Yene ese yangke nale uporo nro
3
Nu pinuma isi bilipne namo nupu mi namo pu,
naime yene won ese yoplongkleye nu mi namo kore sa nu ese nupu.
Mi namo sa nanrona,
ningki kaire nu ese fei naine numaralo nu king ka gapman empo none,
nu ese nupu mi nunini ka naine yilpele ese nangke nale uporo nro.
Ka ningki kaire,
nu ese aflo naine ka nangke ommo uporo nro.
2 Nu ese fei ouwnire nu plai wee nakle nemnopu mi.
Nu ese numaralo none ka aflo naine ka nuꞌpu uma mingklari yukaine foli noneni ka naine nangke nale uporo nro paiyi nu.
3 Yene ese yirengkle nu mi namo nanrona empo fika,
isi mone re maime nale fafaile pu fai mangke nale wongkwongkeni namo:
Isi mone fai maime nale fai mangklu mi,
aikongkeleme ka maime yukaine uma empo fai kungkumplene ka mupeleme nu uma fai kalnirene mi ka refalane mi.
Ka empo taim namo,
mone isi maime yukaine mana empo kalabusye nale empo fai wolpuna yemeiye ommo ka nale fai rukloye ka nampaloye ommo empo pike.
Ka empo taim namo re,
mone isi mamplo renro nale empo fai kalwolpuna nenine ka noko mi nu uma plai.
Ka ommo wongkwongkeni namo isi yangke nu plai naine yukaine iim moneni ka mone re isi maime yukaine iimuma nunini.
4 Ka God,
mana fai yuꞌpu kore mone namo,
yuku nale uporo woneni fai samo wolpalo ka wolaye mone pinuma empo pike mee yemei alele,
5 ka yuꞌpu kore mone pu.
Wu seke yangke nale namo empo ommo uporo isi mone mangkeme.
Onnele!
Wu wone isi samo wolpalo mone ka yangke ompla namo ese yuꞌpu kore mone.
Wu yupole ommo fafaile mingklari isi nene mone.
Ka Holi Spirit empo wu wone ese yame laip keklepe ka mone ese memei kongkom keklepe woneni.
6 Empo nale uporo empo Godni,
wu yangke Jisas Krais mana fai yuꞌpu kore mone,
samo yaiku Holi Spirit woneni wamo mone.
7 Ka nale uporo woneni fai wolyane mone namo,
ese yangke mone maime yukaine pinuma uporo nama empo God.
Empo namo nro ka God yem mone pu ese maime yukaine kongkom woneni,
ka mone maime morume wu nro ese yame mone laip fai waiye nanrona nanrona.
8 Mi namo sa alwone ka mone ese samo bilipim.
Ki wola kire yene ese samo yoplongkle mi alele empo mi namo nu pinuma empo bilipne God fai nu ese neli kelone kei fai samo nulune rokoi fai yilpelene ka naine fai nangke nale uporo nro.
Nale namo,
sa uporo wamo ka ese mewmewye pinuma mingklari.
9 Ka,
yene ese fei ripi yalana irkaparmi empo nu uma fai samo wolpuna neni nu uma plai,
wee nu uma fopi empo fai kalnirene ka noplo mi mingklari euwlangklen noula empo nu flili noneni empo isi,a
wee nu uma fai nemnopu mi ka kalwolpuna nenine mi empo nenene lo empo Moses.
Mi namo,
sa engkemule ka ese fei samo mewmewye laip moneni.
10 La mana wongke yire mi rola yem yangklupu uma ka pone paipi ka pinanpai ponkerila,
sa yene ese samo yane mi kelo wu ese yenmaire nale wunini.
La empo wu fei yupu mi yeneni ka yangkeye nale namo,
sa yene ese samo yane kore mi kelo namo wu.
La wu fei yupu mi yeneni ka na yangkeye nale namo,
sa yene ese yupone wu waiye lese.
11 Yene namale,
mana nanrona empo yupone rokoi uporo pu ka palo renro rokoi empo fai nangkene nale fafaile.
Ka nale fafaile woneni sa kotim wone pu.
Mi rolpitiri Taitusni ese paiyi yulu Pol
12 Ki ese kawane Artemas wee Tikikus paiyi ese yem koii yeneni mokoi namo.
Empo yene yulu wongke ungklama,
sa yene ese wampane yolowi ka yulu ki mokoi empo taun Nikopolis.
Ki wola kire kaiki kaike taun Nikopolis,
empo fika ekleneye ese taim empo riple ka mokoi fai samo raulo ka ki wola kire kaiki mokoi namo.
13 Apolos yane mana empo namale lo noula wunini Senas,
wuyane ese painrine rokoi.
Nanrona fane yene ese samo yuluye wuyane ommo fika fai mewmewye wuyane sa ese reryane wuyane.
14 Nu Kristen pinuma moneni empo ailan Krit namo ese fei kalnaine,
nu re ese samo nem ila uporo yukaine yene empo nale uporo fai mewmewne nu uma fopi empo ommo onne.
Yene ese fei mewyimane nu Kristen kalnaine ka fei nupene nale uporo empo God sa ommo empo God namo ese fei nemei wamo.
15 Pinuma mingklari empo kikakle maime mele nire kaire uporo empo nu paiyi yene.
Ka yene re ese yali kaire uporo empo mu paiyi nu pinuma fopi fai bilipne Jisas ka fai samo wolane mu empo nane yene naine namo.
Wolpuna empo God ese waiye plau pone.