Piparola emen
Jon yeꞌre
Mi empo laip namo sa yemei alele wamo
1
Mi mee empo mu meꞌre paiyi pone namo,
sa mi empo ompla isi oiya waiye se sema God ke yangke ommo mingklari,
ka ompla namo nayeye yolowi plele empoleme.
Mu mupu mi mee,
ka mu mulu wu nama mu moneni,
ka mew moku wu mew mu moneni.
Ka mi mingklari namo sa paiyi Mi empo God sa ese resuklu yali laip alwone paiyi mone pinuma empo pike.
2 Ompla namo isi waiye pu ka wi plele mee,
wu wone sa laip,
se sema God yangke wu yemei alele ese nu pinuma nulu wu.
Mu mulu wu pu ka naimele mu wona moplome mi alele pone empo mi alwone wunini namo.
Mu mire mi alwone pone nanrona ompla namo,
wu wone sa laip namo fai waiye nanrona nanrona.
Ka empo isi,
wu isi yane Aina God naine.
Ka naimele God yangke wu yolowi mu alele wamo sa mu ese resuklu fai mulu wu.
3 Ewelme mu moplo pone mi empo ommo mu mone isi mulu ka mupu namo,
ka pone re ese wolwokera empo ommo mingklari namo.
Ka mone mingklari ese samo wolpuna wokera ka bilipim Aina God ka Auna wunini Jisas Krais.
4 Mu meꞌre piparola mee paiyi pone sa nale empo fai ainemne namo ese samo imeli ka yeye nanrona mone mingklari.
Mone ese maime ali
5 Mi mee Jisas Krais isi yoplo mu ka naimele mu moplo pone re ese pupu:
God wu sa ali ka kurela rola pitiri fei yangkana wu.
6 La mone fai mire nanrona mone maime wolpuna wokera plau God ka mone ke maraimeme nale empo kurela,
sa mone uma fai kalmireme ka fei fai mangke nale uporo mi alwone empo God.
7 La empo mone fai mupeneme nale empo ali yukaine God wone fai waiye ali namo,
nale namo nro fai yangke mone maime wolpuna wokera plau pinuma mingklari empo God.
Ka oli empo Auna wunini Jisas namo,
fai yuꞌpoleye nale fafaile mingklari empo mone ka mone memei namkile nama empo God.
8 La empo mone fai mire nanrona mone uma fei fai mangke nale fafaile,
sa mone uma fai samo kalmanilime mone kore ka mi alwone sa fei waiye wolpuna moneni.
9 La empo mone mouwmane nale fafaile moneni,
sa wu ese yangke yukaine mi isi wu wone yire.
Wu ese yangke nale uporo ese yuꞌpu ommo mingklari mone mangke fei uporo,
ka wu ese samo yuꞌpole ka yangke mone memei namkile wamo.
10 La empo mone fai kalmanili ka mire nanrona mone isi fei mangke nale fafaile,
sa mone mouw God nanrona mana fai kalyireye,
ka re,
mi wunini fei waiye wolpuna moneni.