Pol yulpari sip ese paiyi taunwamo Rom
27
Empo nu nuka mi nanrona mu a ese mem sip ka maimpi Itali,
Pol yakle nu kalabus plai,
nu nawale nu painri kepten empo 100 iimuma noula wunini Julius,
ese yopali nu.
Kepten Julius fai yopaliye grup wongke empo nu iimuma nu fai nouwne nu nanrona Nu Ami Empo Sisar.
The Shipwreck (Aposel 27:1–28:10)
2 Mu mulmampli sip empo taun Adramitium.
Sip namo yire ese paiyi fulu rila empo nenene mokoi plai empo provins Esia.
Nanrona fane mu mem sip maimpi.
Aristarkus re yame mu maimpi.
Wu sa mana wongke empo taun Tesalonaika waiye provins Masedonia.
3 Empo ningknamnole mu maimpi plele taun Saidon ka kepten Julius ke yangke uporo Pol ka wu yireni wu paiyi yulu foluma woneni fai nu ese nane wu ommo plai empo wu wolaye.
4 Mu mupone mokoi namo ka maimpi ka rapu kelo wamo yem mu,
fane mu peki maimpi eklene ailan Saiprus kumalpo empo rapu wamo namo.
5 Empo mu maimpi fulu iplele mu maimpi rikepone fulu maipon empo provins Silisia ka Pamfilia,
ka mu maimpi mona sip yapa taun Maira,
empo yeye provins Lisia.
6 Empo mokoi namo kepten empo iimuma ke yulu sip wongke empo taun Aleksandria yire paiyi Itali fane wu yawale mu maimpi muflal mampli sip namo.
7 Mu maimpi aflo aflo kaire mingklari,
ka mu amparpunu maimpi plele taun Nidus.
Rapu kelo wamo yufu mu fane mu fei samo maimpi,
nanrona fane mu menmaire maimpi kumalpo empo ailan Krit.
Mokoi namo waiye eklene Salmone uklala.
8 Mu amparpunu maimpi mupene piyowa empo fulu maipon,
mu maimpi plele koii nu fai nouw Rila Uporo.
Koii namo sa waiye eklene taun Lasea.
9 Mu maimpi kaire mingklari,
ka empo taim namo sa nu Juda fai neinangklune ompla fai none.
b Nanrona fane Pol yirengkle nu nanrona,
10 “Pone uma,
ki kulu nanrona sip empo mone maimpime mele ese fafaile ka ommo mingklari ese okolpanro ka mone pinuma re ese rili.”
11 Ka kepten empo iimuma fei yupu mi empo Pol yireye,
wu sa yupene mi empo sip nangka yane kepten empo sip.
12 Ka fulu rila namo fei uporo fai sip ese yapa taim empo rapu wamo,
fane uma mingklari nuka mi nire nu ese painri fane.
Empo fika nu nire nu ese painri plele Finiks ka peki napa fulu rila uporo namo empo rapu wamo.
Mokoi namo sa fulu rila yeye ailan Krit,
plola wunini paiyi saut ka paiyi wes ka plola wunini paiyi not ka paiyi wes.
Rapu ka fulu yemei wamo
13 Taim rapu empo saut yolowi ka fei yemei kelo fane nu nire nanrona moule uporo empo nu wolane namo empo yolowi,
nanrona fane nu nengke angka pari riri ka painri eklene nupene piyowa empo fulu maipon empo ailan Krit.
14 Fei amone ka rapu kelo ke yemei,
rapu namo nu fai nouw nanrona “Rapu empo Is kelo wamo yolowi repo empo ailan Krit.”
15 Rapu ka fulu yem sip namo fane sip fei paiyi yine rapu namo,
nanrona fane mu kal maime ka rapu yangkome mu maimpi.
16 Taim mu molomi kumalpo empo ailan pitiri wongke nu fai nouwne Kauda,
mu mengkali mire ese mengke bot empo yapa sip kumalpo ese yolowi sam yapa eklene
17 Taim nu nengke bot pari sip wamo riri ka nu samo nuka wu kelo,
se nu nuꞌpu kapa wamfafai ka nukalo palo paiyi sip ruwe fai ese samo yuna wu kelo.
Nu re num sip wamo namo ese paiyi pari koii anru empo Sirtis,
nanrona fane nu nangklu sel nolo ka rapu yangkome sip namo paiyi aflo afloye.
18 Mu empo mem moule fafaile empo rapu kelo namo,
nanrona fane kaire wongke nu nuꞌpu ommo plai empo naine sip namo ka ningkipanro fulu.
19 Kaire plainrikera pai se,
nu neingkole sel ka ommo empo sip namo ka nu ningkipanro fulu.
Nu mew nuꞌpu ommo ka ningkipanro fulu
20 Kaire ka kikla fei sam alini ningki mingklari rapu ka fulu yeye nanrona.
Mu mulu nanrona mu ese fei sam mai uporo.
21 Kaire mingklari nu fei sam no ompla,
Pol yeli nama nunini ka wu yirengkle nu nanrona,
“Pone uma kinini,
la empo pone pupu mi kinini ka mone fei maimpi mupone ailan Krit sa rapu ka fulu namo,
ese fei yuflo mone ka ommo mingklari ese fei peklimo.
Ka,
pone fei pupu mi kinini.
22 Fane naimele ki kire mi kelo pone,
ese samo paipe kelo.
Empo fika pone ese fei rili,
sip naime nro ese fafaile.
23 Empo ningki ensel empo God ki fa bilipke wu ka kangke ompla empo wu namo,
yolowi yeli rere ki.
24 Ka wu yire ki nanrona,
‘Yene fa yumye,
Pol.
Yene ese paiyi yeli yoplo mi kot yeneni ka Sisar ese yupu.
God yupu yene yesapuye fane wu wolpalo wunini ese uma mingklari empo nane yene naine sip namo ese fei rili.’
25 Nanrona fane kelo poneni samo puna,
ki empo bilipim God nanrona wu ese yangke ommo,
ese nemei yukaine wu yire ki.
26 Ka,
mone ese maimpi mangkana fulu anru empo ailan wongke.”
Fulu yekli sip namo pikpikare kei
27 Empo namba 14 ningki,
rapu yangkome mu maimpi fulu empo Mediterenian.
Moule yukaine riripo rona nu uma fai nopanene sip namo ke nulu nanrona nu sa noloni eklenene pike.
28 Ka nu nem ompla fai ronsane fulu rila ka ningkapalo ka nu nulu nanrona fulu rila namo sa resuklu 40 mita.
Mu as maimpi ka nu nonsa kore ka nu nulu nanrona 30 mita.
29 Nu num sip fai ese paiyi yekli roma ka pikpikare,
fane nu ningkapalo 4pla angka fai napa sip kumalpo namo palo ruwe ka nu nesapune rapu ka fulu namo ese walum.
30 Nu uma fai nangke ompla fai nopanene sip namo nire nupone sip namo ka panro peki painri.
Nanrona fane nu nina bot palo fulu.
Nu num uma mingklari ese namale fane nu nanili nanrona nu ke risinane angka plai empo fai napalene sip ungklapo panro fulu.
31 Ka Pol yireni kepten yakle grup wongke empo nu iimuma nanrona,
“Uma namo ese naine sip.
La empo onne,
pone ese rili.”
32 Nanrona fane nu ami painri naulere kapa empo nukalo bot namo fane bot namo ke firpalo palo fulu.
33 Fei samo walrale,
ka Pol yirengkle uma mingklari namo nu ese no ompla.
Wu yirengkle nu nanrona,
“14pla kaire paiyi pu,
wolpuna poneni fei sam naine uporo ka pone fei po ompla wongke.
34 Naimele ki kirepi pone ese po ompla resuklu pone ese fei ponripi.
Fane pone wongke ese fei ri.”
35 Wu yirengkle nu mi namo pekimo se wu yem bret plai ka wu yire uporo paiyi God ka uma mingklari namo ke nulune wu.
Wu yekli bret ka wo.
36 Ka nu nem kelo wola nu re no ompla noneni.
37 Namba empo mu uma mingklari maime sip namo sa resuklu 276pla uma.
38 Empo nu no ommo resuklu none,
nu ningkipanro ommo plai panro fulu,
empo fika wit namo nangke sip eni.
39 Empo kaire yeri,
nu nulu pike namo ka fei namale,
ka nu nulu fulu rila ka fulu maipon,
nanrona fane nu nuka mi wongke fai nire nengkali ese painri fulu fei rila.
40 Nu naulere angka empo sip panro fulu,
ka nu neingkole kapa empo nukalo pul naine sip kumalpo namo ka nu nengke sel fai yeli sip ungklapo pari ka nu painri ese nina sip waiye fulu maipon.
41 Ka sip ungkla paiyi yoku maipon ka sip namo yangkana maipon ka fei paiyi,
nanrona fane fulu wamo yemei yolowi ka yekli sip kumalpo ka sip pikpikare kei.
42 Nu iimuma naine nonkerila ka nuka mi fai nu ese nuflo nu kalabus rili sa nu ese fei nulipanro rew nufu fulu painri.
43 Ka kepten empo ami sa yum nu ese fei nufu Pol ri,
nanrona fane wu mi yaule nu ami ese fei nuflo nu kalabus rili.
Wu yirengkle nu uma fai samo rew nufune fulu namo nulipanro ka rew nufu painri pike se.
44 Nu uma plai nuꞌpu plang ploli empo sip namo ka nu rew nufu painri pike.
Nu nangke nanrona fane uma mingklari namo samo rew nufu painri plele pike.