Yene ee sam yukule nu umpinuma ee nupune nale e God wolaye
2
Ka,
yene Taitus ee as yukule nu umpinuma se nu ee nangke nale uporo e fa nupunene mi alwone e God nro.
2 Ka sam yukule nu uma alma se
nu ee sam nurune nale e noneni.
Ka ee nangke nale uporo ka nemne noula uporo.
Ka nu ee nemne wola upupu nro.
Ka ee sam namalene ka ee sam bilipimne God,
ka ee nangke nale e fa sam wolane nu plai,
ka nale e fa neri kero ka nungkamne eni e mouli e eni ee ni.
3 Nanrona nro,
yene ee sam yoproye nu umpin alma namo ka yukuleye nu e
nupune nale wone e God wolaye.
Nu e fi nenrelene nu plai.
Ka nu e fi nanrai ira wee wola e nemne mii kero e yeingke nu ka yangke nu e nemei umpin siwole fa karnangklene ompla e nale namo.
Nu sa ee nukule nu plai e nangke nale upupu nro.
4 La e nu nangke nale nanrona,
se nu ee resukru ee nuku umpin e nuꞌpu uma rokoi e ommo namo sa nanrona,
nale e fa sam wolanale inpi noneni wokwokera ka kongkom e noneni plau.
5 Ka nu umpin e nuꞌpu uma ee as
nupunene ira uporo nro,
ka nu ee as naine yukaile ommo e panine nama e God.
Ka nu won ee sam nurune mow noneni,
ka ee as nangke nale upupu nrone nu uma awaili.
Ka nu ee as nene ru e none impi wokerwokera ka nupune mi e nu.
E nu nupunene ommo awaili e mi e nilene riri nam,
se nu umpinuma awaili ee fi nekrinumane mi e God.
Taitus ee yangke nale uporo se nu efapu e nupune
6 Nanrona nro,
Taitus yene ee as yererwaye wolapuna e nu efapu se nu ee sam nupunene wolapuna uporo nro.
7 Ommo awaili e yene ee yangke namo sa,
yene ee yangkeye nale uporo nro sa nu ee nuru ka ee nupunene.
E yene yukuleye nu uma,
yene ee fi karyangkleye ka wewela ka nongkoye.
Yene won ee yangkeye ompla alwone ka yoproye mi alwone nro.
8 Nale ringke e yene ee yangke sa uma e nupune,
sa nanrona,
e yukuleye nu uma,
yene ee yoproye mi e wona nro se nu uma ee fi napu mi wongke ee koroyaneye mi e moneni.
Ka le nu furempi e mone nire fa ee napu eni e mi e moneni,
sa ee onnele ka le nu nire fa e nekrinu mi e moneni,
se nu ee nale e eni wamo.
Nu wokboi ee sam nupunene mi e manwamo e noneni
9 Yene ee yukule nu wokboi siwole sa nu ee nene ru e manwamo e noneni.
Ka ee nangke ompla e none fa nu uma wamfafai e noneni ee ainemne nu wamo.
Ka ee fi nire mi rola fafaile kore nu uma wamfafai e noneni.
10 Ka nu ee fi pekinuꞌpune ommo e nu uma wamfafai e noneni.
Ka nu ee nupu mi ka nupune nro sa uma wamfafai noneni ee namale nanrona,
ompla fikfika e nu ninane mewola e nu wokboi namo,
nu fa sam nangke wona aula.
E nu nangke nale nanrona,
sa ee resukru ee ingke yuꞌpu umpinuma awaili.
Ka nale namo ee yangke uma mingklari ee nane noula wamo pai mi alwone e God,
wu mana fa yuꞌpu kore mone.
11 Ki kireni yene ee yopro yukule nu uma e God e ommo namo se nu uma plai ee ainem nale e God,
e fika wolapuna e God e yemei alele uma awaili pu ka wu ee resukru le yuꞌpu mone kore.
12 Wolapuna e God sa ee yukule mone ee mupone nale e fa merewaplaineme ka kunrinra maneme God ka nale e fa kire wamone ommo e pike nam.
Alwone ee yukaine e mone ee maimeme iplile e nu umpinuma e pike nam,
ka wolapalo e God e fa yukune mone ee mupuneme wola uporo nro,
ka mangke nale uporo ka won ee mupuneme nale upupu nama e God.
13 Ka mone ee bilip kero ka maime plau aimem ka morime mouli e Yesus Krais ee wi sa mone ee muru.
Wu God kero wamo ka mana fa yuꞌpu kore mone,
ee wi plau glori wamo e woneni.
14 Wu e yupone laip woneni ka ri fa ee yuꞌpu kore mone ka yuꞌpole nale fafaile mingklari e mone.
Wu yangke nanrona fa ee yangke mone ee memei pani wamo nama e wu ka ee maime uma e woneni nro.
Ka mone ee maime mangke nale uporo nro.
Ka mone ee sam maime ka milpeleme ee mangke ommo upupu nro.
15 Yene ee yuku noula ka kero e yene yunaye namo sa e yereryali wolapuna e nu se nu ee nupune.
Ka yene won ee as mi kero yaliye nu umpinuma fopi e fa sam kunrinra nanene mi namo sa ee saimoro nale e nu.
Ka yene e fi yinayaneye nu uma ee numaralone mi e yene.