Mi kelo empo nu uma fai nuna ommo mingklari namo, ese sam saimone none
5
Pone uma fai puna ommo mingklari namo,
ese samo ripi pupu mi mee.
Pone ese wolpuna mingklari ka samo pili wamo.
Empo fika,
ekleneye God ese yawane fafaile ese yolowi samo yisyoli pone.
2 Ommo uporo uporo poneni namo,
samo fafaile pu.
Ka ommo papli uporo ka amplapi poneni namo,
nu kurula naulnekli ka nisnoli pekimo kei.
3 Gol ka silva poneni namo,
ros samo yufona nu ka samo fafaile kei.
Ros yufona ommo poneni namo,
ese yuku alele nale fafaile poneni empo pike mee yire pekimo.
Ka nale fafaile poneni namo,
sa ese samo yisyoli pone ka pone ese pem rerei yukaine niꞌpi yuꞌpo nale poneni.
Empo fika,
pone isi pempoku ommo samo uporo wamo ese aiyemye pone kore empo pike mee yire pekimo.
4 Pupu!
Pone fei pali romaula empo nu uma isi nangke nengkle wamfafai poneni.
Fane naimele,
romaula pone fei pali namo wona wili ka youwye God ese yape fafaile kore pone fai yupene nale fafaile poneni namo.
Nu uma isi nangke nengkle poneni namo,
wona nili ka wolpuna fafaile Manawamo Yuna Kelo Wamo namo,
ese samo yangke fafaile pone.
Ka namo sa yemei ripi wunini pu.
5 Empo pone paipe pike,
pone isi wola pire ese samo paipe ommo uporo uporo riri ka pangke ommo fai yape pone aipem wamo.
Pone pope ommo uporo uporo wamo ka yangke pone nale mopo wamo yukaine ommo kulu fai naine ka norune kaire empo fai nuflone nu ka none nu.
Nanrona fane pone re wona porupe nro kaire poneni fai ese pem eni wamo laip poneni.
6 Pone isi pangko mi palo nu uma fei nangke nale fafaile ka puflo nu rili pu.
Nu fei nangke ompla wongke fai ese nape kore nale fafaile poneni namo.
Empo eni yolowi mone, mone ese meli kelo ka moru Manawamo ese yolowi
7 Nanrona fane,
Kristen inomranimpi ka pinofe kinini,
pone ese pem wolpun raulo ka poru Manawamo ese yolowi.
Pone ese wolrufu nale empo mana yangke nengkle.
Wu fai aflo waiye ka yoruye kaire ka riplea nangke ommo wonyaneni ese yangke pike yangke ommo neri ka napale nale uporo wamo.
8 Nanrona fane pone re ese aflo paipe yukaile nu nangke nengkle.
Pone ese kelpane wolpuna poneni.
Empo fika,
Kaire empo Manawamo ese yemei alele namo,
sa yolowi eklen ekleneye.
9 Nu Kristen inomranimpi ka pinofe kinini,
pone faa wolpun fafaile pone kore.
La empo pone wolpuna neni pone kore,
sa Manawamo ese kotim pone yukaile nu uma empo fai nangke nale fafaile nama empo God.
Wu sa waiyeye nro ka kampluno yolowi kore pike mee fai ese yupu kot mingklari.
10 Nu Kristen inomranimpi ka pinofe kinini,
ompla wongke mone ese mulu ka mupene namo,
sa nale empo nu profet empo God isi nangkene.
Nu isi samo aflo naine empo eni nemeine nu.
Nu isi nungkam eni namo empo fika,
Manawamo isi yali nu mi ka nu nangke ommo empo fai noplo mi alwone wunini paiyi nu pinuma fai ese nupu.
Nanrona fane mone re ese aflo maime empo ommo fai nengkali yire yemei mone
11 Pone ese wolrufu nu uma namo.
Plai nunini fei num ka fei nupone bilip noneni.
Mu mulu nu yukaile nu uma isi neli kelo ka nungkam eni ka God ke blesim nu.
Pone namale mi empo Jop.
Wu re isi yeli kelo ka yungkam eni mingklari won yeye paiyi se sema,
Manawamo samo yangke uporo wamo wu yakle nu plai.b
Pone namale nanrona Manawamo,
wu mana fai samo wolyauleye nu pinuma ka wu fai samo wolyaliye nu ka wola woneni ka yangke nale uporo nu.
Mone fei ese kelmane mi moneni kore ka kalmouw noula empo Manawamo riri
12 Nu Kristen inomranimpi ka pinofe kinini,
riri ka rikepone ommo mingklari ki koploke nu namo,
pone faa pouw noula empo heven wee pike wee pouw noula empo ommo plai wee pouw noula empo Manawamo ese kelpane mi poneni fai nu uma ese nupu mi poneni.
La empo pone pire “yei” sa pone samo pire “yei” ka empo mi poneni.
La empo pone pire “onne” sa pone samo pire “onne” nro sa ese resuklu mi poneni.
La empo onne,
sa God ese yangke ompla fafaile wamo yemei pone.
Mi fai nesapune ese kelyane nu uma ese naine kelone bilip
13 Fina poneni sa yungkam eni?
La empo mana yungkam eni,
sa wu ese yesapu ka yaline God ese mewmew wu.
Ka fina poneni waiye kaire uporo ka wu samo aiyem?
Mana empo aiyem namo,
ese yei rai fai yereri noula empo God.
14 Fina poneni empo yenri?
Mana empo yenri namo,
ese youw nu uma fai painri risi empo sios namo,
ese noloni ka nina wel wu noula empo Manawamo ka nane wu nesapu.
15 Ka nu ese wolwokera plau God ka samo bilip nanrona Manawamo ese samo yupu nu empo nu nesapune,
ka Manawamo ese yem kore mana empo yenriye namo ka ese yereri wu kore.
La empo wu isi yangke nale fafaile plai,
sa Manawamo ese yuꞌpole nale fafaile namo.
16 Nanrona fane pone wokwokera ese samo pire mi alwone ka poumane nale fafaile poneni nu plai ka pakle nu pesapu,
sa God ese yemplekuru pone kore.
Mana uporo empo yesapu ka yesapu wunini namo sa kelo wamo resuklu ese mewmew nu plai.
17 Elaijac wu sa mana yukaine mone.
Wu yesapu kelo ka yaline God ese fei yawane riple yolo pike fane riple fei yilo pike resuklu kikla plainrikera ka 6pla kali.
18 Se sema wu fai yesapu kore ka riple yilo ka yangke pike yangke ommo nengkle neri kore.
Mana fei yupene rokoi uporo namo, sa mone ese mem wu yolowi kore
19 Nu Kristen inomranimpi ka pinofe kinini,
la empo wongke poneni yupone mi alwone empo God ka paiyi rokoi fafaile ka wongke yumane wu yolowi kore rokoi uporo,
20 sa mana namo ese namale nanrona,
empo wu yenmaire wongke namo fina empo yangke nale fafaile namo,
mana namo sa ese yem kore mana wongke fai wu ese fei samo pekini.
Wu ese waiye laip yane God nanrona nanrona.
Empo fika,
God ese yuꞌpole nale fafaile mingklari empo mana namo yangkeye.