1 ဇဝ်ဖြာ ပီ ဝီ စ်ု အာမုဝ်ဆဲ 2 တဲး အန် ကာလာင် ဒီ အာရူန် တဝ်း၊ “ဆေ မဲ ဘ့လေး ငဝ် အွမ် ဘူ ဘူင့် ဒဲင် ဒင် အန် ဘော ပီဒဝ့် ငဝ် တီ၊ မဲ လုဝ် ဆာဒိက် တဲး ဘ့လာင် အန် လိုဝ်း ဟာဝ် နာ အာတ့်။” 3 အာရူန် မိူဝ် ဘူင် ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တီ။ အန် မိူဝ် ဘ့လေး ငဝ် အွမ် တီ၊ တဲး န့ ဘ့လာင် နာ အာတ့် ဒင် အန်။ 4 ဒင် ငဝ် အွမ် တီ၊ ဂေ ဟဲ့ ဘူင် တာ ခြိဝ် စုး ဒီ ဒင် အန် ကော ဇမ် ရာ အန် အီ မိုဝ်း ဒူင် ဒီ ဘ့လေး ငဝ် အွမ်။ ဂေ ဟဲ့ ဒိုဝ်း ခြိဝ်၊ ဒွက် တဲး န့ မုး အူ မျုဝ်၊ ကွဲ့ တဲး န့ မိုဝ်း ဒူင် အီ လာယ် ကာဒုတ့်၊ တဲး န့ ပီ ပီ ဘျ ဇဝ်ဖြာ ဒီ အာမုဝ်ဆဲ။

5 ဝါယ် အန် တီ ဇဝ်ဖြာ ပီ ဝီ ဒမ် အာမုဝ်ဆဲ တဝ်း၊ 6 “တဲး မဲ ရဝ်း ဒူအီ အာလေဝီ၊ တဲး ဂေ လေး တ ဒူအီ အီဆာရေလ၊ ဘူင် တဲး ဂေ ဆီငါ ဘွတ် ဒူပ် ပီ ဒမ် ဒါရာ။ 7 မဲ လုဝ် ဒိုဝ်း အိုမ် အီ တဲး န့ ဘွတ် ဆီငါ ဒွန် မျုဝ်၊ ဝီ ခြဝ်း ဒဲင် ဂေ၊ တဲး ဂေ ဆီငါ ဘွတ် ဒူပ် ပီ ဒမ် ဒါရာ။ ဟဲ့ ဟွတ့်၊ မဲ လုဝ် ဂါ့ ဝဲန် ဟိုက် ဒီ ဒုဝ် ဂေ ဘော ဒုဝ်။ မဲ လုဝ် တဲး ဂေ လး ဘော ခြိုင် တာ ဂေ။ ပါယ် တီ ဂေ ဒီ ဘဲန် ဒူအီ အီ ဆီငါ ဘွတ် ဒူပ် ပီ ဒမ် ဒါရာ။ 8 ဆေ ဟဲ့ ဟွတ့် ပါယ် တီ ဂေ လုဝ် ဒိုဝ်း ဂွန် မာမက် အာလူင့် အူ ဒုဝ်၊ ဘော ပီ ဒီ လှူ ဒီဂါဝ် အီ မုး ကာပဲ့ အီ ဟဲ့ ကာမွတ့် ဆီချာ၊ အီ ဟဲ့ ကာဝ်ု နာမန်။ မဲ လုဝ် ဝီ ဒိုဝ်း တး မာမက် အာလူင့် အီ ဆီ နှိုမ် ပေါ အူ ဒုဝ်၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ 9 ပန် တီ မဲ လုဝ် တဲး ဒူအီ အာလေဝီ ဂေ တီ တး ကွယ် နာ အာတ့် ထိုပ် ဘိက် ဘွတ် တွိုန်၊ ဝီ ဒဲ့ တး ကာဇု ဘော ဂေ ဒူအီ အီဆာရေလ ဘောကာဂ့လျီတ်။ 10 ပါယ် တီ မဲ လုဝ် တဲး ဂေ ဒူအီ အာလေဝီ ကွယ် နာ အာတ့် ဇဝ်ဖြာ၊ ဝီ တဲး ဂေ ဒူအီ အီဆာရေလ ဒါင် ဒဲ ဂေ ဒဲင် ဂိန့် ဒူအီ အာလေဝီ ဂေ တီ။ 11 ပါယ် တီ အာရူန် လုဝ် ဝီ လှူ ဒူအီ အာလေဝီ ဂေ တီ ဒီ အုဝ် အီ မုး ဇဝ်ဖြာ၊ တဲး န့ ဘဲန် ပီ ဒီ လှူ အီ မာဝတ် ဝိဝ် မာဝတ် ဝေန့်။ ဟဲ့ ဟွတ့်၊ ဂေ ပွိုန် ဒီ ဘူင် ဂါန် အုဝ် အီ မုး ဇဝ်ဖြာ။

12 ဆေ ဟီ ဟွတ့် ပါယ် တီ တဲး မဲ ဝီ တဲး ဒူအီ အာလေဝီ ဂေ တီ ဝီ ဒါင် ဒဲ ဂေ ဒဲင် ဂိန့် မာမက် အာ ဒုဝ် တွိုန်။ မဲ လုဝ် ဝီ ဒိုဝ်း မာမက် အာဒါ အူ ဒုဝ် လှူ၊ တဲး န့ ဘဲန် ပီ ဒီ လှူ အီ ဂဝ်း ဝဲန် မှာပ်။ အာဒါ ပေါ အူ ဒုဝ် တွိုန်၊ တဲး န့ ဘဲန် ပီ ဒီ လှူ ဒီ ဇဝ်ဖြာ အီ ဒုဝ့် ခဲင် ငဝ်၊ တဲး န့ တဲး ဒူအီ အာလေဝီ ဝီ ကာလဝ့် ဒီ ဇဝ်ဖြာ။ 13 မဲ လုဝ် တဲး ဂေ ဒူအီ အာလေဝီ ကွယ် ဒီ အာတ့် အာရူန် ဂေ ဂွန် အန်၊ တဲး ဂေ လှူ ဒူအီ အာလေဝီ ဂေ တီ ဒီ အုဝ်၊ တဲး ဂေ ဘဲန် ပီ ဒီ လှူ အီ မာဝတ် ဝိဝ် မာဝတ် ဝေန့်။ 14 ပါယ် တီ တဲး မဲ ရဝ်း ဂေ ဒူအီ အာလေဝီ၊ တဲး ဂေ ကာယဝ်း ဒီ ဒူအီ အီဆာရေလ၊ တဲး ဂေ ဘဲန် မီ ဒူအီ ပီ ဆုတ့် ပီ စ်ု အုဝ်။

15 ဝါယ် ဟဲ့ ဟွတ့် ဘူင် မဲ တဲး ဂေ ဆီငါ ဘွတ်၊ ဟဲ့ ဟွတ့် လှူ ဂေ၊ ဂေ လုဝ် ဘူင် ဂါန် ခဲင် ထိုပ် ဘိက် ဘွတ်။ 16 အုဝ် ဟဲ့ ဒိုဝ်း ဂေ၊ တဲး ဂေ ကာဒါင် ဂွန် ဂိန့် ဂေ ဒူအီ အီဆာရေလ၊ တဲး ဂေ ကာဒါင် ဘော ဂွန် အီမာယ် ဒွန် အီ အီ မုး ဂွန် ဂိန့်။ အုဝ် ဟဲ့ ဒိုဝ်း ဂေ၊ တဲး ဂေ ဘူင် မီ ဂါန် အုဝ်။ 17 ခုဝ်၊ ဒေါ ဟဲ့ ငဝ်း အုဝ် ဂေ ဂွန် ဂိန့် ခဲင် မိူင် အဲဂိုပ် တွိုန်၊ အုဝ် ဟဲ့ ဒိုဝ်း ခဲ့ ကွယ် ဂွန် ဂိန့် ဂေ ဒူအီ အီဆာရေလ ဒွန် အီ ဘော ဂွန် ဂိန့် ဂေ ဒုဝ် ဆတ်ဒါဝါ အီ မုး ဒုဝ် အာလူင့် ဒွန် ဒုဝ်၊ တဲး ဂေ ဘောကာဂ့လျီတ် ဘဲန် တူတ့် ကြုဝ် အုဝ်။ 18 ဒေါ တီ နီ၊ အုဝ် ဝီ ရဝ်း ဂေ ဒူအီ အာလေဝီ၊ တဲး ဂေ ဝီ ကာဒါင် ဂေ ဂွန် ဂိန့် ဒူအီ အီဆာရေလ။ 19 အုဝ် ဟဲ့ ဘူင် တဲး ဂေ ဒူအီ အာလေဝီ ပီ လက်ဆွင် ပီ ဒွါ အုဝ် ဒီ အာရူန် ဂေ ဂွန် အန်၊ တဲး ဂေ ဝီ ဘူင် ဂါန် ခဲင် ထိုပ် ဘိက် ဘွတ် ကာဒါင် ဂေ ဒူအီ အီဆာရေလ ဘောကာဂ့လျီတ်။ အုဝ် တဲး ဂေ လှူ ဒုဝ် ဆတ်ဒါဝါ ဒီ အုဝ် ဒါင် ဂေ ဒူအီ အီဆာရေလ၊ တဲး ဂေ ဝီ ကာလဝ့် ဒီ အုဝ်၊ ကွဲ့ တဲး ဂေ ဒူအီ အီဆာရေလ လုဝ် ခမ် အာဖေ အာရေ ဒေါ တး ကာတတ် ဂေ ဒီ ဒူင် ကွယ် အုဝ်။”

20 ဇဝ်ဖြာ ဟဲ့ ဟွတ့် ကာလာင် ဂြုဝ်း တီ၊ အာမုဝ်ဆဲ ဘော အာရူန် ဘော ဂေ ဒူအီ အီဆာရေလ ဘောကာဂ့လျီတ်၊ ဂေ ဘော လှူ ဒူအီ အာလေဝီ ဂေ တီ၊ တဲး န့ ဒူပ် ပီ ကာလာင် ဇဝ်ဖြာ ဒီ အာမုဝ်ဆဲ တွိုန်။ 21 ဒူအီ အာလေဝီ ဂေ တီ မိူဝ် ဘူင် တဲး ဂေ ဆီငါ ဘွတ်။ ဂေ မိူဝ် လး ခြိုင် ပီ တာ ဂေ။ ဟဲ့ ဟွတ့်၊ အာရူန် မိူဝ် လှူ ဂေ ဒီ ဇဝ်ဖြာ၊ တဲး ဂေ ပီ ပီ ဒီ လှူ အီ မာဝတ် ဝိဝ် မာဝတ် ဝေန့်။ အန် ဘော လှူ ဘော ဒုဝ် ဆတ်ဒါဝါ၊ တဲး ဂေ ဝီ ကာလဝ့် ဒီ ဇဝ်ဖြာ၊ တဲး ဂေ ဘော ဘဲန် ဒူအီ အီ ဆီငါ ဘွတ်။ 22 ဝါယ် အန် တီ ဂေ ဒူအီ အာလေဝီ ဂေ မိူဝ် ဟဲ့ တး လိုပ် ဘူင် ဂါန် ခဲင် ထိုပ် ဘိက် ဘွတ်။ ဂွန် အီမာယ် အာရူန် ဂေ တွိုန် ဘော ဘဲန် အီ အိုပ် အီ ယဲတ့် ဂေ။

23 ဇဝ်ဖြာ ပီ ဝီ ကာလာင် ဒီ အာမုဝ်ဆဲ ပေါ န့ ပွါ တဝ်း၊ 24 “ဂေ ဒူအီ အာလေဝီ တီ ဒွန် အီ၊ အာဆာက် အီ ဟဲ့ နုဝ့် အာ ဂိုဝ် ဒီ ဖန် ဆီနမ် ဟုဝ့် နာ ဒဲင်၊ ဂေ ဟဲ့ ပွိုန် ဒီ ဘူင် ဂါန် ခဲင် ထိုပ် ဘိက် ဘွတ်။ 25 ဆေ အာဆာက် ဂေ ယီ ဝီ နုဝ့် ဖန် ဂိုဝ် ဆီနမ်၊ တဲး ဂေ ဒီလှဝ်၊ တဲး ဂေ စူ ဘူင် ဂါန် ဂေ တီ။ 26 ဆေ ဂေ ဘော ဆီ စွယ် အီ ဟဝ် ဘူင် ဂါန် ဂေ၊ ဟဲ့ ပွိုန်။ ဂေ ယီ တူ လုဝ် ဘူင် ဂါန် ရာင် ဂေ။ ပါယ် တီ မဲ ဘော လုဝ် အိုပ် လုဝ် ယွတ် ဂါန် ပီ ဘူင် ဒူအီ အာလေဝီ ဒွန် အီ။”