Kaire uporo pone mingklari.

Piparola empo ki keꞌre mee,

sa poneni uma empo fai bilippe paipe 12pla oli oikenra empo Israel isi pupone mokoi moneni ka paipi paipe nu mokoi plai empo pike mee.

2 Pone Kristen inomranimpi ka pinofe kinini,^a

la empo ommo wongkwongkeni fai nemplekarene pone nemei pone,

sa pone ese pulu nu yukaine ommo fai nerernane pone ese samo aipem wamo.

3 Empo fika,

pone namale nanrona,

ommo wongkwongkeni ese nemei fai nengkali bilip poneni,

sa ommo fai noloni ese kelnane bilip poneni.

4 Pone ese peli kelo bilip poneni.

La empo pone pangke nanrona sa uporo,

namo ese mewmew pone ese peli kelo ka pone ese fei pupone nale wongke empo God wolaye.

Samo onne!

Nale poneni ese uporo wamo ka samo alwone.

5 La empo wongke poneni wolpuna uporo onne wee ila uporo onne,

wu ese yesapu ka yaline God ese yane wolpuna uporo wee ila uporo wu empo onne namo.

God empo mone namo,

wu mana fai yali nro ka wu fei fai yenre mana empo yaline wu.

Samo onne!

Wu fai yali nro empo mana fina yaline wu.

6 Ka empo mana yaline God ese yane wu ila uporo wee wolpuna uporo,

wu ese fei wolpuna plainrane empo wu yaline God ese yane ommo wu.

Wu ese wolwokera ka bilip nanrona God ese samo yireni kore mi wunini namo.

Ka wu ese fei wolpuna plainrane God empo mi namo.

Empo fika,

la empo wu wolpuna plainrane mi wunini,

namo sa ese yukaine rapu fai yereriye fulu ka fulu fai panri panrone.

7 Mana nanrona,

wu ese namale nanrona Manawamo ese fei yane ompla wongke wu.

8 Mana nanrona,

wolpuna wunini fai pikali plol plainrane.

Nanrona fane,

empo ommo mingklari wu fai yangkeye namo,

ila wunini wawile wamo ka wu fei namale rokoi uporo rongkele sa wu ese yupene.

9 La empo Kristen wongke inomranimpi wee pinofe samo waiye yaimali namo,

mana namo wee pin namo nu ese ewele mee aiyem,

empo fika,

God yereri noula nunini pu nanrona nu nuna noula wamo.

10 Ka nu uma nunali ommo mingklari namo,

ese ainem empo God yumalo noula nunini.

Empo fika,

nu ese firipanro ka nupone laip noneni yukaine ommo ula fai rouwli ka plelerine.

11 Empo fika,

empo kaire yeri yeli riri,

wu fai ali kelo wamo ka woli wunini fai yekli kiplela ka kiplela namo rouwlini kei.

Ka ula uporo nunini namo re,

fai rouwlinine se sema pleleri empo kaire woli yekli nu.

Nale nanrona re ese nemei nu uma empo nunali ommo mingklari namo.

Nu re ese rili empo nu wona naine ka nangkene ommo noneni.

12 Pone uma fopi fai peli kelo ka wolpane God empo ommo wongkwongkeni fai noloni nengkaline pone namo,

ki kirepi pone nanrona,

God fai blesim pone wamo.

Empo fika,

pone fai peli kelo yolowi plele empo pekini empo ommo wongkwongkeni nengkaline pone ka pone fai peli kelo empo wolpanepe God,

God wone isi yuka mi pone pu fai wu ese yali aiyem uporo wamo pone.

Aiyem uporo namo,

sa laip namo fai waiye nanrona nanrona.

Wu ese yali ompla namo yukaine wu wone isi yuka mi pu ese yali nu uma fopi fai wolnane wu wamo.

13 La empo ompla wongke yengkali mana wongke ka wu yire yangke nale fafaile,

sa mana namo ese fei yire nanrona,

“God ro yengke ki kangke ompla fafaile mee.”

Mone ese namale nanrona,

God fei fai yimane nale fafaile ese yengke wu wone paiyi yangke nale fafaile.

Ka re,

God fei fai yengke nu uma ese nangke nale fafaile.

14 Ka rokoi empo ommo fai nengkaline nu uma namo,

fai noloni nu uma empo wolpuna nunini fai nemei wamo empo ommo fafaile.

Nanrona fane wolpuna empo mana wone fai yengke wu wamo ese yangke nale fafaile.

Ka mana wone fai samo wolyane ompla fika wona yengkeye wu.

15 Empo wolpuna empo mana yemei yire yangke nale fafaile namo sa paiyila resuklu pu ese napale nale wunini.

Ka nale wunini namo,

sa nale fai yangke nale fafaile.

Namo sa yukaine pin empo mela plau ka yem mela woneni.

Ka empo nale fafaile sa yemei wamo pu,

namo re napale nale wunini.

Nale empo wu yangke yemei namo,

sa nale fai ese ri kore.

16 Ki kirepi pone Kristen inomranimpi ka pinofe uporo kinini,

ki fai wolkape pone wamo.

Ki kire kirepi pone nanrona,

pone ese fei samo wawile rokoi fai nupene nale fafaile ka pupene rokoi empo mi fei alwone namo.

17 Ommo mingklari uporo mone fai mem ka ommo uporo wamo namo,

fai naine riri empo heven ka nolone mone.

Ommo namo sa noloni God wu sa Aina empo kaire,

kali ka kikla fai aline nemi riri.

Wu fai waiye nanrona nro.

Wu fei yukaine ommo malma empo kaire yekliye nu ka yangke malma nunini fai painri angklen se sa yolowi polam.

18 Empo wolpuna woneni nro,

wu yemei Aina moneni.

Wu yuꞌpu mone fai wu ese yali mi alwone woneni mone se sa mone bilipim wu,

ka naimele mone maime yukaile nu uma empo painri risi nu pinuma mingklari ka ommo mingklari namo wu ese yangke nemei keklepe kore.

19 Pone Kristen inomranimpi ka pinofe uporo kinini namo,

ki fai wolkape pone wamo.

Pone ese samo puna mi mee:

ripi poneni ese ikoiyi ka pilpele ese pem mi empo God wampane nro.

Ka pone ese fei penrume reꞌfa ka wampane pire mi.

Ka pone re ese fei wampane wolpuna neni.

20 Empo fika,

empo mana wolpuna neni,

namo fei fai yangke nale uporo empo God wolaye.

21 Nanrona fane pone ese puꞌpole ommo mingklari fai yangke pone fei paipe namkile nama empo God ka nale fafaile wamo pone wona pangkepe namo.

Pone samo pumaralo pone ka pem mi yukaine God isi yoku wiye wolpuna poneni namo.

Empo fika,

mi mee sa kelo resuklu ese yuꞌpu kore pone.

22 Pone faa pupu mi namo empo ripi nro,

pone ese samo puna ka won ese pupenepe.

La empo pone kalpupupe,

sa pone won ese kalpanilipe pone kore.

23 La empo mana yupu mi namo ka fei fai yupeneye mi namo,

wu sa yukaine mana fai yuluye ungklama woneni wiyeye galas fai nulu ungklama.

24 Empo fika,

emen wu namale wone kore ka laip keklepe woneni empo wu yupu mi empo God,

se sema wu pouwpaiyi ka wampane nro wu wolyumalo wone wu sa waiye yukaine mana rongkele.

25 Ka lo uporo wamo namo fai yekli kelo empo nale fafaile ka yangke mone maime nale engkem.

La empo yene kon samo yulu yonsa lo namo ka waiye yangkeye nanrona ka yangke ommo yukaine wu yire ka fei wolyumalo mi isi yene yupuye,

wola God ese blesim yene empo ommo fika yene wona yangkeye.

26 La empo mana wongke yire nanrona wu fai yupeneye wola empo God ka fei samo yopaneye mireꞌfa woneni,

mana namo sa fai kalyaniliye wone.

Ka nale wunini empo fai lotuye ka bilipye namo,

sa samo onne.

27 Nale empo Kristen waiye uporo wamo ka eni sa onne nama empo Aina God moneni sa nanrona,

mone ese samo mopale kongkom empo moka nangka nunini rili pu ka nu pinmana empo inpi nunini rili ka nupole nu pu empo eni nemeine nu.

Ka re,

mone ese sam saimome nale moneni ka nale empo pike mee ese fei yengke mone ka yangke mone ese fei memei namkile nama empo God.