Mone ese mesapu ka maline God ese mewmew pinuma mingklari
2
Ompla empo ki wola kire yene ese emen yangke, sa nanrona. Yene ese yirengkle pinuma mingklari ese nesapu God ka nire tenkyu wu ka naline wu ese mewmew pinuma mingklari. 2 Nu ese nesapu ka naline wu ese mewmew nu king ka nu uma empo gapman. Rokoi namo sa mone mingklari ese mem wolpun raulo ka maime uporo. Ka mone re ese samo mupene nale uporo empo God fai wolaye. 3 Rokoi empo nu nesapune namo sa uporo fai yangke God, mana empo yuꞌpu kore mone, ese yem wolpuna uporo ka aiyem wamo. 4 Wu yire yuꞌpu kore pinuma mingklari sa nu ese namale nomu empo mi alwone. 5 Mi namo sa nanrona, God wokera nro fai waiye, ka mana wongke fai waiye iplele empo God ka mone pinuma. Mana namo sa Krais Jisas. 6 Jisas isi yane laip woneni fa yuꞌpu kore mone pinuma mingklari, namo sa resuklu taim empo God wone yina. Wu yangke nanrona fai yuku mone nanrona wu samo wolyane wamo mone pinuma mingklari fane ese yuꞌpu kore mone. 7 Empo nomu namo nro fane God yina ki kaike yukaine aposel fai koplo mi wunini. Mi namo sa won alwone ki fei kalkanili pone. Wu yake ki ommo fai ese kukule nu pinuma empo fei Juda sa nu ese bilipim Krais ka namale mi alwone namo.8 Nanrona fane ki wola nanrona nu uma empo mokoi mingklari ese nereri mew panri riri ka nesapu. Ki samo wola nanrona nu ese nali laip noneni paiyi God ka naine holi ka nupone nale empo fai nopu mi ka wolpun nenine. Ka nu ese nupene nale empo fai nesapune namo.
Nale empo fai nangke ommo uporo namo, sa ommo uporo nu pinmanangkle
9 Nale namo nro, ki wola nanrona nu pinmana re ese naile ommo uporo nale resuklu none ka ese fei yereryali wolpuna empo uma mingklari. Nu ese fei samo nemplekuru ka mewpanrolene ilapara noneni ka nemplekuru nalpapli noneni plau gol ka kikinelale ommo wongkwongkeni ka naile ommo papli empo nu fai nuꞌpune romaula wamfafai. 10 Ka nu ese nangke ommo uporuporo nro ese nuku nanrona nu samo wola nire nupene mi empo God. Ommo uporo empo nu nangkene namo sa yukaine ommo papli empo none fai nailene.
11 Nu ese konsamo aflo nai ka numalo none panro ka samo nem mi empo God. 12 Ki kire nanrona nu pinmana ese fei painri risi ka nopane uma alma ka noplo nukule nu mi empo God. Nu ese konsamo aflo naine ka nupune nro. 13 Empo fika, God isi yangke Adam paiye risi se sa Iv. 14 Ka Satan fei yaulimi palo ka yenmaire wolpuna empo Adam. Wu isi yenmaire wolpuna empo Iv ka yaulimi palo wu ka wu yangke nale fafaile. 15 Ka nu pinmana ese nangke ommo noneni fai nuꞌpune kongkom. La empo nu samo bilipim Krais, sa God ese yuꞌpu nu kore. Nanrona fane nu ese nupene rokoi empo fai samo wolnaline uma plai, ka nu ese naine holi ka nupene nale uporo.