3 Yene ese samo yuluye ka yangke nale uporoye nu pinmana fopi empo inpi rili nupole nu ka none nro nainene. 4 La pin empo ini woneni ri yupone wu namo, empo yuꞌpu kongkom ka anfife plau nainene, yene ese mewmew nu ese namale nanrona ommo empo nu uma namo emen nangke nama empo God sa fai nanwolene none oli oikenra. Nanrona fane nu ese samo nopanene mampa namo ka none mokapnangkapi fai nali kore ommo fika yukaine isi nu amparpunu nanwolene none. Ka nale namo sa uporo wamo nama empo God. 5 La pin wongke empo ini ri yupone wu ka wu wonekere nro waiye ka wu sa mana onne fai ese yanwo wu. Wu ese samo bilipim God ka yesapu ningki kaire ka yaline God ese mewmew wu. 6 Ka, pin ini wunini empo ri pu ke waiye wolyaule wamo ommo empo pike mee, ke wola yire nanrona wu sanro waiye laip, alwone wu sa waiye yukaine mana empo ri pu. 7 Nanrona fane yene ese samo yirengkle nu pinmana ploli empo inpi rili pu namo ese nupene nale empo fai nesapune God sa nu ese nangke nale uporo nro ka nu pinuma plai ese fei napu nale fafaile empo nu. 8 Nu uma fei fai nulune nu oli oikenra noneni ka nu uma plai empo none fai nakle naine plau mow noneni namo, nu sa nupone bilip noneni pu fane nu sam fafaile wamo ke rikepone nu haiden empo fai nangke nale fafaile.

9 Yene ese yeꞌre noula empo nu pinmana empo inpi nunini rili pu namo sa sios ese mewmew nu. Ka yene ese yeꞌre noula empo nu pinmana kikla nunini rikepone 60pla ka nu empo isi nem mana wokera nro. 10 Pin namo ese yem noula uporo ka wu ese waiye ka yangke ommo upupu. Ommo yukaine, wu fai samo yanwo kongkom noneni ka yuꞌpu ommo empo fai none ka yali nu uma empo mokoi plai empo noloni ka samo ainem wamo nu uma fai bilipne God ese noloni mow wunini ka yaklele rew nunini. Ka ompla wongke kore, wu ese mewmew nu pinuma empo nem eni ka wu pin fai yangke ommo plai uporo. Yene ese yuꞌpu noula empo nu pinmana namo nro.

11 Yene ese fei kalyeꞌre noula empo nu uma pin mangklama empo inpi nunini rili pu, empo fika wola nunini ese nemei ka nuꞌpu uma kore. Ommo namo ese yangke nu ese kuma nane ommo empo Krais. 12 La ommo namo nemei, sa nu pinmana namo nangke fafaile laip noneni ka nu fei nupene promis ^aempo isi none nukane namo. 13 Ompla wongke sa, nu ese num ka nem nale fai naraine mow empo nu uma plai. Ka nu ese fei nangke nale namo, nu ese naraine napu mi empo ommo nu uma plai empo nangke sa nu ese painri ka nangke ila fafaile noneni ka noko mi nu uma plai. Nanrona fane nu noplo mi mingklari fei uporo empo ommo mone ese fei moplome. 14 Ki wola nanrona ese uporo la nu pin mangklama namo empo inpi nunini rili pu namo, ese nuꞌpu uma kore ka nuꞌpu kongkom sa ese samo nopane mow noneni. La empo nu nangke nanrona sa iim moneni namo, ese fei yapu rokoi fai ese yisyoli noula empo nu pinuma empo fai bilipne. 15 Yulu! Ompla fika empo isi nemei plai empo nu pin mangklama empo inpi nunini rili pu namo, plai empo nu nemplemaire ka nupone rokoi uporo ka nupene Satan.

16 La empo pin wongke fai bilipimye Krais ka nu oikenra woneni pinmana plai empo inpi nunini rili pu, sa wu wone ese yuna ommo fai ese mewmew nu. Ka ommo namo ese yangke sios ese fei rangkuwa ese yuluye nu. Sios ese yuluye nu pinmana plai empo inpi nunini rili pu ka nu uma empo fai nulune nu namo sa onne.

17 Nu uma empo fai painri risine sios ka nangke ommo uporo empo sios namo, sios ese yereri noula nunini ka nali romaula nu risi nu plai. Ka nu uma empo fai samo nangke ommo empo none ese nukule nu uma ka noplo mi empo God namo, sios ese aiyem nu rikepone nu plai. 18 Empo fika mone moplo mi empo nile buk empo God yire nanrona, “Pone ese fei pangke bulmakau ese mirefa kungku empo wu yangke ommo fai rew yunraloye rais papli.”^b Pone namale mi wongke empo yire nanrona, “Nu uma empo fai nangke ommo namo, ese nem romaula empo ompla empo nu fai nangkene.” Ka nu uma fai painri risine sios sa yukaine. Nu uma empo sios ese nuꞌpu nu empo nangke ommo empo sios. 19 Yene ese fei yupu mi empo mana wongke empo mi yolo nu uma empo painri risi fai nopanene sios, empo nangke fafaile. La plainrane wee plainrikera ese nire mi nanrona nu nulu wu empo yangke ommo namo, sa yene yupu. 20 La wongke empo nu uma empo fai nangke ommo empo sios na yangkeye nale fafaile, sa yene ese youlmane alele mi wunini nama empo nu uma empo sios. Yene ese samo yoplo mi empo nale wunini, sa nu plai re ese num, ka ese fei nangke nanrona.

21 Empo nama empo God ka Krais Jisas ka nu ensel empo God, ki samo kirewi yene nanrona yene ese samo yuluye ommo mingklari yukaine empo ki kirewi yene namo. Yene ese yangke nale nanrona nro empo uma mingklari. Yene ese fei yangke nale uporo nu uma empo yene fai woluporoye nu nro.

22 Yene ese fei wolfolwo ka wampane mew yauneli uma ka yirengkle nu painri risi ka nangke ommo empo God. La yene yangke nanrona, sa God ese yulu yene nanrona yene re, mana fai yeli plau ommo fafaile empo nu uma fai nangkene. Nanrona fane yene ese samo yuluye yene sa yene ese waiye namkile nama empo God.

23 Yene ese yupone nale empo yene fai kalyaikowo mii aupenro. Ese uporo la yene yaikowoye wain pitiri ese mewmew puna yeneni ka saimolo nale empo yene fai yenriye namo.

24 Ommo fafaile empo nu uma fai nangkene namo ese wampane nemei alele ka ese wampane paiyi kot se nu uma fai nangkene ommo fafaile namo ese noloni kot. Ka nu uma plai fai samo peki nainene ka paiyi se nale fafaile empo nu ese nemei alele. 25 Nanrona fane, nale upupu fai samo yeye alele. La empo nale uporo plai fei wampane nemei alele, sa nu ese fei peki naine.