှိုန့် ဘဲန် ဆဲန် နီ။”