3
Pulu!
Aina God namo,
fai youwye mone nanrona kongkom wunini.
Nanrona fane mone namale,
wu fai wolyane mone wamo.
Mi namo,
sa wone alwone.
Ka nu uma empo pike mee fei samo namale mone nanrona mone sa kongkom empo God.
Empo fika,
God re nu fei namale wu.
2 Pone Kristen inomranimpi ka pinofe uporo kinini,
empo mee mone maime yukaine kongkom empo God.
Ka kingke mone ese maime rongkele,
ompla namo sa nu fei samo nire mi alele mone fai mone ese namale rongkele.
Ka mu namale pu nanrona empo Krais yemei alele,
mone ese samo mulu wu empo nama moneni,
nanrona fane mone ese memei mukaine wu wone.
3 Uma mingklari wona norune wu namo,
wona saimolone none kore ese naine namkile wamo nama empo God yukaine Krais wone waiye namkile wamo.
4 Empo nu uma nangke nale fafaile,
nu samo nuku alele nanrona nu uma fai nangklumo lo empo God.
Empo fika nale fafaile sa yuku alele nanrona nale fai nangklumo lo.
5 Pone namale pu nanrona,
Krais yolowi fai yuꞌpole nale fafaile.
Ka nale namo fai yangke nale fafaile namo,
fei waiye laip wunini.
6 Nu uma naine foli uporo wamo nane Krais namo,
fai samo nupone nale mingklari empo nale fafaile.
Nu uma wona naine nale fai nangke nale fafaile namo,
sa nu uma fopi fei nulu wu ka fei samo namale wu.
7 Pone kongkom uporo wamo kinini,
pone faa pimane nu uma fai kalnanili pone sa nenrape.
Mana fina empo yupene nale uporo namo,
sa uporo wamo nama empo God yukaine Krais wone uporo nama empo God.
8 Nu uma empo nangke nale fafaile namo,
sa furempi empo Satan.a
Empo fika,
Satan wu sa nomu fai yangkeye nale fafaile empo God yangke pike mee ka yolowi plele empoleme.
Nomu empo Auna empo God yolowi namo,
wu ese yisyoliye ommo mingklari empo Satan.
9 Nu uma naine yukaine kongkom empo God namo,
fei fai nuna nale empo nale fafaile namo empo laip noneni.
Empo fika laip uporo empo God namo,
waiye nu.
Nanrona fane nu samo wolnumalo nale fafaile ka ese fei painri kore nale fafaile namo.
10 Empo rokoi namo nro,
mone ese namale nanrona fopi sa kongkom empo God ka fopi sa kongkom empo Satan.
Mana fei fai wolayane nu uma Kristen plai,
wee fei yangke ommo uporo nama empo God namo,
sa fei mela empo God.
Mone ese samo wolamaneme uma plai moneni
11 Empo isine,
nu samo noplo mi alele pone mi fai samo wolnane nu uma plai moneni.
12 Pone ese fei pupene nale empo Kein,
Satan furem empo yufu ino woneni namo ri.
Empo fikami ka wu yufu ino woneni namo ri?
Wu yufu ino woneni ri empo fika,
ino woneni namo,
fai yangke nale uporo nama empo God ka Kein wone namo,
wu sa mana empo Satan
13 Pone inomranimpi ka pinofe kinini,
pone ese fei wolnipanri empo nu uma empo pike mee fai iim pone.
14 Mone namale nanrona mone mupone rokoi empo ri ka maime rokoi empo laip fai waiye nanrona nanrona.
Mone namale ompla namo empo fika,
mone fai samo wolamane nu Kristen inomranimpi ka pinofe plai.
Nu uma fei samo wolanane nu Kristen plai namo nanaine rokoi empo ri.
15 Mana fei samo wolayane inomranimpi wee pinofe plai woneni namo,
sa yukaine mana fai yufloye nu uma plai riline.
Pone namale pu nanrona nu uma fai nuflone nu plai riline namo,
laip fai waiye nanrona nanrona namo,
sa fei waiye plau nu.
16 Rokoi namo nro fane mone namale nale fai samo wolamane nu plai,
sa yukaine Jisas isi yane laip woneni fai mewmew mone.
Nanrona fane mone re ese mane laip moneni paiyi ese mewmew nu Kristen plai plau.
17 La mana wongke empo yuna ommo mingklari empo pike mee ka fei fai wolyaule inomranimpi ka pinofe plai fopi empo ommo onnele namo,
mu namale nanrona nale empo God fai samo wolayaneye mone namo,
fei waiye mana namo.
18 Pone kongkom uporo kinini,
empo mone mire nanrona mone muna nale fai wolamaneme uma plai,
mone ese fei menrume reꞌfa moneni ka kalmoplome.
Mone ese samo mane wolpuna moneni fai mangke nale uporo alwone fai mewmewme nu plai.
19 Ommo mone fai mangke namo,
ese yuku nanrona mone mamplo renro nale empo mi alwone.
Ka ompla namo resuklu ese yali wolpuna raulo ka kelo mone empo mone meli nama empo God.
20 La empo wola moneni samo yoko mimiyen empo ompla wongke,
mone ese maime wolpuna raulo nama empo God.
Empo fika,
God wone namale ommo mingklari,
ka ila wunini samo rikepone ila waiye wolpuna moneni.
21 Pone Kristen inomranimpi ka pinofe uporo kinini,
la empo wola moneni fei yoko mimiyen,
mone namale nanrona mone maime uporo nama empo God.
Ka mone ese molomi ka meli nama wunini ka ese fei mum.
22 Ka mone resuklu ese mem ompla fika yukaine mone fai malime.
Empo fika,
mone fai mupu mi wunini ka mupene lo wunini fai wolaye.
23 Wu yangke lo kelo fai mone ese bilipim noula empo Auna wunini Jisas Krais ka samo wolamaneme nu plai yukaine isi wu yire mone ese mangke.
24 Nu uma empo nupu mi wunini ka nupene namo,
naine foli uporo wamo wunini ka wu yem koii ka waiye laip nunini.
Ka ompla namo nro fai yangke mone namale nanrona God waiye laip moneni.
Wu yawane Holi Spirit pu fai waiye laip moneni ka ompla namo nro fai yangke mone namale nanrona God waiye foli uporo wamo mone.