Taitus wu seke Juda mana. Ka taim empo wu bilipim Manawamo Jisas ka waiye yukaine Kristen wongke, wu sa fai mewmewye Pol empo taim wu fai yangkeye ompla woneni yukaine aposel. Nanrona fane, Pol yireni Taitus waiye ailan Krit fai ese yuluye ommo empo sios empo mokoi namo. Ka piparola empo emen sa yire nanrona nale empo nu uma empo ailan Krit namo fei samo uporo. Nanrona fane mana empo yire paiyi risiye ommo ka nu pinuma empo sios namo ese samo nupene nale uporo nro. Kingke se, Pol yukune Taitus rokoi fai nukulene nu pinuma. Ka nu pinuma namo, sa nu uma pinuma alma ka kongkom efapu ka nu pin mangklama ka nu wokboi siwolenro. Ka pekimo empo mi empo piparola mee sa yire nanrona, Taitus ese yukule nu pinuma sa nu ese naine wolpuna wokera ka nangke nale uporo nu uma plai. Ka nu ese fei nopu mi ka nenrelene nu plai.