Pol paiye waiye ailan Malta
28
Empo mu samo rew mufu fulu ka maimpi plele maipon namo,
mu mulu nanrona mu maime ailan wongke noula wunini Malta.
2 Nu uma fai naine ailan namo nangke nale uporo mu.
Nu nompo niꞌpi ka niremi mu maimpi maime eklene fai mu ese nale mengkini niꞌpi empo fika riple fane mokoi namo raulolo wamo.
3 Pol yirile im plai ka yenru niꞌpi ka niꞌpi woli yem im,
wola umele wongke empo yeye im pulale namo yolo moile ka yuka Pol mew.
4 Ka nu uma empo ailan namo nulu umele namo ke yuka yapa Pol mew,
fane nu noplo none kore nanrona,
“Mana namo sanro mana fai yufloye nu uma riline,
fane wu fei yaikowo fulu ka ri fane naimele umele yopline wu ese ri ka empolme god empo yangke ommo fafaile empo nu uma fafaile wu fei ese yupone wu waiye laip kore.”
5 Wola Pol mew yangkome umele namo firpalo niꞌpi ka niꞌpi yupo kei.
Ka Pol nale fei rerei ka popoku.
6 Uma mingklari wola nire nanrona umele empo yoplineye wu namo nel koii ese popoku wee wu ese firpalo ka faflai ri.
Ka nu nai noru paiyi ka nu fei nulu ompla wongke yemei wu fane nu ke wola wongkeni ka nire nanrona wu sanro god wongke.
7 Mokoi namo waiye eklene pike rola wongke,
ka ila mana wongke noula wunini Publius fai paiyi risiye.
Mana namo youw mu maimpi mow wunini ka mu maime koii namo resuklu kaire plainrikera ka wu fai yangke nale uporo wamo mu.
8 Publius nangka wu sa empo yenri nalwoli ka waile pon mii.
Fane Pol paiyi yulu wu ka yesapu wu ka mew raune mana namo fai uporo kore.
9 Empo Pol yangke nanrona,
nu uma mingklari fopi empo nenrinine ka naine ailan namo noloni Pol ka wu yangke nu uporo.
10 Nu nangke nale uporo wamo mu empo ommo mingklari.
Ka empo mu mire maimpi kore,
nu name mu ommo mingklari empo mu wola mee.
Nu painri taunwamo Rom
11 Mu maime ailan Malta resuklu kali plainrikera se sema mu mampli sip wongke empo isi waiye ailan namo empo isi rapu kelo wamo yemei ka wu waiye koii namo.
Sip namo sa empo taun Aleksandria ka nu nangke malma empo god plainrane wola nu nongkole panri nirample neli sip ungklapo.
Ka noula empo wuyane sa,
Kaster yane Polaks.
12 Mu maimpi plele taun Sirakyus ka mu maime kaire plainrikera mokoi namo.
13 Mu mupone taun namo ka mampli sip maimpi taun Regium.
Moulpeplere rapu yolowi saut ka mu maimpi maimpi moulningki ka paiyi moulpeplere kore,
mu maimpi plele taun Puteoli.
14 Empo mokoi namo,
mu mulu nu uma plai fai bilipne Jisas ka nu nouw mu maimpi makle maime resuklu wik wokera se sema mu maimpi taunwamo Rom.
15 Nu uma fai bilipne mi empo God empo taunwamo Rom namo nupu mi empo mu molomime namo fane nu noloni name mu rokoi.
Nu noloni name mu maket empo Apius koii nu fai nouwne nanrona Mow Anro Plainrikera fai niyene.
Empo Pol yulu nu uma namo,
wu yire uporo God ka wu yulu nanrona kelo empo God yolo wu.
16 Empo mu maimpi taunwamo Rom ka ila mana fai paiyi risiye gapman empo taunwamo Rom namo yane mow wongke Pol fai wonekere ese waiye ka iimuma wongke ese yopane wu.
Pol yoplo miuporo empo God empo taunwamo Rom ka nu iimuma samo nopane wu
17 Kaire plainrikera paiyi se,
Pol yumale nu uma fai painri risine nu Juda namo noloni wu.
Empo nu noloni plele,
Pol yirengkle nu nanrona,
“Pone uma kinini,
ki fei kangke ompla wongke fafaile nu empo lo empo nu mamimam moneni.
Ka nu nina ki kaike kalabus Jerusalem ka nu nem ki kaiki nu uma fai painri risine gapman empo taunwamo Rom.
18 Ka nu uma namo nupu kot kinini ka nu nulu nanrona ki fei kangke ompla wongke fafaile fai nu ese kotim ki ka nufu ki ri.
19 Ka nu Juda fei woluporo mi namo.
Ki sa mi onne fane ki ese fei kotim nu uma kinini.
Nanrona fane ki kalile nu ki ese kaiki Sisar ese yupu kot kinini.
20 Empo namo sa mi nomu fane ki kouw pone polopi fai ki ese kirepi pone.
Empo fika,
ki bilip ka koru ompla empo mone Israel morume namo.
Nanrona fane ompla namo nro yangke ka nu nuka ki sen.”
21 Ka nu nireni wu nanrona,
“Mu fei mem mi wongke yolowi distrik Judia ese yiremi mu mi namo.
Ka nu inomranimpi plai moneni namo nuna mi noloni ka niremi mu ka fei noplo mi wongke kore.
22 Nanrona fane mu wola mire yene ese yoplo mu empo fikami ka pinuma mingklari empo mokoi mingkla ownire nu uma keklepe empo nemeine iplele mu Juda.”
23 Ka nu nuka mi empo taim rongkele sa nu uma mingklari ese noloni plele koii empo Pol fai waiyeye namo.
Nu noloni ningkinamnole paiyi plele ningkipopli.
Wu yoplo yukule nu mi empo kingdom empo God paiyi nu.
Ka wu yirengkle nu ka yereryali nu ese bilipim Jisas,
yukaine lo empo Moses ka nu Profet isi neꞌrene.
24 Plai empo nu nupene mi yukaine empo wu yireye ka plai fei bilip.
25 Nu nopu mi none kore ka nu plelene kenkenra painri taim Pol yoplo mi wokera namo nanrona,
“Holi Spirit yire mi alwone paiyi nu nangka empo pone nangkapi empo isi profet Aisaia ka yolowi.
26 ‘Yene paiyi nu uma namo ka yirengkle nu nanrona,
“Pone ese pupu
ka pone ese fei namale mi nomu,
pone ese pulu
ka pone ese fei namale ompla wongke.
27 Empo fika,
nu pinuma namo,
ikaklo ka wolpuna nunini sa kelo wamo,
nu nupu,
ka ripi nunini fei samo nupu mi nomu
ka nama nunini re yuforo pu.
Ommo namo yuforo nama nunini fane nu ese fei samo nulu
ka nupu mi.
La empo nu nina mi namo waiye wolpuna nunini
ka nensolo wolpuna noloni ki sa ki ese kangke nu nemei uporo kore.” ’ ”a
28-29 Ka Pol yirengkle nu kore nanrona,
“Nanrona fane ki kirepi pone ese sam pupu mi mee.
God yire wu ese yuꞌpu kore mone.
God yali mi namo pu empo nu uma fei Juda namo nu ese nupu.”b