Piparola e Pol yeꞌre pai
Taitus
1
Ki Pol,
mana siwole fa karkangklerike ompla e God ka kaike yukaine aposela e Yesus Krais.
Wu e yawane ki fa ee kerkali nu umpinuma awaili e wone e oi yaure nu fa ee naine yukaine uma e woneni nro,
ka e yereri bilip e nu e yemei ka pari wamo,
ka won e nupunene nale upupu yukaine wone nro e wolaye.
2 Ki e kangke ompla nam fa ee mewmewye bilip e nu umpinuma e God fa ee naine kero.
Ka ompla namo sa e yangke nu ee naine plau ainem ka norine God ee yali nu laip e fa sam naine neki nekei none.
Mouli oi God fi yangke ompla wongke yemei aleleye namo,
wu oi yukami pu yire ee yale mone laip e fa sam naine nekei nekei.
Ka God namo wu fa fi karyireye mi wongke.
3 E mouli e wone oi yaureye,
God mana fa yuꞌpu kore mone namo,
yangke mi woneni yemei alele ka yina ompla fa mi nufune woneni namo wi mew e ki.
4 Taitus,
ki keꞌre piparola nam pai yene.
Ka yene ke waiye yukaine auna e ki koneni,
ka bilip e yeniye yene namo sa yukaine bilip e yeniye ki.
Fane Aina God yane Krais Yesus,
mana oi yuꞌpu koreye mone namo,
wolanane yene ka nane yene wolapuna aplai.
Taitus ee yapu nu uma upupu ka yaure nu fa ee nangke ompla e sios
5 Nomu e ki kupone yene waiyeye ailan Krit namo sa nanrona,
yene ee kampruye ommo plolploli e nenene namo,
ka yene ee as yaureyaliye nu irauma e sios mingklari e nene taun mingklari namo,
yukaine oi ki kireke yene namo.
6 Yene ee yina nu uma e nu umpinuma fi resukru napu eni wongke e nu nangke.
Ka nu uma fopi e yene yire yina nu namo ee nem pin wokwokera nro ka kongkom e nu sa kongkom fa bilipne Krais.
Ka kongkom e nu namo,
nu ee fi nem noula fafaile nanrona nu sa kongkom fa wewela ka aikongkele ka nurulene mi.
7 Nu uma ee yene yina nu namo,
sa nu uma fa nurune ompla e God e nu painri ririne ommo e sios.
Nanrona fane nu ee fi nangke ompla fafaile ee yangke nu umpinuma ee nuru nu nanrona nu sa uma fa nangkene nale fafaile.
Nu ee fi wolanire nanrona nu e neri lida ka nuna noula wamo mewnufrone none wolapoku ka ee nangke nale fafailene nu umpinuma.
Nu ee fi naikono ka fowrone ka wolane romaula ka ommo wongkwongkeni e pike nam.
Nu ee fi faflai wolapuna neni,
ka nu ee fi poinpain nufrone nu umpinuma.
8 Nu ee
nangke nale uporone nu fopi ee nine mow e none,
ka ee as naine yukaine nu uma e fa sam wolane ommo upupu e God nro.
Kairkum nu ee sam nupunene ira upupu nro,
ka kairkum nu ee as nangke nale uporo nroye nu umpinuma,
ka ninane none pai God ee none fa rainene nama e wu,
ka ee sam nurune none kore sa nale fafaile e fi nemei wolapuna e noneni.
9 Nu ee as neima kero mi alwone e God oi yeye ka wi plele nam mu ke mukuleme nu.
Nanrona fane nu ee resukru le nukule nu umpinuma plai e mi alwone namo sa nu ee bilip.
E rokoi namo nro,
se nu ee resukru le nereri wolapuna e nu uma e fa nupunene mi e alwone namo.
Ka e uma plai ee nunane wola wongkwongkenine mi e alwone namo,
se nu ee as mi nufona nu se nu ee namale ka ee nem ira uporo e none ee ni kore none.
Ailan Krit namo, yuna uma e fa kunrumkarine ka wismamne nu umpinuma se nu ee fi bilip
10 Yene ee sam yuruye nu uma upupu ka yuꞌpu nu ee nangke ompla e sios namo.
E fika,
nu uma fopi e fa ira kerole ka aikongkelene ka fa fi wolane mi alwone namo,
mingklari e nu sa naine mokoi namo.
Nu wona kunrumkarine mi wongkwongkeni ka wona neinensone ka sam nisnorine wolapuna e nu umpinuma.
Ka nu uma namo,
mingklari e nu sa uma e Juda,
ka nu fa nangke nale namo sa wamo.
Nu uma namo fa neri kerone ira ka nale e fa naurene papri.b
11 Mone ee meinangkru rokoi e nu uma e fa malmalane mowmow e nu uma plai ka karneirpalene nu mi ka nangke fafailene ira ka wola e nu uma e bilipne plau nu uma fopi e ni ka nakle nu nainene mow e nu namo.
Nale e nu fa karnangkle ka nangke fafailene ira ka wola e nu namo fa yangkeye ompla e mone umpinuma e fi resukru ee mangke,
ka nu won,
fa nireline nu umpinuma naline nu romaula e furflala ompla e nu fa nukulene nu namo.
12 Isi mana wongke e fa sam namaleye mi ka nale e none e Krit e yire nanrona,
“Nu uma e Krit namo,
nu fa kunrumkarine mi ka nale e nu fafaile wamo yukailene nu omkuru amun e ai.
Nu fa kire none ompla ka merewaplai karnilene nro.”
13-14 Mi nam sa alwone.
Nanrona fane yene ee mi keroye ka miyuforoye nu sa ee yangke nu ee nensona nale e nu se nu ee fi nangke nale fafaile namo kore.
Ka nu ee resukru ee bilip God ka ee fi ripi naranane wawai mi e nemeine wolapuna e nu Juda,
ka lo wongkwongkeni e nu uma e fa sam kunrinra nanene mi alwone namo.
15 Nu umpinuma e naine pani ommo e God yangke,
nu ee no ompla ringkringkeni ka ee naine panine nama e God.c
Ka nu uma e fa nangkene nale fafaile wongkwongkeni nama e God ka fa fi bilipimne Krais,
ommo mingklari namo sa e fafaile wamo nama e God.
Ka nale fafaile e nu namo fa sam wismamye puna ka wola e nu sa nu e fi namafeingkyaneye nale fikayen sa e uporo ka nale fikayen sa e fafaile.
Ka nale namo ke fi yangke nu ee nale enine ompla wongke.
Sam onnele!
16 Nu fa nire nanrona nu namale God.
Ka nale e nu sa ke sam yuku nu alele nanrona nu fa fi wolananene wu wamo ka fa sam kunrinra nanene wu.
Nale e nu sam fafaile wamo ka nu fa fi nupune mi.
Ka nu sa ee fi resukru le sam nangke ompla wongke uporo.