2 Timoti, yene fai bilipimye Krais Jisas ka nale namo nro sa yangke yene waiye yukaine auna ki koneni. Ki keꞌre piparola mee paiyi yene empo fika, Aina God yane Manawamo empo mone Krais Jisas namo ese wolpalo yene wamo ka wolnane yene ka nangke yene waiye wolraulo.

3 Empo ki kupone yene mokoi namo ka kire kaiki provins Masedonia, ki isi kirewi yene pu yene ese waiye taun Efesus ka yire mi kelo nu uma fai kalnirene nanrona nu ese fei kalnoplone mi plai empo nu noplo nukulene nu pinuma mi empo God. 4 Nu ese samo nupone ka wolnumalo nale empo fai kalnirene mi fafaile ka noplo mi ewlangklen noula empo nu flili empo isi. Mi namo, ke yangke nu uma wolpuna neni ka poinpain nopune uma ka fei mewmew nu ese bilipim God ka nangke ommo isi God yali nu ese nangke. 5 Ka, nomu empo mi kelo ki kape pone namo sa nanrona, pone ese samo wolpale nu pinuma plai. Nale namo fai yemeiye wolpuna empo mana fina empo wola yire wu ese fei yangke nale fafaile, ka wu namale nanrona, wu fei fa yangke nale fafaile nama empo God, ka wu re ese samo wola nanrona wu sa bilipim Krais Jisas wokera nro. 6 Uma plai, ke nupone rokoi uporo namo ka naimele nu nupene rokoi fai noplone mi fafaile empo nomu onne. 7 Nu fai samo wola nire naine yukaile nu tikse empo lo isi God yane Moses. Ka nu fei namale mi nomu empo none noplone namo. Nu ke kalneli kelone mi noneni ka nu nire none samo namale mi namo. Ka nu none sa fei namale mi nomu empo none fai noplone namo.

8 Mone namale, la empo mone mimane lo yangke ompla namo God isi yina woneni, lo sa ompla uporo. 9 Mone re namale nanrona ommo empo lo namo, God fei yina lo fai kotim nu uma empo fai nupenene nale uporo. Onne. Ka, rokoi wunini, wu fai yemplekuruye nale empo nu uma fei fai nupenene lo. Ka nu uma empo fai wewelane ka aikongkelene, ka nu uma fei fai samo nupenene nale uporo nama empo God. Lo namo, sa fai kotimne nu uma empo fai nangke nale fafaile, ka nu uma empo fai nupenene ommo empo pike mee nro ka fei fai nupenene nale empo God wolaye. Ka rokoi wongke empo lo re sa fai kotimne nu uma empo fai nuflone mokanangka ka nu uma plai riline. 10 Ka fai kotimne nu pinuma empo fai nangke nale pamok ka nu uma mana empo fai nemnangklene none kore. Nu uma empo fai pekinuꞌpune uma ka nenru nu uma plai nuꞌpune ka nangke nu naine yukaile nu uma nale siwolenro fai nangke ommo nu uma namo, lo re ese kotim nu. Ka nu uma empo fai kalnirene mi empo nu nire mi alwone riri. Ka nu uma fei fai nangke ommo yukaine empo none fai nuka mi nire nangke. Ka nu uma empo fai nangke ommo plai fai ese yuku nanrona nu fei samo wolnane mi uporo empo God yukaine mone fai moplome namo. 11 Miuporo namo, sa mi alwone yire mi alele nanrona, God empo mone namo wu yuna kelo woneni ka yuna ali wamo. Ka wu yem ki ka yake ki mi namo fai koplo. God namo yuna noula wamo ka wu sa nomu empo nale aiyem.

12 Ki kane tenkyu Krais Jisas Manawamo moneni, empo yake ki kelo ka wu namale nanrona ki ese keli kelo ka kangke ommo wunini. Nanrona fane wu yem ki fai ese kangke ommo namo. 13 Isi, ki mana fai ouwkireke ka minrike Manawamo ka nu uma wunini re ki fai kangke fafaile nu. Ki mana fai kangke nale fafaile wamo ka kalkuflo keklike nu pinuma empo fai bilipne. Ka wu samo wolpalo ki empo fika, ki kone empo kangke ommo namo, ki fei namale wu ka ki fei bilipim wu. 14 Manawamo moneni Krais Jisas namo empo wolyane ki wamo ka yangke ki bilipim wu ka kane wolpuna kinini paiyi nu plai.

15 Mi ki ese kirepi pone mee, sa mi alwone mone mingklari ese mem ka bilipim. Krais Jisas isi yolo pike mee ese yuꞌpu kore nu pinuma fai nangke ommo fafaile. Ki re wongke empo nu uma fai nangke ommo fafaile namo, ki nro sa fafaile wamo rikepone nu plai fai nangkene nale fafaile. 16 Ka, yene ese yulu nanrona ki kone nro sa samo fafaile wamo fane Krais Jisas ke wolpalo ki wamo. Fane ommo namo fai ese yuku nu pinuma mingklari ese namale nanrona wu fai wolpun neniye, ka wolpun neni empo wu fei fai wampaneye sa onne empo nu fai nangke ommo fafaile nama wunini. La empo nu nulu ommo namo isi wu yangkeye namo empo wu samo wolyaule ki wamo empo fika ki mana fafaile wamo ki empo kaiki risi nale empo nale fafaile namo. Ommo namo ese nangke nu namale ka nu ese samo bilipim wu ka nu ese nem laip fai waiye nanrona nanrona. 17 Ki samo wola kire mone pinuma mingklari ese mereri noula empo God ka mane noula wamo wu ewelme ka kingke ka nanrona nanrona. Empo fika wu wokera nro sa God. Wu sa King fane mone ese fei mulu wu nama moneni. Wu ese fei ri, wu ese waiye nanrona nanrona. Amen.

18 Auna ki koneni Timoti, ki na koploke fai rerkane yene empo ompla ki kawe yene ese yangke, nanrona sa yene ese samo wolrufu mi profet empo isi nu nirewi yene namo, ka yene ese samo yeli kelo ka yangke ommo fai ese yoplo miuporo empo God. Ka empo nu uma neklinumane mi yeneni, yene ese yeli kelo mi alwone namo yukaile nu iimuma fai neli kelo ka nopune. 19 Empo yene yeli kelo, yene ese samo bilipim Jisas ka namale nanrona yene sa uporo nama empo God. Uma plai namale nanrona nu empo nangke ommo plai fafaile, ka nu fei nimane God paiyi risiye nu ka yukuleye nu rokoi uporo fai nu ese nupene. Nanrona fane nu nangke bilip nunini fafaile yukaine sip wongke empo paiyi pari rip ka pikpikare kei. 20 Mana plainrane empo nu uma empo fai nangke nanrona, sa Himeneus yane Aleksander. Ki kina mana plainrane namo paiyi mew empo Satan^a fai wuyane ese namale nanrona wuyane ese fei ouwnire kore God.