Timoti ese kelo yoplo mi empo God
4
Krais Jisas ese yonsane nale empo mone pinuma empo maime laip ka nu pinuma empo rili pu. Ki kire mi kelo yene nanrona, Krais Jisas namo ese yemei alele ka uma mingklari ese nulu wu nama noneni ka wu ese waiye king nanrona nanrona. Nanrona fane empo nama wunini ka nama empo God, ki na koploke ese kererkane yene. 2 Nanrona fane yene ese yeli kelo ka yoplo mi wunini paiyi nu pinuma. La empo nu uma nire nupu mi wee nu numplewa ka fei nire nupu mi empo Krais, sa yene ese yali nu mi alwone ese yereryali wolpuna nunini sa ese yangke nu ese nemplemaire wolpuna ka nupene mi empo God. Yene ese samo yoplo mi paiyi nale empo nu fai nangkene. Ka mi namo, ese mewmew nu ka yaukiri nu ese fei nangke ommo fafaile. Ka yene ese yereryali wolpuna empo nu ese neli kelo ka samo nuna kelo mi namo. Ningki kaire yene ese yoplo afloye nu ka samo yukuleye nale empo God fai wolaye. 3 Empo fika, taim ese yemei nu pinuma ese samo numplewa ka kuma nane mi alwone. Ripi nunini ese samo nalana mi fai nupene nale empo nu fai samo wolane wamo. Ka nu ese nouw nu uma empo fai noplo nukulene nu ommo empo nu fai samo wola nire nupu. 4 Ka nu ese samo numplewa ka kuma nane mi alwone. Ka wolpuna nunini ese fei samo naine nu ese wolpeni wamo nire fai ese nupu irkaparmi nro. 5 Ningki kaire yene ese samo yuluye ila ka nale yeneni. Yene ese waiye nama feingkyane la empo eni yolowi yene, yene ese yeli kelo ka yungkam eni namo. Yene ese yoplo miuporo empo God paiyi nu pinuma. Empo ompla fika Manawamo yawe yene, sa yene ese samo yangke.6 Ki kire kelkane yene empo mi mee, empo fika, taim ekleneye nu ese nufu ki ri ka oli kinini ese okopalo yukaine wain empo nu fai nanene God yukaine ofa. Taim empo ki kire kaiki sa yolowi ekleneye. 7 Ki kuna bilip kinini ka ki keli keloke ese kungkam ompla upupu empo miuporo. Ka ki re isi keli kelo yukaine nu iimuma fai neli kelo taim empo fai nopu iim. Nanrona fane ki kangke ompla namo pekimo yukaine mana fai yempliriye resis ka paiyi plele koii empo wu yireye. 8 Naimele ompla uporo wamo empo mana rikepone resis sa rowai yoruye ki ese kem. Ompla uporo namo sa yukaine, Manawamo fai yupeneye nale uporo fai wu ese yuluye nu pinuma ka wu ese youw ki yukaine mana uporo nama woneni. Ka taim empo kot wamo wunini, wu ese yake ki ompla uporo namo empo mana rikepone resis. Ka ompla namo, wu ese fei yake ki wokera nro. Onne! God ese yali nu uma mingklari fopi isi wolane wu wamo ka isi noru nire nulu wu ese yemei alele.
Timoti ese wampane paiyi ka yulu Pol
9 Yene ese wampane yapu rokoi ka yolowi yulu ki. 10 Empo fika, Demas wu sa wolaye ommo empo pike mee fane wu paiyi taun Tesalonaika pu. Kresens sa paiyi provins Galesia ka Taitus sa paiyi distrik Dalmesia. 11 Luk wokera nro sa ki kane maime. Empo yene yolowi, yene ese yumane Mak yane polopi plau. Empo fika, wu mana uporo fai mewmew plau ki mangkeme ommo. 12 Ki kawane Tikikus paiyi pone taun Efesus pu. 13 Empo yene yire yolowi, yene ese yem saket kinini empo waiye mow empo Karpus empo taun Troas. Yene ese yuꞌpu buk kinini plau. Ka yene ese yuꞌpu buk empo nu nangke ommo kulu papli namo yene fai wola yumaye. Ka yene ese wolrufu ka yem yuna yolowi ki.
14 Aleksanda, sa mana fai yangke ommo bras namo, isi yangke ommo fafaile wamo ki. Kingke se, Manawamo wone ese yangke fafaile wu yukaine isi wu yangke ommo namo ki. 15 Poo konsamo yuluye mana namo, empo fika, wu mana fai wewelaye ka fai yangklu mi munini empo mone mire moplo mi. 16 Emen ki keli kot, mana wongke fei reryane ki ka yoplo mi. Uma mingklari nupone ki. Ka ki wona kesapuke God ese yupone ommo fafaile empo nu. 17 Ka Manawamo empo waiye plau ki fane yake ki kelo. Nanrona fane wu samo reryane ki kungkam ommo wunini ka koplo miuporo paiyi nu uma mingklari empo fei Juda ese nupu. Manawamo empo mewmew ki fane laion wamo fei wo ki.a 18 Manawamo ese yem ki kore ka wu ese samo yaukiri ki empo ommo fafaile nu uma nire fai ese nangke ki. Ka wu ese samo yanwo ki ka wu ese mewmew ki paiyi la taim wu ese yem ki kali kingdom empo wu waiye heven. Mone ese mereri noula empo Manawamo nanrona nanrona. Amen.
Mi empo Pol sa won nanrona
19 Yene ese yirengkle kaire uporo mi kinini paiyi Prisila yane Akwila ka nu uma empo Onesiforus. 20 Erastus sa ro yeye taun Korin ka Trofimus sa empo yenri fane ki kupone wu waiye taun Miletus. 21 Yene ese amparpunu wampane yolowi mee, mokoi mee fai raulo wamole ka rapu kelo fai yemeiye. Yubulus, Pudens, Linus ka Klodia ka nu Kristen pinuma plai naimele nire kaire uporo paiyi yene. 22 Manawamo ese waiye plau spirit yeneni ka ese wolpalo pone.