1 အာမုဝ်ဆဲ ဝီ ကာလာင် ဒီ ဂေ ဒါ တာင် အီ ယဲတ့် ခြိုဝ် ဂေ ဒူအီ အီဆာရေလ တဝ်း၊ “ဇဝ်ဖြာ ဟဲ့ ဒွါ အာမိင် ပါယ် နီ။ 2 ဆေ န့ မိုဝ်း အီမာယ် အူ ဝီ၊ ဆေ အန် ဟဲ့ ကာဆဲန့် ဟဲ့ ဒိူင် ဒီ ဇဝ်ဖြာ လွင် ပီ ဒီ ဘူင် အန် အူ မျုဝ် အူ မျုဝ်၊ အန် တူ ပွိုန် တဲး ဂြုဝ်း ပီ ဒိူင် ပီ ကာဆဲန့် အန် တီ ဝီ စှိုမ် ပီယေန့်။ အန် လုဝ် ဘူင် ဒူပ် ခဲ့ ပီ ဒိူင် အန် တီ။

3 ဆေ န့ ဘော မုး ဂွန် အီဘိုန့် အီ ဆီ မုး ဒီဘျာ၊ အီ ဆီ ကွယ် ရိုမ် ဒူပ် ဂုန့် မာ အန်၊ ဆေ အန် ဟဲ့ ဒိူင် ဒီ ဇဝ်ဖြာ အူ မျုဝ် အူ မျုဝ် လွင် ပီ ဒီ ဘူင် အန်၊ 4 ဆေ ဂုန့် အန် မိူဝ် ဟဲ့ ယိုဝ် လွင် အန် တီ၊ ယီ တူ ခြဲ တူ တဝ်း မာဆေ ဒီ အန်၊ အန် လုဝ် ဘူင် ဒူပ် ပီ ဒိူင် ပီ ကာဆဲန့် အန် တီ ဒွန် မျုဝ်။ 5 မာလဲ၊ ဒေါ ယိုဝ် ဂုန့် အန် လွင် ပီ ကာဆဲန့် အန်၊ ဆေ ဂုန့် ဘော ခြဲ ဂွန် အန်၊ ဂွန် အီဘိုန့် တီ တူ လုဝ် ဘူင် ဒူပ် ဂြုဝ်း ပီ ဒိူင် ပီ ကာဆဲန့် အန် တွိုန် ခေါ အူ မျုဝ်။ ဇဝ်ဖြာ မိူဝ် ဒီ ထာယ် ဒီ အန် ကူပ် ဟဲ့ ခြဲ ဂုန့် အန် ဒီ အန်။

6 ဆေ န့ ယီ မုး အီဘိုန့် အီ ဟဲ့ မိုဝ်း အီမာယ်၊ ဆေ အန် ဟဲ့ ဒွိုမ် ဒိူင်၊ ဒွိုမ် ကာဆဲန့် ဒီ ဘူင် အူ မျုဝ် အူ မျုဝ်၊ 7 ဆေ အီမာယ် အန် မိူဝ် ဟဲ့ နပ် လွင် ပီ ဒိူင် ပီ ကာဆဲန့် အန် တီ၊ အီမာယ် အန် ယီ တူ ခြဲ တူ တဝ်း မာဆေ ဒီ အန်၊ အန် လုဝ် ဘူင် ဒူပ် ဂြုဝ်း ပီ ဒိူင် ပီ ကာဆဲန့် အန် တီ ဒွန် မျုဝ်။ 8 မာလဲ၊ ဆေ အီမာယ် အန် ဟဲ့ ယိုဝ် လွင် အန် တီ၊ ဘော ခြဲ အန်၊ အန် တူ လုဝ် ဘူင် ဒူပ် ပီ ဒိူင် ပီ ကာဆဲန့် အန် တီ။ ဇဝ်ဖြာ မိူဝ် ဒီ ထာယ် ဒီ အန်။

9 ဆေ န့ ယီ မုး ယာ ဆီပြး၊ ဘော မုး ဆီပြး အိမ် ဘော မုး ဆီပြး ယမ်၊ အန် လုဝ် ဘူင် ဒူပ် ပဲ့ ဟဲ့ ဒိူင် ပဲ့ ဟဲ့ ကာဆဲန့် အန် ဒွန် မျုဝ်။

10 ဆေ အီဘိုန့် အီ မိုဝ်း အီမာယ် ဟဲ့ ဒိူင် ဟဲ့ ကာဆဲန့် ခဲင် ကာင် အီမာယ် အန်၊ 11 ဆေ အီမာယ် အန် ပီ ဘော ဟဲ့ ယိုဝ် မိူဝ်၊ ယီ တူ တဝ်း မာဆေ ဒီ အန်၊ ခဲ့ ပီ ဒိူင် ပီ ကာဆဲန့် အန် တီ ဒွန် မျုဝ်၊ အန် လုဝ် ဘူင် ဒူပ်။ 12 မာလဲ၊ ဒေါ ယိုဝ် အီမာယ် အန် လွင် အန် တီ၊ ဆေ အီမာယ် အန် မိူဝ် ဟဲ့ ခြဲ ဟဲ့ ကာလာင် ဒီ အန်၊ အန် အာဝ် ဟူ လုဝ် ဘူင် ဒူပ် ပီ ကာဆဲန့် အန် တီ။ န့ ပီ အန် တူ ဒွိုမ် ကာဆဲန့် မာဆေ။ 13 ခဲ့ ပီ ဒိူင် ပီ ကာဆဲန့် အန်၊ န့ ဘော မုး မျုဝ် မှဝ် အာဝ် တဝ်း၊ အီမာယ် အန် ဟဲ့ ပွိုန် တဲး အန် ဘူင် ဒူပ်။ ဆေ အာဝ် ပါယ် တီ ဟဲ့ ပွိုန် ခြဲ အန်။ 14 မာလဲ၊ ဆေ အီမာယ် အန် ဟဲ့ ယိုဝ် လွင် အန် တီ၊ အန် ယီ တူ ခြဲ တူ တဝ်း မာဆေ။ အန် လုဝ် ဘူင် ဒူပ် တူတ့် ဒွန် မျုဝ် ခဲ့ ပီ ဒိူင် ပီ ကာဆဲန့် အန် တီ။ အီမာယ် အန် ဟဲ့ တဲး ဂြုဝ်း ပီ ဒိူင် ပီ ကာဆဲန့် အန် တီ မန် ဆီချာ ကူပ် တူ ခြဲ အန် ဒေါ ဟဲ့ ယိုဝ် အန် တွိုန်။ 15 ဆေ အီမာယ် အန် တူ တဝ်း မာဆေ ဒေါ ယိုဝ် အန် လွင် ပဲ့ ဟဲ့ ဒိူင် အီဘိုန့် အန်၊ ဟဲ့ ဟွတ့်၊ ဝီ ခြဲ အန်၊ အီမာယ် အန် တီ လုဝ် ခမ် မှာပ် ကူပ် ဝဲန် အန် ဂြုဝ်း ပီ ဒိူင် ပီ ကာဆဲန့် အီဘိုန့် အန် တီ။”

16 အာတီ န့ မုး ဒါရာ ပီ ကာလာင် အုန် ဇဝ်ဖြာ ဒီ အာမုဝ်ဆဲ။ န့ မုး လွင် ပီ ဒိူင် ပီ ကာဆဲန့် အီမာယ် ဂါယ် အီဘိုန့် ဘော ပီ ဒိူင် ပီ ကာဆဲန့် ဂုန့် ဂါယ် ဂွန် အီဘိုန့် အီ ဆီ မုး ဒီဘျာ၊ အီ ဆီ ကွယ် ရိုမ် ဒူပ် ဂုန့် မာ အန်။