Yene ese fei wolyane uma plai nro
2
Pone Kristen inomranimpi ka pinofe kinini,
mone uma fai bilipim mana namo yuna noula wamo ka namba noula wunini sa Jisas Krais.
Ka empo nale poneni fai wolpane plai ka plai re pone fei fai wolpali nu,
nale namo sa yuku nanrona pone ro samo bilipim wu wee?
2 La empo pone pempoku mow koli ka mana plainrane noloni plele pone empo pone pempoku paipepe namo.
Wongke empo wuyane sa rana ommo papli uporo ka yuflana ring empo nu nangke gol waiye mew mempi wunini,
ka wongke sa mana empo ommo onne wu fai rana ommo fafaile kiinale wamo.
3 Empo wuyane noloni plele ka pone pulu wuyane,
pone pangke nale uporo mana empo rana ommo papli uporo namo ka pone pireni wu nanrona,
“Yene yolowi ka waiye sia uporo mee.”
Ka pone pireni mana empo ommo onne namo nanrona,
“Yene paiyi yeli nanri,”
wee “Waiye aipela eklene funrola plola empo ki fai rew kauneke namo.”
4 La empo pone pangke nale nanrona,
sa yukaine pone fai pulu ponsa nu plai wolpuna poneni.
Ka pone fei wola uporo ka pulu ponsa uma mingklari plai empo nale won yukaine nanrona.
Samo onne.
Pone ke pemei pukaine jas fai pulu ponsa nu uma plau wolpuna fafaile nro.
5 Pone Kristen uporo inomranimpi ka pinofe kinini,
ki wolkane pone wamo.
Nanrona fane ki kire pone ese pupu mi kinini mee ka pemplekuru wola ka nale poneni.
Nu uma empo yaimali naine pike mee,
nu uma namo,
sa God yuꞌpu nu pu ese naine uporo wamo monre empo nale fai bilipne.
Isine,
wu yuka mi pu nu uma fai samo wolnane wu namo ese nane wu naine plau monre empo kingdom wunini.
Nanrona fane wu yuꞌpu nu uma empo ommo onnele nama empo nu uma empo pike mee ese nane wu naine plau kingdom wunini.
6 Ka pone isi pangke nu pinuma empo yaimali namo flemulu wamo.
Ka fina fai yisyoliye pone ka yengke pone paipi ka peli nama empo kot?
Nu uma namo nunali ommo ka romaula mingklari pone fai pulu nu nanrona nu sa uporo wamo,
nu sa fai nane eni wongkwongkeni pone.
7 Empo isi pone bilipim Jisas namo,
nu uma nouw pone noula uporo empo wu.a
Ka noula namo nro,
uma namo nunali romaula mingklari ka ommo mingklari empo pone fai pulu nu yukaine uporo wamo,
sa fai samo nisinoline noula empo Jisas.
8 Pone ese pukairi lo yukaine God,
King moneni empo yame mone wiye buk empo God sa yire nanrona,
“Pone ese samo wolpale nu plai yukaine pone fai samo wolpane pone kore.”
La empo pone pangke nanrona,
sa pone pangke ompla uporo wamo.
9 La empo pone wolpane mana wongke ka samo pangke uporo wu ka fei samo wolpane wongke ka pone pangke fafaile wu,
namo sa yuku alele wamo nanrona pone fei pupene lo ka pone pangke ommo fafaile wamo nama empo God.
10 La empo mana yukairi lo mingklari ka samo yupeneye ka empo wu yekli lo wongke namo,
mana namo ese yuku wone nanrona mana fai yekli lo mingklari empo God.
11 God namo nro yame mone lo plainrane namo sa yire nanrona,
“Yene ese fei yangke nale pamok,”
ka “Ese fei yufu mana ri.”
La empo mana wongke samo yupene lo ka fei yangke nale pamok,
ka wu kepe yufu mana ri,
wu sa mana fai yekliye lo.
12 Nanrona fane empo pone poplo mi wee pangke ompla wongke,
pone ese namale nanrona lo empo yangke mone maime nale engkem namo,
ese samo kotim mone.
13 Empo fika,
empo mone maime kaire empo kot wamo empo God,
wu ese fei wolpaloye nu uma fopi isi fei wolpalone uma plai.
Ka mana empo yukune nale empo fai wolpaloye uma plai empo wu waiyeye pike mee,
sa wu ese rikepone kot namo.
Bilip fei yangke nale uporo namo, sa yemei ompla siwolenro
14 Pone Kristen inomranimpi ka pinofe kinini,
la empo mana wongke yire nanrona,
“Ki fai bilipimke Krais,”
ka wu ke fei yangke nale uporo nu uma,
bilip wunini namo sa ompla siwolenro.
Ka bilip wunini namo ese yangke ompla fika uporo wunini ese yem kore wu?
Sa onnele fane!
15 La Kristen inomranimpi wee pinofe wongke poneni namo amplapi uporo onne ka ommo fai woye re sa onne.
16 Ka wongke poneni ese yireni wu nanrona,
“Kaire uporo yene ka yene ese yem wolpun raulo.
Yene ese yufona amplapi ka yakuru nalpapli yeneni ka yene paiyi yem ommo wo ka reryane puna yeneni.”
La empo yene yulu nanrona wu sa ommo onnele ka yene fei mewmew wu,
mi yeneni namo ese mewmew wu rongkele?
17 Nanrona nro bilip ese fei waiye wonkerila.
La empo mana fei samo yuku nale uporo nu uma,
bilip wunini namo sa puꞌlo nro fei yangke ompla wunini.
18 Ka,
mana wongke yire nanrona,
“Yene yuna bilip ka ki kuna nale fai kangke nale uporo uma plai.”
Nanrona fane yene yuku ki bilip yeneni empo Jisas namo fei yuna nale uporo.
Ka ki ese kangke nale uporo namo sa ese yuku yene bilip kinini.
19 Uporo wamo yene empo yuna bilip namo nanrona God wokera nro empo waiye.
Ka yulu,
bilip nanrona re fei resuklu,
nu opola fafaile re fai bilip nanrona.
Ka ompla namo empo God wokera nro waiye namo,
fai yangke nu num ka nemfolwori fafaile wamo wu.
20 Wawile mana,
yene yire namale nanrona bilip fei yuna nale uporo wunini namo,
fei yangke ompla uporo wee?
Naimele sa,
yupu.
21 Yene ese namale nanrona God isi yulu yonsa nale uporo ka namale flili moneni Abraham namo nanrona mana uporo empo wu yina auna wunini Aisak wiye alta riri ka yire yangke ofa pali God.
22 Yene ese namale nanrona bilip ka nale wunini sa fai yane nangkana plau.
Ka nale wunini namo samo yangke bilip wunini yemei alwone.
23 Nanrona fane ompla namo sa yemei nanrona mi wiye buk empo God sa yire nanrona,
“Abraham samo bilipim God ka God wone yulu bilip wunini ka wu wone youw Abraham nanrona mana fai yangke nale uporo.”
Ka God youw wu foli wunini.b
24 Nanrona fane yene ese namale nanrona,
mone memei uporo nama empo God empo mone mangke nale uporo uporo wu wone wolaye empo mone bilipim wu.
Empo fika,
bilip nro ese fei yangke mone memei uporo nama empo God.
25 Nanrona nro,
Rahap pin fai yangke nale pamok namo peki yenru nu uma empo Josua isi yawale nu painri pekinulu taun namo.
Se sema Rahap ke yawale nu painri rokoi wongke ka nu fei painri kore rokoi isi nu nolonine namo.
Fane God wolarufu nale empo Rahap yangkeye namo ka youw wu pin uporo.
26 Empo fika,
nale uporo fei waiye bilip namo,
bilip namo sa yukaine puꞌlo nro.
Nanrona nro,
spirit fei waiye nale namo,
sa laip onne.