Mana fai samo wolaye nale empo pike mee sa waiye yukaine iim empo God
4
Ommo fika sa fai yereryaneye pone Kristen popu mi ka pempopupe pone kore?
Anro ommo wongkwongkeni empo fai wolpuna nemeine namo ke nererine wolpuna poneni ka ommo namo fai nopu iplele empo nalpapli poneni,
ka nale namo nro fai nengke pone paipe pempopu iplele pone?
2 Pone fai samo wola pire puꞌpu ommo wongkwongkeni,
ka pone fei fai puꞌpupe.
Nale empo pone fai ruklo ka nampaloye ommo wongkwongkeni namo,
fai yangke pone popu mi ka kalpopupe ka puflo nu uma riline.
Ka pone ese fei puꞌpu ommo namo empo pone wola pire pone ese puꞌpu.
Pone fei fai puꞌpu ommo namo empo fika,
pone isi fei paline God fai ese puꞌpu ommo namo.
3 Empo pone fai paline ompla ka pone fei pem,
sa nanrona,
pone fai paline plau wolpuna fafaile mingklari.
Ka empo pone paline,
pone fai wola nanrona la empo pone pem sa pone ese saimopane pone nro pone ese fei samo ponsa rokoi rongkele sa uporo fai ese pangke.
4 Pone sa yukaile nu pinmana fafaile fai nupole inpi nonengkle ka painri nangke nale pamok.
Pone fei namale nanrona nale empo fai samo wolane ompla empo pike mee,
fai yangke yene ese iim empo God?
Nanrona fane la mana yire yemei foli uporo plau ommo empo pike mee,
wu ese yangke wu wone yemei iim empo God.
God fai samo wolyane nu uma fai numalo none
5 Buk empo God yire nanrona,
“Spirit namo empo God yina waiye mone namo,
sa God samo wola wu ese waiye ruwe wu wokera nro.”
Pone pire mi empo God mee sa mi siwole nro wee?
6 Ka wolyane empo God sa uporo wamo ka fai mewmewye mone.
Nanrona fane mi wiye buk empo God yire nanrona,
“God fai yisyoli ka yumalo noula empo nu uma fai nererine noula noneni namo samo panro,
ka wu fai samo wolyane nu uma fai numalo noula noneni.”
7 Nanrona fane pone ese pumaralo pone ka paipe ruwe kelo empo God.
Pone ese samo kuma pane Satan ka fei ese pupene wolpuna wunini.
La empo pone pangke nanrona,
sa wu ese yulpalo ka yupone pone.
8 Pone ese samo wol pane God ka paipi samo eklene wu.
La empo pone pangke nanrona sa wu wone re ese yolowi ka samo waiye eklene pone.
Pone uma fai pangke nale fafaile namo re ese namale ka pangke pone pemei namkile nama empo God yukaine mana empo samo yaklele mew woneni samo namkile.
Ka pone uma empo wolpuna plainrane ka fai pulu kelo ommo empo pike mee pire pupene God,
ese samo pangke pone wone pemei namkile nama empo God,
ka pupene wu wokera nro.
9 Ommo fafaile pone isi pangkepe namo,
ese yangke pone wolpaule ka pilipe nro ka paipe.
Ka pone uma empo samo wolpeni fai pupope namo,
ese pupone nale empo fai nupone ka pone ese samo pili wamo.
Ka pone uma fai aipempe ommo namo,
ese samo wolpaule wamo ka pilipe nro ka paipe.
10 Pone ese pumaralo pone ka paipe ruwe empo Manawamo.
La empo pone pangke nanrona,
sa wu wone ese yuꞌpu pone ka yangke pone paipe aipem wamo.
Mone fei ese mangko mi palo nu plai
11 Pone Kristen inomranimpi ka pinofe kinini,
pone fei ese ouwpire nu pinuma empo God.
La empo pone ouwpire wee pangko mi palo nu,
sa yukaine pone fei samo wolpane lo empo God fai mone ese wolmale nu plai,
nanrona fane pone wona pangko mi paloye lo namo.
La empo yene yangko mi palo lo empo God,
sa yuku nanrona yene waiye jas empo lo namo.
12 God nro isi yangke lo namo ka wu wokera nro sa waiye jas empo lo namo ka pinuma mingklari.
Wu nro sa mana fai samo yisyoli nu pinuma wee yuꞌpu kore nu pinuma.
Nanrona fane yene yire yene fina ka yangko mi palo nu plai ka ouwyireye nu?
Mone faa wolmuma God ka mupene wolpuna moneni nro empo ommo empo ningkinama
13 Pone uma fai puna wolpuna nanrona,
“Anro eseme wee ningkinama mu ese maimpi taun wongke ka mu ese mangke ommo bisnis ese resuklu kikla wokera.
Ka ommo namo ese yangke mu memei romaula mana.”
14 Pone fei namale ompla fika ese yemei ningkinama.
Laip poneni namo,
sa yemei yukaine rulu fai yemeiye mii woli ka pari riri ka fai wampane pekini.
15 Ese uporo wamo la empo pone pire nanrona,
“La empo Manawamo wone wola yire mu ese maime,
sa mu ese mangke ommo namo empo mu wolame.”
16 Ka pone fei fai pire nanrona,
pone fai pangke ompla ese nu plai nulu pone ka wola nanrona pone samo rikepone uma mingklari ka pone pire mi alele ommo wamfafai pone pire pangke.
Ka nale namo sa fafaile nama empo God.
17 Pone ese namale ompla namo.
La empo pone namale nale ruꞌfu uporo wongke fai pone ese pangke ka pone fei pangke,
sa pone pangke nale fafaile nama empo God.