Piparola empo Pol yeꞌre paiyi
Taitus
1
Ki Pol,
mana siwole fai kalkangke ompla empo God ka kaike yukaine aposela empo Jisas Krais.
Wu yawane ki fai kelkali nu pinuma mingklari empo isi wu wone yaule nu ese naine yukaine nu uma woneni,
fai yangke bilip nunini ese nemei wamo,
ka re nu ese samo namale mi alwone wunini.
Mi alwone namo sa rokoi fai nupene nale uporo wu wone wolaye.
2 Ki wona kangkeke ompla namo fai ese mewmew nu ka ese kelkale bilip empo nu pinuma empo God sa nu ese resuklu neli kelo,
ka ese naine plau ainem ka norune God ese yali nu laip fai yeye nanrona nanrona.
Isi God fei yangke ommo wongke yemei alele,
wu isi yuka mi pu ese yame mone laip fai ese yeye nanrona nanrona.
Ka God namo fei fai kalyireye mi wongke.
3 Ka taim resuklu empo isi wu wone yina,
God mana empo yuꞌpu kore mone namo,
wu yangke mi woneni yemei alele ka wu yina ommo fai noplo mi wunini yolowi mew kinini.
4 Taitus,
ki keꞌre piparola mee paiyi yene.
Yene waiye yukaine auna kinini,
ka bilip empo yene yunaye namo sa yukaine bilip empo ki kunake.
Aina God yane Krais Jisas,
mana empo yuꞌpu kore mone namo,
ese wolnane yene ka ese nane wolraulo yene.
Taitus ese yapu nu uma uporo ka yuꞌpu nu fai ese nangke ommo empo sios
5 Nomu empo isi ki kupone yene waiye ailan Krit namo sa nanrona,
yene ese yemplekuru ommo plolploli empo nenene namo,
ka re yene ese yuꞌpu nu ilauma empo sios mingklari empo naine taun mingklari namo,
yukaine isi ki kirewi yene namo.
6 Yene ese yina nu uma empo nu pinuma fei resuklu napu eni wongke empo nu nangke.
Ka nu uma fopi empo yene yire yina nu namo ese nem pin wokwokera nro ka kongkom empo nu sa kongkom fai bilipne Krais.
Ka kongkom empo nu namo,
nu ese fei nem noula fafaile nanrona nu uma fai wewelane ka aikongkelene ka nangklu mi.
7 Nu uma ese yene yina nu namo,
sa nu uma fai nopane ommo empo God empo nu painri risine ommo empo sios.
Nanrona fane nu ese fei nangke ommo fafaile ese nangke nu pinuma ese nulu nu nanrona nu sa uma fai nangkene nale fafaile.
Nu ese fei wolanire nanrona nu sa neli lida ka nuna noula wamo nuflo none wolpoku ka nu ese nangke nale fafaile nu pinuma.
Nu ese fei naikono ka folwone ka wolane romaula ka ommo wongkwongkeni empo pike mee.
Nu ese fei faflai wolpuneni ka nu ese fei poinpain nopune nu pinuma.
8 Nu ese
nangke nale uporone nu uma plai fopi empo noloni mow nunini.
Ka nu ese naine yukaine uma fai samo wolane ommo uporo empo God nro.
Ningki kaire nu ese nupene ila uporo nro.
Ningki kaire nu ese nangke nale uporo nro nu pinuma, ka
nu ese nali none painri God ese naraine uporo nama empo wu, ka
nu ese samo nopane none kore sa ommo fafaile ese fei resuklu nemei wolpuna noneni.
9 Wu ese samo yuna mi alwone empo God isi oiya wiyeye namo ka yolowi plele naimele empo mu mukuneme wu namo,
sa wu ese samo bilipim.
Nanrona fane ese resuklu wu ese yukule nu pinuma plai mi alwone namo sa nu ese bilipim.
Ka empo rokoi namo nro,
sa resuklu wu ese yereri wolpuna empo nu uma ese nupene mi alwone namo.
La empo uma plai fai wola wongkenine mi alwone namo,
sa wu ese yenrele nu sa nu ese namale ka ese nem ila uporo empo none ese noloni kore none.
Ailan Krit namo, sa yuna nu uma fai kunrumkaline ka nensonane nu pinuma sa nu ese fei bilip
10 Yene ese samo yuluye nu uma uporo ka yuꞌpu nu ese nangke ommo empo sios namo.
Empo fika,
nu uma fopi fai ikakrinri kelolene ka aikongkelene ka fei fai wolane mi alwone namo,
mingklari empo nu sa naine mokoi namo.
Nu wona kunrumkaline mi wongkwongkeni ka wona nensonane ka samo nisinoline wolpuna empo nu pinuma.
Ka nu uma namo,
mingklari empo nu sa nu uma empo Juda ka nu fai nangke nale namo sa wamo.
Nu uma namo fai neli kelone ila ka nale fai naulene paplib
11 Mone ese maukiri rokoi empo nu uma namo fai naraine mow empo nu uma plai ka naniline ka nisnoline ila ka wola empo nu uma empo bilipne namo.
Nale namo empo nu naniline ka nisnoline ila ka wola empo nu ese nangke ommo mone pinuma ese fei mangke.
Nu fai naraine mowmow ka samo nisnoline nale uporo empo nu pinuma fai samo nainene namo,
ka re,
nu nangke nu pinuma ese nalene romaula fai naniline skul empo nukule nu namo.
Ka empo nale nro nu fai kalnengkene romaula nunini.
12 Isi mana wongke noneni fai namale mi ka nale empo ailan Krit namo sa yire nanrona,
“Nu uma empo Krit namo,
nu sa uma fai kunrumkaline mi ka nu sa uma fafaile wamo yukaine ommokulu mouleni.
Nu fai samo kile none ommo ka samo numne ka kalnilene nro.”
13-14 Mi namo sa won alwone.
Nanrona fane yene ese yenreleye nu mi kelo ese yangke nu nensona nale nunini sa nu ese fei nangke nale fafaile namo kore.
Ka nu resuklu ese bilipim God ka ese fei nupune wawai mi empo nemeine wolpuna empo nu Juda,
ka lo wongkwongkeni empo nu uma fai samo kuma nanene mi alwone namo.
15 Nu pinuma empo naine namkile ommo empo God wone yangke,
nu ese none ommo wongkwongkeni ka nu ese nainene namkile nama empo God.c
Ka nu uma fai nangkene nale fafaile wongkwongkeni nama empo God ka fei fai bilipimne Krais,
ommo mingklari namo samo fafaile wamo nama empo God.
Ka,
nale fafaile empo nu namo ke samo yisyoliye puna ka wola nunini fane fei namale nale rongkele sa uporo ka nale rongkele sa fafaile.
Ka nale namo fei yangke nu flemulu ompla wongke.
Sam onne!
16 Nu fai nire nanrona nu sa namale God.
Ka nale empo nu samo yuku nu alele nanrona nu fei fai wolnane wu wamo ka fai samo kuma nane wu.
Nale nunini samo fafaile wamo ka nu fei fai nupune mi.
Ka nu ese fei samo resuklu ese nangke ompla wongke uporo.