Pone ese pengkali spirit, empo noloni God, wee onnele
4
Pone Kristen inomranimpi ka pinofe uporo kinini,
pone ese fei bilipim uma mingklari fopi empo noloni pone ka nire pone nanrona,
“Spirit empo God yake ki mi nanrona.”
Pone ese pengkali nu spirit namo ka samo namale nu nanrona,
nu sa Spirit empo God wee onne.
Nu profet mingklari empo kalnirene naimele naine mokoi mingklari empo pike mee pu.
2 Pone ese pupene rokoi namo ese namale Spirit empo God:
la mana wongke yire,
“Jisas Krais yolowi yukaine mana alwone” sa,
pone ese namale nanrona Spirit empo God sa waiye mana namo.
3 La empo nu uma fei noplo mi namo alele nanrona empo Jisas namo,
sa spirit nunini namo seke Godni.
Nu spirit namo sa empo mana fina fai iimye Krais.
Iim empo Jisas namo,
sa isi pone pupu mi empo wu ese yolowi namo,
empo mee yolowi pu ka waiye pike naimele.
4 Pone kongkom uporo kinini namo,
pone sa Godni ka mi poneni sa samo rikepone mi empo nu profet fai kalnirene namo pu.
Empo fika,
Holi Spirit,
mana empo yuna kelo wamo namo,
sa yem koii ka waiye laip poneni ka wu rikepone Satan,
fina empo paiyi risiye pike mee.
5 Nu uma namo,
fai samo wolnane ommo empo pike mee.
Nanrona fane nu fai noplo mi mingklari ommo empo pike mee.
Ka nu uma empo pike mee fai ainem wamo nire nupu mi nunini.
6 Mone uma empo God,
nanrona fane nu uma empo namale God namo,
fai nupu mi moneni.
Ka nu uma fei Godni namo,
fei fai nupu mi moneni.
Ka empo rokoi namo nro,
mone resuklu ese namale Spirit empo mi alwone ka spirit fai yengkeye ka yaniliye nu uma.
Mana fai samo wolayane God ese samo wolayane nu plai plau
7 Pone Kristen inomranimpi ka pinofe uporo kinini,
mone ese samo wolamaleme nu plai moneni empo fika God wone wu sa nomu empo nale fai wolayane nu pinuma.
Nu uma fai nuna nale fai wolane nu pinuma namo samo namale God ka nu naine yukaine nu kongkom empo God.
8 Fina empo fei yuna nale fai samo wolayane nu plai namo,
fei namale God.
Empo fika,
God wu wone sa nomu empo nale fai samo wolayane nu plai.
9 God yawane Auna wokera nro woneni namo yolo pike fai mone ese mem laip fai waiye nanrona nanrona empo ommo isi wu yangkeye mone.
Ka nale namo sa yukune mone alele wamo nanrona God fai samo wolaye mone.
10 Nale fai samo wolayane,
sa nale empo God.
Isi mu fei mangke nale namo paiyi risi wu.
Onne!
Isi wu yangke nale namo empo samo wolayane mone se sa wu yukule nale namo empo wu yawane Auna wokera woneni yolo pike mee yukaine ofa fai yupone nale fafaile moneni.
11 Pone Kristen inomranimpi ka pinofe uporo kinini,
empo nale namo,
God yukune mone nanrona,
wu samo wolayane mone.
Nanrona fane mone re ese samo wolamane nu plai.
12 Mana wongke isi fei yulu God nama wu woneni,
samo onnele.
La empo mone samo wolamane nu plai,
empo rokoi namo nro,
sa God ese yem koii ka waiye laip moneni ka nale wunini fai samo wolane mone namo,
ese waiye kelo mone.
13 Mone namale nanrona mone maime foli uporo wamo plau God ka wu re yem koii ka waiye laip moneni.
Empo fika,
wu yane Spirit wunini fai waiye laip empo mone pinuma mingklari fopi empo maime yukaine nu foluma alwone empo God.
14 Ka mu mulu ompla Aina God yangke empo yawane Auna wunini yolowi fai yuꞌpu kore nu pinuma empo pike mee.
Nanrona fane mu fai moplongkle mi empo ompla namo mu mulu.
15 La empo mana wongke yire nanrona,
“Jisas wu sa Auna empo God,”
God yem koii ka waiye laip wunini ka wu waiye foli alwone empo God.
16 Nanrona fane,
mone samo namale wu wamo nanrona,
God fai samo wolaye mone wamo.
Ka mone fai mane mone paiyi nale namo wunini.
God wu sa nomu empo nale fai wolayane nu plai.
Ka uma nuna nale fai samo wolane nu plai namo,
sa nu naine foli uporo wamo empo God ka God yem koii ka waiye laip nunini.
17 La empo mone samo wolamane nu plai,
ka maime renro nale empo Krais isi yangke empo wu waiye pike mee,
nale namo ese waiye kei mone.
Empo mone namaime pike mee,
mone maime yukaine Krais wone pu.
Nanrona fane mone ese fei maime ka wola mingklari ka mum kaire empo kot wamo empo God ese yemei pike mee.
18 Mone fei fai kalmume God.
Empo fika wu fai samo wolaye mone namo sa yangke mone maime renro nale fai samo wolamaneme nu plai.
Ka nale fai samo wolayane nu plai namo,
sa fai samo yuꞌpole nale fai kalkalnumne God.
La empo mone kalkalmume God,
sa yuku nanrona mone mum empo ompla fika fafaile wamo ese God yangke yemei mone.
19 Mone fai mangke nale fai samo wolamaneme nu plai empo fika God wone mana isi risi fai wolayameye mone wamo.
20 La mana wongke yire nanrona,
“Ki fai samo wolakaneke God,”
ka wu fai wolpun kile wee fei fai wolyaneye nu Kristen inomranimpi ka pinofe plai,
mana namo sa mana fai kalyireye.
La empo mone fei samo wolame nu plai fopi mone fai mulume nu nama moneni namo,
mone ese wolmane God rongkele,
fina empo mone fei mulu wu nama empo mone namo?
21 Mi kelo isi Krais yame mone sa nanrona:
Nu uma fai wolanane God namo,
ese wolanane nu Kristen inomranimpi ka pinofe plai plau.