Mi mingklari niye piparola mee fei samo noplo mi alele fina sa isi yeꞌre piparola mee. Ka mi mingklari empo histri empo Kristen sios sa noplo nanrona piparola mee sa empo yolowi Jon. Ka Jon wu sa aposel namo fina isi waiye ekleneye Jisas. Mi mingklari empo niye piparola mee sa yukaine mi nilene Miuporo empo Jon Yeꞌre. Taim empo Jon yeꞌre piparola mee, nu aposel mingklari empo Jisas sa isi rili pu ka mingklari empo nu tikse fai kalnaniline sa empo nemei ka naraine naniline ka samo nemplemaire nu Kristen ese nupele nu empo wolpuna wongkeni Jisas. Nanrona fane piparola mee fai ese kelyali nu uma Kristen ese nupene nale uporo empo God ka mi fika empo samo yire Jisas wu sa fina.

Ka wolpuna wongke empo Jon sa nanrona, wu yire nanrona nu Kristen pinuma sa ese fei nimane nu uma empo kurela namo, fai kalnaniline ka nengke nu nupone God. Nu “uma empo kurela” namo fai nire nanrona, ommo empo naine pike mee, sa fei uporo wamo. Ka nu re fai nire nanrona, Jisas wu sa Auna empo God, nanrona fane wu fei ese yemei yukaine manale ka fei ese waiye monre empo nu ommo empo pike mee yukaine mone pinuma fai mangkeme namo. Mi wongke nu fai nirene sa nanrona, mana yire samo waiye nama empo God, wu ese fei wolaye ommo empo pike mee. Nu re fai nire nanrona, nale uporo ka nale empo samo wolaye nu plai namo re sa ompla empo pike nro. Nanrona fane, mone pinuma ese fei wola mire mupene nale namo. Ka empo piparola empo Jon mee, Jon wu wone samo wola nanrona, mone Kristen pinuma ese fei mupu ka bilipim mi empo nu namo.

Empo piparola naimele, Jon yire kelyane mi alwone nanrona Jisas empo yemei manale ka nu pinuma empo bilipim Jisas namo, sa ese nupene nale empo Jisas fai samo wolaye God ka nu ese samo wolnali nu pinuma plai plau. God wone isi emen wolaye mone wola, yina Spirit woneni waiye puna empo mone uma fai bilipimme wu. Ka wu wone fai kelyali nu uma fai bilipimne wu namo, fai samo nangkana God ka naine foli wunini ka re nupene nale empo Jisas ringklene mi uporo empo God.