Yene ese samo yoployukule nu pinuma ese nupene nale God wone fai wolaye
2
Ka yene Taitus,
yene ese yukule nu pinuma fai nu ese nangke nale uporo fai nupenene mi alwone empo God ro.
2 Yene ese samo yoployukule nu uma alma namo sa
nu ese samo nulune nale noneni.
Nu ese nangke nale uporo ka ese nem noula uporo.
Nu ese samo nupenene ila uporo nro.
Nu ese samo namale ka bilipim God,
ka nangke nale fai samo wolnane nu plai,
ka nale empo fai neli kelo fai nungkam eni empo taim eni nemeine.
3 Nanrona nro,
yene ese samo yoplongkle nu pinmana alma namo ka yukule nu sa
nu ese samo nupene nale empo God fai wolaye.
Ka nu ese fei ouwnire nu plai.
Ka nu ese fei nemne ila ka wola fai nem mii kelo ese yengke nu ka yangke nu ese nemei pin nale siwole fai kalnangkene ompla empo nale namo.
Nu ese nukule nu plai ese nangke nale uporo nro.
4 La empo nu nangke nale nanrona,
sa nu ese samo resuklu nukule nu pinmana empo nuꞌpu uma namo rokoi empo ommo namo sa nanrona,
nale fai samo wolnalene inpi noneni wokwokera ka kongkom noneni plau.
5 Ka umapin empo nuꞌpu uma namo ese
nupenene ila upor uporo nro,
ka nu ese naine yukaine ommo fai namkile nama empo God.
Ka nu ese samo nopane mow noneni,
ka nu ese nangke nale uporone uma mingklari.
Ka nu ese fei painri risine inpi noneni,
nu ese nupene mi empo inpi wokwokera noneni nro.
Taim empo nu nupene ommo mingklari empo naine risi namo,
sa pinuma mingklari ese fei neklinuma mi empo God.
Taitus ese yangke nale uporo sa nu kongkom efapu namo ese nupene
6 Nanrona nro,
Taitus yene ese yereryali wolpuna empo nu kongkom efapu sa nu ese samo nupene wolpuna uporo nro.
7 Ommo mingklari yene ese yangke,
sa yene ese yangke nale uporo nro fai nu ese nulu ka nupene.
Empo yene yukuleye nu,
yene ese fei kalyaniliye wee wewela ka waraiye nongkoye.
Yene ese samo yangke ompla alwone ka yoplo mi alwone nro.
8 Nale wongke yene ese yangke ka uma plai nupene,
sa nanrona,
empo yene yukuleye nu uma,
yene ese yoplo mi ruꞌfu nro sa nu uma ese fei napu mi wongke empo koroyane mi empo mone.
La nu iim uma empo mone nire napu eni empo mi moneni,
ese onne empo nu nire nisnoli mi empo moneni,
sa nu ese samo flemulu wamo.
Nu wokboi ese samo nupene mi empo manawamo noneni
9 Yene ese yukule nu wokboi siwole fai nu ese fei naine numaralo manawamo noneni.
Ka nu ese samo nangkene ommo noneni sa nu uma wamfafai noneni ese ainem nu wamo.
Ka nu ese fei nire mi rola fafaile nu uma wamfafai noneni.
10 Ka nu ese fei pekinuꞌpune ommo empo nu uma wamfafai noneni.
Ka nu ese nupu mi ka nupene nro sa uma wamfafai noneni ese namale nanrona,
ommo fika empo nu nina mewola empo nu wokboi namo,
nu fai samo nangke uporo wamo.
Empo nu nangke nale nanrona,
sa ese resuklu ese kingke nuꞌpu pinuma mingklari.
Ka nale namo ese nangke uma mingkla ese nane noula wamo paiyi mi alwone empo God,
wu mana fai yuꞌpu kore mone.
11 Ki kirewi yene ese yukule nu pinuma empo God empo ommo namo ese uma plai ese ainemne nale empo God,
empo fika wolyane empo God sa yemei alele nu uma mingklari pu.
Ka wu sa resuklu ese yuꞌpu kore mone.
12 Wolyali empo God sa fai yukule mone ese mupone nale fai mumplewame ka kuma maneme nale empo God ka nale fai samo wolame ommo empo pike mee.
Won alwone empo mone maime iplele empo nu pinuma empo pike mee,
ka wolpalo empo God fai yukuneye mone ese mupene wolpuna uporo nro,
ka mangke nale uporo ka mupene nale uporo nama empo God.
13 Ka mone ese bilip kelo ka maime aimem plau ka morume Jisas Krais ese yolowi sa mone ese mulu.
Wu God kelo wamo ka wu mana empo yuꞌpu kore mone,
ese yolowi plau glori wamo woneni.
14 Wu empo yupone laip woneni ka ri fai ese yuꞌpu kore mone ka yuꞌpole nale fafaile mingklari empo mone.
Wu yangke nanrona fai ese yangke mone ese memei namkile wamo nama wunini ka ese maime uma woneni nro.
Ka mone ese maime mangke nale uporo nro.
Ka mone ese samo maime ka milpeleme ese mangke ommo uporo nro.
15 Yene ese samo yukule noula ka kelo empo yene yunaye namo fai ese yereryali wolpuna empo nu pinuma sa nu ese nupene.
Ka yene re ese yali mi kelo nu pinuma fopi fai samo kuma nane mi namo ese saimolo nale nunini.
Ka yene ese fei yimane nu uma ese numaralo mi yeneni.