Samo yopane nongkola yeneni
3
Pone Kristen inomranimpi ka pinofe kinini,
seke mone mingklari ese memei yukaine tikse.
Empo fika,
mu uma fai mukuleme nu pinuma namo,
taim empo kot wamo,
God ese samo yulu yonsa ommo mingklari pitpitiri empo nenene ommo isi mu mangkeme namo fai wu ese kotim mu.
2 Mone uma mingklari fai mangke ommo wongkwongkeni fai yangke mone fei ese samo mupene rokoi uporo.
Ka,
nu uma fai samo nopane nongkola noneni namo,
nu uma nanrona sa uporo wamo ka nu sa resuklu fai samo nopane nalepapli noneni plau.
3 Empo mone mina ain plola hos reꞌfa,
ain plola pitiri namo fai yangke hos namo yupene wolpuna moneni ka yangke ompla empo mone wola mire wu ese yangke.
4 Pone wolrufu nu sip.
Sip sa ommo wamfafai ka fai nempliri kelo empo rapu kelo.
Empo nu fai nemplirine,
stia pitiri namo fai yenmaireye sip wamo namo fai paiyi koii pei empo kepten empo sip wola yire sip ese paiyi.
5 Nanrona nro,
nongkola moneni wu sa ompla pitiri plola empo nale moneni.
Ka nongkola namo fai yangke uku mingklari ka yoploye ommo fai yereriye noula moneni ommo wamo isi mone mangkeme.
Mone namale,
niꞌpi rola pitiri nro namo yangke niꞌpi wamo ka yuꞌpo yaku ommo mingklari naine ai.
6 Nongkola moneni namo,
wu sa yukaine niꞌpi.
Fai yuna ommo mingklari fafaile wamo fai yangke yire samo yisyoli nale moneni yemei kiina.
Ka nongkola ese samo yisyoli laip moneni yukaine niꞌpi fai yuꞌpo yaku ommo mingklari.
Ka niꞌpi namo,
sa niꞌpi empo Hel wone.
7-8 Nomu empo ki kire nongkola moneni samo fafaile sa nanrona,
wongke empo nu pinuma empo pike mee fina samo yopane nongkola woneni.
Mana isine yuꞌpu ommo kulu amun wongkwongkeni,
yukaine rora,
ka ommo wongkwongkeni pitirpitiri ka wamfafai empo ai,
ka empo fulu ka mana yopali nu,
ka re mana wona yuꞌpuye ommo namo ka yopaliye nu.
Ka nu pinuma empo pike mee wongke sa fei resuklu ese samo yopane nongkola woneni.
Empo fika,
nongkola moneni namo,
sa fai waiye yilpeleye nro ese yoplo mi fafaile wamo.
Ka ompla namo nro sa fai samo yisyoli nale moneni yukaine marasin fafaile fai yangke mana ri imeli waiye reꞌfa moneni.
9 Nongkola moneni namo fai mereri noula empo Manawamo ka Aina moneni.
Ka mone fai mire mi fai yisyoli nu uma plai empo God isi yangke nu yukaine wu wone.
10 Reꞌfa wokera moneni mee nro sa fai yangke ompla plainrane,
wongke fai yereri noula empo Manawamo ka wongke yire mi fai yisiyoli nu uma.
Pone Kristen inomranimpi ka pinofe kinini,
God fei yimane mone ese mupene ommo plainrane namo empo nongkola moneni fai nangkene namo.
11 Nupi yane fulu fei fai nempliri ka noloni nemnoku naine plau mii pulale wokera.
Namo sa onne.
12 Pone Kristen inomranimpi ka pinofe kinini,
la ilo fik ese napale nelale empo ilo oliv plau wee onne?
La ilo wain ese napale nelale empo fik plau wee onne?
Nanrona nro,
fulu ese fei yangke mii uporo.
Nanrona nro,
reꞌfa poneni ese samo poplo mi uporo nro empo ripi empo nu pinuma ka God.
Rokoi plainrane empo ila uporo
13 Fina poneni sa yuna ila ka wolpuna uporo waiye wone?
La empo mana nanrona waiye sa,
wola uporo ka ila wunini ese yangke wu yumaralo wone ka waraiye nale uporo sa nu pinuma ese nulu.
14 La empo pone fai wolpuna fafaile uma plai ka wolpuna poneni sa yuna nale fai yapu rokoi fai mewmew pone nro,
pone ese fei pereri noula poneni ka ese fei kalpirepe ka pumaralo mi alwone.
15 Ila uporo nanrona seke yolo heven ka seke yolo God.
Ila uporo nanrona sa yemei wolpuna empo nu uma nro,
ka wu sa ompla pikeni fane.
Ka Satan wu sa nangka empo ila uporo namo.
16 Nomu empo ki kire mi mee sa nanrona,
uma fopi fai wolpuna fafailene nu uma plai ka fai napu rokoi wongkwongkeni fai nererine noula noneni namo,
sa ningki kaire mone ese mulu nale fai wewelane ka fai samo naine uporo namo sa onne.
Ka re mone ese mulu nale empo samo fafaile wongkwongkeni re ese nenene.
17 Ka nu uma empo nem wolpuna ka ila uporo yolowi God,
nu uma namo ese nangke nale nanrona:
nale empo fai samo naine namkile nama empo God,
sa nale empo fai wolnale nu plai ka samo nemnoku naine plau,
nale empo fai aflone nu uma plai,
ka nale empo fai samo wolwokera uma plai,
ka nale wamo empo fai wolnale,
ka nale empo fai samo wolpalone nu uma plai,
ka nale empo fai wolpuna uporo fai yangke nale samo uporo nu uma plai.
Nale namo nro,
mone ese mangke paiyi uma mingklari ka ese fei mangke paiyi uma plai nro.
Ka nale fai kalnirene namo,
sa onne fei waiye wu.
18 La empo mone maime wolwokera,
namo sa yuku nanrona mone mokle ommo wela.
Ka nale empo wolwokera namo,
sa nale uporo laip moneni yukaine ommo uporo nengkle.