1 Timoti 4

Kalnemple mi fai nanili nu pinuma ese nupone bilip nunini

Holi Spirit yoplo mi alele nanrona taim ese kingke noloni plai empo nu uma ese nemplemaire ka nupone bilip noneni. Empo fika, nu ese nupu mi empo opola fai kalnirene ka opola fafaile ka nupene mi nunini. 2 Nu uma fai nuka ila empo nu uma namo nale empo fai kalnirene ese nemei ka noplo mi alele mi fafaile empo none paiyi nu pinuma ese nupu. Ila empo nu samo wawile ka nu fei namale nale fafaile empo none ka nu re fei flemulu nale empo none nangkene namo. Samo onne. 3 Nu uma namo ese mi naule nu pinuma ese fei nemnuꞌpu ka naukiri ommo plai nu ese fei no. Ka God ke yangke ommo empo fai none namo paiyi mone pinuma empo bilipme ka namale mi alwone empo wu, ese mem ka mo ka mire tenkyu wu. 4 Empo fika, ommo mingklari God yangke namo sa uporo nro. Nanrona fane, mone ese fei makuru ompla wongke empo God yangke. Mone ese mem ka mire tenkyu God ommo namo. 5 Mi empo God ka empo mone fai mesapume namo fai yangke ommo namo ese nemei holi.

Timoti ese waiye yukaine mana uporo fai yuna ommo empo Krais

6 La yene won nayoploye mi alele paiyi nu pinuma fai bilipne mi namo, yene mana uporo fai yangke ommo empo Krais Jisas. Ka yene ese yem mi kelo alwone empo mone mire bilipme wu ka ila uporo empo nu uma plai empo isi nukune yene ka yene won nayupeneye. 7 Yene ese fei yupu wawai mi nomu onne ka fai keloye nale empo pike mee. Yene ese samo kuma yane mi namo ka yupene rokoi uporo fai ese yangke yene yeli kelo ka yupene nale uporo empo God. 8 Yene namale, empo mone mire mangke nalpapli moneni waiye kelo, mone fai mangke ommo wongkwongkeni, ka ommo namo ese mewmew mone pitiri nro. La mone mupene nale uporo empo God, ommo namo ese samo yangke mone kelo ka ommo namo re ese mewmew mone rokoi wongkwongkeni empo mee ka kingke re mone ese mem laip God empo isi yuka mi mone. 9 Mi naimele ese ki kirepi pone namo, sa mi alwone fai mone uma mingklari ese mupu ka bilipim. 10 Mone samo bilipim God fai waiye nanrona nanrona ka wu mana fai yuꞌpu kore pinuma mingklari, ka mi alwone sa nanrona wu fai samo riryuꞌpuye mone uma empo bilipme wu nro. Ka mone maime morume wu fai ese samo yangke mone, nanrona fane mu kelo wamo mire mangke ommo namo.

11 Yene won ese yali mi namo paiyi nu pinuma ka won yukuleye nu ese nupene mi namo. 12 Nu ese nulu yene nanrona yene sa mela efapu, ka nu ese fei wola nanrona yene sa mana siwole. Onne. Yene ese yangke nale uporo wongkwongkeni sa nu uma empo bilip ese namale yene ka nupene yene. Yene ese yoplo mi uporo ka yupene nale uporo nro. Nale uporo empo fai wolnane nu uma plai ese waiye yene ka yene ese bilipim God ka waiye namkile nanrona nama empo God. 13 Naimele ka paiyi plele taim empo ki koloki, yene ese yeli kelo yoplo yukule mi empo God paiyi nu uma ese nupu ka yene ese yoplo nomu empo mi namo ka yoplo yukule nu nale empo God wolaye. 14 Yene ese fei kalwaiye, yene ese yangke ommo namo isi God yawe yene yukaine presen empo taim nu uma empo sios isi mew naune yene. Ka empo taim namo, wongke empo nu yoplo mi profet fai God ese yawe yene kelo fai ese yangke ommo namo. 15 Yene ese fei kalwaiye, yene ese samo yangke ommo namo, sa uma mingklari ese nulu nale ka ommo empo yene yangkeye sa uporo ese yemei paiyi wamo. 16 Yene ese sam saimoye nale yeneni ka ommo empo yene yangkeye fai yukuleye nu pinuma namo. La yene samo wola yapaye ommo empo yene yangkeye namo, sa God ese yem kore yene yakle nu uma fai nupune mi empo yene.