Timoti ese waiye yukaine iimmana uporo empo Krais Jisas
2
Auna kinini, yene ese yem wolyane empo Krais Jisas ese kelyawe yene yeye nanrona. 2 Mi mingklari isi yene yupu ki koploke nama empo uma mingklari namo, mi namo yene ese yina paiyi mew empo nu uma fai nuna kelo mi empo God ka nu empo resuklu ese nukule nu plai empo mi namo. 3 Yene ese waiye yukaine iimmana uporo empo Krais Jisas ka yungkam eni empo ommo namo plau mu. 4 Yene namale ommo nu iimuma fai nangkene. Nu fei fai kalnangke ommo plai empo nu nangke ommo noneni yukaine iimuma. Nu fai samo nangke ommo yukaine iimuma, sa opisa noneni ese samo aiyem nu. 5 Nanrona nro, la empo mana yempliri resis fei yupene lo empo resis, wu ese fei yem prais. 6 Mana empo yangke ommo wamo nengkle woneni sa ese yem ommo paiyi risi nu uma plai. 7 La empo yene yuna mi mingklari empo ki kirewi yene yeye wolpuna yeneni, sa Manawamo ese yangke yene namale ommo mingklari namo.8 Ningki kaire yene ese wolrufu Jisas Krais nanrona, wu sa yemei uma empo king Devit ka wu isi ri ka God yereryane wu kore ka wu waiye laip. Miuporo namo sa ki fai koploke uma mingklari fai nupune. 9 Rokoi empo fai noplo miuporo empo God namo, sa won nomu wola nu uma ke nulu ki yukaine mana fafaile wamo ka nake ki eni mingklari wamo wola nu nina ki kalabus. Ka mi empo God namo, sa ompla nu ese fei nuna ka nina wu kalabus. 10 Nanrona fane ki fai keli kelo ka kungkam eni mingklari namo ese saimolo nu pinuma empo God isi yuꞌpu ese samo nane Krais Jisas naine plau glori wunini nanrona nanrona. 11 Mi ese kingke yolowi namo, sa won alwone fane uma mingklari ese samo bilipim:
La empo mone ri plau wu
sa mone ese maime laip plau wu.
12 La empo mone meli kelo ka mungkam eni mingklari,
mone ese mane wu maime yukaine king.
La empo mone samo mumplewa wu ka mire mi alele nanrona mone seke uma wunini,
sa wu re ese samo yumplewa mone ka yire mone re seke uma wunini.
13 La empo mone muka mi mire mupene wu ka mone fei mupene mi empo isi mone mukame namo,
sa wu ese yupene mi wu woneni empo ompla wu yire yangke.
Wu ese fei yaniliye wone kore.
Timoti ese samo yeli kelo sa wu ese yungkam ommo empo God
14 Nu uma yeneni sa namale mi namo pu, ka yene won ese yoplo yukuleye nu ningki kaire sa nu ese samo namale. Empo nama empo God, yene ese samo yirengkle nu sa nu ese fei nemnopu mi empo mi fafaile noneni empo nomu nunini. Nale namo sa fafaile ka fai yangke fafaile laip empo nu uma fai nupune. 15 Yene ese sam amparpunu yangke ommo yukaine mana uporo wone nama empo God sa wu ese samo wolaye ommo empo yene yangkeye. La empo yene samo yoplo mi alwone wunini, sa, yene ese fei flemulu ompla wongke. 16 Yene ese fei waiye eklene nu uma empo fai noplo mi fafaile fei samo nupene ila ka wolpuna empo God. Empo fika, nu uma fai noplo mi fafaile namo, ese paiyi fafaile wamo ka ese fei naine eklene God. 17 Mi fafaile empo nu uma namo, sa ese yukaine muꞌku wamo ke yoko rinra empo mana ka ese paiyi fafaile wamo. Mana plainrane empo fai nangke nale namo, sa Himeneus yane Filetus. 18 Wuyane nupone rokoi empo mi uporo pu, empo fika, wuyane fai nire nanrona, “Empo isi mone bilipim Jisas ka mone mem baptais, sa yukaine mone isi maime pike pulale ka mone memei kore pu. Nanrona fane mone ese fei memei taim wongke kore.” Empo mi namo nro, wuyane fai nangke fafaile bilip empo nu pinuma plai. 19 Ka God isi yirane pu roma kelo wamo fai yeꞌreye sios wonenia ka roma namo kelo wamo nayeye. Wu yeꞌre mi namo wiye roma namo ka yire nanrona, “Manawamo samo namale nu pinuma woneni.” Ka wu fai yeꞌre mi rola wongke kore nanrona, “Uma mingklari nem noula empo Manawamo, sa ese kuma nane nale fei uporo nama empo God.” 20 Mow wamo wongke sa yunali dis naine. Dis namo, plai empo nu, nu nem gol ka silva wola nangke. Ka plai sa nu nem ilo wola nangke ka plai sa nu nem pike wola nangke. Dis namo, plai empo nu sa fai nangke ommo uporo ka plai sa fai nangke ommo fafaile. 21 Nanrona fane, la mana wongke empo yuꞌpole nale fafaile wone fai yunaliye laip woneni ka yemei uporo nama empo God, sa mana namo ese yemei yukaine dis empo fai nangke ommo uporo. Mana namo ese samo waiye uporo ka holi. Ka Manawamo ese yulu wu yukaine mana empo waiye yilpeleye nro fai ese yangke ommo mingklari uporo wunini. 22 Nanrona fane ningki kaire yene ese samo kuma yane wolpuna fafaile fai yemeiye wolpuna empo nu kongkom efapu ka pin mangklama. Yene ese samo yangke ommo fai ese yem nale uporo, ka nale empo fai samo bilipne God, ka nale empo fai wolnalene nu plai, ka yem nale empo wolpun raulo. Ka pone mingklari ese samo pangke nale namo. Yene yakle nu uma empo wolpuna nunini uporo wamo nire nu ese fei nangke nale fafaile nama empo God namo, ese posipane ka pesapu Manawamo. 23 Yene ese fei yina mireꞌfa yeneni plau mi fafaile wongkwongkeni empo nu uma ila nunini empo imeli ommo fafaile namo. Yene namale nanrona, mi fafaile wongkwongkeni namo fai yisyoli nu uma ka yangke nu naine nopu mi ka nopune nro. 24 Mana empo yangke ommo empo Manawamo ese fei yangke nale fafaile nu uma wee yakle nu nopu mi. Wu ese samo yangke nale uporo nro nu uma mingklari. La empo nu uma wewela ka fei nupu mi wunini, wu ese samo yem wolpun raulo nro ka yapu rokoi wongkwongkeni fai ese yoplo yukule nu pinuma nale empo God wone fai wolayire nu ese samo nupene. 25 Wu ese samo afloye fai ese yangke nu uma fei fai nupu mi ese namale ommo uporo nu ese nangke. La empo wu yangke nanrona, ki fei namale, anro God ese mewmew nu ka nu ese nenmaire ka nupone ommo yukaine none fai nangkene ka nem ila uporo mi alwone empo God. 26 Satan yuꞌpu nu naine auworu wunini pu fai wu ese yangke nu nupene mi wunini. Ka, empo nu namale mi alwone empo God, sa ila ka wolpuna uporo ese yemei nu kore ka nu ese nulipanro ka nupone auworu empo Satan ka ese konsamo nai.