1 ဝါယ် ဟဲ့ လေး ဂေ ဒူအီ အီဆာရေလ ခဲင် မိူင် အဲဂိုပ်၊ န့ ဟဲ့ နုဝ့် အူ ဆီနမ် ဒီ အူ မာဂျီန်။ ဒေါ အန် တီ ဇဝ်ဖြာ ဝီ ကာလာင် ဒီ အာမုဝ်ဆဲ ခဲင် ပြဲ ကာဟဝ်း ဒီ ခူပ် နွန် ဆီနာယ်။ 2 အန် တဝ်း၊ “ဆေ ဟီ ဇမ် အာခြာဝ် အန်၊ တဲး ဂေ ဒူအီ အီဆာရေလ ဘူင် ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။ 3 မာဂျီန် တီ ဟီ ဇမ် ဂိုဝ် ဒီ ဖွုန် ဆီငဲ၊ နာ ဘာ ဒီ အပ်၊ တဲး ဂေ ဘူင် ဘ့လွယ် တီ၊ တဲး န့ ဒူပ် ခဲ့ ပီ ဒမ် အုန် အုဝ် ဒီ ဘေ လွင် ဘ့လွယ် တီ ဒွန် မျုဝ်။”

4 ဟဲ့ ဟွတ့်၊ အာမုဝ်ဆဲ ဝီ ကာလာင် ဒီ ဂေ ဒူအီ အီဆာရေလ၊ တဲး ဂေ ဘူင် ဘ့လွယ် တီ။ 5 ပါယ် တီ ဒေါ ကွယ် ဂေ ခဲင် ပြဲ ကာဟဝ်း ဒီ ခူပ် နွန် ဆီနာယ် တွိုန်၊ ဒေါ ဟဲ့ ဇမ် မာဂျီန် ဒေါ ဂုဝ်၊ ဆီငဲ ဂိုဝ် ဒီ ဖွုန်၊ နာ ဘာ ဒီ အပ်၊ ဂေ ဘော ဘူင် ဘ့လွယ် တီ။ ဂေ ဒူအီ အီဆာရေလ မိူဝ် ဘူင် ဒူပ် တူတ့် ဒွန် မျုဝ် ခဲ့ ပီ စ်ု ဇဝ်ဖြာ ဒီ အာမုဝ်ဆဲ။

6 မာလဲ၊ န့ ယီ မိုဝ်း ဂေ ဒူအီ မင် အီ အီ တူ ပွိုန် လိုပ် ဘ့လွယ် တီ ကူပ် တူ ဆီငါ ဂေ မျုဝ် အီ ဒူပ် ဒါရာ။ ခုဝ်၊ ဂေ ဟဲ့ တာ ဒိုဝ် ဒုဝ် ဒူအီ ယမ်။ ဆီငဲ အန် တီ ဂေ ဘော ဝီ ဟာဝ် ဒူင် ကွယ် အာမုဝ်ဆဲ ဂါယ် အာရူန်၊ 7 ဝီ ဒီမွှတ် ဂါယ် တဝ်း၊ “ဒုဝ် ယေ တူ ဆီငါ ကူပ် ဟဲ့ တာ ဒိုဝ် ယေ ဒီ ဒူအီ ယမ်။ ယေ ယီ ဆီ ဒူပ် ဂေ ဒူအီ အီဆာရေလ ဘောကာဂ့လျီတ်၊ လှူ ဒီ ဇဝ်ဖြာ။ မှဝ် န့ ပါယ် ပီ တူ ပွိုန် ယေ ဘူင် ပါယ် တီ။း”

8 အာမုဝ်ဆဲ ဝီ တဝ်း ဒီ ဂေ၊ “တဲး ဘေ နှဝ့်၊ အုဝ် ဒီ ဒီမွှတ် ဇဝ်ဖြာ၊ ယုဝ် ဇဝ်ဖြာ ဒီ တဝ်း မာဆေ ဒီ ဘေ။”

9-10 ဇဝ်ဖြာ ဝီ ကာလာင် ဒီ အာမုဝ်ဆဲ၊ တဲး အန် ကာလာင် ဒီ ဂေ ဒူအီ အီဆာရေလ တဝ်း၊ “ဘော ဘေ ဘော လှုက်လှာန် ဘေ၊ ဆေ န့ မိုဝ်း ဒူအီ အီ တူ ဆီငါ ကူပ် ဟဲ့ တာ ဒိုဝ် အန် ဒုဝ် ဒူအီ ယမ်၊ ဆေ န့ ဘော မိုဝ်း ဒူအီ အီ တူ ပွိုန် ဒီ လိုပ် ဘ့လွယ် တီ ကူပ် ဟဲ့ ဟာဝ် အန် ဒူပ် န့တေန့်၊ ကူပ် ဟဲ့ ကွယ် တူင့် အန်၊ ဆေ ဂေ ယီ ဆီ လိုပ် ဘ့လွယ် တီ၊ 11 တဲး ဂေ ဝီ ဘူင် ဘ့လွယ် တီ ဒေါ ဟဲ့ ဇမ် ပေါ အူ မာဂျီန်။ ဒေါ ဇမ် မာဂျီန် ဟာအာ၊ ဆီငဲ ဂိုဝ် ဒီ မ့ဖွုန်၊ နာ ဘာ ဒီ အပ်၊ တဲး ဂေ ဟူမ် မာဘူ ဘော ခါမုန် အီ တူ ဟပ် ဆီနမ် ဘြး ဘော ဒဝ် ဆွင့်။ 12 ပီ ဒီ ဟူမ် တီ ဒွန် မျုဝ်၊ ကွဲ့ တဲး န့ ကာလူယ် ဇမ် ပါ ခဲညှာ။ ကာအာင် ဒုဝ် ဆတ် တီ မိူဝ်၊ ဂေ တူ ပွိုန် ကာဘက် ခေါ အူ ဘူင့်။ တဲး ဂေ ဘူင် ဘ့လွယ် တီ၊ တဲး န့ ဒူပ် တူတ့် ဒွန် မျုဝ် ခဲ့ ပီ စ်ု အုဝ်။ 13 ဆေ န့ ယီ မိုဝ်း ဒူအီ အီ ဟဲ့ ဆီငါ ဘွတ် ဒူပ် ပီ ဒမ် ဒါရာ၊ အန် မိူဝ် တူ ဝဝ့် ဒီ မှဝ်၊ အန် ယီ တူ ဆီ လိုပ် ဘ့လွယ် တီ၊ အာဝ် ပွိုန် မာတ် အန် မုး ဒူအီ အီဆာရေလ။ ခုဝ်၊ အန် တူ လှူ ပီ ဒီ လှူ ဒီ အုဝ် ဒေါ ဇမ် အာခြာဝ် အန်။ အန် လုဝ် ဝီ ခမ် မှာပ် အန်။

14 ဆေ န့ မိုဝ်း ဒူအီ အာမျုဝ် ဟဝ် အီ ကွယ် ကာတဲ ဘေ၊ ဆေ အန် ဆီ လိုပ် ဘ့လွယ် တီ၊ တဲး အန် ဘူင် ဒူပ် တူတ့် ဒွန် မျုဝ် ခဲ့ ပီ စ်ု အုဝ် ဘေ ဘူင်၊ န့ ဘော မုး ခဲတ့် ဘော မုး ဒူအီ အာမျုဝ် အုဝ် အာဝ် တဝ်း၊ ခဲ့ ပီ လုဝ် ဘူင် ဂေ၊ န့ ဘော မုး အူ မျုဝ်။”

15 ဝါယ် ဟဲ့ ဟွတ့် ဂေ ဆမ် ထိုပ် ဘိက် ဘွတ် တွိုန်၊ ဆီငဲ တီ န့ ဘော မိုဝ်း န့အု တး ပ့လိုက် ထိုပ် ဘိက် ဘွတ် တီ။ စုး ဆိန့် ဘာ ဒီ အပ် ကော ဇမ် ပါ ခဲညှာ ဆိန့်ဝး န့အု တီ ပီ ငဝ်။ 16 ကာတဲ ဆီငဲ န့ ဘဲန် န့အု အီ ပ့လိုက်။ ခဲင် မှိုဝ် န့ ယီ ဝီ ဘဲန် ပီ ငဝ်။ န့အု ယီ ပ့လိုက် ပါယ် တီ ဆေဆေ။ 17 ဒွန် ဇေန့်၊ ဆေ န့အု တီ ကာဂဝ်း ဒီ ထိုပ် ဘိက် ဘွတ်၊ ဂေ ဒူအီ အီဆာရေလ မိူဝ် ဒီ ဒီဂျြီပ် ဒီဂြူမ် ထိုပ် ဘိက် ဂေ ဒွန် မျုဝ်၊ ဟာဝ် ဒူပ် န့အု တီ။ န့အု တီ ဟာဝ် ဂိူတ် ဒီ မှဝ်။ ဂေ မိူဝ် ဝီ ဆမ် ထိုပ် ဘိက် ဂေ ဒီ တီ။ 18 ပါယ် တီ ဂေ ဒူအီ အီဆာရေလ ဘူင် ဒူပ် ပီ စ်ု ဇဝ်ဖြာ ဂေ ဘူင်။ ဂေ ဘော ဟာဝ် ဘော ချ၊ တဲး န့ ဒူပ် ပီ ကာလာင် ဇဝ်ဖြာ ဒီ ဂေ။ ဆေ န့အု တီ ဟဲ့ ပ့လိုက် ထိုပ် ဘိက် ဘွတ် တွိုန်၊ ဂေ မိူဝ် ဝီ လိုပ် ကွယ် ခဲင် ထိုပ် ဂေ။ 19 ဆေ န့အု တီ ပ့လိုက် ထိုပ် ဘိက် ဘွတ် တွိုန်၊ န့ ပီ ဘော လှေန့် မိူဝ်၊ ဂေ ဒူအီ အီဆာရေလ တူ ကာထုဝ့် ဟာဝ် နာ မှဝ်။ န့ ဘော လှေန့် ခဲ့ မှဝ်၊ ဂေ မိူဝ် ဘ်ု ဒီ ထူမ် ပီ ကာလာင် ဇဝ်ဖြာ ဒီ ဂေ။ 20 မင် ဇေန့် န့အု တီ ပ့လိုက် ထိုပ် ဘိက် ဘွတ် တွိုန် အာဒါ မီ အာ အူယ် ဆီငဲ။ ဂေ ယီ ချ ဒေါ ကာလာင် ဇဝ်ဖြာ ဘော ကာထုဝ့် ဒေါ ကာလာင် ဇဝ်ဖြာ ဒီ ဂေ။ 21 မင် ဇေန့် န့အု တီ ပ့လိုက် ထိုပ် ဘိက် ဘွတ် မီ ဘာ ဒီ အပ် ဇမ် ဆိန့်ဝး၊ ဟဲ့ ဟွတ့် ဝီ န့စုဝ့် ဟုဝ့်။ ဆေ န့ ပါယ် တီ ဂေ မိူဝ် ကာထုဝ့် ဘာင် ဒူင် ချ ဂေ ဒူပ် န့အု တီ အူ ဇေန့်။ ဘော မုး ခဲင် မှိုဝ်၊ ဘော မုး ကာတဲ ဆီငဲ၊ န့အု တီ စုဝ့် ဟုဝ့် ဒေါ မှဝ်၊ ဂေ မိူဝ် ကာထုဝ့် ဒေါ အန် တီ။ 22 န့ ဘော မုး အာဒါ အာ ဆီငဲ၊ ဘော မုး အာဒါ အူ မာဂျီန်၊ ဘော မုး အာဒါ အူ ဆီနမ်၊ န့ ပီ ဘော လှေန့် ခဲ့ မှဝ် အာဝ် တဝ်း၊ ဆေ န့အု ယီ ပ့လိုက် ထိုပ် ဘိက် ဘွတ် တီ၊ ဂေ မိူဝ် တူ ကာထုဝ့် ဘာင် ဒူင် ချ ဂေ။ ဆေ န့အု ဟဲ့ ကာဂဝ်း၊ စုဝ့် ဟုဝ့် ဒေါ မှဝ်၊ ဂေ မိူဝ် ကာထုဝ့် ဘာင် ဒူင် ချ ဂေ ဒေါ အန် တီ။ 23 ပါယ် တီ ဂေ မိူဝ် ထူမ် ပီ စ်ု ဇဝ်ဖြာ ဂေ ဘူင် ဒွန် မျုဝ်။ ဒေါ စ်ု ဇဝ်ဖြာ ဂေ ကွယ်၊ ဂေ မိူဝ် ချ ကွယ်။ ဒေါ စ်ု ဇဝ်ဖြာ ဂေ ဟာဝ်၊ ဂေ မိူဝ် ကာထုဝ့် ဟာဝ်။ ဂေ ဘူင် တူတ့် ဒွန် မျုဝ် ခဲ့ ပီ ဒမ် အုန် ဇဝ်ဖြာ ဒီ အာမုဝ်ဆဲ။