1 Timoti 6

Nu wokboi siwole ese nangke nale uporo nro

Nu pinuma fai bilipne Jisas ka naine wokboi nro ka fai nangkene ommo empo nu uma plai namo, ese numaralo noula noneni ka nererine noula empo manawamo empo none. Nale namo sa fai yangke nu uma empo fei bilipne namo, ese fei ouwnire noula empo God ka skul empo miuporo empo God. 2 La manawamo empo nu wokboi namo fai bilipne Jisas, sa nu wokboi namo ese fei nem wola nanrona, “Manawamo namo, sa ki apa,” nanrona fane nu ese wewela ka ese fei nupu mi empo nu. Nu wokboi namo, asa nem wola nanrona, “Mana empo ki kangke ommo wunini namo, wu mana empo bilipye fane ki ese wolkane wu.” Ka nale namo sa wu ese amparpunu kore.

Nale fai kileye romaula sa rokoi fafaile fai ese yengke nale fafaile ese nolonine

Mee sa ommo yene ese yukule nu uma ka yererwo wolpuna nunini sa nu ese samo nangke ommo namo. 3 Mu fa mukuleme nu uma mi uporo empo Manawamo moneni Jisas Krais ka nale uporo empo God wolaye. La empo mana wongke owyire skul empo mu ka wu sa ke yukuleye nu mi wongke sa fei yukaine mi mu fa mukuleme nu uma, 4 mana namo wu fai aikongkeleye, ka mew yuꞌfloye wolpoku ka wewelaye nro. Ila empo wu samo kungkuno fei namale ompla wongke, onne. Wolpuna wunini imeli wolpun fafaile fai yemyukaile mi ka yopu mi empo mi nomu empo mi plai namo. Mi namo fai yangke mana wolpun fafaile nu uma plai ka nu nopu mi ka yupoyale ka wol fafaile nu plai. 5 Ningki kaire nu fai naine wolpun nenine nro ka wolpuna nunini sa fafaile wamo ka fei samo namale mi alwone. Nu fai wola nanrona, rokoi fai nupene nale uporo empo God namo, sa mewmew mone fai mem romaula mingklari. 6 Ka, mi alwone sa nanrona, la empo mone aimem wamo ommo empo God fai yame mone, mone ese namale nanrona rokoi fai nupenene nale uporo empo God sa ese mewmew mone wamo. 7 Mone namale nanrona, empo ama nuꞌpu mone molo pike mee mone isi fei mungkam ompla wongke molo pike mee, nanrona fane empo mone mupone pike mee, mone ese fei mungkam ompla wongke maimpi plau. 8 La empo mone muna ommo fai mome ka ommo plai fai maileme, sa mone ese mire nanrona ommo namo, sa resuklu mone. 9 Nu uma fai wola nire nuꞌpu ommo mingklari wamo namo, fai nempliri painri ka panrinolo ommo fai nemplekarene yukaine misiri fai yunaye ommo kulu. Ila ka wolpuna nunini fai napane nire nangke ommo fafaile namo nro ka ommo namo fafaile wamo fai yengkeye eni ese yemei laip nunini namo sa nu ese samo fafaile wamo laip ese kingke yolowi. 10 Nale fai kilene romaula sa fai yengkeye ommo mingklari wongkwongkeni fafaile ese nemei. Plai empo nu uma fai kilene romaula namo, nupone bilip noneni ka ommo namo ese yengke eni wongkwongkeni yemei nu yukaine ompla neni ese samo yoku nu.

Yene ese yempliri kelo ese yem laip ese waiye nanrona nanrona

11 Ka yene sa mana empo God, ka yene ese yupone ka waiye amone empo ommo fafaile namo. Yene ese yeli kelo ka yupene mi empo kirewi yene namo: Yene ese yangke nale uporo ka yupene nale uporo wamo empo God, ka yene ese bilipye God wokera nro, ka yupene nale empo fai samo wolane nu plai, ka yene ese yeli kelo ka yungkam eni ka yene ese wolpuna aplaiye nu pinuma. 12 Nale fai bilipne namo, sa yukaine resis wongke. Nanrona fane yene ese yempliri kelo resis namo sa yene ese yem laip ese waiye nanrona nanrona empo God isi yauleni yene ese yem namo. Yene isi yoplo mi empo ommo namo nama empo nu uma mingklari. 13 Mone namale, God fai yane laip ommo mingklari, ka mone re namale nanrona, empo Pontius Pailat yuyaliye Jisas Krais, wu yire mi alwone kore wu. Ka naimele, nama empo God yane Krais Jisas, ki kire mi kelo yene nanrona, 14 yene ese samo yupene ommo mingklari yukaine isi yene yemye namo, ka yene empo fei yangke ommo wongke fafaile fai ese yangke nu pinuma ese nokomi yene. Yene ese yangke nanrona nro paiyi plele taim empo pinuma mingklari ese nulu Manawamo empo mone Krais Jisas ese yolowi kore. 15 Ommo namo sa ese nemei yukaine taim empo God wone yina pu. God wone sa nomu fai ainemne ka wone wokera nro sa fai paiyi risiye ommo mingklari. Wu King empo nu king mingklari ka Manawamo empo nu ilauma mingklari. 16 Wu wokera nro sa ese fei ri. Ka wu sa fai waiye mokoi woneni yuna ali wamo ka mana wongke ese fei paiyi eklene wu. Ka mana wongke isi fei yulu wu ka mana wongke sa fei resuklu ese yulu wu. Nanrona fane mone ese mereri wu ka mereri noula ka kelo wunini nanrona nanrona. Won alwone.

Nu uma fai nuna romaula mingklari ese bilipim God ka mewmew nu pinuma

17 Yirengkle nu uma fai nuna romaula mingklari ka ommo upupu empo pike mee ese fei neliriryen aikongkelene ka nererine noula empo none kore. Nu ese fei wola kelo ommo fai wampane fafaile namo. Nu ese bilipim God empo fika, wu mana fai yame mone ommo upupu mingklari fai nangke mone aimem wamo. 18 Yirengkle nu ese nuna romaula noneni ka nangke ommo upupu. Nu ese fei nulu romaula namo yukaine ompla wongke uporo noneni. Ommo uporo wamo empo none namo, sa nale fai nangke uporo nu plai. Nu ese nangke nale uporo fai ese mewmew nu plai ka nali ommo paiyi nu uma empo samo ommo keipa. 19 La nu nangke nale namo, nale isi nu nangke ese yemei yukaine ommo kelo fai yuna bilip nunini, yukaine roma kelo empo yuna mow wongke ka ese fei fafaile. Nanrona fane bilip nunini ese kelo ka nu ese resuklu nem laip namo sa laip alwone namo fai waiye nanrona nanrona.

Timoti ese samo yuluye ompla empo wone fai yangkeye

20 Timoti, yene ese samo yuluye ompla namo empo God yawe yene namo. Yene ese kuma yane mi wongkwongkeni empo nu uma fai nouwne nanrona “ilauporo.”^a Ilauporo namo, sa fei alwone ka fai yengkaliye wola empo God. Nanrona fane yene ese waiye amone nu uma namo fai nire nanrona none sa nuna ilauporo. 21 Plai empo nu uma empo fai bilipne ke nupenene ilauporo namo sa poipainenru bilip noneni pu. Wolpuna empo God sa waiye plau pone.