Nu Kristen bilipim God Auna
5
Nu uma empo bilipim Jisas nanrona wu sa Krais,
sa naine yukaile nu kongkom empo God.
Ka uma fopi fai samo wolnane aina wokera,
nu fai samo wolnane kongkom wunini plau.
2 Empo mone samo wolmane God ka mupene lo wunini,
sa mone ese namale nanrona mone samo wolmale kongkom wunini plau.
3 La empo mone samo wolmane God,
sa mone ese mupene lo wunini.
Ka lo wunini namo,
sa uporo ka ese fei eni wolpuna moneni.
4 Nu uma empo naine yukaile nu kongkom empo God namo,
kelo empo pike mee ese fei yumalo nu ka yangke nu firipanro.
Jisas empo yumalo iim namo pu.
Mone fai bilipime Jisas ka empo rokoi namo nro,
mone fai mumalo nale empo fai nopu namo ka mumalo kelo empo pike mee.
5 Fina fai rikepone ka yumalo kelo empo pike mee?
Nu fopi empo bilipim Jisas nanrona wu sa Auna empo God,
nu uma namo nro sa fai rikepone ka numalo kelo empo pike mee.
Jisas wu sa fina?
6 Jisas Krais namo,
sa wu mana fina empo isi waiye heven ka yolo pike.
Se Jon ke baptaisim wu mii se sema,
wu ri ka oli wunini oko yolo moile.
Wu fei yolo mii siwole nro.
Wu yolo plau mii ka oli.
Holi Spirit wu sa nomu empo mi alwone,
ka Holi Spirit namo fai yoplo mi empo nale empo Jisas Krais.
7 Ommo plainrikera fai noplo mi won wokera nro fai samo nireni mone nanrona Krais wu sa mana empo God wone yawane yolowi.
8 Holi Spirit ka mii ka oli namo,
nu won nire mi wokera nro.
9 Empo nu uma empo pike mee fai noplone ommo empo nu none namalene namo,
mone fai samo bilipimme mi nunini.
Nanrona fane mone ese samo bilipim mi empo God fai yame mone.
Empo fika mi empo God fai yame mone namo,
sa ommo wamo ka re samo yumalo mi empo nu uma siwole empo pike mee.
Empo fika,
wu seke mana empo pike mee,
wu sa God ka mi empo wu yame mone namo,
sa mi empo Auna woneni.
10 Nanrona fane,
la empo mana bilipim Jisas nanrona Auna empo God namo,
mi namo sa waiye wolpuna nunini ka nu resuklu ese noplone mi.
La empo mana fei bilipim mi empo God yoploye,
mana namo ese yire nanrona,
God wu fai kalifleniliye.
Empo fika,
mana namo fei fai bilipimye mi empo God isi yoploye namo empo Auna woneni namo.
11 Ka mi empo God isi yoploye namo,
sa naime:
God yame mone laip fai waiye nanrona nanrona.
Ka Auna wunini namo,
sa nomu empo laip namo.
12 Nu uma empo nangkana Auna empo God namo,
sa nem laip fai waiye nanrona nanrona.
Ka nu uma fei nangkana Auna empo God namo,
laip empo fai naine nanrona nanrona namo sa onne.
Mone ese namale nanrona mone ese mem laip fai waiye nanrona nanrona
13 Ki keꞌre pu mi mee paiyi pone uma fai bilipimpe noula empo God Auna,
fai pone ese namale nanrona pone pem laip fai waiye nanrona nanrona.
14 Mone fei fai mum empo mone mesapume God ka malineme ompla.
Namo sa empo fika,
mone namale nanrona,
la empo mone mesapu ompla wongke empo God wone wola pu yire mone ese mem sa,
wu ese yupu mi empo mone mesapume.
15 Mone samo namale nanrona God yupu pu ommo mingklari mone mesapume ka malime namo.
Nanrona fane ompla fika empo mone malineme namo,
mone namale kore nanrona,
mone mem ompla namo pu.
16 La empo yene yulu inomranimpi wee pinofe wongke yangke nale fafaile ka nale fafaile namo fei resuklu yangke wu samo pekini hel,
sa yene ese yesapu God ese yane wu laip fai waiye nanrona nanrona.
Ka nale fafaile plai fai yangke mana ese samo pekini ka waiye hel.
Ki fei kire yene ese yesapu God empo ompla namo.
17 Nale mingklari fei uporo namo,
sa fafaile nama empo God.
Ka plai empo ommo fafaile namo,
ese fei nangke mana waiye amone God ka samo pekini hel.
18 Mone namale nanrona nu uma naine yukaile nu kongkom empo God namo,
fei fai nangkana nale empo fai nangke nale fafaile.
Empo fika,
God Auna fai samo yopaliye nu kongkom empo God ka ese fei mewyimane Satan yisyoli nu.
19 Mone namale nanrona mone sa kongkom empo God,
ka Satan fai waiye yukaine ilamana empo nu pinuma empo pike mee.
20 Mone namale pu nanrona God Auna empo yolowi pu ka wu yangke mone namale ka mem ila uporo empo ommo fai ese yangke mone namale God alwone namo.
Nanrona fane naimele mone maime foli uporo wamo empo God ka Auna wunini Jisas Krais,
wu wone nro sa God won alwone ka wu wone sa laip fai waiye nanrona nanrona.
21 Pone kongkom uporo kinini,
pone ese samo paipe amone nu god giaman.