3 Ki kire tenkyu God, mana ki fai kangke ommo wunini. Ki fai kupene nale uporo empo ki kangke ommo wunini yukaile nu flili kinini isi fai nangkene. Wolpuna kinini, ki namale nanrona ki sa uporo nama empo God. Ka ki fei wolyumalo yene, nanrona fane ki fai kire tenkyu God ka kesapuke yene ningki ka kaire. 4 Ki fai wolrufuke kaire isi yene nama kulu yoloye namo^a, ka namo fai yangke ki kire ese samo kulu yene. Ka namo ese yangke ki aikem ka kem wolraulo wamo.

5 Ki namale nanrona yene fai samo bilipimye Krais Jisas wu wokera nro yukaine yene mampa Lois yane yene moka Yunis re isi bilipim wu. Ka ki namale nanrona bilip namo re nawaiye yene. 6 Nomu namo nro, fane ki kire ese samo kererkane wolpuna yeneni ka kangke yene ese samo kelyane ompla namo empo laip yeneni yukaine mana empo namale fai yompo niꞌpi ka niꞌpi fai samo ali wamo. 7 Yene ese samo namale nanrona Spirit empo God yame mone ese fei yangke mone mum. Wu yane Spirit fai yame kelo mone, ese yangke mone samo wolmale nu plai, ka fai mewmew mone ese samo mopane laip moneni. 8 Nanrona fane yene ese fei flemulu empo yene yoplo mi empo Manawamo ka empo ki re yene ese fei flemulu ki, empo fika, ki kaike kalabus noula wunini. Yene yem kelo empo God ka yenkawe ese mungkam eni empo fai moplo miuporo empo God. 9 Isi God yem mone kore ka youw mone ese maime pinuma woneni. Wu fei wola nale uporo empo mone mangkeme ka wu youw mone. Onne. Isi oiya God fei yangke ompla wongke yemei, wu youw mone wolpuna woneni. Ka mew empo Krais Jisas wu wolpalo mone ka yangke mone maime pinuma woneni. 10 Naimele Krais Jisas, mana empo yuꞌpu kore mone namo, empo yemei alele pu. Ka ommo empo wu yangkeye namo, ke yangke wolyaule empo God re yemei alele pu. Krais Jisas isi yisyoli ka yumalo kelo empo fai riline ka miuporo wunini yangke mone pinuma mingklari namale laip empo fai samo naine nanrona nanrona. 11 God empo yem ki ese kaiki mokoi mingklari yukaine aposel wongke ka kaike yukaine tikse fai ese koplo miuporo namo ka kukuleke nu uma mi wunini sa nu ese nupu. 12 Ki fai kangke ommo namo, ka nomu namo, ki fai kungkamke eni namo. Ki fei flemulu eni empo ki kungkamke namo. Empo fika, ki samo namale mana empo ki fai bilipke wu, ka ki namale nanrona wu ese yane kelo ka wu wone ese paiyi risi ommo isi wu yina waiye mew kinini paiyi plele empo wu ese yolowi kore. 13 Empo yene yoplo mi, yene ese yoplo yukaine isi ki kukuneke yene namo, ka yene ese yuna kelo bilip yeneni ka samo wolyane nu uma plai. Nale plainrane namo, Krais Jisas wu wone fai yereryaneye wolpuna empo mone ka mone fai mangkeme. 14 Yene samo yopane ka samo yaukiri miuporo empo God isi yina paiyi mew yeneni namo. Holi Spirit empo God waiye mone namo, sa ese mewmew yene fai ese yopane ka samo yaukiri ompla uporo namo. 15 Yene namale nanrona uma mingklari empo provins Esia empo nenmaire ka nupone ki pu. Ka Figelus yane Hermogenes re empo nenmaire ka nupone ki. 16 Ki kesapu nanrona Manawamo ese wolpalo ka yangke uporo Onesiforus yakle uma mingklari empo mow woneni. Ningki kaire wu fai yemplekuruye wolpuna kinini ka wu fei fai flemuluye ki empo kaike kalabus. Sam onne. 17 Empo wu yolowi taunwamo Rom, wu samo amparpunu yapu ki paiyi la empo wu wane ki. 18 Ki wona kesapuke Manawamo ese wolpalo ka yangke uporo wu empo wu yupu kot empo mone uma mingklari. Yene won samo namale ommo mingklari uporo pu Onesiforus isi yangkeye yire mewmew ki empo isi ki kaike taun Efesus.