Krais wu sa fai mewmewye mone
2
Pone kongkom uporo kinini,
ki keꞌre mi mee ese mewmew pone sa pone ese fei pangke nale fafaile nama empo God.
La empo wongke yangke nale fafaile nama empo God,
sa wu resuklu ese yuꞌpole nale fafaile empo mana namo.
Empo fika,
Mana Fai Yeli Risiye Mi Moneni namo,
fai yaline Aina God ese yuꞌpole nale fafaile moneni.
Ka mana namo fai yangke nale uporo wamo nama empo God noula wunini sa Jisas Krais.
2 Wu mana fina isi yem koii moneni ka yangke wu wone yemei yukaine ofa uporo fai yuna wolum uporo wamo fai yuꞌpole nale fafaile moneni.
Wu fei yangke ommo namo mone pinuma empo isi bilip pu namo nro,
wu yangke fai ese mewmew pinuma mingklari empo pike mee.
Mana empo namale God fai samo yupene lo mingklari wunini
3 La empo mone mupene lo empo God,
sa mone ese samo namale nanrona mone samo namale wu.
4 La empo mana wongke yire nanrona,
“Ki namale God,”
ka wu ke fei samo yupene lo mingklari empo God,
mana namo sa fai kalifleniliye ka mi alwone empo God fei waiye puna ka wola wunini.
5 La empo mana yupu mi empo God ka samo yupene,
mana namo samo yane wolpuna woneni paiyi God ka samo wolyane wu.
Ka empo rokoi namo nro,
mone ese namale nanrona mone maime uma foli uporo wamo empo God.
6 Mana fina fai yire nanrona wu waiye foli uporo wamo empo God namo,
ese samo yupene rew koii empo Jisas.
7 Pone Kristen inomranimpi ka pinofe uporo kinini,
ki fei keꞌre lo keklepe wongke pone.
Sam onne!
Lo namo isi pone pem pu ka namale pu,
ka yeye wi plele empo mee.
8 Ki won keꞌre kore lo namo paiyi pone.
Laip ka nale uporo empo Jisas ringklene laip ka nale uporo empo pone empo mee,
sa nukune mone nanrona lo namo sa ompla keklepe kore.
Empo fika,
kurela sa pepel paiyi ekleneye yire pekimo ka ali alwone namo yemei ka yem koii pu ka waiye naimele.
9 Mana fai kalyireye nanrona wu sa waiye ali,
ka wu sa mana fai wolpuna fafaileye Kristen inomranimpi wee pinofe wongke namo,
mana nanrona sa waiyeye kurela.
10 Mana fai samo wolaye Kristen inomranimpi wee pinofe wongke namo,
sa waiye ali ka ompla wongke ese fei yaukiri rokoi wunini fai wu ese paliyolo,
ka wu ese fei firane.
11 Ka mana fai wolpuna fafaile ka fei wolayali Kristen inomranimpi wee pinofe wongke namo,
wu waiye kurela wamo ka wu waraiye powpale kurela.
Empo fika,
kurela samo yuforo nama wunini fane wu fei namale koii pei wu paiyiye.
12 Kongkom uporo kinini,
ki wona keꞌreke piparola mee paiyi pone
empo fika,
pone uma empo bilipimpe Jisas Krais.
Nanrona fane God yuꞌpole nale fafaile mingklari poneni pu.
13 Ki wona keꞌreke piparola mee paiyi pone uma empo peli kelope bilip poneni empo Jisas Krais isine ka yolowi plele empo mee ka pone sa yukaine pone nangkapi rinra nunini fai kelo wamo,
empo fika pone samo namale Jisas Krais,
wu mana fina isi oiya waiye pu se sema God ke yangke ommo mingklari naine mele,
yolowi plele empoleme.
Piparola empo ki keꞌreke mee,
sa paiyi pone uma fai bilip kelo Jisas yukaine nu efapu fai rinra kelo wamo.
Empo fika,
pone empo pumaralo Satan,
mana fai paiyi risiye nale fafaile.
14 Kongkom uporo kinini,
ki keꞌre piparola mee paiyi pone pu
empo fika,
pone namale Aina God.
Piparola empo ki keꞌre mee,
sa paiyi pone uma empo fai bilip kelo Jisas Krais isine ka yolowi plele empoleme.
Empo fika pone samo namale Jisas Krais,
wu mana fina isi oiya waiye pu se sema God ke yangke ommo mingklari empo naine mele,
yolowi plele empoleme.
Ki keꞌre pu piparola mee paiyi pone uma fai bilip kelo Jisas yukaile nu kongkom efapu fai rinra kelo wamo.
Empo fika,
pone samo bilipim Krais ka mi empo God waiye kelo wamo puna ka wola poneni,
ka pone pumaralo Satan,
mana fai paiyi risiye nale fafaile.
Mone ese fei samo wolame nale fafaile empo pike mee
15 Pone ese fei samo wolape nale fafaile ka ommo mingklari wongkwongkeni empo pike mee.
Fina empo samo wolaye ommo empo pike mee,
fei resuklu wolyane Aina.
16 Ommo mingklari empo pike mee fai yengke mone mangke nale fafaile yukaine nale fai:
wolpuna yemeiye,
nampaloye,
ka nale fai nererine noula.
Nale wongkwongkeni empo pike mee fai yengke mone mangke nale fafaile.
Ka Aina God namo,
yire mone ese fei mangke nale namo.
17 Pike mee yire pekimo ka ommo mingklari wongkwongkeni wunini fai nengkene mone pinuma mingklari namo,
wona paiyi ka pekimo kei,
ka mana fai yupeneye wolpuna empo God namo,
wu ese waiye nanrona nanrona.
Mana fai wolpuna fafaile Krais sa yemei alele pu
18 Pone kongkom uporo kinini,
mone memei pu empo pike mee yire pekimo.a
Isi pone pupu mi empo iim namo empo Krais ese nemei.
Empo mee,
mingklari empo nu iim empo Krais namo nemei alele pu.
Namo sa yuku nanrona mone memei pu empo pike mee yire pekimo.
19 Nu uma namo isi nane mone maime pu se sema nu nupone mone ka panro moile.
Namo sa yukune mone alele wamo nanrona,
nu fei naine uma alwone moneni.
La empo nu uma alwone moneni,
sa nu ese nakle mone maimeme.
20 Ka empo pone sa,
Krais yali Holi Spirit pone pu.
Ka pone namale mi alwone empo God pu.
21 Ki fei keꞌre mi mee empo yuku pone nanrona pone fei namale mi alwone.
Onnele!
Ki namale nanrona pone namale mi alwone pu,
ka kalnirene mi wongkwongkeni empo pone pupupe namo,
fei yolowi mi alwone empo God namo.
22 Mana fai kalyire ka samo yaniliye nu pinuma namo,
wu sa fina?
Mana fina fai yire nanrona,
“Jisas wu seke mana isi God yina fai yuꞌpu kore nu pinuma woneni.”
Mana namo empo yire mi nanrona,
wu sa iim empo Krais ka wu samo kuma yane Aina God ka Auna wunini.
23 Mana fai kuma yane Auna empo God namo,
sa kuma yane Aina wunini plau.
Mana fai bilip ka yire nanrona,
“Jisas namo,
wu sa God yem wu ese waiye yukaine mana fai yuꞌpu kore pinuma mingklari woneni,”
fai samo waiye foli uporo empo Auna empo God yane Aina God.
Holi Spirit fai yukule mone mi alwone
24 Pone ese puna kelo ka pupene mi namo isi pone pupu pu.
La empo pone puna mi kelo namo ka pupene sa,
pone samo paipe foli uporo empo Auna empo God ka Aina God plau.
25 Ka wu isi yuka mi mone pu ese yame mone laip fai waiye nanrona nanrona.
26 Ki keꞌre mi mee paiyi pone ese kirepi pone nu uma wona nengkali ese kalnaniline pone.
27 Ka empo pone,
Krais yali Holi Spirit pone pu ka wu yem koii ka waiye laip empo pone.
Nanrona fane pone faa pupu nu uma empo kalnirene namo fai nukulene pone skul wongkeni kore empo mi alwone namo.
Ka kelo empo Holi Spirit nayukuleye pone ommo mingklari yukaine mi alwone pone pem pu,
ka pone namale pu empo mi alwone wunini namo ka wu fei kalyire.
Nanrona fane pone won ese paipe foli uporo wamo empo God.
Kongkom empo God
28 Pone kongkom uporo kinini,
pone ese paipe rere plau ka samo paipe foli uporo plau God.
Ka empo wu yolowi alele,
mone nameli kelo ka fei flemulu wu taim wu yolowi.
29 La empo pone namale nanrona Krais wu sa mana uporo wamo empo God,
wola pone re namale pu nanrona uma mingklari empo nangke nale uporo nama empo God,
naine yukaine nu kongkom wunini.