Piparola ringke kore e Pol yeꞌre pai
Timoti
1
Ki Pol,
aposel e Krais Yesus.
Wolapuna e God woneni wu yem ki fa e kangke ompla e wu woneni e yukaine aposel fa e kireli nu umapinkongkom mi e laip e isi wu yukaye mi fa e yali nu umapinkongkom fopi e fa bilipne Krais Yesus.
2 Timoti,
yene sa mana fa ki sam wolake yene wamo ka kuru yene ke yukaine auna ki koneni,
nanrona fane ki keꞌre piparola nam pai yene.
Ki kesapu Aina God yane Manawamo moneni,
Yesus Krais wolapalo ka wolanane yene ka naꞌne yene wolapuna aplai.
Mone ee fi nale enime miuporo
3 Ki kire tenkyu God,
mana e ki fa kangkeke ompla e wu.
Ka ki fa sam kupuneke nale uporo e ki fa kangkeke ompla e wu yukaine oi nu flili e ki fa nangkene.
Wolapuna e ki,
sa ki namale nanrona ki sa eni onnele nama e God.
Fane ki e fi wola kuruno yene,
ee ki kire fa tenkyuke God ka kesapuke God ningki kaire.
4 Ki fa wolarufuke isi yene nama kuru yoloye namo,
ke yangke ki kire ee sam kuru yene se.a
Ka e namo yangke ki ke sam aikem ka kem wolapuna raulo wamo.
5 Ki namale nanrona yene fa sam bilipye Krais Yesus wokera nro yukaine oi yene mampa Lois yane yene moka Yunis e bilipne wu.
Ka ki sa namale nanrona bilip namo sa won naye yene.
6 E nomu namo nro,
sa ki kire kereri wola e yene ka e kangke yene e sam keryaneye ompla e laip e yeneni yukaine mana e namale fa yompoye niꞌpi ka niꞌpi fa sam ali wamoye.
7 Yene e sam namale nanrona Spirit e God yane mone e fi yangke mone mum me.
Wu yane Spirit fa yane kero mone,
fa yangke mone e sam wolamaleme nu plai,
ka e mewmew mone fa e sam murume laip e moneni.
8 Nanrona fane e yene yopro mi e Manwamo yene e fi refaeniye mi e yene ee yopro,
ka e ki plau yene ee fi refaleye ki,
e fika ki oi kaike kalabuske noula e wu.
Yene ee yem kero e God wone fane yane ki mungkam eni plau e mopro miuporo e God.
9 Isi God yuꞌpu mone kore ka youw mone e mone maime umpinuma e woneni.
Wu e fi wola nale uporo e mone mangke ka wu youw mone.
Onnele.
Isi oiya God fi yangke ompla wongke yemei,
wu youw mone wolapuna woneni.
Ka mew e Krais Yesus wu wolapalo mone ka yangke mone maime umpinuma woneni.
10 Naminre Krais Yesus,
mana oi yumale kore mone namo,
e yemei alele pu.
Ka ompla e wu yangke namo,
yangke wolapalo e God e yemei alele pu.
Krais Yesus oi sam yisyori ka yumaralo kero e riline ka miuporo e wu e yangke mone awaili umapinkongkom e namale laip e fa sam naine kei.
11 God e yumane ki fa e kaiki mokoi mingklari yukaine aposel wongke fa kaike yukaine tikse fa e kopro miuporo namo ka kopro kukuleke nu uma mi e wu se nu ee nupu.
12 Ki fa kangke ompla namo,
ka nomu namo,
ki fa kungkamke eni.
Ka ki fa fi nale enike eni e ki kungkamke.
E fika,
ki e sam namale mana e ki bilipimke wu,
ka ki e namale nanrona wu ee yane kero ki ka ee pai riri ommo oi wu isi yina waiyeye mew e ki ee pai plele mouli e wone ee wi kore.
13 E yene yopro mi,
yene ee yopro yukaine isi ki kukuneke yene namo,
ka yene ee yuna kero bilip yeneni ka sam wolayali nu uma plai.
Nale plainre namo sa,
Krais Yesus wone nro sa fa yereryaneye wolapuna e mone ka mone fa mangkeme.
14 Yene e sam yuru ka sam yeinangkru miuporo e God yina pai mew e yene namo.
Holi Spirit e God e waiye mone namo,
e mewmewyene sa yene e yuru ka e sam yeinangkruye ompla uporo namo.
15 Yene e namale nanrona nu uma mingklari e provins Esia e nensona nupone ki pu.
Ka Figelus yane Hermogenes plau e nensona ka nupone ki.
16 Ki kesapu nanrona Manwamo ee wolaraulo ka yangke uporo Onesiforus yakle nu uma mingklari e mow woneni.
Ka kairkum wu fa saimoroye wolapuna e ki ka wu fa fi naleniye ki e ki kaike kalabuske.
Sam onnele.
17 E wu wi taunwamo Rom,
wu fa sam amparpunu yapu ki pai plele mouli e wu yinra ki.
18 Ki won naye kesapuke Manwamo fa e wolayaure ka ee yangke uporo wu e mouli e wu fa ee yupu kot e mone awaili umapinkongkom.
Yene won ee sam namale ommo mingklari upupu oi Onesiforus yangkeye fa ee mewmewye ki oi ki kaikeke taun Efesus.