Yene ee yangkeye nale uporo nro
3
Nu umpinuma e bilip e nupu mi namo pu,
ka yene won ee as yoproye mi namo yaliye nu kore sa nu ee sam nupu.
Mi namo sa nanrona,
kairkum nu won ee naine ru e nu king ka gapman e noneni nro,
ka nupu mi e nunini ka naine niplelene nro fa ee nangke nale e uporo nro.
Ka kairkum,
nu ee sam naine aplai ka nangklerine ommo upupu nro.
2 Nu ee fi nemnangkomparine nu plai wee ouwnirene.
Nu ee sam numaro none ka naine aplai ka numale nu uma awaili yukaile nu e fori e noneni fa ee naine ee nangke nale e upupu nro pai nu.
3 Yene ee yireli nu mi nam e fika,
isi mone won oi fa maime fafaile ka mangkeme nale fafaile namo:
Mone oi fa maime nale e fa nurulene mi,
nongko ka maime yukaineye nu uma e kungkumple ka nupulene nu uma e fa karnangkle mi ka refalane mi.
Ka e mouli namo,
mone oi maime yukaine mana e kalabusye nale e fa nampalo ka wolanapa wamone ommo e pike.
Ka e mouli namo,
mone won oi maime renro e nale e fa pongkonupu ka nokone uma plai mi.
Ka ompla ringkringke namo oi yangkeye nu plai naine yukaile nu furempi e mone ka mone plau won maime yukaile furempi e nuningkle.
4 Ka God,
mana fa yuꞌpu kore mone namo,
yuku nale uporo e woneni fa wolapalo ka wolaye mone umpinuma e pike nam yemei alelyen,
5 ka e yuꞌpu kore mone pu.
Wu seke yangke nale namo e mone oi mangkeme ommo upupu.
Onnele!
Wone nro e wolafaiye mone wamo ka yangke ompla namo fa ee yuꞌpu mone kore.
Wu e yaklele ommo furflala awaili oi yangkana mone.
Ka Holi Spirit e wone nro ee yane malma kekeple ka mone ee memei kongkom kekeple wunini.
6 E nale uporo e God wone,
wu yangke Yesus Krais mana e fa yuꞌpu kore mone namo,
kiryaiku Holi Spirit e God mone.
7 Ka nale uporo e wu fa wolayane mone namo,
ee yangke mone ee maime yukaile umpinuma e uporoye nama e God.
E namo nro sa God e yaure mone pu ee maime yukaine kongkom e woneni,
ka ee mai morime wu nro ee yame mone laip e fa waiye yekei yekei.
8 Mi namo sa alwone ka mone ee sam bilipim.
Ki wola kire yene ee sam yopro mi alelyen e mi mingklari namoye nu umpinuma e bilipne God se nu kairkum neri kero ka e sam nurune rokoi e fa ilpelene ka ee naine fa ee nangke nale e uporoningke.
Nale namo,
sa uporo wamo ka ee mewmewye umpinuma mingklari.
9 Ka,
yene ee fi ripi yaranaye furflalami e nu uma e fa wolapeni ka karwolapuna kirene nu uma plai,
ee nu uma fopi e fa karnangklene ka nopro mi euwlangkren mingklarine noula e nu flili e isi,a
ka e nu uma e fa nemnangkomparine mi ka karwolapuna kirene mi e yeye lo e Moses.
Mi namo,
nengkemule e fi mewmewye laip e moneni.
10 La e mana wongke yire mi rola fa e yauri uma ka pone paipi ka pinapai ponekerila,
sa yene ee yane mi kero wu sa ee yensona nale e wunini.
La e wu fi yupu mi e yeneni ka yangkeye nale namo,
sa yene fa sam yane wu mi kero namo kore.
La e wu fi yupu mi e yene ka naye yangkeye nale namo,
sa yene yupone wu yeye se.
11 Yene e namale pu nu uma nananrona,
e nupone rokoi wona pu ka painri nukaro none naine renro e rokoi fafaile.
Nu uma nanrona namo,
sa fa nangkene ommo furflala nama e God.
Ka ommo furflala e nu fa nangkene nama e God namo,
e kotim nu uma namo pu.
Mi plola pitiri e Taitus ee pai yuru Pol
12 Poprolaye le ki ee kawane Artemas wee Tikikus e pai yem koii e yene namo.
Ka e yene yuru wongke e wuyane sa,
yene ee as yukarinra faflai wi yuru ki e repo e taun Nikopolis.
Ki e wola pu fa e kaiki kaike pike plola e taun Nikopolis,
e fika poprolaye le mouli ee riple ka mokoi ee raulo wamo ee yemei ka ki wola fa ee kaiki kaike namo.
13 Apolos yane mana e namale lo noula e wu Senas,
wuyane ee painri rokoi.
Nanrona fane yene ee sam nama yuruye wuyane e ompla fikfika ee mewmewye wuyane ka ee reryaneye wuyane
14 Nu umpinuma Kristen e mone e ailan Krit namo e fi karnailene,
nu won ee as nem ira e nale uporo fa mewmewne nu uma fopi e ommo yaimarene.
Yene e fi yaꞌnpalo nu Kristen karnailene ka fi nupulene nale upupu e God se nu e fi rerile nale e ompla e God.
15 Umpinuma awaili e ki kakle maime nam nire kaire uporo e nu pai yene.
Ka yene won ee yire kaire uporo e mu ee pai nu umpinuma fopi e bilipne Yesus ka fa sam wolane mu wamo e nane yene nainene namo.
Wola e God ee waiye plau pone.