Nu uma fai painri risine ommo empo sios ese samo nupene nale uporo
3
Mi empo ki kire ese kirepi pone namo, sa mi alwone. La mana samo wola yire yangke ommo yukaine mana fai yuluye sios, ompla namo sa uporo wamo fai wu ese yangke. 2 Mana yire yukaine mana fai yuluye sios sa wu ese samo yupene nale uporo nro, sa nu uma ese fei napu ompla wongke fafaile wu. Wu ese yem pin wokera nro ka wu re ese samo waiye ka samo yulu ommo ese wone yire yangkeye. Wu ese samo yuluye wone ka yupene nale uporo nro ka nu uma ese nereri noula wunini. Ompla wongke re, wu ese yangke nale uporo nu uma fai nolonine mow woneni ka wu ese namale rokoi fai yoplo yukuleye nu pinuma. 3 Wu ese fei yaikowo mii kelo folwo ka wolpuneni ka paiyi yakle nu uma nopune. Wu ese samo aflo waiye ka ese fei yangke nu uma plai plau wolpuneni. Ka wu re ese fei wolaye romaula ka yulu nanrona romaula sa ompla wamo laip woneni. 4 Wu ese yanwo ka yaukiri pinkongkom woneni ka yangke nu kongkom woneni ese samo namale mi wunini ka nupene. 5 Ka mana fina fei samo yanwo ka yaukiri pinkongkom woneni namo, sa ese fei yangke ompla namo ese yopane ka yaukiri sios empo God. 6 Kristen keklepe ese fei yangke ommo namo fai paiyi risiye sios. La wu yangke ommo namo, wolpuna fafaile ese yemei wu ka wu ese yereri noula woneni ka waraiye nongkoye ka God ese kotim wu yukaine empo isi wu kotimye Satan. 7 Mana empo yem ommo fai paiyi risiye sios namo ese yuna noula uporo. Nu uma empo fei naine sios namo re ese nereri noula wunini ka noplo mi alele nanrona wu sa mana uporo, sa mana namo ese yuna ommo namo ka paiyi risi ommo empo sios. La mana empo yuna noula fafaile, mana namo nu ese nire mi wongkwongkeni ese yisyoli wu ka Satan ese yeire wu yukaine misiri fai yunaye ommo kulu.Nu uma empo fai nangke ommo empo sios ese samo nupene nale uporo
8 Nanrona nro, nu uma plai fai nangke ommo empo sios empo nu nina nu namo ese nangke ommo empo sios, nu re ese nuna noula uporo sa nu pinuma ese nulu nu sa uma fai numaralone none sa nu ese samo nupu mi nunini. Nu ese fei naikolno mii kelo mingklari ka folworine ka nu re ese fei nampalo ommo ka napu rokoi wongkwongkeni ese peki nuꞌpu romaula empo nu uma plai. 9 Nu ese namale none nanrona nu sa uporo nama empo God. Nu ese samo nuna mi alwone empo God isi yame mone uma fai bilipme wu. 10 Pone ese konsamo pulu nu nanrona nu uma fei fai nangke eni sa pone ese pali ommo empo sios paiyi nu.
11 Nu pinmana empo nu re, ese samo nangke nale uporo ka nuna noula uporo nama empo nu uma plai. Nu ese fei noko mi wee mi nolo nu uma plai. Nu ese sam saimone none ka samo nangke ommo empo nu nali nu.
12 Uma empo fai nangke ommo empo sios ese nem pin wokera nro ka wu ese samo yanwo kongkom ka uma mingklari empo fai nakle naine plau mow woneni. 13 La nu uma empo fai nangke ommo empo sios ese nangke ommo uporo, sa uma mingklari ese samo nereri noula nunini ka nu ese neli kelo ka nu ese fei num empo nu nire noplongkle nu uma bilip noneni empo Krais Jisas.
Nomu empo nale empo mone fai bilipme
14 Ki wola kire koloki mee ka kulu yene, ka ki fai wolrufu kore wola naimele ki keꞌre mi mee paiyi yene se.
15 La empo ki fei wampane koloki, sa yene ese yulu mi nile piparola mee ese yuku yene nale uporo empo mone uma empo God ese mupene. Mu uma empo God, sa maime yukaine sios empo God fai yuna laip waiye nanrona. Ka sios namo sa yukaine ilo rinra kelo ka roma wamo fai yuna mi alwone empo God. 16 Mone mingklari samo namale mi alwone nanrona, mi namo fai nu uma ese nangke nale uporo nama empo God, sa ompla uporo wamo. God yuku mone nanrona,
Wu isi yolowi yukaine manale run
ka nu pinuma nulu wu nama noneni,
ka Holi Spirit yuku nanrona nale wunini sa uporo wamo,
ka nu ensel re nulu wu nama noneni.
Nu uma isi nuna mi wunini
ka noplo mi mokoi mingklari empo pike mee,
ka nu pinuma empo pike mee
nupu ka bilipim wu,
ka God yumane wu pari riri
ka waiye mokoi empo yuna glori wamo.