Festus yupu mi empo Pol
25
Empo Festus yem koii empo Feliks ka waiye provins namo kaire plainrikera paiyi se wu yupone taun Sisaria ka paiyi pari taunwamo Jerusalem.
2 Ka mokoi namo,
nu bikpris empo tempol ka nu uma fai painri risine nu Juda noloni wu koii namo fai nu ese kotim Pol.
3 Nu naline Festus nanrona,
“Mu mire yene ese yireni Pol ese yolowi Jerusalem.”
Nu nireni Festus mi namo empo fika nu nire ese peki naine rokoi ka empo Pol yire yolowi nu ese nufu wu ri.
4 Ka Festus ke yirengkle nu kore nanrona,
“Pol ro waiye kalabus taun Sisaria ka kaire eklene pu ki ese kaiki koii namo kore.
5 Plai empo nu uma fa painri risine pone ese ki kakle maimpi.
La empo wu yangke ompla wongke fafaile wamo,
sa nu ese kotim wu empo mokoi namo.”
6 Festus yakle nu naine yukaine 8pla kaire wee 10pla kaire ka wu palo kore taun Sisaria.
Ningkinama,
wu paiyi mow ka waiye koii empo mana fai nupune kot ka yirengkle nu ese numane Pol noloni wu.
7 Empo Pol wi yeli monre mow empo fai kotne,
nu Juda isi nupone Jerusalem noloni ka panri naine mow monre empo fai kotne namo mamane wu.
Nu neli ka mi nolone wu mingklari wu isi yangke ommo wongkwongkeni fafaile wamo.
Ka nu fei nukune nomu empo mi namo.
8 Ka empo nu noplo mi pekimo se,
Pol yoplo mi wunini nanrona,
“Ki fei kangke ompla wongke fafaile ka kekli lo empo nu uma Juda.
Ka ki fei kangke ompla wongke fafaile tempol,
ka empo Sisar re ki fei kangke ompla wongke fafaile.”
9 Festus yire yangke nu Juda ese wolpuna uporo wu fane wu yaline Pol nanrona,
“La yene yire paiyi Jerusalem fai ki ese kupu mi yeneni empo koii namo wee onne?”
10 Ka Pol yireni wu kore nanrona,
“Ese onne!
Mow empo ki kelike mee,
sa mow Sisarni fai kotne.
Yene namale nanrona ki fei kangke ompla wongke fafaile nu Juda.
Nanrona fane yene yupu kot kinini mokoi mee.
11 La empo ki kangke ompla wongke fafaile sa ki ese ri,
ki fei kum.
La mi empo nu Juda mi nolone ki namo fei alwone,
sa mana wongke ese fei yina ki paiyi mew empo nu.
Ki wola kire Sisar wone ese yupu kot kinini.”
12 Empo Festus yakle nu uma fai nane wu ila uporo namo yakle nuka mi pekimo se,
wu yireni Pol nanrona,
“Yene wola yire Sisar ese yupu mi yeneni,
nanrona fane yene ese paiyi Sisar.”
Festus yane King Agripa nuka mi empo Pol
13 Kaire plai paiyi se king Agripaa yane pinmela woneni Bernaisi noloni taun Sisaria fai wuyane ese nire kaire uporo Festus.
14 Wuyane naine taun Sisaria kaire mingklari,
ka Festus yoploni king Agripa mi empo Pol.
Ka wu yireni wu nanrona,
“Feliks yina mana wongke ro waiye kalabus ka naimele wu ro waiyeye.
15 Empo isi ki kaiki Jerusalem,
nu bikpris empo tempol ka nu uma fai painri risi nu Juda ke kotim wu ka nali nanrona mu ese mangke fafaile wu.
16 Ka ki kirengkle nu nanrona,
‘Gapman empo Rom fei fai kal kotimye uma ka fei fai yali nu painri mew empo nu uma fai kotim nu.
Wu ese paiyi ka yeli nama empo nu ka nu ese as nane wu taim fai ese nupu mi wunini se.’
17 “Nanrona fane empo ki koloki kore taun Sisaria,
ningkinama se ki kaiki kaike mow empo fai kotne ka ki kire mana namo yolowi ka ki kupu kot wunini.
Ki kumplewa kot namo ese fei yeye.
18 Empo nu uma fai kotim wu namo neli ka nu noplo mi nunini,
ki wola nanrona nu ese kotim wu empo ompla fafaile isi wu yangkeye.
Ka nu fei nulu ommo fafaile.
19 Wola nu nane wu nopu mi plai empo lotu noneni.
Mi wongke sa nanrona Pol yire mana wongke empo ri,
noula wunini Jisas,
empo yemei ka waiye laip kore.
20 Ki fei namale mi nomu namo,
nanrona fane ki kaline wu ese paiyi Jerusalem sa ki ese kupu mi wunini mokoi namo.
21 Ka Pol sa yumplewa fane wu yaline ki ese kawane wu paiyi Sisar ese yupu kot wunini.
Nanrona fane ki kane mi kelo wu ese waiye kalabus yoru ki ese kawane wu paiyi taunwamo Rom ese yulu Sisar.”
22 Ka King Agripa yireni Festus nanrona,
“Ki wola kire kone ese kupu mi empo mana namo.”
Ka Festus ke yireni wu kore nanrona,
“Ningkinama yene ese yupu mi wunini.”
King Agripa yupu kot empo Pol
23 Nanrona fane ningkinama,
King Agripa yane Bernaisi naile ommo papli uporo ka wuyane neri mow monre empo fai kotne.
Ka nu ofisa empo nuna namba wamo ka nu uma fai painri risine taun namo nakle nemnoku naine plau.
Ka empo Festus mi paiyi,
nu iimuma numane Pol nane neli monre.
24 Festus yemei ka yire nanrona,
“King Agripa ka pone uma mingklari empo paipe plau mu mow mee,
pone pulu mana mee.
Pinuma mingklari empo Juda,
nu mi nolo mana empo Jerusalem namo ka empo mokoi namo re,
ka nu ke pongke ka nangke mi kelo nanrona wu fei waiye wu ese ri.
25 Ki kulu nanrona wu fei yangke ompla wongke fafaile fai wu ese ri.
Ka wu wone yire wu ese paiyi Sisar fai ese yupu kot wunini.
Nanrona fane ki kireni wu paiyi taunwamo Rom fai ese yulu wu.
26 “Ka ki sa mi onne fane ki ese keꞌre mi fika wiye piprola ese kireni manawamo moneni Sisar.
Nanrona fane ki kumane wu yolowi yene King Agripa ka pone uma mingklari mee sa pone ese pupu mi wunini,
fai ki ese kem mi plai sa ki ese keꞌre wiye piprola mee.
27 Ki kulu nanrona namo fei uporo empo mone mawane mana wongke waiye kalabus paiyi ka mone fei meꞌre mi rola ese mirengkle nu mi empo nu kotimne wu namo.”