Timoti ee as waiye yukaine iimmana uporo e Krais Yesus
2
Auna kinini,
yene e as yem wolapalo e Krais Yesus fa e kairkum keryane yene.
2 Mi mingklari isi ki kopro ka yene yupuye nama e nu uma mingklari namo,
mi namo sa yene ee yina pai mew e nu uma e fa nuna kerone mi e God se nu ee resukru le nukule nu uma plai mi namo.
3 Yene e waiye yukaine iimmana uporo e Krais Yesus ka yungkam eni plau mu.
4 Yene e namale ommo e nu iimuma fa nangkene pu.
Nu fa fi karnangkene ommo plai e nu fa nangkene ommo e noneni yukaine iimuma.
Nu fa sam nangke ommo yukaine iimuma,
sa opisa e none e sam aiyemye nu.
5 E yukaine,
e mana e puyeye resis e wu fi sam yupune lo e fa resis ne,
se wu e fi yem prais wongke.
6 Mana e fa yangke ompla wamo nengkrele e wunini sa ee as yuꞌpu ommo pai riri nu plai.
7 La e yene yuna mi mingklari e isi ki kireni ke yene yeye wolapuna e yene,
sa Manwamo e yangke yene e sam namale ye ommo mingklari namo.
8 Kairkum yene e as wolarufuye Yesus Krais,
wu e yemei nu uma e king Devit ka wu e ri pu ka God ke yereryane wu kore fane wu nam waiye laipye.
Miuporo namo sa ki fa koproke ka nu uma mingklari fa nupune.
9 Rokoi e fa noprone miuporo e God namo,
sa won nomu fane nu uma kee nuru ki yukaine mana e fafaile wamo fane mi namo yane ki eni mingklari wamo fane nu uma nina ki kalabus.
Ka mi e God namo,
sa ompla nu e fi nuna ka nina wu kalabus.
10 Nanrona fane ki fa keri kero ka kungkam ke eni ringkringkeni e fa saimoro ke nu umapinkongkom e God isi yumale fa e sam nane Krais Yesus e naine plau glori e wu fa e yekei.
11 Mi ee wi ingke namo,
sa mi won alwone fane nu uma mingklari ee sam bilip:
La e mone e rili plau wu
se mone e mane wu e maime laip.
12 La e mone meri kero ka mungkam eni ringkringkeni,
se mone e mane wu e maime yukaine king.
Le mone ee mumeki wu ka mire nanrona mone seke uma wunini,
se wu plau ee yumeki mone ka ee yire mone seke uma wunini.
13 La e mone muka mi mire fa e mupune wu ka mone ke fi mupune mi isi mone mukame namo,
sa wu plau e yupune mi e wu woneni e ompla e wu yire fa e yangke.
Wu fa fi rilyaneye wone kore.
Timoti ee sam yeri kero fa ee yungkam ompla e God
14 Nu uma yeneni e namale mi namo pu,
ka yene won ee yopro yukuleye nu ningki kaire se nu ee sam namale.
E nama e God,
yene ee samo yireli nu se nu ee fi nemnopu mi e mi fafaile e noneni e nomu nunini.
Nale namo fafaile fa yangke fafaileye laip e nu uma e nupunene.
15 Yene ee sam amparpunu yangke ompla yukaine mana uporo wone nama e God sa wu ee samo wolaye ompla e yene yangkeye.
La ee yene sam yopro mi alwone wunini,
sa,
yene ee fi naleni ompla wongke.
16 Yene e waiye amon nu uma fa nopro mi fafaile fa fi nupune ira ka wolapuna e God.
E fika,
nu uma namo fa nopro mi fafaile,
e pai fafaile wamo ka e fi naine nalene God.
17 Mi fafaile e nu uma namo,
fa yemei yukaine muku kalale e yokoye rinra e mana pai fafaileye.
Mana plainre e fa nangke nale namo,
sa Himeneus yane Filetus.
18 Wuyane nupone rokoi e mi uporo pu,
e fika,
wuyane fa nire nanrona,
“E isi mone bilipim Yesus ka mone mem baptais,
sa yukaine mone isi maime pike pulale ka mone memei kore pu.
Nanrona fane mone ee fi memei mouli wongke kore.”
E mi namo nro,
wuyane fa nangke fafailene bilip e nu umpinuma plai.
19 Ka God isi raisaro pu roma kero wamo fa ee yeꞌreye sios wonenia ka roma namo sa kero wamo naye waiyeye.
Wu yeꞌre mi namo wile roma namo ka yire nanrona,
“Manawamo sam namale nu umpinuma woneni.”
Ka wu fa yeꞌre mi rola wongke kore nanrona,
“Uma mingklari e nem noula e Manawamo,
sa ee kunrinra nane nale e fi uporo nama e God.”
20 Mow wamo wongke sa yuna dis e nainene.
Dis namo,
plai sa e raisaro gol ka silva.
Ka plai sa e nangke ilo ka plai sa e nangke pike.
Dis namo,
plai sa nu fa nangkene ompla upupu ka plai sa fa nangkene ommo fafaile.
21 Nanrona fane,
le mana wongke yangkrumo nale fafaile e wone e fa yunaye laip e wone ka yemei uporo nama e God,
se mana namo e yemei yukaine dis e fa nangkene ommo upupu.
Mana namo ee sam waiye uporo ka holi.
Se Mana wamo e yuru wu e yukaine mana e waiye ipleleye nro fa e yangkle ommo mingklari upupu e wu.
22 Nanrona fane ningki kaire yene e sam kunrinra yane wolapuna fafaile e fa nemeine wolapuna e nu kongkom efapu ka pin mangkrama.
Yene e as sam yangke ompla fa e yem nale uporo,
ka nale fa sam bilipne God,
ka nale fa wolnanene nu plai,
ka yem nale e wolapuna raulo.
Ka pone mingklari won e as pangke nale namo.
Yene yakle nu uma e wolapuna nunini uporo wamo ka nire nu e fi nangke nale fafaile nama e God namo,
e posi ka pesapu Manwamo.
23 Yene fa yinaye mireꞌfa plauye mi fafaile wongkwongkeni e nu uma e ira nunini e imeri ommo fafaile namo.
Yene namale nanrona,
mi fafaile wongkwongkeni namo fa yisyori nu uma ka yangke nu naine nemnopumi ka nopune nro.
24 Mana e yangke ompla e Manwamo e fi yangke nale fafaile nu uma wee yakle nu nemnemnopu mi.
Wu e sam yangke nale uporo nroye nu uma mingklari.
La e nu uma wewela ka fi nupu mi e wunini,
se wu e as sam yem wolapuna raulo ka yapu rokoi wongkwongkeni fa e yukule nu umapinkongkom nale e God wone fa wolayire nu fa e sam nupune.
25 Wu e sam komafre fa e yangke nu uma e fa fi nupune mi e namale ommo upupu fa nu e nangkene.
Le wu yangke nanrona se ki e fi namale,
ro God ee mewmew nu fane nu ee nensona ka nupone ompla yukaine e none fa nangkene ka ee nem ira uporo e mi alwone e God.
26 Opola e yuꞌpu nu e naine impola wunini pu fa wu e yangke nu ee nupune mi e wu.
Ka,
le nu e namale mi alwone e God,
sa ira ka wolapuna uporo e nemei nu kore ka nu e nulilpanro nupone impola e Opola ka e naine nale aplai.